Nwun mąąɓo 15 - Yálá laawoo hɛɓɛ (dc)Samsɔn ə nwąną kulɔ 1 Yii kuu tawolo kulaa ɉu, mɔ̨nun deei lɔwai, Samsɔn ə həɠə, yɛ li nwoo pilii nɛ̨ą ɓa, ɓolu lon yɛ ɓo ɲəi, yɛ li la nɛ̨ą pɔ. Yɛ mɔlɔ ɓa: «Gáá bɔ ŋą́ lɔ nɛ̨́ą yii pɛlɛ mu.» Kɛlaa, mɔlɔ hvo hvaa mą. 2 Mɔlɔ yɛ mą: «Ə kɛ gwə́i, nɛ̨ɛ̨nui wɛli hvo kɛa yɛ́, yili ɓə gɛ gɛ́ dɛɛ ə́ wɔ hulɔnon pɔ. Kɛlaa, nəɠə nɛ̨ɛ̨nu kaa ɓɛ, nɛlɛɛ dɛɛ mą, yili həɠə a ə́ nɛ̨ą.» 3 Samsɔn yɛ diɛ: «Yii nwɛi, mɛ̨nį ɲɔ̨n gáá pai naai Filisti nuą diɛ, nu ta hva ɉɔ́n ɉəɠə yili hu.» 4 Samsɔn ə tɛɛ, ə li nɔwɛi, ə wɛɛn nwun ɉaaɓa hon, ə kpalan mɛla, yɛ nwɛɛnŋaa hon hveelɛ hveelɛ, yɛ di won ɉee gee ɓa, yɛ ɲili di lɔwai. 5 Ə nwɔ̨n naa mą, ə ɓo diɛ, di lɔ Filisti nuą di wɔ tíiɠaa kəlee ɓa. Di mɔ̨nunŋaa kələn, ə mą kɛ viɲə da olivə yɛɛɠaa. 6 Filisti nuą di mąąni kɛ kɛ diɛ mą: «Gbɛɛ ɓə mɛ̨nį ŋɛ̨i kɛ?» Diɛ diɛ: «Samsɔn ɓə, ə gɛ tii mąąhɔlɔɓo, mɔlɔi ŋɛ̨i a Timna mun aa Samsɔn nɛ̨ą həɠə aa dɛɛ Samsɔn nwɔ hulɔnon pɔ.» Nąąlɔwai, Filisti nuą də li, di nɛ̨ɛ̨nui kələn da nąn. 7 Samsɔn yɛ diɛ: «Yii kaa gɛ tii, və́ pai heei lɔ tin, hvo kɛli ŋą́ nwą́ną kulɔ kaa.» 8 Ə pɛlɛ diɛ, ə di kɛlɛ kpɔ a nwalawalaa, yili pulu, ə li ə lɔ kwɛni wolo ta hu Etamə daa kwɛlɛ. Samsɔn da ɉoohvaalən naa kpaɠa 9 Filisti nuą di tɛ Ɉuda lɔi hu, di nąą mąą tínɛ̨n, di kɔ́ pɛlɛ Lɛhi taa ɓa. 10 Ɉuda nuą di di mąąni kɛ, diɛ mą: «Lə mɛ̨nį ɓa ka pa pɛlɛi kuɔ?» Filisti nuą diɛ diɛ: «Samsɔn hon mɛ̨nį ɓə ku paa la. Kwa ɉon, mɛ̨nįi ŋɛ̨i hiɛ ə naa kuɔ, ku da laa mą.» 11 Nąąlɔwai, di hinąą waa haaɓa kulɔ Ɉuda lɔi hu, də li Etamə kwɛni wolo la, diɛ Samsɔn ɓa: «Kɛlɛi ə́ kili kaa ɉu yɛ́ kɛ Filisti nuą kaa heeni gu mɛ̨i-ee? Mɛ̨nįi yáá naa kuɔ, gaa lə?» Samsɔn ə di woo ŋąąpənə yɛ diɛ: «Mɛ̨nįi di naa mą́ą́, nwɔ́ kwələ ka tii ŋą́ gulɔ.» 12 Diɛ Samsɔn ɓa: «Ə́ yili mɛ̨nį ɓə ku paa la, ku ə́ tɛɛ Filisti nuą pɔ.» Samsɔn yɛ diɛ: «Ka ka kwɛla, kaa diɛ ka hvo pai báái.» 13 Diɛ mą: «Kpaa! Ku hvo kɛ li ku ə́ paa, ə́ yili mɛ̨nį lɔ ɓə, ku ə́ tɛɛ di pɔ.» Di nɛɛ mą di ɲili a yɛli nįnɛ̨ hveelɛ, di ɉəɠə gwɛni wolo hu, də li la. 14 Ɓɛlɔwai di həli la Lɛhi daai, Filisti nuą di pa naakwiɛn ɉii, diɛ tomą a kwəinɛ̨ɛ̨. Kɛlaa, Yai-Laa nwɔ Kilii ə too ɉu, ɲɛli tii di ɲili la, ə kɛ lɔ yɛ nwɔ̨n a yeekali kələn, ə tee ɲeeɠaa diɛ. 15 Yili pulu, ə hoohvaalən naa kpaɠa ta kaa too ni, yɛ ɓo ni a nwunu, ə ɉəɠə, ə nu waa tɔ̨nɔ̨ paa la. 16 Nąąlɔwai, Samsɔn yɛ diɛ: «Hoohvaalən naa kpaɠa tɔ̨nɔ̨ haalai ŋą́ nu powa pu gee mɛ̨i. Hoohvaalən naa kpaɠa tɔ̨nɔ̨ haalai ŋą́ nu waa tɔ̨nɔ̨ paa.» 17 Ɓɛlɔwai ə kpɛɛ la a yili ɓoɔ, ə ɉoohvaalən naa kpaɠaai pili kwɛa la, di gɛɛnąąi tii laa hee a Ramatə-Lehi. 18 Ɲąąɓa, kpələ wɛli ə Samsɔn hon, ə nwoo tɛ Yai-Laa ɓa, yɛ mą: «Oo Yálá! Yɛ́ ɓə hvaa mą ə́ ɲeetɛɛmąą ŋɛ̨i tɛɛ bɔ́, ya ka kpələ wɛli yɛ ə́ baa, ə́ kaa pai nɛ́ɛ́i laa kɛ́nɛ̨ kpolɔwaɠaai ŋɛ̨i di ɉón?» 19 Nąąlɔwai, gwɛni gbahai tii kɛ Lɛhi, Yálá ə mɛla, yá ə kulɔ ɉu, Samsɔn ə gbələ la, ə too nįįla. Yili ɓə gɛ di ɲáton tii laa hee a Ein-Kore. Haa ɓaa haa, ɲáton tii kaa ni laa. 20 Kwɛlan bow hveelɛ yee mu, Samsɔn ə tɔɔ Israɛlə nuą ɲɛ̨itɔwɔ, Filisti nuą di wɔ yələi hu. |