Ɛstɛrə 4 - Yálá laawoo hɛɓɛ

Ɛstɛrə da nwɔ nuąi

¹ Mɛ̨nįɠaa tii bələ mɛ̨n Mardose ə mo, ə mąą həɠə hu ɓɛla, ə mąąwɛli hee ɓo, ə luwu pu nwuɔ̨, yili pulu, ə li daa hąąi, ə tomą kpɔ a wɔlɔ.

² Ə tɛɛ yɛ li tɔɔmun yəi bɛlɛ́ laaləi a wɔlɔ. Yaan, mąą hvo nɛ li kɛ mąą wɛli həɠə hvo lɛɛ nu ta kwaną yɛ li tɔɔmun yəi gwəli.

³ Goɓitaaɠaa kəlee hu, ɓɛi lɔpee tɔɔmun nwoo tii ə həli laa, Ɉuifəɠaai di kaa nąą, ə too diɛ a liihɛlɛn, diɛ hin nɔ, diɛ wɔlɔ, diɛ di woolaa a damąą diɛ luwu pu di nwuɔ̨ diɛ mąąwɛli heɠe too di kwąną.

⁴ Ɛstɛrə nwɔ gbɛtɛkpuwuluɠaai da nɛ̨ąą di kɛ bɔ diɛ tí mą, di pa, di di woo hukulɔ mą, yili ə tɔɔmun nɛ̨ą mąą ɲɔw kpɔ kɛnɛ̨. Ɛstɛrə ə nɛ̨ɛ̨ mą, ə həɠəɠaa tɛɛ də li la Mardose pɔ, ə gɛ, ə mąąwɛli həɠəi tii kulɔ gwąną, kɛlaa, Mardose hvo gɛ mą.

⁵ Nąąlɔwai, Ɛstɛrə ə Hatakə təli, yili ə kɛ a gbɛtɛkpuwuluɠaa tɔ̨nɔ̨ yaai tɔɔmun ə dɛɛ Ɛstɛrə pɔ yɛ tí mą. Ɛstɛrə yɛ Hatakə ɓa: «Li ə́ həli Mardose ɓa, lə ɓə kɛ yaai gaa yili kɛi tii?»

⁶ Hatakə ə li ə Mardose kaa heeni dɔɔ kwəli laaləi.

⁷ Mardose ə mɛ̨nį kəlee hukulɔ mą; pələi kpɔ Haman aa nwoo kwɛlɛ la, yɛ kɛ, da Ɉuifəɠaa kəlee paa; a hɛn gɔw kɛnɛ̨ tɛɛ dɔɔmun bɔ, ə naa nwɔ hɛn gɔw kəhii hu; ə yili hukulɔ Hatakə ɓa.

⁸ Ɉɛɓɛ́i ŋɛ̨i di bɛ̨ɛ̨ yɛ hvilɛn na Ɉuifəɠaa kəlee paa mɛ̨nį ɓa; diɛi kpɔ di kaa Susə daai, Mardose ə dɛɛ bɔ, yɛ nwɔ̨nɔ̨ mą: «Li ə́ Ɛstɛrə kili pu ɉu, ə́ ɉɛɓɛ́i ŋɛ̨i daa noloɓo, ə́ nɛ ma.» Mardose yɛ Hatakə ɓa: «Hvo kɛ li Ɛstɛrə ə li, ə həli tɔɔmun ma, mɛ̨nįi ŋɛ̨i hu, ə ɉuwu hu nuą mąąnɛ̨ɛ̨maa hvə.»

⁹ Hatakə ə li, ə Mardose woo tii kəlee hukulɔ Ɛstɛrə ɓa.

¹⁰ Ɛstɛrə yɛ mą: «'Li, ə́ nwóó ɲali bulu ɓo Mardose ɓa, yɛ́ mą:

¹¹ ‹Ɓɛ nɔi nuą kəlee, ə həɠə tɔɔmun nwɔ tínuą diɛ, ə həli la nɔi nuą diɛ, di kili kaa ɉu, diɛ, nui lɔpee ta hva lɔ tɔɔmun bɔɔli, ə kɛ a hulɔnu, ə kɛ a nɛ̨ɛ̨nu; akɛ tɔɔmun hvo dəli li, da baa. Kɛlaa, nui tɔɔmun a dəli, mąą nu ɓə a lɛɛ a vulú; ɛlɛɛ, da nui tɔɔmun a nwɔ hɛni tunwɔ̨n nɛ ma. Ɲą́ą́ ka, aa kɛ a hvolo pow haaɓa, tɔɔmun hvo ta də́li li.›»

¹² Ɓɛlɔwai Mardose ə Ɛstɛrə nwɔ woo ŋąąpənə hɔlɔɓo la,

¹³ ə Ɛstɛrə woo ŋąąpənə ŋɛ̨i, yɛ mą: «Hvó ə́ kiliŋąhiɛ, yɛ́ kɛ diɛ, yaa tɔ̨nɔ̨ ə́ kaa pai kulɔi ɉu, ə́ nwun mąą ə ɓo Ɉuifəɠaa lɔwai, ə́ kɛ mɛ̨nį ɓɛ tɔɔmun yəi bɛlɛ́n.

¹⁴ Mąąhɔlɔɓo, a kɛ yá hee tín mɛ̨nįi ŋɛ̨i hui, Ɉuifəɠaa di nwɔɔ liilaa da di nwun mąąɓo mɛ̨nį a həɠə pələ ta kpɛli; yɛ́ ka ə́ yəi bɛlɛ́n nuą kəlee ka nwun a lɛɛ ɉu. Yaan a kɛ yili kaa tii, gbɛɛ ɓə gɔlɔn, akɛ mɛ̨nįi ŋɛ̨i mąą mɛ̨nį hvəi gɛ, yɛ́ kɛ la a tɔɔmun nɛ̨ą?»

¹⁵ Nąąlɔwai Ɛstɛrə ə wɛlɛɛ tɔɔ Mardose pɔ, yɛ mą:

¹⁶ «'Li, Ɉuifəɠaai di kaa Susə daai, ə gəlee ŋąąkpɔn, ka hin nɔ mą́ą́ mɛ̨nį ɓa, hvolo haaɓa, a kpinį haaɓa, nu ta hvo kɔ̨nɔ̨n mįi, hvo gbələ. Ɲą́ą́ gbɛli kwa nwɔ koló kɛ nɛ̨ąąi ku kaa gɛi lɔ tii. Yili pulu, gáá lii, tɔɔmun nííla pələi mąn tɔ́n gaa la ma. Akɛ ŋį́ haa, ŋį́ haa.»

¹⁷ Nąąlɔwai Mardose ə li, ə gɛ yɛ pələi tii Ɛstɛrə ə wɛlɛɛ tɔɔ la.