Mąątɛ̨nɛ̨ 84 - Yálá laawoo hɛɓɛ (dc)Nwələi ɉiɛ kulɔ nuą di kɛi doo a di tɛi lɔwai Ɉerusalɛmə 1 Nwələ ɲɛ̨itɔwɔmun. Kore lonnii di wɔ wələ woo, diɛ mu hee gwɛnįn. 2 Yai-Laa Mɛ̨nį Kəlee ŋą Hééɓomun, ə́ wɔ pɛlɛ́ɠaai wɛli kaa nuą diɛ kɛnɛ̨! 3 Níi hvo gɛi, ɉáálíi kaa tɛi a ɲą́ą́ Yai-Laa yəi gwəli hąąi a kwəinɛ̨ɛ̨. Nį́į́ mąn, gbínį mąn, gəlee tomąi, Yálá hvulúmąą pɔ pələ. 4 Yai-Laa Mɛ̨nį Kəlee ŋą Hééɓomun, nwɔ́ Tɔɔmun, da nwɔ́ Yálá, ə mą kɛ liɛnŋaa ɓə, da di taa tɔɔi hɔlɔɓo, hvoloonŋąą diɛ di lonnii pui hɔlɔɓo, ə́ wɔ haláá kulɔi kwɛlɛ. 5 Nuąi di kaa ə́ yəi bɛlɛ́n, di nwun na nɛ̨ɛ̨ ɓə! Da túwɔ́ lɔ Ə́ mąątɛ̨nɛ̨i. 6 Nwun nanɛ̨ɛ̨mun maa, nui a nwɔ huwalawala hɔlɔɓo ə́ yəi bɛlɛ́n, a hvilɛn pələ ɓa, a níi nɛ̨ɛ̨ gwəi. 7 Tɛɛi di kɛi mo kpələ wɛli lɔi hu, di nąą mąą pənə a yá nwun gulɔ lɔi. Dulɔ tolooɠaai pu mą, di lúwɔ́ gboloon naa mɛ̨i. 8 Di hvąŋąlɔɔ lɔ a yələ kəlee, diɛ li, diɛ li di kpɔwɔ lɛi Yálá ɓa, Siɔn daai. 9 Yai-Laa Mɛ̨nį Kəlee ŋą Hééɓomun Yálá, Ə́ hvɛlii gáá moi, 'Ə́ wəli tɔɔ mą. Ɉakɔbə nwɔ Yálá, 'Ə́ wəli tɔɔ kpɔ a nɛlɛɛ. 10 Ee kə Yálá! 'Ə́ ɲɛ̨i kɛ ku mąą kɔ̨nwɔ̨ gbalai ɓa, Nui ŋɛ̨i Ə́ ɉəɠə ɉu ə́ dɔɔ wulɔ lɔ mą, Ə́ ɲɛ̨i lɛlɛɛ hee mą. 11 Hvo gaai, yíikuu tanɔ̨n gbən gɛɛ Ə́ yəi bɛlɛ́n, viɛlaɓoɔi kwɛlan nwaa tɔ̨nɔ̨ ɓa, yili mąą mɛ̨nį ɓa, yii ŋą́ ɉəɠə ɉu a níiɓa, ya ɓaa, viɛlaɓoɔi ŋą́ gɛ nwɔ́ Yálái yəi bɛlɛ́ hvaŋąn mu, ə tɛɛ, nu kɛɛ, nuąi da di woo kala, di yəi bɛlɛ́n ma. 12 Mąąhɔlɔɓo, Yai-Laa nwɔ́ Yálá kaa a hvoló, Yɛ ɓo a nu mąą kpɛ gbanąn, Yai-Laa a nu kɔ́ a nɛ̨ɛ̨laa, da ɲɛ̨i pɔ̨nɔ̨. Nuąi da hiɛ a ɉaŋąą, hva di kunwɔ̨ a nwun nąnɛ̨ɛ̨. 13 Yai-Laa Mɛ̨nį Kəlee ŋą Hééɓomun, nui a gilitɔɔ Yɛ́, nwun na nɛ̨ɛ̨ ɓə! |