Zɛnɛse 8 - Yálá laawoo hɛɓɛ (dc)

Noe kulɔ mɛ̨nį gələn ɉu

¹ Noe nąą kili ə too Yálá ŋą, da ɉɛnŋaa kpɔ tii kɛ Noe pɔ gələn ɉu. Yálá ə hvaŋą kɛnɛ̨ ta tɛɛ lɔi mɛ̨i, ɲáɠaa mąą yɛ yɛɛ.

² Yələkɔlɔn naa ə kpulu, tulɔ hvo kɛa kɛi pu, ɲátonŋaa laa ə kpulu.

³ Ɲá yɛ kɛa kpala lɔi mɛ̨i tiikpə-tiikpə. Ɲá hvɛɛ tii ə hvóló nwun dɔ̨nɔ̨ hvóló pow lɔɔli kɛ lɔi mɛ̨i, mąą yɛ kɛa yɛɛ.

⁴ Ɲąnin mɛ̨ihveelɛ nwɔ hvóló pow kɔ́w mɛ̨ihveelɛ yələ, gələn ə yɛɛ, ə hee Araratə yee tona.

⁵ Ɲá ə lɛɛ kpɔ kpalai, ə lɛɛ ɉu, ɲąnin bow nąą ə ɉəli; ɲąnin bow nwɔ hvóló dɔlɔɔ yələ, ɲeeɠaa tona yɛ kulɔ ɲá mu.

⁶ Hvóló pow nąąn dɛɛ pulu, Noe ə gələn vinɛtɛlɛ laa ɓo.

⁷ Ə gwąą-gwąą tɔ̨nɔ̨ kulɔ, yili ə li, ə pənə kpɔlɔ tii ə pa, mąąhɔlɔɓo, ɲá hvo ni kɛ kpala li lɔi mɛ̨i.

⁸ Yili pulu, ə tonwələn dɔ̨nɔ̨ kulɔ vinɛtɛlɛ la, ə ɓo mą, əgɛ, ə gaa a kɛ ɲá aa kpala lɔi mɛ̨i.

⁹ Kɛlaa, nwɛ̨ni tii hvo kɛɛnąą ta hɔlɔɓo ɓɛi a hee laa, mąąhɔlɔɓo, yá ə kɛ ni lɔi mɛ̨i. Ə pənə ə pa, Noe ə ɉon ə nɔ gələn ɉu.

¹⁰ Lɔwɔ tɔ̨nɔ̨ tɛɛ pulu, ə pənə nwɔ̨nɔ̨ ə ɓo mą.

¹¹ Lii ə mo, yələwulii pɔ ɓə ə paa la, olivə tɛlin ə ɓo naa ɓa. Nąąlɔwai, Noe ə gɔlɔn gɛa yɛ ɲáɠaa daa too di kwənąn ɉu.

¹² Ə pənə nwɔ̨nɔ̨ ə nąą mąąkpɔn, lɔwɔ tɔ̨nɔ̨ tɛɛ pulu, ə ɓo nwɔ̨nɔ̨ donwələn tii ɓa, ə li, hvo kɛa pənə hvo pa.

¹³ Noe kaa kwɛlan ə kɛ a kwɛlan nwun mɛ̨ida, kwɛlan dɔ̨nɔ̨, gwɛlan tii nwɔ ɲąnin dɔlɔɔ, voló dɔlɔɔ yələ, ɲá ə kpala kpɔ kɛa lɔi mɛ̨i tɛ̨ɛ̨tɛ̨ɛ̨. Noe ə gələn don ɉəɠə mɛ̨i, ə ɲɛ̨i hee lɔi mɛ̨i, nąą kəlee kpalaa.

¹⁴ Ɲąnįn veelɛ nwɔ hvóló pow hveelɛ kɔ́w mɛ̨ihveelɛ yələ, lɔi mɛ̨i kpalaa kpɔ kɛa kɛ tɛ̨ɛ̨tɛ̨ɛ̨.

¹⁵ Nąąlɔwai, Yálá yɛ Noe ɓa:

¹⁶ «'Kulɔ kɛa gələn ɉu, yɛ́, ə́ nɛ̨ą, ə́ lon ɉinąą da di nɛ̨ąni.

¹⁷ Ɉuwɔɠaa da nwɛ̨niɠaai kpɔ kɛ ə́ pɔ gələn ɉu, gəlee kulɔ di hala lɔi mɛ̨i nąą kəlee, di di kaa, di huwu ə ɓɛlɛ.»

¹⁸ Noe ə kulɔ gələn ɉu, nɛ̨ą ə kulɔ, non ɉinąą di kulɔ da di nɛ̨ąni.

¹⁹ Yili pulu, huwɔ kəlee ɉilɛ da ɉaa di kulɔ, da yiiɠaai kpɔ di kaa lɔi mɛ̨i.

²⁰ Noe ə haláá kulɔi ta pɛli Yai-Laa ɓa. Ə taatɛlɛɛ mąąhəɠɛɛɠaa da nwɛ̨ni mąąhəɠɛɛɠaa kəlee, da həɠə, ə gulɔ Yai-Laa ɓa a haláái da gəlee kələn.

²¹ Ɉaláá tii Noe ə gulɔ ə nɛ̨ɛ̨, ə Yai-Laa liilaa. Yai-Laa yɛ gbɔwɔ ɓa: «Və́ kɛa pai lɔi nɛ̨ŋɛ̨n naai nu kan dúwɔ́ pələ mąą mɛ̨nį ɓa. Bələi mąn kpɛli di wɔ kiliŋąhiɛ hva kɛ la a nɛlɛɛ, ə gɔwɔ tɔɔ di lokolo yələ ɓa. Ɛlɛɛ, və́ kɛa pai yɛnɛ̨ɛ̨ nwun na pilii yɛ bələi ŋɛ̨i ŋį́ gɛ́ lai.

²² «Bələi lɔ yɛnɛ̨ɛ̨ kaa pai lamui la, tíi kɛɛ da mɔ̨nun deɛ, wə́leen da kwɛlɛ, hvóló laa teɛ da hamą lɔɔ, yələ pɔɔ da, kpinį, di hva kpɛɛ.»