Zɛnɛse 48 - Yálá laawoo hɛɓɛ (dc)Ɉakɔbə ə lúwɔ́ too Ɉosɛfə lonnii diɛ 1 Mɛ̨nįɠaai tii kəlee tɛɛ pulu, diɛ Ɉosɛfə ɓa: «Ə́ nąn gaa ɲɔ̨n gɛi.» Ɉosɛfə ə nɛɛ mą, ə nonnii hveelɛi həɠə, Manase da Ɛfraimə da diɛni di li. 2 Di mo Ɉakɔbə ɓa, diɛ mą: «Ə́ lon Ɉosɛfə kaa pai nwoo pili yɛ́.» Israɛlə ə miɠiɓiɠi ɓo ə haŋą ə hee. 3 Ɉakɔbə yɛ Ɉosɛfə ɓa: «Huwalawala kəlee Nąmu Yálá ə gbɔwɔ lɛ mą́ą́ Luzə Kanaan lɔi hu, ə lúwɔ́ too mą́ą́; 4 Yɛ mą́ą́: ‹Gáá pai ə́ kwəi nwun ɉii, ə́ huwu ə ɓɛlɛ, ŋį́ ə́ kɛ a nu kpulu kɛnɛ̨. Nɔi ŋɛ̨i ə́ kaa ɉu ɓɛi, gáá pai dɛɛi ə́ huwu pɔ a nwɔɔ a yələ kəlee mɛ̨nį.› 5 Yiihu kɛa, non veelɛi ŋɛ̨i ə́ ɉɔlɔɓo ɓɛ Eziptə lɔi hu gɛɛ və́ pai, diɛ ɓaa: Ɛfraimə da Manase, gáá di laa tooi nwɔ́ lonnii pɔ, yɛ bələi Rubɛn da Simeɔn di kaa la. 6 Kɛlaa, lon yiiɠaai ə́ kaa pai ɉɔlɔɓoi di pulu, yiliɠaai ɓə gaa a ə́ lonnii. Di laa hu ɓə di ləɠəni kaa pai lɔi hɔlɔɓoi la. 7 Ɓɛlɔwai ŋį́ həɠə la nɛ̨ŋɛ̨ lɔi hu, gɛ́ pa, Rasɛlə ə haa ɲə́i bələ pɔ Kanaan lɔi hu, gɛɛ və́ həli Ɛfrata. Naa ɓə ŋį́ noo laa Ɛfrata bələ pɔ, yai a Bɛtleɛmə.» 8 Israɛlə ə Ɉosɛfə lonnii kaa, yɛ mą: «Gbɛɛ nuą ɓəi?» 9 Ɉosɛfə yɛ nąn ma: «Lonŋąąi Yálá ə gɔ́ la ɓɛ, diɛ ka.» Ɉakɔbə yɛ nwɔ̨nɔ̨ mą: «Di mąąlɛɠɛ mą́ą́, ə gɛ, ŋį́ lúwɔ́ too diɛ.» 10 Israɛlə ə pɔlɔ kpɔ ɲɛ̨i hvo kɛi kɛɛ mąąkpɛɛ a nɛlɛɛ. Ɉosɛfə ə nonnii mąąlɛɠɛ di kálá ɓa, yili ə di nɛ̨nɛ̨ɓo, ə di hee gɔwɔ mɛ̨i, 11 yili pulu, yɛ Ɉosɛfə ɓa: «Gílí hvo kɛa kɛ mą gɛ́ kɛ, ŋą́ ɲɛ̨́i tɔɔ yɛ́, kɛlaa, ya ka, Yálá aa hvaa mą, ŋą́ą́ ə́ kaa, ŋą́ą́ nwɔ̨nɔ̨ ə́ lonnii kaa!» 12 Ɉosɛfə ə nonnii həɠə nąn gɔwɔ mɛ̨i, ə kwɛli hvilɛn nąn ma. 13 Yili pulu, Ɉosɛfə da nonnii di di yee too gee hu, da di káláni kəlee. Ɛfraimə ə lɛɛ Ɉosɛfə ɓa-mįi-yee hu pələ, akɛ tii Israɛlə kɛɓɛ yee hu pələ li; Manase ə lɛɛ Ɉosɛfə kɛɓɛ yee hu pələ, a kɛ tii Israɛlə ɓa-mįi-yee hu pələ li. Yili pulu, Ɉosɛfə ə pənə ə nonnii mąąlɛɠɛ di kalá ɓa. 14 Kɛlaa, Israɛlə ə ɲee kpəɲąn gee pulu, ə mamįiyee laa Ɛfraimə nwuɔ̨, yai kɛ a nokolo laamun, ə gɛɓɛ yee laa Manase nwuɔ̨, yai kɛ a nu pɔlɔ laamun. 15 Ə Lúwɔ́ too Ɉosɛfə ɓa, yɛ mą: «Yálái ŋɛ̨i ną́nni Abrahamə da Isaakə di di wɔ yɛnɛ̨ɛ̨ kɛ nííɓa hu, a Yálái kɛi mɛ̨́i kaa a yələ kəlee, 16 a nwɔ malakai kɛi mą́ą́kɔ̨nwɔ̨, 'Ə lúwɔ́ too nɛapɛlɛɛ ŋɛ̨i diɛ. Ɲálái tii ə hvaa mą, di náá kulɔ kala mu; di ną́nni Abrahamə da Isaakə di laa tɛ. Di huwu ə ɓɛlɛ nɔi nąą kəlee.» 17 Ɉosɛfə ə gaa yɛ nąn aa mamįiyee pɛlɛ Ɛfraimə nwuɔ̨, hvo nɛ̨ɛ̨ mą. Ɉosɛfə ə nąn mamįiyee həɠə Ɛfraimə nwuɔ̨, ə bɛlɛ Manase nwuɔ̨. 18 Yɛ mą: «Ną́n! Yáá lan, Manase ɓə a nu pɔlɔ. Ə́ ɓa-mįi-yee pɛlɛ nwuɔ̨.» 19 Kɛlaa, nąn ə lənə mą, yɛ mą: «Nón, gíli ka ɉu. Yaa kpɛli mąn gaa pai kɛi a huwu nwun gulɔi. Kɛlaa, ə mą kɛ tii, nəɠə kaa pai kɛnɛ̨i ə tɛɛ mą.» 20 Mąą yələi tii, Ɉakɔbə ə lúwɔ́ too diɛ, yɛ diɛ: «Israɛlə nu huwu kaa pai kɛi lúwɔ́ tooi diɛ gɔɔn yɛ́, diɛ kɛ mą: ‹Gɛ́, Yálá ə lúwɔ́ too yɛ́, yɛ bələi ə gɛ la a Ɛfraimə da Manase!›» Bələ ɓə Ɉakɔbə ə Ɛfraimə tɔɔ la Manase tɔwɔ. 21 Israɛlə yɛ Ɉosɛfə ɓa: «Náá hiɛ ka ną́nni kwɛlɛ, kɛlaa, Yálá kaa ka pɔ. Gaa pai pənəi ə li a kaa ka nąnni pɔ lɔi. 22 Ɉosɛfə! Gáá ə kɔ́i kɛnɛ̨ ŋį́ dɛɛ ə́ liɛni diɛ. Gáá Sisɛmə lɔi tɛɛi ə́ pɔ, ɓɛi ŋį́ nąą hɔlɔɓo a nwɔ́ ɓɔwai da nwɔ́ kilɛn Amɔrə nuą yəi.» |