Mąątɛ̨nɛ̨ 37 - Yálá laawoo hɛɓɛ (dc)Tələnmomun da nɛ̨ŋɛ̨n ɉəɠəmun 1 Davidə nwɔ wələ woo. 1 Davidə nwɔ wələ woo. 'Ə́ líi hvo kələn ə́ kwəi nu ɲɔ̨nwɔ̨ɔ̨ɠaa pɔ, 'Hvó tolo kulɔ a piɛn doo nuą. 2 Mąąhɔlɔɓo, di kaa pai kpalai lɔ ɉa yɛ kala tiliin, diɛ yohva yɛ kpomói laakpala. 3 'Ə́ kilitɔɔ Yai-Laa ɓa, 'túwɔ́ a nɛlɛɛ yɛ́ pɛli heei nɔi hu, yɛ́ kɔ̨nɔ̨n ɉɔlɔɓo laa liilaa hu. 4 Yai-Laa ə kɛ a ə́ wɔ kwəinɛ̨ɛ̨, mɛ̨nįi ə́ líí a vɛli, gaa pai dɛɛi ə́ pɔ. 5 'Ə́ tínąą mɛ̨nį lɛɛ Yai-Laa yee kɔn ma, 'ə́ kilitɔɔ mą, gaa pai gɛ mɛ̨nį kɛi ɉu. 6 Gaa pai ə́ wɔ tɛ̨ą mɛ̨nį tooi pɔ̨nɔ̨ ŋą, yɛ yələ ɓɔi, ə́ wɔ tələnmolaa a lɛ a hvóló ɲą ɉe-ɉe. 7 Yá kɛ Yai-Laa kwɛlɛ, 'kɔlɔhaa yɛ́! Ə́ kilitɔɔ mą; 'ə́ líi hvo kələn ə́ kwəi nui ɲeepɔɔ kaa lɛlɛi bɔ, da nui gbąną-gbąną mɛ̨nįɠaa kɛi. 8 'Liiholi lɛɛ laa, ə́ nii kələn gwəi lɛɛ laa. 'Hvó ə́ líiholi, naa kulɔi hvo lɛlɛ li. 9 Mąąhɔlɔɓo, di kaa pai mɛ̨nį ɲɔ̨n gɛ nuą kulɔi a di nwun, Kɛlaa nuąi di kilitɔɔ Yai-Laa ɓa, nɔi kaa pai lɛɛi a di wɔɔ. 10 Nąą wolo aa lɛɛ tiikpə, nui hva Yálá mąąwiɛ, yɛ pili; yá bɔɔ kwɛli, hvá kɛa gaa. 11 Kɛlaa, nɔi a lɛɛ a liilaa nuą di wɔɔ; liilaa a kɛ di yəi, di wəli pulu laɠiɛ. 12 Nui hva Yálá mąąwiɛ, a lɔgilii kɛ a tələnmomun, yɛ naa hvaną a mąą mɛ̨nį. 13 Kɛlaa, Yai-Laa a kɛ yɛ́lɛ́i mą, mąąhɔlɔɓo, gaa nwɔ kuui kaa yɛ pa. 14 Nu ɲɔ̨nwɔ̨ɔ̨ɠaa daa ɓɔwa kwɛa kulɔ daa hu, daa gilɛn ɲala ɉu, mąąwɛlimun da yeehowolomun di paa mɛ̨nį ɓa; nui hiɛi a ɉaŋąą nwun dee mɛ̨nį ɓa. 15 Kɛlaa, di kpɔwɔ ɓɔwa tii, aa lɔ di hu, gilɛnŋaa hu yɛ yali. 16 Ɉɛn goloi tələnmomun ɲəi, vialaɓɔɔ tɛɛ nɛ̨ŋɛ̨n ɉəɠə nuą du wɔ hɛn gɔwi ɓa. 17 Mąąhɔlɔɓo, nɛ̨ŋɛ̨n ɉəɠə nuą yee kɔnwɔn ɉu kaa pai yalii, Kɛlaa, Yai-Laa a ɲee pu tələnmo nuą mu. 18 Yai-Laa ə kwəi kwələ nuą di wɔ hvólóɠaai kɔ́lɔn, di kwɛlin a lɛɛ laa kpɛɛ hva kɛ mą. 19 Di ɲɛ̨i mąą hvo pai luwui a mɔ̨nɔ̨ yələ, pulu a too, da pilɛ. 20 Nuąi da wɛlikpɛɛmąąlaa kulɔ a Yálá, di nwun na kaa pai pilii; a diɛi di kaa a Ną́mu Yálá ɲowoɠaa, yɛ gbali hu kala tiliin, yɛ nwɔ̨n nulu, di liɛ li kpɔ tɛ̨ɛ̨tɛ̨ɛ̨?. 21 Nu ɲɔ̨nwɔ̨ɔ̨ a hɛn ɉíŋɛ̨n, hva pənə hvo dɛɛ, tələnmomun a nu ɲɛ̨imąąwɛli kaa, yɛ nukpɔɔlaa kɛ. 22 A tɛ̨ą, nuąi a lúwɔ too diɛ, di pɔɔ ɓaa a nɔi, nuąi a di nɛ̨ŋɛ̨n naa, da di kulɔ a di nwun. 23 Yai-Laa a nu kɔ́wɔ tɔɔ mu kpąąn; nwɔ pələi yɛ nu lii hon. 24 Mąą nu ə ma kalin, hva too; mąąhɔlɔɓo, Yai-Laa a ɉon a ɲee. 25 Ə həɠə ɉúlɔnon ɲələ ɓa, ə həli la bɔ́lɔ́i lɔwai ŋɛ̨i ɓa, və́ ta tələnmomun gaa li, yii nu hvo mą, və́ ta gwəilonnii kaa li, diɛ kɔ̨nɔ̨n vɛli. 26 Yələ kəlee, tələnmomun a nu mąąwɛli kaa, yɛ kwələ tɔɔ; lúwɔ́ kaa gwəi lonnii diɛ. 27 'Hvó kɛ ə́ kaa mɛ̨nį ɲɔ̨n gɛi, mɛ̨nį lɛlɛɛ kɛ; akɛtii, yá ə́ heei hɔlɔɓo a yələ kəlee mɛ̨nį. 28 Mąąhɔlɔɓo, tɛ̨ą wɛli kaa Yai-Laa ɓa, hva gili kulɔ nwɛlikɛmąą nuą hu, a ɲɛ̨i kɛ diɛ a yələ kəlee. Kɛlaa, da nu ɲɔ̨nwɔ̨ɔ̨ɠaa huwu kulɔ a nwun. Di kaa pai mɛ̨nį ɲɔ̨n gɛ nuą hukalai a yələ kəlee mɛ̨nį. 29 Tələnmo nuą kaa pai lɔi hɔlɔɓoi, diɛ hee ɉu a yələ kəlee mɛ̨nį. 30 Tələnmomun naaləi hva kpɛla kili mɛ̨nį ɓoɔ ɓa, tɛ̨ą mɛ̨nį lɔ ɓə a kulɔ na. 31 Nwɔ Yálái nwɔ tɔ́n nwooi kaa níi hu, gɔwɔ pɔɔ hva pu ɉu. 32 Nu ɲɔ̨nwɔ̨ɔ̨ɠaa da kɛ tələnmomun mąąhɛnŋįi, diɛ baa pələ kwɛli. 33 Kɛlaa, Yai-Laa hva nɛɛ laa hvo too di yee ŋą; a li kiti haɠa ɓa, hva nɛɛ laa di hvo giti kala mą. 34 'Ə́ kilitɔɔ Yai-Laa ɓa, lɛɛ nwɔ pələi mɛ̨i; gaa pai ə́ kɛnɛ̨i, yɛ́ lɛɛ a nɔi nąmu, ə́ kaa pai nu ɲɔ̨nwɔ̨ɔ̨ɠaa kaai diɛ di kulɔ a di nwun. 35 Nui hvo Yálá kɔ́lɔn, ŋį́ gaa yɛ gilitɔɔ vaŋą ɓa, yɛ nwun dɛ yɛ Liban hɛan; 36 Kɛlaa, aa tɛɛ, hvo kɛa laa, ŋį́ gwɛli və́ kɛa gaa. 37 'Ə́ ɲɛ̨i hee tai nu lɛlɛɛ ɓa, kwəi kwələ mun gaa tai, líikpələmun ɉuwu a ɓɛlɛ. 38 Kɛlaa, nuąi da di muhəɠə gu Ną́mu laa ɓa, da gəlee paa a hvoló tɔ̨nɔ̨; diɛ nu ɲɔ̨nwɔ̨ɔ̨ɠaa huwu kulɔ a nwun. 39 Tələnmo nuą ɓalo mɛ̨nį a həɠə Yai-Laa pɔ, ya ɓə gaa a di mąąkpɛ pɛlɛ́ wala wala, ɓɛlɔwai mɛ̨nį wala wala ta a di kaa la. 40 Yai-Laa a di mąąkpɔn mąąɓo; yɛ di yee la hvólóon, a di kulɔ nu ɲɔ̨nwɔ̨ɔ̨ɠaa yəi; yɛ di ɓalo, mąąhɔlɔɓo, Yai-Laa ɓə di gɛ a di mąąkilɛi. |