Timote veelɛ 2 - Yálá laawoo hɛɓɛ (dc)'Ə́ wɔɔ nąą kɛ mɔ̨nɔ̨ɠaa hu 1 Yili ɓa, nón, nɛ̨ɛ̨laai gaa Jésu-Kristə hu, 'ə́ hvaŋąlɔ mą. 2 Mɛ̨nįɠaai ə́ mąąkwɛli ɲə́i, kɛla tamąą ɲɛ̨i ɓa, 'lí, ə́ galihvaɓo tələnmo nuą diɛ, diɛi da pɛli di nu takpɛliɠaa mąąkwɛli mą, diɛ kpɛli. 3 Kristə ŋą holahi, 'ə́ yee hee nwɔ mɔ̨nɔ̨i mu. 4 Nui da ɉon a holahi, hva bulu pələ mɛ̨nį niihɛlɛn ɉee, a kɛ, gaa bɔ, nui ɉon a holahi ə niihon. 5 Ɛlɛɛ nwɔ̨nɔ̨, hɛn nuą kaa mąąkɔ̨nwɔ̨i, nu hva ɉɔlɔɓo, hvo kɛli, a hiɛ a gbaalə. 6 Tíi kɛmun vaŋąlɔɔ, a gbɛa gɛ kóló dɔlɔ mįi. 7 Mɛ̨nįɠaai tii gáá moi yɛ́, 'gbaɠala kaa. Yii ɓaa gbəliɠaa tii, gu Nąmu kaa pai ɉuponoi yɛ́. Jesus ŋɛ̨i nwun ə kulɔ haa yəi, ə́ kilitɔɔmą 8 'Ə́ kili hvilɛn Jesus Kristə ɓa, yai nwun ə kulɔ haa yəi, a yai kulɔ Davidə huwu hu, yə bələi, nwɛlɛɛ lɛlɛɛi gáá naa həlii ə mo la, 9 a yai, mąą mɔ̨nɔ̨ ka gáá mįi, diɛ dóó kpɔ la yɔwɔn ŋą, yɛ ŋą́ kɛ a mɛ̨nį ɲɔ̨n gɛmun. Kɛlaa Yálá laa woo hvo yɔwɔn ŋą. 10 Yili ɓə gaa mą, gáá nííkpələi mɛ̨nį kəlee mu, nuąi Yálá aa di həɠə ɉu, di mąą mɛ̨nį ɓa, əgɛ, diɛ kpɛlimąn di ɓalo hva kpɛɛ hɔlɔɓo, yai gaa Jesus Kristə hu, ə pɛlɛ la, mąąwiɛlaa hva kpɛɛ, mą. 11 Nwooi ŋɛ̨i, mąąnɛ̨ɛ̨i nuą di di kilitɔɔmą: «Akɛ gwa Kristə ni gwaa haa a kee, gwa diɛni gu kaa pai yɛnɛ̨ɛ̨ kɛi gee ɓa. 12 Gwa diɛni gwa mɔ̨nɔ̨ mįi gee ɓa, gwa diɛni gu kaa pai tɔɔlaa kɛi gee ɓa. Akɛ gwa lənə mą, yaa kpɛlimąn a lənə guɔ. 13 Gwa wala kulɔ gu woo ɓa, nwɛi, a kulɔ nwoo ɓa a yələ kəlee, mąąhɔlɔɓo, hva pɛli lənəi gbɔwɔ ɓa.» 'Ká dɛ̨ą woo laa həli a ɉaŋąą 14 Mɛ̨nįi tii kili too nu kəlee ɲą, ə́ ɲąą wala kpɔ, 'di tí la a ə́ nwąnąi Yálá ɲɛ̨i ɓa, yɛ́ diɛ: di hvo kɛ a hvaa kɛ nuą, woo tamąą mąą mɛ̨nį hu, yili dɔlɔ hvo mą; hvo kɛli lɔ ə mɛ̨n nuą nwun ɉu lan. 15 'Ə́ ŋąąwala, ə́ mąątɛ̨nɛ̨ lɛlɛɛ hɔlɔɓo Yálá ɲəi ɓa, yɛ nui daa mąą mɛ̨nį hukpɛ, yɛ kóló kɛ mun nwumɛ̨ hva tɛ la, yɛ dɛ̨ą woo ŋɛ̨i laa həli kpɔ a ɉaŋąą. 16 Yii ɓaa ɉowoon gbɛli-kpɛliɠaa tii, 'ə́ laa kulɔ yiliɠaa hu. Nuąi da di laa lɔ yiliɠaa hu, tuwɔ pələ ɲɔ̨n nɔ ɓə da kɛnɛ̨ ɉu; 17 di hvaa woo kaa a kɛɛ kala mɛ̨nįi a taɠa-taɠa. Bələ ɓə Himene da Filetɔsə di kaa la. 18 Daa həɠə tɛ̨ą pələ mɛ̨i, diɛ kɛ, haaɓɛlaa daa gbɛa nwun; diɛ nu tamąą di wɔɔ laa na laa həɠə la tii bələ mɛ̨i. 19 Ə mą kɛ ləi, bɛlɛ́ kɔwɔ hvilɛn gwɛnii Yálá ə naa, gaa laani naai. Gɔlɔn ɉɛn maa a Nwoo ŋɛ̨i: «Gu Nąmu ə nwɛiɠaai kɔlɔn.» Ɛlɛɛ nwɔ̨nɔ̨: «Nui lɔpee a gu Nąmu hvɛli, ə mąą kwɛa mɛ̨nį ɲɔ̨n ma.» 20 Pɛlɛ́ kɛnɛ̨ mu hɛnɲąŋą kəlee di hvo lɔ a: hɛni da wali kwɛli, daɠaa da kɛ a wulu, da ləɠi-pɔlɔ. Da daɠaa kɛ a di yee huɓo hɛnɲąŋą walawala, daɠaa di ɓo a hvįikpɛɛ kóló kɛ hɛn. 21 Nui a ɲee kulɔ mąąliɓi mɛ̨nįɠaa hu, da pɛli di gɛ a di yee huɓo hɛnɲąŋą walawala, mąąhəɠɛɛ, gu Nąmu yɛ ɲee huɓo ɉu, bɛliɛ mɛ̨nį lɛlɛɛ kəlee mąą mɛ̨nį ɓa. 22 'Ə́ mąąkwɛa muhəɠə nįnɛ̨ɠaa di wɔ tuwɔ pələ ɲɔ̨nwɔ̨ɔ̨nŋaa diɛ, nuąi da Yálá laa hvɛli a di kwəi kwɛlɛɛ, ká diɛni, 'ká tələnmolaa kwɛli, da laa na laa, da wɛlikɛmąąlaa, ɛlɛɛ da liilaa. 23 Kɛlaa, mowo hɛa kpɛli-kpɛli too nuą tii, 'ə́ mąąkwɛa diɛ. Ə́ kili kaa ɉu, hvaa lɔ ɓə a doo nuą lɔwai. 24 Yaan, gu Nąmu ŋą tímun, mąą hvo nɛ̨ɛ̨li a hvaa kɛmun, kɛlaa nu kəlee wɛli ə kɛ mą, bɛliɛ nuą mąąkwɛlii, niikpəlɛɛ nuą woo mu. 25 Nuąi da kɛ naa hɛatooi, yɛ di woo ɲąąpənə a liinɛ̨ɛ̨ gwəi laa. Gbɛɛ ɓə gɔlɔn, akɛ, Yálá hvo pai kili tɛɛi di pɔ, diɛ pɛli di ɲɛ̨i tínɛ̨n ɉii, diɛ ɉee tɛ̨ą pɔ pələ? 26 Ɛlɛɛ, diɛ kpinįi, diɛ pu di kili kɔlɔn ɉii, diɛ kulɔ la tii nąnį ŋą hɛlɛn ɲą, yai aa kɛ di kɛ a ŋą luwɔɠaa, diɛ tí la tii mą, a niiɓa pələ? |