Timote veelɛ 3 - Yálá laawoo hɛɓɛ (dc)

Yɛnɛ̨ɛ̨ ɲąąkpɛɛi lɔwai

¹ Ə́ kili ə pu kani ɉu, yɛ́ kɛ: yɛnɛ̨ɛ̨ ɲąąkpɛɛ yələɠaa da pa kɛi lɛɠɛi, mɛ̨nį ɲąąnwąnąą ŋą yələɠaa kaa pai ɉəlii.

² Nąąlɔwai, nu kanŋaa da kɛ a kunwuɔ̨ nuą, a wali mɛlaa, di huɲąŋą kɛnɛ̨ɛ̨, di ɲɛ̨itɛɛ, diɛ Yálá lalan, di kwɛli tiɛ di kaa-nuą diɛ, di hvo mɛ̨inɛ̨ɛ̨ kɔlɔn, di hva Yálá mɛ̨nį mɛlɛ kɛ mą,

³ di kili walawalaa, di nwun va tínɛ̨n, di laa-pələɓoɔ, di ɲąą hvo laa li, di ɲąniɛ, di ɓo a mɛ̨nį lɛlɛɛ ɲowo;

⁴ a nu ɓowo nuą, di liikələnŋąą di kwəi, kpɔwɔ ɲąąkɛnɛ̨ aa di ɲɛ̨i pu, di liiɓa mɛ̨nį wɛli ə ɓo diɛ, dɛɛ la Yálá nwɛi ɓa;

⁵ di ɲɛ̨ilai kaa pai kɛi yɛ Yálá kɔ́lɔn nuą, kɛlaa diɛ lənə laa na laa hvaŋą ɓa. Nu taaləɠaa tii diɛ kpɛlimąn, ə́ mąą kwɛa diɛ!

⁶ Daɠaa kaa di lɔwai, da lɔ bɛlɛ́ɠaa mu, nɛ̨ąąɠaai hvaŋą hvo di yəi, diɛ di hon a di wɔɔ túmɔ̨i, a nɛ̨ąą tii di wɔ nɛ̨ŋɛ̨n diɲɛ heɛ ni di nwuɔ̨, diɛ ɓo la ni di liiɓa mɛ̨nįi lɔpee gəlee pulu,

⁷ yələ kəlee lɔ ɓə da kɛ mɛ̨nį mąąkwɛlii la, di hvo ta pɛli li tɛ̨ą kaai.

⁸ Bələi lɔ wɔlɔ, Ɉanɛsə da Ɉambrɛsə di tɔɔ la Moisə la, bələ lɔ ɓə nuąi ti diɛ kpɛlimąm, da tɔɔ la tɛ̨ą la. Di kaa a nuąi di kili ɲɔ̨nwɔ̨ɔ̨ di kwəi, di wɔ laa na laa hvo a hɛn da.

⁹ Kɛlaa, di hvo pai lii kwɛala, mąąhɔlɔɓo, di wɔɔ ɓowo mɛ̨nįi kaa pai tooi pono ɲą nu kəlee ɲɛ̨i ɓa, yɛ bələi lɔ nu hveelɛi tii di wɛi ə kɛ la.

¹⁰ Kɛlaa ə́ wɛi, ə́ kɛ bɔ́ gɛ́ nuą mąąkwɛli a mɛ̨nįɠaa, dúwɔ́ pələɠaa hu, nwɔ́ kiliŋąhiɛɠaa hu, nwɔ́ laa na laa, nwɔ́ liikpələ laa hu, nwɔ́ wɛlikɛmąąlaa hu, nwɔ́ tɔɔ a nwąnąi laa hu,

¹¹ náánɔ̨nwɔ̨i di mo, da mɔ̨nɔ̨ɠaai ŋą́ mįi Antiɔsə, Ikoniumə da Listrə. Laanɔ̨nwɔ̨ ləi ɓə di hvo ɉee li mą́ą́, ə́ gəlee gbaɠala kɔ́lɔn, gəlee hu, Ną́mu ə gúlɔ ɉu.

¹² Ɛlɛɛ mun, nuąi da di wɔ yɛnɛ̨ɛ̨ Yálá yee kɔnmą Jesus Kristə hu, diɛ ɓə da di laanɔ̨nwɔ̨ɓo.

¹³ Nu nwun ɉu lan nuą da laa nɛ̨ɛ̨ mąą nuą, da kɛnɛ̨ mɛ̨nį ɲɔ̨n ɉu, diɛ nu takpɛliɠaa ɓowo, diɛ nwɔ̨nɔ̨ di kpɔwɔ ɓowo.

¹⁴ Kɛlaa ə́ wɛi, mɛ̨nįɠaai ə́ mąą kwɛli, yai ə́ laa na a neelee, 'tɔɔ yiliɠaai mɛ̨i kpąą, nui ə́ mąąkwɛli ɲee ɲą, ə́ gɔlɔn.

¹⁵ Ə həɠə ə́ lokolo yələ ɓa ə həli yiihu ɓa, ə́ ɉɛɓɛ́ mąąhəɠɛɛ hu wooɠaa kɔ́lɔn, da pɛli di kili tɛɛ ə́ pɔ, yai a nu lɔ nwun mąąɓo laa hu a nu laa Jesus Kristə la.

¹⁶ Ɉɛɓɛ́ mąąhəɠɛɛ hu wooɠaa kəlee di həɠə Yálá pɔ, da pɛli nu mąąkwɛlii, diɛ nu ɲąątɔɔ a mɛ̨nį lɛlɛɛ kɛɛ, diɛ nu hutɔɔ, diɛ nu hvilɛn tələnmo pələ mɛ̨i,

¹⁷ ə gɛ Yálá nwɔ nu, ə mɛ̨nį lɛlɛɛ huwu kəlee kɛi.