Samia Veerɛi 15 - Yálá laawoo hɛɓɛ (dc)Absalɔn kaa tɔɔlaa kwɛlii a lɔgilii 1 Mɛ̨nįɠaa tii kəlee tɛɛ pulu, Absalɔn ə wotolo həɠə, da hooɠaa, ə bɛlɛ nu pow lɔɔli ɓa, nuąi tii diɛ gilɛ həɠə ɲɛ̨i tɔwɔ. 2 Absalɔn ə humo, ə li ə tɔɔ bələ kwɛlɛ ɉįi la, nu ta aa kɛi tɛɛ yɛ li tɔɔmun bɔɔli mąą mɛ̨nį ta ɓo mɛ̨nį ɓa, Absalɔn a dəli yɛ mą: «Ə́ həɠə daa nɛlɛ hu?» Yili akɛ ma: «Ə́ wɔɔ luwɔi ə həɠə Israɛlə huwuhu nuą lɔwai, gaa a nu huwu ŋɛ̨i hu mun da.» 3 Nąąlɔwai, Absalɔn a kɛ mąą nu ɓa: «Li, mɛ̨nįi tii aa nɛɛ yɛ́, ə́ haŋąąi, kɛlaa, ya li tɔɔmun bɔɔli, nu ta hva hɔlɔɓo laa yii a nwəli tɔɔ ə́ woo ɓa.» 4 Yili pulu, Absalɔn yɛ diɛ: «Ə li kɛ gáá a kiti tee mun nɔi ŋɛ̨i hu nwɛi! Nuąi kpɔ mɛ̨nį kaa diɛ, də li kɛ pai bɔ́, gɛ́ di wɔɔ mɛ̨nįɠaa ɓo a ɉaŋąą.» 5 Ə lɛɛ, nu a ta pa kɛ yɛ pɛlɛ gɔwɔ mu, Absalɔn ə kɛi ɲee haŋą mąą nu pɔ, yɛ nɛɛɓo. 6 Bələ ɓə Absalɔn ə kɛi gɛ la a Israɛlə nuąi kpɔ kɛi pa tɔɔmun bɔ di mąą mɛ̨nį ɓo mɛ̨nį ɓa gəlee. Bələ ɓə Absalɔn ə Israɛlə nuą kəlee di wɔ kiliŋąhiɛ tinɛ̨n na bɔ pələ. 7 Kwɛlan nąąn gulaa ɉu, Absalɔn yɛ tɔɔmun ma: «Nɛ́ɛ́ laa, ŋą́ li Hebrɔn, nwóó ŋɛ̨i ŋą́ gwɛlɛ Yai-Laa ɓa, ŋą́ bɔ mɛ̨nį kɛ. 8 Mąąhɔlɔɓo, ɓɛlɔwai ə́ wɔɔ tímun ə kɛ la Gesurə daai Aramə lɔi hu, ŋą́ nwóó kwɛlɛ Yai-Laa ɓa, gɛ́ diɛ: ‹Akɛ Yai-Laa a pənə a li a ɲą́ą́ Ɉerusalɛmə daai, ŋą́ haláá kulɔ Yai-Laa ɓa.›» 9 Tɔɔmun yɛ mą: «Li liilaa hu.» Absalɔn ə tɛɛ yɛ li Hebrɔn. 10 Absalɔn ə lɔi mu kɛla tɔɔ Israɛlə nu huwu kəlee pɔ, yɛ diɛ: «Ka Tulu woo mɛ̨n, ka kɛ diɛ: ‹Absalɔn aa kɛ a tɔɔmun Hebrɔn daai.›» 11 Ɉerusalɛmə daai, nu nwun veelɛ ɓə lɛɛ Absalɔn pɔ, ə di təli, yiliɠaa kili hvo kɛ mɛ̨nį ta hu, mɛ̨nįi tii kpaɠala lɔpee hvo kɛ diɛ. 12 Ɓɛlɔwai Absalɔn ə kɛi ɉaláá laa həli la, ə nu tɔɔ Davidə nwɔ nwun dɔɔ hu mun Ahitofɛlə pɔɔli Gilo daai. Nɔgilii hu lɔ ɓə kɛi kɛnɛ̨, nuąi kɛ Absalɔn pulu, di kpulu ta lɔ ɓə kɛi pɛlɛ ma. Davidə ə pu ə həɠə Ɉerusalɛmə daai 13 Nu ta ə pa ə Davidə kili pu ɉu, yɛ mą: «Israɛlə nuą kəlee daa tɔɔ Absalɔn pulu.» 14 Nąąlɔwai, Davidə nwɔ nuą kpɔ tii kɛ bɔ Ɉerusalɛmə daa, ə mo diɛ, yɛ diɛ: «'Ka ká muhəɠə, ka gu pu, mąąhɔlɔɓo, Absalɔn hvo pai gu ɲɛ̨imąąwɛli kaai. Ka gwə li ɉa-ɉa, hvo pa nee gu hon, yɛ gu mąą mɛ̨nį pili ɉu, ə lɛɛ, yɛ daai nuą lɛɛ a ɓɔwa kwɛa kɔ̨nɔ̨n.» 15 Tɔɔmun bɔ nuą diɛ tɔɔmun ma: «Yii lɔpee ya mo, ku kaa ə́ pulu.» 16 Tɔɔmun ə kulɔ taai gɔwɔ ŋą, da ɲəi bɛlɛ́n nuą kəlee, kɛlaa, ə nwɔ wɛli nu pow lɛɛ laa, diɛ di ɲɛ̨i kɛ bɛlɛ ɓa. 17 Ɓɛlɔwai tɔɔmun da nɔi nuą kəlee di kɛi kulɔ la taai, di tɔɔ bɛlɛ gbɛlamąą ɓa. 18 Ɲee pɔ nuą kəlee diɛ tɛɛ nííla: Kereti nuą, Peleti nuą, Gatə nuą kəlee, da nu mɛ̨idai ŋɛ̨i həɠə Gatə, diɛ hvilɛn bulu, di kəlee di tɛɛ tɔɔmun dɔwɔ. 19 Tɔɔmun yɛ Gatə mun Itai ɓa: «Lə mɛ̨nį ɓa, yɛ́ kpɛli mąn ə́ kaa hvilɛn ɉii búlu? Pənə ə́ li, ə́ lɛɛ dɔɔmun yii tii pɔ, mąąhɔlɔɓo, ə́ kaa a nwea, ə lɛɛ, ə́ pu, ə́ həɠə ə́ nwɔɔ lɔi hu, yɛ́ pa ə́ mąąkilɛi ɓɛ, 20 ə lɛɛ, wɛi lɔ ɓə ə́ paa la, a kɛ tii nwɔ̨nɔ̨ háákələi gɛ́ ə́ kpaan, yɛ́ hvilɛn búlu; ya pa, nwɛ́i ŋɛ̨i nwɛi, gáá lii too nwuma ɓa. Ə́ pulu pənə ə́ li ka ə́ nąn nonnii, gɛ́ Yai-Laa ə ə́ hon a wɛlikɛmąąlaa da lii nɛɛ gwəi.» 21 Kɛlaa, Itai ə tɔɔmun nwoo pulu pənə yɛ mą: «Yii kpɔ Yai-Laa kaa a vulú, ə lɛɛ, nwɔ́ mɛ̨nį Nąmu ə ɓo a vulú, ɓɛi kpɔ nwɔ́ mɛ̨nį nąmu tɔɔmun a kɛ laa, ə haa-o, ə lɛɛ yɛnɛ̨ɛ̨-o, ə́ wɔ tímun a kɛ laa, ka yaa ka haa gee pɔ.» 22 Davidə yɛ Itai ɓa: «Pa ə́ tɛɛ tɔwɔ.» Gatə mun Itai ə tɛɛ da ɲəi bɛlɛ́n nuą, da nu kpulu gbəli kəlee. 23 Nɔi nuą kəlee di kɛi wɔlɔ a di woo kɛnɛ̨. Nuą kəlee di tɛɛ. Tɔɔmun yaa kpįnįi ə Sedrɔn ya teen, ə lɛɛ, nɔ nuą kəlee di kɛi tɛɛ a bələi tii a laa a nɔi pun goo. Mįnɛ̨ kəhi mąą mɛ̨nį 24 Sadɔkə kpɛli mąn ə kɛ laa Leviteɠaa kəlee di ɓo bɔ Yálá nwɔ mįnɛ̨ kəhii ə ɓo di kalan ŋą. Di Yálá nwɔ kəhii laa Abiatarə kwɛlɛ, ə lɛɛ la ɉu nuą kəlee di kulɔ daai di tɛɛ. 25 Tɔɔmun yɛ Sadɔkə ɓa: «Pənə ə́ li a Yálá nwɔ kəhii taai. Yai-Laa a kɛ bɔ a ɲɛ̨i lɛlɛɛ hee mą́ą́, gaa pai pənəi ə pa a ɲą́ą́, ə hvaa mą ŋą́ pənə ŋą́ gaa da mąąwiɛ pɛlɛ. 26 Kɛlaa, a kɛ Yai-Laa hvó bɔ́, ə́ ɉón yɛ bələi a laa la a nii.» 27 Tɔɔmun yɛ ɉaláá laa həli mun Sadɔkə ɓa: «Yaa gbaɠala kaa! Pənə ə́ li a ə́ lii laa yɛ taai, yɛ́ ka ə́ lon Ahimaasə, da Abiatarə lon Ɉonatan. 28 Hvo gaai, gáá pai lamuni woloɓo nɔi pun ɉu, gɛ́ nąą mąąkpɔn, ə lɛɛ la ɉu, gɛ́ ka wɔ wɛlɛɛ hɔlɔɓo.» 29 Sadɔkə da Abiatarə di pənə də li a Yálá nwɔ́ kəhii Ɉerusalɛmə daai, di lɛɛ laa. Davidə ə Husai tɔɔ yɛ li Absalɔn maahɛŋii 30 Davidə ə kɛi olivie yee tɛ, ə kɛi ɲee tɛ a wɔlɔ; həɠə pɛlɛɛ nwun mɛ̨i, ə kɛi hiɛ kɔ́lɔ hvo kɛ gɔwɔŋa. Nu kpului tii kɛ bɔ, həɠə ə kɛ gəlee nwun mɛ̨i. Di kɛi li, diɛ ɲee tɛ diɛ wɔlɔ. 31 Di pa diɛ Davidə ɓa: «Ahitofɛlə kaa nɔgili kɛ nuą pɔ, da Absalɔn ni ɓə di tɔɔ.» Davidə ə Yálá hvɛli yɛ mą: «Gáá ə́ hvɛlii Yai-Laa, gɛ ə́ Ahitofɛlə kili ŋąą pɛlɛ hvo kilimąą woo ɓo.» 32 Davidə ə həli ɲee tona, ɓɛi da kwɛli hvilɛn naa Yálá ɓa, Husai ŋɛ̨i a Arki mun ə pa naakwiɛn ɉii mąą həɠə ɓɛlaa, pɔlɔ puɔ nwuɔ̨. 33 Davidə yɛ mą: «Ya hvilɛn búlu, ya ləi kɛ mą́ą́ a tiɛ̨. 34 Kɛlaa ya pənə ya li taai yɛ kɛ Absalɔn ɓa: ‹Tɔɔmun gáá kɛi a yɛ́ tímun. Ɉu hvo kwɛa li ŋą́ kɛ a ə́ nąn nwɔ́ tímun. Yii laa hu, gáá a yɛ́ tímun.› Ya yili kɛ tii ya pɛli mą Ahitofɛlə nwɔ liɛwooɠaa maapənə yɛ́ ɲɛ̨i lɛlɛɛ hee bɔ́ pələ. 35 Ə lɛɛ, kɛlɛi, ɉaláá kulɔ nuą Sadɔkə da Abiatarə di kaa pai kɛi laa ə́ kwɛlɛ-ee. Mɛ̨nįi lɔpee ə pai mɛ̨n ɉii yɛ hvilɛn tɔɔmun yəi bɛlɛ́n mɛ̨nį ɓa, ya li ə́ ɉukulɔ ɉaláá kulɔ nuą Sadɔkə da Abiatarə diɛ. 36 Di lonnii hveelɛi kaa laa di kwɛlɛ. Ahimaasə Sadɔkə lon ɉulɔnu ə lɛɛ Ɉonatan Abiatarə lon ɉulɔnu. Mɛ̨nįi lɔpee ka káá pai mɛ̨n ɉii, ka mo diɛ, diɛ ɉukulɔ mą́ą́.» 37 Davidə mɛlan Husai ə pənə ə li taai, ɓɛlɔwai Absalɔn ə kɛi tɛ la Ɉerusalɛmə. |