Mąątɛ̨nɛ̨ 143 - Yálá laawoo hɛɓɛ (dc)Tələnmolon nwɔ mąąwɛli hvɛli woo 1 Davidə nwɔ Yálá hvɛli woo. 1 Davidə nwɔ Yálá hvɛli woo. Yai-Laa! Ə́ wəli tɔɔ nwɔ́ hvɛli wooi ɓa, Ə́ wəli tɔɔ kpɔ a nɛlɛɛ nwɔ́ nɛ̨ɛ̨mąąhvə wooi ɓa, Ə́ tələnmoɔi, ə́ haŋąą, yili mąą mɛ̨nį ɓa, nwóó mu hon! 2 Kiti hvo kɛ, ká ə́ wɔ tímun ka lɔwai, Mąąhɔlɔɓo, yɛnɛ̨ɛ̨ mun dai lɔpee hvo tələnmo li ə́ ɲɛ̨i ɓa. 3 Ɲówo aa kɔ́ pɛlɛ mą́ą́, aa dóó, aa gíin-gíin, aa bíli haa nwɔ kpinį hu, yɛ nuąi wɔlɔ daa haa. 4 Hvaŋąi lɔpee hvo kɛa ɲə́i, ɉú aa pu mą́ą́ a kwəi pilimąą. 5 Gáá gíliɲąhiɛi gɛ́ vilɛn tɔwɔ tɔwɔ yələɠaa diɛ, gɛ́ pənə gɛ́ ə́ kɛ mɛ̨nįɠaa hu kulɔ gbɔ́wɔ ɓa, gɛ́ ə́ yee kɛ kólóɠaa pənə gwə́i, gɛ́ doo. 6 Gáá ɲə́ə́ hąŋąi ə́ pɔ pələ, ɲą́ą́ ka ɲɛ̨i ə́ lííla, yɛ lɔi ɉu aa kpala a yá wɛli. 7 Yai-Laa, nwóó mu hon gilɛ, vį́nna aa tɔn. 'Hvó ə́ ɲɛ̨ilai noo mą́ą́, və́ pa nəi kɛ yɛ nuąi daa yɛɛ ɲąmuątaa. 8 Yələ a lɛɛ kpɔlɔ ɓɔi, ə́ ə́ wɔ wɛlikɛmą́ą́laa lɛ mą́ą́, mąąhɔlɔɓo, yɛ́ ɓə gílitɔɔ yɛ́. Bələi mąąnɛ̨ɛ̨ ŋį́ tɛɛ la nɛ mą́ą́, mąąhɔlɔɓo ə́ pɔ pələ ɓə, níí muhəɠɛɛi la. 9 Yai-Laa, 'gúlɔ ɲówoɠaa yəi, ə́ pɔ pələ ɓə a mą́ą́kilɛi. 10 Mą́ą́kwɛli a ə́ liiɓa kɛ pələ, mąąhɔlɔɓo yɛ́ ɓə a nwɔ́ Yálá, ə́ wɔ Líinɛ̨ɛ̨gwəi laa, ə də́nən dɔɔ pələ lɛlɛɛ mɛ̨i. 11 Yai-Laa, ə́ laa mąą mɛ̨nį ɓa, vúlúmąą ə lɛɛ yɛnɛ̨ɛ̨, yɛ́ tələnmolaa haalai, gúlɔ mɛ̨nii. 12 Ə́ wɔ wɛlikɛmąąlaa haalai, ə́ kaa pai ɲówoɠaa paai, Nuąi kpɔ daa hee mɛ̨́i, yɛ́ di nwunna pili. Mąąhɔlɔɓo ə́ wɔ tímun maa a ɲą́ą́. |