Mąątɛ̨nɛ̨ 80 - Yálá laawoo hɛɓɛ (dc)

¹ Nwələ ɲɛ̨itɔwɔ mun, Yágbudɛn vələ mɛ̨i. Asafə nwɔ kɛla hvaa a wələ.

² Israɛlə mɛ̨i kaa mun, ə́ wəli tɔɔ, yɛ́i yá tɔɔ Ɉosɛfə huwu tənən dɔɔi yɛ taatɛlɛɛ mɛ̨ikaamun, yɛ́i heeni mąąkpɛ malakaɠaa mɛ̨i, ə́ kpɔwɔ lɛ.

³ Ə́ wɔ kuláálaai ə muhəɠə, ə tɔɔ, Ɛfraimə, Bɛnɉamɛn da Manase di tɔwɔ, 'pa ə́ ku ɓalo.

⁴ Ee Yálá! 'Pənə ə́ ku hee ku kpanɲą, 'ə́ ə́ ɲɛ̨i lɛlɛɛ hee kuɔ, ku kaa pai ɓalo.

⁵ Yai-Laa Mɛ̨nį Kəlee ŋą Hééɓomun Yálá! Ə́ kaa pai lɛɛi Ə́ líiholii, yɛ́ ə́ lii tee ə́ wɔ nuąi di wɔ hvɛliwooɠaai diɛ, ə lɛɛ ɉu mįnɛ̨ lɔwai?

⁶ Lə mɛ̨nį ɓa yá di kɔ̨nɔ̨n ɲɔwɔ a di ɲɛ̨iyá, yɛ́ di ɲɛ̨iyá kɛ a di kpələyá?

⁷ Ku kwɛlɛ nuą diɛ di kwəi kwɛli ku mąą mɛ̨nį hu, ku yowoɠaa diɛ yɛlɛ kulɔi ku hu kpɔ a nelee.

⁸ Yálá, Mɛ̨nį Kəlee ŋą Hééɓomun; pənə ə́ ku hee ku kpanɲą, ə́ ə́ ɲɛ̨i lɛlɛɛ hee kuɔ, ku kaa pai ɓaloi.

⁹ Nwulu ɓɔn ə́ gulɔ Eziptə lɔi hu, yɛ́ hį́i takpɛliɠaa kpɛ di heei, yɛ́ ɉin naai;

¹⁰ ə́ nɔi pɛli kpɔ a nɛlɛɛ di tɔwɔ, ə gɛ ɉamu ə lɔ a nɛlɛɛ, ə nɔi laahvɛɛ.

¹¹ Nįnįn bɛlɛɛ kɛ ɲeeɠaa mɛ̨i, ɛlɛɛ, gbɔlɔ halaa yɛ Yálá nwɔ kpitiliɠaa.

¹² Nwonwoɠaa di kɛi kpɔ li diɛ həli gboloyá ɓa, gbaɠa pɛlɛɛɠaa diɛ həli ɲálee kɛnɛ̨ɛ̨ ɓa.

¹³ Lə mɛ̨nį ɓa, ə́ nwɔ galaɠaai wolo? Nuąi kpɔ tɛɛi laa, diɛ maɠaa nwuɔ̨?

¹⁴ Lɔwɔɓoi yɛ gala, lɔwɔ-huwɔɠaa diɛ mįi.

¹⁵ Yálá, Yai-Laa Mɛ̨nį Kəlee ŋą Hééɓomun, pənə Ə́ pa kani wɛ! 'Lɛɛ yələkɔlɔn ɉu, Ə́i ɲɛ̨i pili ku mɛ̨i, ɓɛ kaa li, 'ə́ kɛ mɛ̨nį kɛ viɲə yɛai ŋɛ̨i mąą mɛ̨nį hu.

¹⁶ Ɉihɛn yɛ́ kpinįi ə́ ɉin a ə́ yee, mąąkpɛ, da non ŋɛ̨i ə́ ɉuwalawala ə́ mąą mɛ̨ni ɓa.

¹⁷ Ɓɛ kaa li, daa gələn, daa dee; ə́ ɲɛ̨i nwɛ̨ɛ̨ pələ diɛ, di nwun na aa pili.

¹⁸ Nui ŋɛ̨i ə́ ɓa-mįi-yee hu pələ, ə́ yee pɛlɛ mɛ̨i, da nu lon tii yɛ́ kpinįi ə́ kaa a vaŋąi.

¹⁹ A kɛ kɛa tii, ku hva ku mąąkwɛa yɛ́ a yələ ta; 'ku laahɔnmo yɛnɛ̨ɛ̨, akɛti kwa ə́ təli a ə́ laa.

²⁰ Yai-Laa Mɛ̨nį Kəlee ŋą Hééɓomun Yálá, ə́ ɲɛ̨i lɛlɛɛ hee kuɔ, ku ɓalo.