Kolosə 4 - Yálá laawoo hɛɓɛ (dc)

¹ Luwɔ nąmįną, káá kpəlimąn, ká ká wɔɔ luwɔɠaai hon a tələnmolaa, a ɉaŋąą. Ká kili ə pu ɉu káá kpɛlimąn, káá, ká Nąmu kaa yələkɔlɔn ɉu.

Liɛwoo

² Ká ká hvaŋąlɔ Yálá hvɛliɛ hu, ə ɲee kɛ káá, káá pɛli mɛ̨inɛ̨ɛ̨ hu kɔlɔn ɉii.

³ Ká wɔɔ Yálá hvɛlii lɔwaiɠaa, ká Yálá hvɛli kuɔ kpɛlimąn kuɔ, əgɛ, Yálá ə naa woo laa həli pələ laaɓo ku tɔwɔ, gɛ́ pɛli Kristə mąą mɛ̨nį loɔɠaa hukulɔi, yai gáá gaho ɲą, mąą mɛ̨nį ɓa;

⁴ gɛ́ pɛli Kristə mąą mɛ̨nį hukulɔ a ɉu ponoɔ yɛ bələi mąąnɛ̨ɛ̨ ŋį́ mo la.

⁵ Nuąi di hvo a Kristalɛa, 'ká túwɔ́ pələ ə kɛ a nɛlɛɛ di ɲɛ̨i ɓa. Yíikuu kpuɔlon ká yəi, 'ká ɉon a nɛlɛɛ.

⁶ 'Ká lono woo ə nɛ̨ɛ̨ nuą wəlii a yələ kəlee, yɛ pɛli nɛ̨ɛ̨laa pələ laa ɓoi nuą lɔwai, 'ká nu tɛitɛi woo pulu pənə, a ɲąą pənə pələ.

⁷ Yii hvilɛn na mą́ą́ mɛ̨nį ɓa, ká káá pai mɛ̨n ɉii, gu nąn non Tisikə la, yai nwɛli kaa mą́ą́, a tímun a kulɔ nwoo ɓa, yai gwa yaa ku kaa kóló tɔ̨nɔ̨i kɛi gu Ną́mu hu.

⁸ Ŋą́ gili, ŋą́ dɔɔ ka pɔɔli, əgɛ, ə ku mąą mɛ̨nį huklɔ káá, ɛlɛɛ, ə ká hvaŋąlɔ.

⁹ Onesimə ɓə pai naa lɛi, yai a gu nąn non a kulɔ nwoo ɓa, mąą mɛ̨nį nwąnąą, ə ɓo a ká ta. Mɛ̨nįɠaa kpɔ tɛɛi ɓɛ, diɛ ɓə pai ɉukulɔi káá.

¹⁰ Aristarkə, yai kwa yaa ku kaa gaho ɲą, yɛ ka tuwɔ ɓo, ə mą kɛ, Barnabasə dɛlɛn non Markə, yɛ ka tuwɔ ɓo. Markə ti, daa hiɛ mąą mɛ̨nį hukulɔ kaa, a pa ka pɔɔli, ka ka yee hee mu a nɛlɛɛ.

¹¹ Jesus, yai naa mɛ̨i hee ɓaa Ɉustusə, yɛ ká tuwɔ ɓo. Ɉuifəɠaa lɔwai, diɛ tɔ̨nɔ̨ lɔ ɓə kwa diɛni ku yee káá Yálá-taa tɔɔlaa mąą kóló ɓa; diɛi ti ɓə liilaa tɛɛi bɔ́.

¹² Epafrasə yɛ ka tuwɔ ɓo, yai a ká ta. Jesus Kristə ŋą tímun yili nwɛi, vįi hva kpɛɛ Yálá hvɛlii ká mąą mɛ̨nį ɓa, a Yálá hvɛli, yɛ ka tɔɔ kpąą, ká kɛnɛ̨ Kristə kɔ́lɔnŋąą hu, ɛlɛɛ, ká kɛ a Yálá liiɓa kɛ pələ kɔ́lɔnŋąą.

¹³ Yii ŋɛ̨i gáá mo káá yɛ hvilɛn na Epafrasə ɓa, tɛ̨ą li; a niihɛlɛn kpɔ kɛnɛ̨ ká mąą mɛ̨nį, ə mą kɛ, Laodise nuą da Hierapolisə nuą kpɛlimąn.

¹⁴ Lukə ŋɛ̨i a ɲɔwɔtɔlɔ, a gu ɓɛlan nɛlɛɛ, yɛ ká túwɔ́ ɓo, ə mą kɛ, Demasə.

¹⁵ 'Ká ku wɔɔ túwɔ́ wɛlɛɛ laa həli nąn nonnii di kaa Laodise diɛ, ə mą kɛ, Nimfa, da gbɔn a gee kaa ɲəi bɛlɛ́n.

¹⁶ Ɓɛlɔwai ká ɉɛɓɛ́i ŋɛ̨i hɔlɔɓo la, ka galan, ka dɛɛ Laodise nuą pɔ di galan. Kaa kpɛli mąn, ɉɛɓɛ́ yii a həɠə Laodise pələ a pa ka pɔ, ka galan.

¹⁷ Ka mo Arsipə ɓa, kaa mą: tiɓo yii gu Ną́mu Jesus aa dɛɛ bɔ, ə ɉon a nɛlɛɛ, ə naa kulɔ.

¹⁸ Túwɔ́ wɛlɛɛ ŋɛ̨i, ɲą́ą́ gbínįi ɓə bɛ̨ɛ̨i a ɲéé, ɲą́ą́ Polə, gáá yɔwɔn ŋą, 'ká ká kili lɛɛ ɉú. Yálá nwɔ mɛ̨inɛ̨ɛ̨ ə kɛ ká pɔ!