Mąątɛ̨nɛ̨ 22 - Yálá laawoo hɛɓɛ (dc)Yálá hva bulu tii nɛ̨n guɔ 1 Nwələ ɲɛ̨i tɔwɔmun, nwələi da kɛ mą: «Yələ ɓɔi Lomą.» Davidə nwɔ wələ woo. 2 Nwɔ́ Yálá! Nwɔ́ Yálá! Lə ɓə kɛ yai, ə́ ə́ kili kulɔ ɉú? Gɛ́ tómą lɔ kpɛli kpɛli, málo mɛ̨nį mąą kwɛaa lɔ mą́ą́. 3 Nwɔ́ Yálá! Ŋą́ ə́ təli a yələɓɔɔ, hvó nwóó mu hon ɉi. Kwiihɛ̨ą, vá hvįįtɔɔ hɔlɔɓo. 4 Yá pa yaan, yɛ́ ɓə a Mąąhəɠəmun, yɛ́i ə́ kaa heeni tɔɔkpəlin ɉu, Israɛlə nwɔ mąątɛ̨nɛ̨ wələ hąąi! 5 Ku nąnni di di kilitɔɔ yɛ́, da di kilitɔɔ yɛ́, yɛ́ di kulɔ mɛ̨nįi. 6 Di kɛi tómą ə́ pɔ pələ, yɛ́ di ɓalo! Da di kilitɔɔ kɛ yɛ́, hvó kɛi di ɲɛ̨i lɛɛ pələi! 7 Kɛlaa nwɛ́i, kpə́ə́liɲɛ̨nɛ̨ɛ̨n ɓaa a ɲą́ą́, nu hvaa a ɲą́ą́, nuą diɛ di laa pu ɉú, nu kəlee diɛ vííɓo. 8 Nui lɔpee a gáá, a naakpan ɲąli a ɲą́ą́, diɛ vííɓo, diɛ yɛlɛ, diɛ di nwun gbɛŋɛ̨n, diɛ kɛ mą: 9 «Ə gilitɔɔ Yai-Laa ɓa! Yili ə ɓalo kan! Ə ɓalo kani wɛ! Hvo gaai yɛ aa nwɛlilakɛ!» 10 Yɛ́n, yɛ́ ɓə gúlɔ néé kwəi, yɛ́ náá ɲeekɔ̨nwɔ̨n ɉu, ɲįnį mu. 11 Nwɔ́ Yálá! Néé ə gáá lɔ, di náákwɛlanmo yɛ́! Ŋą́ kɛ ni néé kwəi, Ə́ ɓo a nwɔ́ Yálá! 12 'Hvó ə́ mąąkwɛa kpɔ tii mą́ą́, hvó gaai, mɔ̨nɔ̨ aa lɛɠɛ mą́ą́, mą́ą́ kpɔnmąą ɓomun və mą. 13 Niŋɛ̨ hilɛɠaa daa mą́ą́ tinɛ̨n daa doo gee hu, Basan huwɔɠaa daa mą́ą́ tinɛ̨n daa doo gee hu. 14 Di kaa di laa taɠai mą́ą́, nu huɓɛla yalaɠai tii, di kaa hvuluun ɉi. 15 Vą́ŋą aa həɠeen, yɛ wulɔyíi, Dɔ́ɔ́tɔɔnŋaa kəlee daa kulɔ di gee la. Níí kaa gwə́i yɛ kwɛ̨ingban, ɲɛ́lɛ kəlee aa həɠeen ɉú. 16 Gwáną aa kpala, yɛ kwɛahaɠa a kɛ nwɔ̨n ɉu, nɛ̨́n yɛ kanąn nɛ̨́ŋɛ̨-nɛ̨ŋɛ̨ mu, yáá náá kámą la pɔlɔkpɔlun ɉu. 17 Yilɛɠaa daa mą́ą́ tinɛ̨n, daa doo gee hu, mɛ̨nį ɲɔ̨n gɛ nuą daa mą́ą́ tinɛ̨n, daa gɔ́wɔɠaa, da ɲeeɠaa ɓɔ. 18 Ŋą́ pɛli gɔ́w kəlee lonon ɉi, nuą kaa di ɲɛ̨i tɛi a ɲą́ą́, diɛ gáá hįį. 19 Di kaa mą́ą́ həɠəɠaa ɲąą kwɛlɛi di kee lɔwai, diɛ nwɔ́ biliɉui kɔ́ a kpɛɛn. 20 Kɛlaa yɛ́, Yai-Laa, 'hvó tɔɔ kpɔ tii kwɛaala! Yɛ́i a vą́ŋą! 'Pa kilɛ mą́ą́! 'Ə́ mąą hvulɔ ɉa! 21 'Ŋą́ yɛnɛ̨ɛ̨ kulɔ kɔ́ kɔ ɓowa yəi, gúlɔ yilɛɠaa yeeɲąnin ɉu. 22 'Gúlɔ yala la, 'gúlɔ lan mįnɛ̨ lɔwai… Yáá nwóó mu hon! 23 Gáá pai pənəi, gɛ́ ə́ laa lɛ ną́n nonnii diɛ, ɛlɛɛ, gɛ́ ə́ mąątɛ̨nɛ̨ ɲąąkpɔn gbɛa-kpɛa hu. 24 Kaai kpɔ ka ɲɔw Yai-Laa ɓa, 'ka mąątɛ̨nɛ̨! Kaai kpɔ a Ɉakɔbə huwu, 'ka naa tɛ! Kaai kpɔ a Israɛlə nu huwu, 'ka ɲɔw mą! 25 Hvo gili kulɔ li mąą wɛlimun ɉu, nwɔ mąą wɛlilaa hu, hvo bulu tɔɔ li mą. Kɛlaa, wɔlɔi ə mo mą, ə nwoo mu hon 26 Yɛ́ ɓə ŋą́ ə́ tɛ̨nɛ̨, ɲąąkpɔn gbɛa-kpɛa hu! Mɛ̨nįɠaai ŋą́ di laakwɛlanmo, ŋą́ di kɛ ə́ ɲɔwmąą nuą ɲɛ̨i ɓa. 27 Kpɔwɔ mąąyɛɛ nuą da kɔ̨nɔ̨n mįi, di pilɛ ɉu. Diɛi da Yai-Laa kwɛlii, da Yai-Laa laa mąątɛ̨nɛ̨. «Yíipoo, da yɛnɛ̨ɛ̨ ɲąąnɛ̨ɛ̨, 'di kɛ kaa!» 28 Yɛnɛ̨ɛ̨ pilɛɛ gee mɛ̨i kaa pai gili lɛɛi Yai-Laa hu, diɛ pənə, diɛ pa bɔ pələ. Nu huwui kpɔ lɔi mɛ̨i, di kaa pai kwɛli hvilɛn ɉi Yai-Laa kɔwɔ mu. 29 Heeɓolaa kaa a Yai-Laa nwɔɔ! Gaa heeni lɔi kəlee nwun mɛ̨i. 30 Nwun na nɛ̨ɛ̨ nuąi lɔi mɛ̨i, daa kɔ̨nɔ̨n mįi, diɛ ka gwɛli hvilɛn ɉi mą! Nuąi kpɔ haa pɛ̨ɛ̨ di nwuɔ̨, gəlee kaa pai kwɛli hvilɛn ɉi mą, di hvo pai lɛɛi a yɛnɛ̨ɛ̨ kɛ nuą. 31 Di huwu kaa pai tíi Yai-Laa ɓa, di kaa pai mąą mɛ̨nį hu kulɔi, nu huwui tii ɓa. 32 Nu huwui tii kaa pai Yai-Laa nwɔ tələnmolaa hu kulɔi, ɛlɛɛ, gaa pai Yálá kɛ mɛ̨nį hu kulɔi, di kwəi lonnii diɛ. |