Mąątɛ̨nɛ̨ 39 - Yálá laawoo hɛɓɛ (dc)

Nu da nwɔ Yɛnɛ̨ɛ̨, di hvo Yálá nwɔ mɛ̨inɛ̨ɛ̨i kwɛlɛ a hɛn da

¹ Nwələ ɲɛ̨itɔwɔmun: Yedutun. Davidə nwɔ wələ.

² Ŋą́ kɛi kɛ diɛi: «Gáá ɉiɛ pələ mąąkpɛɛi, 'və́ pa nəi nɛ̨ŋɛ̨n ɉəɠə váá woo hu. Yii kpɔ nui a nwoo kala, gaa gwɛ́lɛ, hvo kɛli ŋą́ ɲə́ə́ kɛ náálee ɓa.»

³ Ŋą́ náá pilɛ, və́ kɛi hvaa, ɛlɛɛ, nɛlɛɛ ɓa kɛ, ŋį́ mɛ̨́ihaa nwɔ́ mɔ̨nɔ̨i yee ə tɛɛ mą́ą́.

⁴ Gíliɲąhiɛi ŋą́ kɛi mo mɛ̨nįi tii ɓa, níí ə kələn gwə́i, ə kɛ lɔ yɛ nwɔ̨n a ɓɛla ɉú, ya ɓə gɛ, gɛ́ kɛa hvaa.

⁵ Yai-Laa, nwɔ́ yɛnɛ̨ɛ̨ kpɛɛ yələ lɛ mą́ą́, hvóló yɛli ɓə kɛa aa lɛɛ ɲə́i, bələi və́ la a lamun ɉɛn, gɛ́ pɛli gbaɠala kaai. Ɲíikuu woloi aa lɛɛ ɲə́i, gɛ́ pɛli gɔlɔn ɉi.

⁶ Hvo gaai, yáá nwɔ́ hvólóɠaai hu kpuwɔ kɛnɛ̨, ɛlɛɛ, nwɔ́ yɛnɛ̨ɛ̨ kaa kpɔ a lə, ə́ ɲɛ̨i ɓa? A tɛ̨ą, nu hu kilinŋąą kaa lɔ ə́ ɲɛ̨i ɓa hvɔan-hvɔan, yɛ hvaŋą.

⁷ A tɛ̨ą, nu a kɛ lɔ lii, yɛ pa, kɛlaa, gaa lɔ yɛ nįnįn! A tɛ̨ą, gɛ mɛ̨nį kaa lɔ a hvąŋą! A hɛn gwɛli ə dɛ gee ɓa, nui pai dɔlɔ kulɔi, hvo gɔlɔn.

⁸ Yiihu kɛa Ną́mu! Lə kpɔ ɓə kɛa ŋą́ hee gɛ́ mąąkpɔn? Gílitɔɔi yɛ́!

⁹ Gúlɔ gɛ́ nɛ̨ŋɛ̨n gəlee yəi, hvó dóó ɓowoɓɛlaa la.

¹⁰ Ŋą́ą́ náá pilɛ, və́ kɛa pai hvaai, hvó gaai, yɛ́ ɓə ə́ kɛ mɛ̨nį kɛi.

¹¹ Yɛ́ hvaɠai ɲɛ̨i həɠə mą́ą́, ə́ yee pɛlɛi ə́ mo mą́ą́, ŋą́ą́ too.

¹² Yá nu hutɔɔ a gɛ nɛ̨ŋɛ̨n naa pɔɔ, hɛn nwɛli kaa mą, yá nɛɛ a vowolo! A tɛ̨ą, nu kan nwɔ yɛnɛ̨ɛ̨ kaa ə́ ɲɛ̨i ɓa a hvąŋą!

¹³ Yai-Laa! Ə́ wəli tɔɔ nwɔ́lɔ woo da dómą woo ɓa, Ə́ wəli mąąlaa ə́ nwóó mɛ̨n, ɲɛ̨́iyá kələ, hvó ə́ wəli laa kpulu! Mąąhɔlɔɓo, gáá ə́ yəi yɛ nwɛ̨ą, yɛ tɛɛmun lɔ yɛ bələi ną́nni di kɛ la.

¹⁴ Ə́ ɲɛ̨i ɲɔ̨nwɔ̨ɔ̨ həɠə mą́ą́, əgɛ, gɛ́ pɛli yɛ́lɛ́i, gɛ́ li, gɛ́ kpɛɛ kɛa.