Ɛstɛrə 5 - Yálá laawoo hɛɓɛƐstɛrə li mɛ̨nį tɔɔmun bɔ 1 Voló haaɓa hin nɔɔ tii pului, Ɛstɛrə ə nwɔ tɔɔ həɠəɠaa kɛ mą, ə li dɔɔ kwəli, tɔɔmun yəi bɛlɛ́ laaləi. Tɔɔmun ə kɛ heeni ɲəi bɛlɛ́n dɔɔ kpəlin ɉu, ɲɛ̨i hiɛ bɛlɛ́ laaləi pələ. 2 Ɓɛlɔwai ə Ɛstɛrə kaa la tɔɔni gwəli hąąi, nwɛli ə too mą, ə nwɔ hɛni tunwɔ̨n ɉaŋą Ɛstɛrə pɔ, Ɛstɛrə ə pa, ə ɲee pɛlɛ ma. 3 Tɔɔmun yɛ mą: «Tɔɔmun nɛ̨ą Ɛstɛrə, lə ɓə kɛ? Lə ɓə ə́ kaa bɔ? Ɓɛi ŋɛ̨i gáá laa, ə́ ma kɛ mą́ą́: Dɔɔlaa bələ tɔ̨nɔ̨ tɛɛ bɔ́! Ŋą́ dɛɛ ə́ pɔ.» 4 Ɛstɛrə yɛ mą: «Nwɔ́ɔ́ mɛ̨nį nąmu! Háákələi, gáá bɔ, ŋį́ ə́ ɓɛlɛ kɔ̨nɔ̨n bɛli, ka Haman ka pa laa, ka ka laa mįi.» 5 Tɔɔmun ə nɛ̨ɛ̨ mą, ə tímun da tɔɔ, diɛ li Haman təli, ə gɛ də li Ɛstɛrə nwɔ təli ɓa. Yili pulu, di nu hveelɛi də li Ɛstɛrə pɔɔli. 6 Di kpɛɛ a di laa mį́ɛ, tɔɔmun yɛ Ɛstɛrə ɓa: «Lə ɓə ə́ kaa bɔ ŋį́ gɛ yɛ́? Lə kpɔ ɓə ə́ kaa ɓɔ ŋį́ gaa yɛ́? Ŋą́ pɛli, ŋį́ dɔɔlaa bələ tɔ̨nɔ̨ tɛɛ ə́ pɔ, akɛ yili ɓə ə́ kaa bɔ!» 7 Ɛstɛrə yɛ tɔɔmun ma: «Yii gáá bɔ ŋį́ ɉu hvɛli yɛ́, 8 nwɔ́ɔ́ mɛ̨nį nąmu, akɛ, nwɛ́li kaa yɛ́, ə lɛɛ, ə́ kaa bɔ ə́ niiɓa mɛ̨nį laa hvɛɛ, gáá nwɔ̨nɔ̨ bɔ tinąą, ka Haman ka pənə ka pa ka kɔ̨nɔ̨n mįi ɓɛ. A kɛ tii, yii gáá bɔ, ŋį́ mo yɛ́.» Haman ə Mardose paa wulu pɛli 9 Voló tɔ̨nɔ̨i tii hu, Haman ə kulɔ Ɛstɛrə yəi bɛlɛ́n a kwəinɛ̨ɛ̨; kɛlaa, ɓɛlɔwai ə pa la tɔɔmun yəi bɛlɛ́ laaləi, Mardose hvo kpɛli dumo, hvo gɛ hvo həɠə Haman tɔwɔ. Haman lii ə kələn gbɔ gwəi kɛnɛ̨, Mardose pɔ. 10 Kɛlaa, ka kɔ̨nɔ̨n mįi ɓɛ ə tɛɛ yɛ li ɲəi bɛlɛ́ laaləi. Haman ə mɛlaa təli, ə mą kɛ nɛ̨ą Ɉɛrɛsə. 11 Bələi yaa Haman nwɔ hɛn nąmu laa kaa la, bələi nonnii tamąą la, ɛlɛɛ, bələi nwɔ tɔɔi kaa la, bələi tɔɔmu aa ɉee la a nwun nąmįną di wɔ nwun nąmu, ə yiliɠaa lə diɛ. 12 Yili pulu, yɛ diɛ: «Ɲą́ą́ dɔ̨nɔ̨ gbən lɔ ɓə, tɔɔmun nɛ̨ą Ɛstɛrə ə də́li háákələi kwa tɔɔmun kuɔ li nwɔ ɓɛlɛ kɔ̨nɔ̨n mįi bɔɔli. Yili pulu tinąą nwɔ̨nɔ̨, tɔɔmu nɛ̨ą aa ku təli kwa tɔɔmun. 13 Kɛlaa, yili ə mą kɛ tii, níí hvo laa li, gɛ mɛ̨nį Mardose ŋɛ̨i a Ɉuifə, gaa a galan ɉon da dɔɔ kwəlii, a dɔɔmun gwɛlɛ mun da.» 14 Nąąlɔwai, Haman nɛ̨ą Ɉɛrɛsə da Haman mɛlaani, di mo mą diɛ mą: «'Mo, di wulu ta pɛli, gwɛa yee yɛ ɓo a yee laa mą pow haa ɓa, tinąą, ə ɉu hvɛli tɔɔmun ma, di Mardose hɛlɛn mą. Yili pulu, ka tɔɔmun ka li, ka ka laa mįi a kwəinɛ̨ɛ̨.» Mɛ̨nįi tii ə Haman lii hon, ə mo di nwulu tee di vilɛn. |