Zɛnɛse 37 - Yálá laawoo hɛɓɛ (dc)Ɉosɛfə mąą mɛ̨nį Ɉosɛfə ə hįį kaa 1 Ɉakɔbə ə hee Kanaan lɔi hu, ɓɛi wɔlɔ nąn ə kɛ laa. 2 Ɉakɔbə lonnii mąą mɛ̨nį hukulaa ka: Ɉosɛfə ə kɛ a hulɔnon, gaa kwɛlan yɛ ɓo pow kɔ́w mɛ̨ihveelɛ, da niɛni di ɓo mɛlaɠaa da moluɠaa pulu lɔi pun ɉu, niɛni tii, di kɛ a nąn nɛ̨ąni veelɛ Bilha da Zilpa di lonnii. Yii kpɔ kɛ niɛni da gɛ a ɲɔ̨nwɔ̨ɔ̨, a pa, ə ɉukulɔ di nąn ma. 3 Ɉosɛfə wɛli ə kɛ Israɛlə ɓa, ə tɛɛ niɛni kəlee diɛ, mąąhɔlɔɓo, ə ɉɔlɔɓo bɔlɔɔ kɔ́lɔi. Ɉakɔbə ə gbaawii lɛlɛɛ tɛɛ Ɉosɛfə pɔ. 4 Ɉosɛfə niɛni di gaa diɛ, di nąn aa di ləɠə wɛli la kɛ aa dɛɛ diɛ. Ɉosɛfə wɛli ə kpɛɛ niɛni diɛ ə tɛɛ gɛi ɓa. Di hvo kpɛli kɛi nwɔ mɛ̨nį lɛlɛɛ ɓo. 5 Yələ ta, Ɉosɛfə ə hįį kaa, ə ɉukulɔ niɛni diɛ, yili ə nwɔ wɛli kpɛɛ mąą laa ta pɛlɛ mą niɛni yəi. 6 Ɉosɛfə yɛ niɛni diɛ: «'Ka ka wəli tɔɔ, ɉįi ŋį́ gaa, ŋį́ ɉukulɔ kaa. 7 Ə haa kɛ yɛ gwa kɛ yɛa ta, guɔ mɔ̨nun dee. Nwɔ́ mɔ̨nun gɔn ə haŋą ə tɔɔ, ka wɛiɠaai kəlee di pa di pɛlɛ nwɛ́i kɔ́wɔ mu.» 8 Niɛni diɛ mą: «Gaa ə́ kwəi ə́ kaa pai heei ku mɛ̨i, ə́ ku ɲąąwooɓo?» Nwɔ wɛli kpɛɛ mąąlaa ta ə pɛlɛ nwɔ̨nɔ̨ mą niɛni yəi, ɉįi tii ə gaa ə ɉukulɔ diɛ, mąą mɛ̨nį ɓa. 9 Ɉosɛfə ə pənə nwɔ̨nɔ̨ ə hįį takpɛli kaa, ə li nwɔ̨nɔ̨ ə ɉukulɔ niɛni diɛ, yɛ diɛ: «Ŋą́ą́ nwɔ̨nɔ̨ hįį kaa, ŋį́ hvóló kaa, ɲąnin da pɛmɛ̨lɛ̨n-gɔw pow kɔ́w tanɔ̨n, di pa di pɛlɛ gɔ́wɔ́ mu.» 10 Ə li ə ɉįi tɔ̨nɔ̨i tii hukulɔ nąn ma, nąn ə haŋą mą, yɛ mą: «Hį́i ləi ɓə ŋɛ̨i ə́ gaai? Gaa ə́ kwəi, ku kaa pai pɛlɛi ə́ kɔ́wɔ mu a yələ ta, ɲą́ą́, ə́ lee, ɛlɛɛ ə́ liɛni?» 11 Ɉosɛfə niɛni di tolo hee mą, kɛlaa, nąn nwɛi, ə kɛi giliŋąhiɛ ɉįiɠaai tii non ə gaa, mą. Ɉosɛfə niɛni di nɔwɔtɔɔ 12 Ɉosɛfə niɛni di li Sisɛmə, a di nąn nwɔ taalɛlɛɛɠaai di kɔ̨nɔ̨n gwɛlii. 13 Yələ ta, Ɉakɔbə yɛ Ɉosɛfə ɓa: «Ə́ liɛni kaa daatɛlɛɛɠaa pulu Sisɛmə, gɛ́ ə́ li ə́ kulɔ di mɛ̨i.» Ɉosɛfə yɛ mą: «Gáá li.» 14 Ɉakɔbə ə pənə yɛ Ɉosɛfə ɓa: «'Li ə́ ə́ liɛni mɛ̨i kaa da daatɛlɛɛɠaa, bələi di kaa gɛi la, ə́ pa ə́ ɉukulɔ mą́ą́.» Ɉakɔbə ə Ɉosɛfə tɔɔ, ə həɠə Hebrɔn nɛ̨ŋɛ̨ lɔi hu, yə li Sisɛmə. 15 Hulɔnu ta ə gaa yɛ tɛɛ-tɛɛ ɓo ɲɛɛ kɔ́wɔ hu, yɛ mą: «Lə ɓə ə́ kaa gwɛlii?» 16 Ɉosɛfə yɛ mą: «Níɛni ɓə gáá di kwɛlii, ɓɛi di kaa laa da di wɔ taatɛlɛɛɠaai, ya pɛli nąą lɛ mą́ą́?» 17 Ɉulɔnui tii yɛ Ɉosɛfə ɓa: «Daa həɠə ɓɛ, ŋį́ di woo mɛ̨n, diɛ kɛ di kaa lii Dotan daa kwɛlɛ pələ.» Ɉosɛfə ə tɛɛ yɛ li niɛni kwɛlii, ə di kaa Dotan. 18 Yiliɠaa di gaa kwɛala, yɛ pa. Gɛɛ hvo həli diɛ, di lɔ mąą kilii, ə gɛ, di baa. 19 Diɛ kɛ di kee ɓa: «Ɉįį kaa mun ka tii pai. 20 'Ka pa, 'ka gu baa, gu bowa pili nowaɠaai ŋɛ̨i ta hu. Gwa li, gwa kɛ gu nąn ma: ‹Lɔwɔ huwɔ ta aa ə́ lon ɉon, aa mį́i.› Gwa gɛ tii, bələi nwɔ hįiɠaai kaa pai kɛi la, gwa nąą kaa.» 21 Rubɛn ə di woo mɛ̨n, kɛlaa nwɛi, ə kɛ bɔ ə Ɉosɛfə nwun mąą kɔ̨nwɔ̨. Yɛ diɛ: «'Ka gu hvo baa, 22 mąą hvo nɛ̨ɛ̨li gu hvo kɛ a nu paa nuą, nɔi pun ɉu ɓɛ, lɔwa pɔlɔɠaa kaa ɓɛ, ka gu bili lɔ da hu, kɛlaa, ka gu hvo kɛ gu kaa baai.» Rubɛn ə kɛi mo tii diɛ, mąąhɔlɔɓo, ə kɛ bɔ ə nəɠə lɛɛ a vulú, ə li la di nąn bɔ. 23 Ɓɛlɔwai Ɉosɛfə ə həli la niɛni diɛ, di wolo mą, di nwɔ həɠə lɛlɛɛi tii kulɔ gwąną. 24 Di bili lɔwa ta hu, nɔwai tii hu kpalai kɛ, ya hvo kɛ ɉu. 25 Yili pulu, di hee kɛa diɛ di kɔ̨nɔ̨n mį́i. Di lɛɛ lɔ laa heeni, diɛ yɔw kɛ nuą kaa diɛ pa, di kɛ a Ismaɛlə nu huwu, daa həɠə Galaadə pələ, diɛ li Eziptə, yɔw tįɛ̨ tamąą ə ɓo di yəi ɲɔ̨nwɔ̨mɛ̨ɛ̨ɠaa pulu. 26 Ɉuda yɛ mɛlaa diɛ: «Gwa gu ləɠə paa, gu bowa loo, tɔ̨nɔ̨ lə kɛɛ ɓə gwa ɉɔlɔɓo ɉu? 27 Yaamun, 'ka gu nɔwɔtɔɔ, Ismaɛlə nu huwu ŋɛ̨i ɓa. Gu hvo kɛ gu kaa baai, gu mą gɛ ləi, gu ta ka a gu ləɠəi ŋɛ̨i.» Mɛlaa kəlee di hvaa nwoo ɓa. 28 Ismaɛlə nu huwui a Madian yɔw kɛ nuą, di kɛɛ tɛɛ nąą, di Ɉosɛfə kulɔ nɔwai, di nɔwɔtɔɔ diɛ a wali kwələ pow hveelɛ, yiliɠaai di ɉəɠə di li la Eziptə. 29 Ɓɛlɔwai Rubɛn ə li la nɔwa hu kaai, hvo Ɉosɛfə kaa laa, nii ə ɓɛla kpɔ mą kɛnɛ̨, ə mąą həɠə hu ɓɛla. 30 Ə pənə ə pa, ə tómą nəɠəni mɛ̨i, yɛ diɛ: «Ɉosɛfə hvo ɓɛ! Ŋą́ yii laa lɔ kpɔ mį?» 31 Nəɠəni di ɓolu hilɛ ta hon, di nwun dee, di Ɉosɛfə nwɔ həɠəi lɔ ɲąmą hu. 32 Di ɉəɠəi tii həɠə di dɛɛ di nąn ma, di nwɛlɛɛi ŋɛ̨i laa mɛ̨i, diɛ mą: «Nąn! Ku ɉəɠəi ŋɛ̨i kaa puu ni bələ pɔ, 'ɉon ə́ gaa, akɛtii Ɉosɛfə nwɔ həɠəi ɓəi?» 33 Ɉakɔbə ə gaa, ə gɔlɔn, ə tómą kpɔ kɛnɛ̨, yɛ mą: «Eekə! Nón nwɔ həɠəi ka! Lɔwɔ huwɔ ta ka ŋɛ̨i aa Ɉosɛfə hon, aa ɉu ɓɛla-ɓɛla aa mį́i.» 34 Nąąlɔwai, Ɉakɔbə ə nwɔ həɠəi hu ɓɛla, ə mąąwɛli hee ɓo, ə non nwɔlɔ ɓo kpɔ a ɉu kwɛa. 35 Ɉakɔbə lonnii kəlee di pa, di nąn ɲɛ̨i kpalai, kɛlaa, nii hvo pɛli laai. Mąąhɔlɔɓo, ə kɛi kɛ mą: «Gáá lɛɛi nón ɉaa wɔlɔ ɓoi, ə lɛɛ ɉu, ŋį́ həli mą ɲąmuątaa.» Ə kɛ lɔ wɔlɔ ɓa, yɛ mo. 36 Madian nuąi tii Ɉosɛfə ya, di li la Eziptə, di nɔwɔtɔɔ Potifarə ɓa; yai kɛ a dɔɔ kwəli mąąkpɛ nuą di nwun nąmu. |