Mąątɛ̨nɛ̨ 73 - Yálá laawoo hɛɓɛ (dc)

Nwələ hɛɓɛ ɉaaɓa ną Nu hvo ɲɛ̨i kulɔ hulu nuą di wɔ nwunnąnɛ̨ɛ̨ pɔ
1 Asafə nwɔ Yálá mąątɛ̨nɛ̨ woo.

¹ Asafə nwɔ Yálá mąątɛ̨nɛ̨ woo. A tɛ̨ą, Yálá lii nɛ̨ɛ̨i gwəi Israɛlə pɔ, da nuąi di kwəi kwəlɛɛ.

² Kɛlɛɛ, ə mą kɛ tii, ŋí kɛi kɛa tɔɔ takpa-takpa, nąą a lɛɛ tiikpə, gɛ́ kɛ ŋą́ too.

³ Mąąhɔlɔɓo, ɲɛ̨́i ə kɛi kulɔ hɛn nąmįną pɔ, a nɛ̨ŋɛ̨n ɉəɠə nuą di wɔ nwunnąnɛ̨ɛ̨ kaai ŋį́ kɛi moi.

⁴ Di hva hɛn da wɛli lɛɛ di kpɔwɔ ɓa, ə lɛɛ ɉu di haa la, di kpilikɔlɔn ɲąliɛi lɔ a yələ kəlee.

⁵ Di hva mɔ̨nɔ̨ mįi, mɛ̨nį nwąnąąi a laa nuą diɛ, da hva laa diɛ.

⁶ Yili mąą mɛ̨nį ɓa, kpɔwɔŋaa kɛnɛ̨ ɓə a di kwąną həɠə, nwąnąlɔ mɛ̨nį ə ɓo di yee pɔ.

⁷ Di wɔ kiliŋąhiɛ ɲɔ̨nwɔ̨ɔ̨ a kulɔ di kɔ́lɔ ɓa yɛ wulɔ, di líí laahvɛɛ a gbąną mɛ̨nį.

⁸ Di yee pənə mɛ̨nį nuą hu, da kɛi mąą lono kɛ, diɛ yɛlɛ, diɛ lono kɛ a di woo kɛnɛ̨.

⁹ Diɛ di laa pu yələkɔlɔn ɉu, diɛ di laa pu yɛnɛ̨ɛ̨ mɛ̨nįɠaa hu.

¹⁰ Yili ɓə a kɛ gɛi, Yálá nwɔ nuą diɛ tinɛ̨n nąą pələ; ɓɛi da ya tɛɛ laa di pɔ kɛnɛ̨.

¹¹ Diɛ kɛ diɛ: «Yálá a yili kpaɠala kaa ləi? Hɛn Gəlee mɛ̨imun, a mɔ̨ɔ̨ pɛli yili kpaɠala kɔ́lɔn ɉii?»

¹² Ɛlɛɛ nu ɲɔ̨nwɔ̨ɔ̨ɠaai tii kaa lɔ tii, di wəli pulu laɠiɛ, diɛ hɛngɔw tiɛ̨ gee mɛ̨i.

¹³ A tɛ̨ą, kpɛli kpɛli kpɔ ka ti ŋą́ gɛ, gɛ́ nį́i laahɔnmo mąąhəɠəlaa hu, gwə́i kwəlɛɛ gɛ́ mɛ̨nįɠaa hu.

¹⁴ Di kɛi túwɔ́ gɛ́lɛi, yələwala pɔ tɛi tɛi, diɛ ɉútɔɔ.

¹⁵ Ŋą́ kɛ kɛ diɛ: «Gáá gíliŋąhiɛi yɛ diɛ», ŋį́ li kɛ lɔ ə́ lonnii mąą kilii.

¹⁶ Mɛ̨nįi tii ŋį́ kɛi gaa, ŋą́ kɛi gíliɲąhiɛ mą, gɛ́ nwun gwɛli mą, ŋį́ gaa, yili walawalaai;

¹⁷ Ə lɛɛ ɉu ɲələi ŋį́ lɔ la Yálá yəi bɛlɛ́n, mɛ̨nįi kɛ ɉeɛ di ɲɛ̨itɔwɔ ŋį́ gɔlɔn gɛa.

¹⁸ A tɛ̨ą, yáá di tɔɔ nįmįnįn bələ mɛ̨i, yɛ́ pa di pilii nwun na pili kɛɛnąą.

¹⁹ Gaa kpɔlɔ a nu tɛɠii kɛɛ kalaa lɔ poto-poto, daa lɔ gbąi, di hu aa kala a ɲɔw.

²⁰ Ną́mu yáá di mąąnįnįn gəlee kpɛɛ daa kwəi, kpɔlɔ yɛ nu a hįį kaa.

²¹ Níi kələn ŋąą kɛ gwə́i, ɉą́ą́ yɛ kɛ ə yali;

²² ŋį́ kɛ lɔ hviliwɔlɔn, və́ kɛi mɛ̨nį ta kpaɠala kaa; ŋį́ kɛ lɔ yɛ taatɛlɛɛ, kɛlɛɛ vílɛn ŋąąi lɔ kɛ ə́ pulu.

²³ A tɛ̨ą, gáá lɔ ə́ pulu a yələ kəlee, ə́ ɉón a mamįiyee;

²⁴ Yɛ́ li a ɲą́ą́ ɓɛi ə́ kɛ bɔ, yili pulu, ə́ kaa pai ɉə́i mąąwiɛ pulu.

²⁵ Gbɛɛ takpɛli ɓə ɲə́i yələi pələ, ə kulɔ ə́ pulu? Ŋą́ kɛ ə́ yəi yɛnɛ̨ɛ̨ ɓɛi, lə kpɔ ɓə mąą kąnąn a hee mą́ą́?

²⁶ Gɔ́lɔ da níí da pɔlɔ, kɛlɛɛ nwɔ́ kilitɔɔmąą, ya lɔ ɓaa a Yálá, a yələ kəlee.

²⁷ Yili ɓa, nui a mąąkwɛa yɛ́, mąą nu hva lamun; nui a ə́ lɛɛ, yɛ ɉon a pələ takpɛli, yá gulɔ a nwun.

²⁸ Nwɛ́i nwɔ́ yɛnɛ̨ɛ̨ ɲąąnɛ̨ɛ̨ lɔ ɓaa: Ŋį́ kɛ Yálá kwɛlɛ. Ną́mu Yai-Laa kwɛlɛ ɓə ŋį́ gɛ a mą́ą́kilɛi, gɛ́ pɛli gɛ mɛ̨nįɠaa kəlee noloɓoi.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ