Zɛnɛse 42 - Yálá laawoo hɛɓɛ (dc)

Ɉosɛfə niɛni di pa kɔ̨nɔ̨n ɲai bɔɔli

¹ Ɉakɔbə ə bələ mɛ̨n diɛ mą kɔ̨nɔ̨n gaa Eziptə lɔi hu, yɛ nonnii diɛ: «Lə mɛ̨nį ɓa ka káá ɓɛ kaa ka keeni ɲɛ̨i kaa?

² Ŋą́ą́ mɛ̨n diɛ kɔ̨nɔ̨n gaa Eziptə lɔi hu. Ka həɠə ka li ka da ya, ka paa la, ə gɛ, gu hvo pa háá a pulu.»

³ Nąąlɔwai, Ɉosɛfə niɛni pow tii di həɠə diɛ li Eziptə lɔi hu kɔ̨nɔ̨n ɲa mɛ̨nį ɓa.

⁴ Ɉakɔbə hvo hvaa mą, Ɉosɛfə nəɠə Bɛnɉamɛn hvo lɛɛ niɛ ni pulu di hvo li. Ɉakɔbə ə kɛi giliŋąhiɛ, yɛ kɛ mą: «Gáá Ɲɔwi, gɛ́, mɛ̨nį ta hvo pa laa nwɔ̨nɔ̨ Bɛnɉamɛn ɓa.»

⁵ Israɛlə lonnii da nu takpɛliɠaa di bələ kpɔn, diɛ li kɔ̨nɔ̨n ɲai Eziptə lɔi hu, mąąhɔlɔɓo, bului tii ə too Kanaan lɔi hu nąą kəlee.

⁶ Ɉosɛfə ɓə kɛi Eziptə lɔi ɲąą woo ɓo, ya ɓə kɛi mɔ̨nun nɔwɔtɔɔ nwɛ̨ąą diɛ. Niɛni di pa, di pɛlɛ nɔi ɓa gɔwɔ mu.

⁷ Ɉosɛfə ə di kaa, ə di kɔ́lɔn, kɛlaa, hvo gbɔwɔ lɛ diɛ, ə haŋą diɛ, yɛ diɛ: «Ka həɠə mį?» Diɛ mą: «Ku həɠə Kanaan lɔi hu, ku pa kɔ̨nɔ̨n ɲai.»

⁸ Ɉosɛfə ə di kɔ́lɔn a nɛlɛɛ, diɛ ɓə di hvo Ɉosɛfə kɔ́lɔn.

⁹ Nąąlɔwai, Ɉosɛfə nwɔ hįiɠaai nąą kili ə too ŋą. Ə pənə yɛ niɛni diɛ: «Nɛ̨nɛ̨ɛ̨n naa kɛ nuą ɓaa kaa! Ka pa nɔi mąą hɛn mɛ̨nį ɓa!»

¹⁰ Ɉosɛfə niɛni diɛ mą: «Kpaa-o! Ku wɔ mɛ̨nį nąmu, ku pa lɔ kɔ̨nɔ̨n ɲai.

¹¹ Ku kəlee ku kaa a hulɔnu tɔ̨nɔ̨ lonnii, tələnmo nuą ɓaa kuɔ, ku hvo a nɛ̨nɛ̨ɛ̨n naa kɛ nuą.»

¹² Ɉosɛfə ə pənə, yɛ diɛ: «Lɛɛ ka ŋɛ̨i ka káá gɛi, ka pa nɔi mąą hɛnŋii, ə gɛ, ka nɔi mɛ̨nįɠaa kɔ́lɔn.»

¹³ Di pənə diɛ Ɉosɛfə ɓa: «Kpaa kpɔ tɔ̨nɔ̨ kpɛli! Ku nąn gaa tanɔ̨n, ku həɠə Kanaan lɔi hu. Ku kɛ a nu pow kɔ́w hveelɛ, kɛlaa, ku kpɛlamąą ə lɛɛ laa ku nąn gwɛlɛ. Ə lɛɛ, ku tɔ̨nɔ̨ hvo kɛa laa.»

¹⁴ Ɉosɛfə yɛ diɛ: «Mɛ̨nįi kpɔlɔ ŋį́ kɛi mo, ya ka tii, nɛ̨nɛ̨ɛ̨n nąą kɛ nuą ɓaa kaa.

¹⁵ Mɛ̨nįi ŋɛ̨i ka mo, gaa bulu kwɛlii, a kɛ tɛ̨ą li. Gáá gwɛlai a tɔɔmun nąą, gɛ́ diɛ: Ka hvo pai kulɔi ɓɛ nɔi, akɛ ka kpɛlamąą tii hvo pa li.

¹⁶ Ka nu tɔ̨nɔ̨ tɔɔ, ə li ə ɉəɠə ə paa la, mɛlaa di lɛɛ ɓɛ gaho ŋą. Yili a kɛ, ya ɓə ŋą gɔlɔn na gɛ diɛ tɛ̨ą ka tii ka mo. Akɛ a wala pa, tɔɔmun nwun tii ə báá, a kɛ tii nɛ̨nɛ̨ɛ̨n naa kɛ nuą ɓaa kaa.»

¹⁷ Ɉosɛfə ə di too gaho ŋą, di hvóló haaɓa kɛ laa.

¹⁸ Voló ɉaaɓa yələ, yɛ diɛ: «Mɛ̨nį gáá ɉu hvɛlii kaa, ka gɛ, ka nwun mąą a ɓo. Mąąhɔlɔɓo, ɲą́ą́ gbɛli, ŋą ɲɔw Yálá ɓa.

¹⁹ Akɛ ka káá a tələnmo nuą, ka hvaa kani mą, ka tɔ̨nɔ̨ ə lɛɛ ɓɛ gaho ŋą, mɛlaa yiiɠaai tii, di pənə di li a kɔ̨nɔ̨n bɛlɛ́n nuą pɔ.

²⁰ Yili pulu, ka li, ka pa a ka ləɠə. Ka yili kɛ tii, ŋą gɔlɔn gɛ́ diɛ, ka tɛ̨ą ɓo, ɛlɛɛ, haa hva həli kaa.» Ɉosɛfə niɛni di hvaa yili ɓa.

²¹ Di kɛi mo di kee lɔwai, diɛ kɛ mą: «Gu ləɠə pulu mɔ̨nɔ̨ ka ŋɛ̨i gu kaa mį́i. Ɓɛlɔwai ə kɛi kɛ la guɔ: ‹Ka mą́ą́ wɛli kaa›, gu hvo kɛ gu wəli tɔɔ li mą. Mɛ̨nį nwąnąąi tii həli mą, gwaa həli voló ɓa. Guɔ kpɛli, gu wɛi ɲələ ka.»

²² Rubɛn yɛ nəɠəni diɛ: «Kɛlɛi ŋį́ ta kɛi kɛ kpɔ kaa: ‹Gu hvo mɛ̨nį ɲɔ̨n gɛ a Ɉosɛfə ŋɛ̨i›, kɛlaa, ka hvo ka wəli tɔɔ nwóó ɓa nąąlɔwai, ɉaai tii aa həli mą, mąąnɛ̨ɛ̨ gu bulu mɔ̨nɔ̨ mį́i.»

²³ Ɉosɛfə niɛni kili kpɛli hvo kɛ ɉu, diɛ kɛ gaa di woo mɛ̨n ɉii. Mąąhɔlɔɓo, ɓɛlɔwai ə kɛi hvaa la niɛni pɔ, di kɛi nwoo laa tɛɛ.

²⁴ Ɉosɛfə ə li dɔ̨nɔ̨ kɛɛnąą, ə hee laa yɛ wɔlɔ. Ɓɛlɔwai Ɉosɛfə ə pənə ə pa la, ə mo diɛ, yɛ diɛ: «Simeɔn ɓə lɛɛi gaho ŋą.» Ɉosɛfə ə mo, di Simeɔn hon, di ɲili mɛlaa ɲɛ̨i ɓa.

Ɉosɛfə niɛni di pənə di li Kanaan lɔi hu

²⁵ Yili pulu, miíɠaai di paa la, di naahvɛɛ, di nwaliɠaa lɔ mɛ̨i di yəi. Ɉosɛfə ə mo, di bələ pɔ kɔ̨nɔ̨n dɛɛ niɛni pɔ.

²⁶ Ɉosɛfə niɛni di miíɠaa laa ɉoohvaalənŋąą pulu, di tɛɛ diɛ li.

²⁷ Ɓɛlɔwai kpinį ə pɛlɛ la diɛ bələi, di di tiɛ̨ pu, ə gɛ, di yii laa. Nu tɔ̨nɔ̨ ə nwɔ ɓií laa hvólóon, ə gɛ, ə kɔ̨nɔ̨n dɛɛ ɉoohvaalənŋąą pɔ. Ə nwali kaa mií hu.

²⁸ Yɛ mɛlaa diɛ: «Di nwɔ́ walii lɛɛ ɲə́i, gaa ɲə́i mií hu!» Liihɛlɛn ə too gəlee diɛ, di ɲɔw, diɛ kɛ di kee ɓa: «Lə ɓə ɲɛ̨i Yálá ə gɛ, a kuɔi?»

²⁹ Ɓɛlɔwai di paa la Kanaan lɔi hu, di nąn Ɉakɔbə pɔ, di mɛ̨nįɠaa kəlee hukulɔ mą, diɛ mą:

³⁰ «Ɉulɔnui nɔi tii nwun na, ə mo kpɔ kuɔ a nwąnąi, yɛ ku kaa a nɛ̨nɛ̨ɛ̨n naa nuą.

³¹ Ku mo mą, kuɔ mą: ‹Ku hvo a nɛ̨nɛ̨ɛ̨n naa nuą, ku kaa a tələnmo nuą.

³² Kuɔ mą, ku kɛ a hinąą pow kɔ́w hveelɛ, ku nąn gaa tanɔ̨n. Kɛlaa ku ləɠə tɔ̨nɔ̨ hvo kɛa laa, yili nwɔ ləɠəi ɓə lɛɛ Kanaan lɔi hu, ku nąn gwɛlɛ.›

³³ Ɉulɔnui tii yɛ kuɔ: ‹Akɛ tələnmo nuą ɓaa kaa, gáá bɔ ŋį́ gili kɔ́lɔn, yili ɓa, nu tɔ̨nɔ̨ ə lɛɛ ɓɛ, ka li a kɔ̨nɔ̨n, ka dɛɛ bɛlɛ́n nuą pɔ.

³⁴ Ka kɛi pa, ka kpɛlamąąi tii laa, ka diɛni ka pa. Ka gɛ tii, kɛ tii nɛ̨nɛ̨ɛ̨n naa nuą hvaa kaa. Yili pulu, ŋą́ Simeɔn tɛɛ ka pɔ, ɛlɛɛ, ka pɛli ka hiɛ ɓɛ nɔi, ka ka mąąkpaanŋąą ɲɛ̨i kulɔ.›»

³⁵ Nu kəlee ə nwɔ ɓíi hu ɓo, nwaliɠaai di li la, di gaa ɓíi lon da hu, nɔɔ di tiɛ̨ mɛ̨i. Gaai tii di mo, di kəlee di ɲɔw, ə mą kɛ di nąn Ɉakɔbə.

³⁶ Ɉakɔbə yɛ nonnii diɛ: «Nonnii hveelɛ ka tii kaa gulɔ ɲə́i, diɛ ɓaa: Ɉosɛfə da Simeɔn. Ka káá nwɔ̨nɔ̨ bɔ ka Bɛnɉamɛn həɠə? Ɲą́ą́ lɔ ka tii mɛ̨nįɠaai tii kəlee kaa laai mą́ą́.»

³⁷ Rubɛn yɛ di nąn ma: «Bɛnɉamɛn tɛɛ bɔ́, kwə li, ŋą́ wala pənə və́ paa la, nón ɉinąą hveelɛi ŋɛ̨i, ə́ gəlee paa.»

³⁸ Ɉakɔbə yɛ mą: «Kpaa-o! Rubɛn, və́ nón ŋɛ̨i tɛɛi ə́ pɔ hvəli la. Niɛ aa haa, yaa tɔ̨nɔ̨ lɔ ɓə aa lɛɛ ɲə́i. Ka diɛni ka lɛɛ nwɔ̨nɔ̨ ɉiɛ pələi, mɛ̨nį ta a kɛ lai, gáá pai haai a liiholi, ka túwɔ́ hɔn mąą mɛ̨nį ɓa.»