Zakari 9 - Yálá laawoo hɛɓɛ (dc)Israɛlə da hįi takpɛliɠaa Nu huwu ta kpɛliɠaa mąąhəɠə mɛ̨nį 1 Lolo woo. Yai-Laa woo aa həli Hadrakə lɔi ɓa; ə kpɛla Damasə. Mąąhɔlɔɓo, Yai-Laa nwɔɔ ɓaa a Aramə nwɔ taaleei, lɔ yɛ bələi nwɔɔ ɓaa la a Israɛlə lɔi kəlee pilɛɛ gee mɛ̨i. 2 Ə mą kɛ, Hamatə, yai gaa Damasə kwɛlɛ, da Tirə, da Sidɔn, a gilimąą taaɠaai tii. 3 Tirə aa kuláá-taa tɔɔ, gbɔwɔ mąą kɔ́nwɔ̨ mɛ̨nį ɓa, aa wali tiɛ̨ gee mɛ̨i, yɛ munuun gbala, da hɛni, yɛ pələpɔ palaya. 4 Kɛlaa, Ną́mu kaa pai ɉon ɉi, yɛ daa mąąkpɛ hįį pu gboloyá hu, ɛlɛɛ, nwɔ̨n ɲɛ daa kpįnį lee kələn. 5 Askelɔn a pa nąą kaai, ɉu kaa pai pui mą a ɲɔw, Gaza hu yɛ kɛ ə yali a mɔ̨nɔ̨, ɛlɛɛ Ɛkrɔn tɔɔ bulu hvo kɛa pai kɛi mą. Tɔɔmun va kɛa kɛ Gaza, nu hva kɛa kɛ Askelɔn. 6 Wɛlin-nonnįį ɓə pai kɛi heeni Asdɔdə, gáá pai Filisti nuą di wɔ kpɔwɔ ɲąą kɛnɛ̨i mąą yɛɛi. 7 Ɲąmąi tii na, gáá pai gulɔi na, ɛlɛɛ, kɔ̨nɔ̨n tɔ́n gaa mą, gɛ́ gulɔ ɲin nɔwai; Yaa kpɛlimąn, a kɛ yɛ nuąi daa kulɔ mɛ̨nįi, nąąlɔwai, a ɉeei hɔlɔɓo Ɉuda nu huwuɠaa lɔwai, ə lɛɛ a ku wɔ Yálái nwɔɔ, ɛlɛɛ, Ɛkrɔn kaa pai kɛi yɛ Ɉebusə nuą. 8 Gáá pai kɛi tɔɔni nwɔ́ pɛlɛ́i kwɛlɛ, gɛ́ mąąkpɛ, nuąi da tɛ diɛ yɛɛ, di tɔwɔ, tɔɔmun da hva kɛa hee mɛ̨i lɔ tii, mąąhɔlɔɓo, ɲą́ą́ gbínįi ɓə pai kɛi ɲɛ̨́i kɛi mą. Kpɔwɔ mąą yɛɛ da liilaa wɛlɛɛ ɓomun 9 'Pili yələi a kwəinɛ̨ɛ̨, Siɔn nɛ̨ɛ̨gbɛla! 'Tómą a kwəinɛ̨ɛ̨, Ɉerusalɛmə nɛ̨ɛ̨gbɛla! Ə́ wɔ tɔɔmun gaa pai ə́ pɔ, dələnmoɔ, ɛlɛɛ, gɔ́ aa nɛ̨ɛ̨ mą, hva nwun dɛ, gaa heeni hvoohvaalən mɛ̨i, hvoohvaalən non mɛ̨i. 10 Gaa pai kɔ-kɔ-wotolo mɛ̨nį kpɛɛi Ɛfraimə lɔi hu, yɛ kɔ-kɔ-wotolo mɛ̨nį kpɛɛ Ɉerusalɛmə. Gaa pai gɔ-kɔ kilɛn ɉu yalii, ɛlɛɛ, yɛ liilaa yɛnɛ̨ɛ̨ loloɓo a lɔi kəlee nwɔɔ. Nwɔ heeɓolaa kaa pai həɠəi gboloyá ta ɓa, ə həli da kpɛli ɓa, yɛ həɠə ɲá kɛnɛ̨ ɓa, yɛ həli nɔi kpɛlai. Gɔluwɔɠaa kaa pai lɛɛi di kpɔwɔ yee kɔ́nma 11 Ə́ wɛi, mįnɛ̨i gwa yɛ́ gu ɉəɠə a ɲąmą, nowai yá hvo ɉu, gáá pai ə́ wɔ luwɔɠaai kulɔi ɉu. 12 'Ka pənə ka lɔ daa kɛnɛ̨ɛ̨ hu, kaai a gɔluwɔɠaa, ka ɲɛ̨i ə ɓo bələi. Háákələi kpɔɔ kpɔɔ, gáá moi yɛ́: Gáá pai ə́ wɔ mɔ̨nɔ̨ɠaai mąą hvɛla tɛɛi ə́ pɔ, gee mɛ̨i hveelɛ. 13 Ɉuda ɓə gáá gɛi, a nwɔ́ kɔ-kɔ kilɛn, Ɛfraimə ɓaa a mɛ̨ɛ̨kɔw, gɛ́ dɔɔ ɲą. Siɔn, gáá ə́ lonnii ɲąątɔɔi, yɛ́i a Yavan, ə́ lonnii diɛ, gɛ́ ə́ kɛ yɛ kuláá kɛnɛ̨ nwɔ kɔ-kɔ-ɓɔwa. 14 Yai-Laa kaa pai kɛi di nwun mɛ̨i, nwɔ mɛ̨ɛ̨kɔwi kaa pai kɛi lii, yɛ yələgbąnąą a kɛi yɛlɛ. Nąmu Yai-Laa, yɛ túlú hvɛɛ gɔ́ ɓa, yɛ həɠə ɉɛɠɛɛ pələ tulɔ hvaŋą hu yɛ pa. 15 Yai-Laa Mɛ̨nį Kəlee ŋą Hééɓomun, kaa pai kɛi nwɔ nu huwui mąą kpɛi. Ɲələvin ɉu kwɛniɠaa kaa pai kɛi nu hukalai, diɛ nu nwun nwolo, diɛ ɲąmą kpələ yɛ lɔɔ, diɛ pilɛ ɉu, yɛ lɔɔ ɲąąkwɛlɛ gbąmą, yɛ ɉaláá kulɔ taɓali mįnɛ̨ɠaa. 16 Ɲələi tii, Yai-Laa, di wɔ Yálái a di mąąkɔ̨nwɔ̨, diɛi tii a nwɔ nu huwui, a nwɔ ɓɛlaa haaɠaai. Di kaa pai kɛi yɛ Kúwɔ́-kwɛni lɛlɛɛɠaa, diɛ lən nwɔ lɔi mɛ̨i. 17 Ee kə! Di kaa pai kɛi di nɛ̨ɛ̨ hu tai! Di kaa pai lɛlɛi-yee! Mɔ̨nun da lɔɔ di lɛlɛ pələ kaa pai, ɉilɛlɛa, da nɛ̨ɛ̨lɛa di kwəi nɛ̨ɛ̨i. |