Mąątɛ̨nɛ̨ 36 - Yálá laawoo hɛɓɛ (dc)1 Nwələ ɲɛ̨itɔwɔmun, Yai-Laa nwɔ tímun Davidə nwɔ wələ woo. 2 Túwɔ́ pələ ɲɔ̨n gulɔmun nwɔ woo ɲɔ̨n a mo, nąą kili kaa ŋą́, nwɔ kili ɓa, mąą hva pɛli kpɛlin ɉii Yálá ɲɛ̨i ɓa. 3 Gaa gbɔwɔ ɲɛ̨i ɓa a nu kɛnɛ̨ɛ̨, hva pɛli ɉɔn gaai, yɛ həɠə bulu. 4 Kɛɛ kala mɛ̨nį da nu ɓowo mɛ̨nį lɔ ɓə gaa na, mɛ̨nį lɛlɛɛ kɛ kili hvo mą. 5 A kɛ ɲəi gbin ɲą, mɛ̨nį ɲɔ̨n nɔ ɓə gɛ gili a too gwəi, ganąnŋąą pələ ɲɔ̨nwɔ̨ɔ̨ ɓa a wəlii kpɔlɔlaa; hva gɛ hvo ɲee kulɔ mɛ̨nį ɲɔ̨n ɉu. 6 Yai-Laa, ə́ wɔ wɛlikɛmąąlaa kaa yələkɔlɔn ɉu, yɛ́ kulɔ nwoo ɓa laa, yɛ həli kpɔ tulɔ kpinįnŋaa diɛ. 7 Yɛ́ tələnmolaa tɔɔi dɛɛ yee kpɛa-kpɛaa diɛ, ə́ wɔ kitii kpon ɉu kwɛa dɛɛ gboloyá kpon ɉu kwɛaa ɓa. Yai-Laa, yá nu da huwɔ di ɓalo. 8 Yálá, ə́ wɔ wɛlikɛmąąlaa kɛnɛ̨ɛ̨ ɓə-e! Ee, mąąwiai, ɉɔ̨nwɔ̨ hvo mą. Nu kanŋaa da di mąąkilɛ ə́ hvaŋąn mu. 9 Diɛ pilɛ ə́ yəi bɛlɛ́n gɔ̨nɔ̨n nɛ̨ɛ̨ɠaa hu; ɲái yá dɔɔ di la, gaa a yɛnɛ̨ɛ̨ ɲąąnɛ̨ɛ̨ yá. 10 Mąąhɔlɔɓo, ə́ pɔ pələ ɓə yɛnɛ̨ɛ̨ nwun gulɔi kaa laa; kuɔ kɛɛ pɔ̨nɔ̨ kaa ə́ wɔ kɛɛ pɔ̨nɔ̨i hu. 11 Ə́ wɔ wɛlikɛmąąlaa hu hvoloon, nuąi ə́ kɔ́lɔn di mɛ̨i, ə́ ə́ wɔ tɛ̨ą mɛ̨nį lɛ nuąi di haŋąą di mɛ̨i. 12 Kpɔwɔ ɲąąkɛnɛ mun hvo kpɔ hvilɛn ɓɛi gáá laai, ɛlɛɛ, nwąnąlɔ nuą, hvaŋą hvo gbɛ́ ɉééi. 13 Ɓɛ ɓə mɛ̨nį ɲɔ̨n gɛ nuą da too laa, di puɔ lɔi ɓa, di hva pɛli di muhəɠəi. |