Mąątɛ̨nɛ̨ 45 - Yálá laawoo hɛɓɛ (dc)'Ka gu wɛlikɛmąą wələ too Yálá ɓa 1 Nwələ ɲɛ̨itɔwɔmun: Da kɛ nwələi ɲɛ̨i ɓa: Yagbudɛ-wələ. Kore lonnii di wɔ kilaa pono wələ woo, wɛlikɛmąą wələ. 2 Woonɛ̨ɛ̨ aa kulɔ góókpala, gáá nu pɔlɔ wələi tooi tɔɔmun ma. Nɛ̨́n ə kɛ ná yɛ, hɛɓɛ́ kɛmun nwəlɛɛ, nwɔ hɛɓɛ́ kpɔw! 3 Nu kanŋaa lɔwai, yɛ́ lɔ ɓə a nɛlɛɛmun, mɛ̨inɛ̨ɛ̨ lɔ ɓə a kulɔ ə́ la, mɛ̨nįi gɛ Yálá yɛ lúwɔ́ too yɛ́ ɲɛ̨n deei hvo mą, yaa li. 4 Ee kə! Kuláá kpəɠɛ! 'Kɔ-kɔ-ɓɔwa kpulɔn ə́ ləŋəi, ə́ mąąɲinɛ̨n ni, ə́ ɲɛ̨i pɔ̨nɔ̨ hɛn ni. 5 'Ɉoo laa wɔlɔ, a ə́ ɲɛ̨i pɔ̨nɔ̨ pələ, 'gɔ́ ə nɛ̨ɛ̨ yɛ́, tɛ̨ą mɛ̨nį hu, tələnmolaa hu, da liilaa hu. Ə́ ɓa-mįi-yee ə ɲɔw too di hu. 6 Yɛ́ tɔ́nwą kpɛlɛmąą ɲąąkulaaɠaai da nuą mąąɲɔw. Lɔiɠaa kaa pai tooi ə́ kɔwɔ mu, yɛ tɔɔmun ɲowoɠaa pɔla di kəŋə hu. 7 Ee kə Yálá! Yɛ́i yɛ́ Heeɓolaa kpɛlai hvo mą, yɛ́ tɔɔ-hvilii, tələnmo hvili li! 8 Mɛ̨nį haŋąą wɛli kaa yɛ́, yɛ́ wɛlikpɛɛmąąlaa kulɔ a mɛ̨nį ɲɔ̨n, yili ɓə gɛ, Yálá, ə́ wɔ Yálái yɛ ə́ mąąti a kwəinɛ̨ɛ̨ wulɔ, yɛ ə́ hviɛlaɓo la tii ə́ ɓɛlaa diɛ. 9 Ə́ mąąhəɠəɠaa kaa lɔ a mirə wulɔ, a alowɛsə wulɔ da kanɛlə wulu kɔlɔ. Wələ nɛ̨ɛ̨ɠaa kaa kulɔi dɔɔ pɛlɛ́ mun, a dɔɔ pɛ́lɛ́i dɔɔ a hə́lə́ ɲįn. 10 Ə́ mąątínɛ̨n ŋąą a tɔɔɓɛlaa lonnii nɛ̨ąą, ɛlɛɛ, tɔɔ nɛ̨ɛ̨nu ə ɓo tɔɔni ə́ ɓa-mįi-yee hu, mąąyiliɛ a Ofirə hɛni huwaa hva-hva. 11 'Ə́ wəli tɔɔ nón nɛ̨ɛ̨non, 'ə́ ɲɛ̨i hee tai, ə́ ə́ wəli tɔɔ kpɔ a nɛlɛɛ; 'Lɛ̨ą ə́ nwɔ nuą diɛ, da ə́ wɔ pɛ́lɛ́i mu nuą. 12 Əgɛ, ə́ wɛli ə too tɔɔmun ma, ə́ nwun nąmu li, 'kwɛli hvilɛn mą níila. 13 Akɛtii, Tirə nuą, a ɉɛn gɔw lɔi tii hu nuą, di kaa pai ə́ mąąpui a mɛ̨inɛ̨ɛ̨ kpɛa kpɛa. 14 Tɔɔ nɛ̨ɛ̨non mąąwiaa kaa bɛlɛ́n bələ, həɠə mąąpuɔ a hɛni ə ɓo gwąną. 15 Mąąyiliɛ a həɠə ɲɛ̨i tɔɔ, diɛ li la tɔɔmun bɔ, mɛlaa nɛ̨ɛ̨lɛai tii bɔ, di kaa lɔi tɔɔmun ɲəi bɛlɛ́n. 16 Di tɔɔi a di yɛli ɓa a kwəinɛ̨ɛ̨, diɛ lɔ dɔɔ pɛlɛ́ mu. 17 Ə́ lonnii kaa pai kɛi a ną́nni mąąhvalin, yɛ́ di kɛ a lɔi ɲɛ̨itɔwɔ nuą lɔi mɛ̨i nąą kəlee. 18 Gáá pai kɛi ə́ laa kili tooi nuą ŋą a kwɛlan gəlee da nwɔɔ, nuą diɛ ə́ laa mąąwiɛ a yələ kəlee. |