Mąątɛ̨nɛ̨ 112 - Yálá laawoo hɛɓɛ (dc)

Kulɔ nwoo ɓa nuą pɔɔ ɓaa nwunnąnɛ̨ɛ̨

¹ 'Kánikookwəi! Nui a ɲɔw Yai-Laa ɓa, nwun na nɛ̨ɛ̨i, a nui kpɔ tii a nwɔ tiɓoɠaa wɛlilakɛi.

² Nonnii da kɛ ɓɛ yɛnɛ̨ɛ̨ a nu walawalaɠaa, lúwɔ́ a kɛ tələnmo nuą huwu ɓa.

³ Ɲəi bɛlɛ́n ɉɛnŋąą ɓaa yeelahvoloon hɛn gɔw da nwun na nɛ̨ɛ̨, nwɔ tələnmolaa ɲɛ̨n və mą.

⁴ Ə mą kɛ kpinįi ɓə, kɛɛ a pono kwəi kwələ nuą mɛ̨i, a nu mąąwɛli kaa, nii nɛ̨ɛ̨ gwəi, dələnmoɔ.

⁵ A nu ɲɛ̨imąąwɛli kaa yɛ kwələ tɔɔ, gaa pai gbɔwɔ mɛ̨nįɠaa ɲɛ̨i kulɔi tɛ̨ą pələ mɛ̨i.

⁶ Gaa pai kɛi a dɔɔ kpilin hva tumu dɔɔi, tələnmomun gili a lɛɛ nuą ŋą a yələ kəlee.

⁷ Hva ɲɔw diɛ-diɛ woo ɲɔ̨nwɔ̨ɔ̨ ɓa, niilaai gwəi, gilitɔɔ Ya-Laa ma,

⁸ niikpəlɛɛi, hva ɲɔw hɛn da ɓa; ɲɛ̨i a tɛɠɛɓo ɲowoɠaa hu.

⁹ A mɛ̨inɛ̨ɛ̨ kpɛa-kpɛa kɛ yeehowolo mun ma, nwɔ tələnmolaa kaa a yələ kəlee mɛ̨nį, a nwun muhəɠə a ɲɛ̨i pono.

¹⁰ Wea mun a nąą kaa, yili yɛ lɔ mą kɛnɛ̨, yɛ naa hvaną, yɛ kpala; nuąi di hvo Yálá pɔ, di líiɓaɠaa da lɛɛ a kpɛli.