Izikiɛ 46 - Yálá laawoo hɛɓɛ (dc)Dɔɔmun mąą mɛ̨nįɠaa 1 Mɛ̨nį kəlee ŋą Hééɓomun Yálá woo ka, yɛ: Bɛlɛ́n bələ, ɲiman mu, kpon tii ɲɛ̨i heɛ voló kulɔi pələ, naa a kɛ a gbulɔɔ, góló kɛ hvóló mɛ̨idai yeemu; kɛlaa, da naaɓo a vįitɔɔ yələ. Da naaɓo lɔ nwɔ̨nɔ̨ a ɲąnin dɔɔ nįnɛ̨. 2 Dɔɔmun a həɠə ɲɛnɛ̨ɛ̨ pələ, a tɛɛ a gbon tii nwɔ ɲiman mu pələ, ə lɔ, ə tɔɔ gbon nwulu ɓa, yili pulu, ɉaláá laa həli nuą di dɔɔmun nwɔ haláá hɛn da gəlee kələn kulɔ, da nwɔ liilaa halááɠaai. Dɔɔmun a pɛlɛ niiɓa bɛlɛ́ laaləi, yili pulu, ə kulɔ; kɛlaa, di hva bɛlɛ́ laa kpulu, ə lɛɛ ɉu yələ ə wulu. 3 Nɔi lonnii da pɛlɛ di liiɓa Yai-Laa lííla, bɛlɛ́ laaləi tɔ̨nɔ̨i tii ɓa, a vįitɔɔ yələɠaa, da ɲąnin nįnɛ̨ yələɠaa. 4 Tɔɔmun nwɔ haláá hɛn da gəlee kələn, a gulɔ Yai-Laa ɓa, a vįitɔɔ yələ, a kɛ a ɓɛlaa lon mɛ̨ida; kpɛɠii hva kɛ diɛ, da ɓɛlaa hilɛ tɔ̨nɔ̨ kpɛɠii hva kɛ mą. 5 A Yálá kɔ́ a Eifa tɔ̨nɔ̨ lɛɠɛ hunwɔ hu, mɛlaa hilɛ nwɛi li; mɛlaa lonnii di wɛi, ɓa pai kɛi a, hɛn a too ɲəi, yaa li. Nwulɔ nwɛi, ə kɛ a Eifa tɔ̨nɔ̨, hin tɔ̨nɔ̨. 6 Ɲąnįn nįnɛ̨ yələ nwɛi, a gɛ a nįŋɛ̨ hilɛ gbɔn, yii kpɛɠii hva kɛ mą. 7 Dɔɔmun a Yálá kɔ́ a Eifa tɔ̨nɔ̨, a nįŋɛ̨ nwɛi; ɛlɛɛ Eifa tɔ̨nɔ̨ a mɛlaa hilɛ nwɛi. Mɛlaa lonnii di wɛi, yii lɔpee a too ɲəi. Nwulɔ nwɛi, a kɛ a hin tɔ̨nɔ̨ da Eifa tɔ̨nɔ̨. 8 Dɔɔmun nɔi lɔwai, a lɔ a bɛlɛ́ laaləi ɲiman mu pələ, a kɛi kulɔ, a kulɔ lɔ nwɔ̨nɔ̨ nąą pələ. 9 Nɔi lonnii da pa Yai-Laa lííla a ɉɛli pu yələɠaa, yiiɠaai da lɔ a ɲələi pələ pɛlɛ laaləi pələ, diɛ kwɛli hvilɛn Yálá ɓa, da kulɔ ɉɛɠɛɛ pələ kpon gɛɛnąą. Nu hva yali bulu, yɛ kulɔ ɓɛ pələi ə lɔ la. Mąąnɛ̨ɛ̨ nu ə kulɔ a gbon tii ɲɛ̨i tɔwɔ pələi. 10 Dɔɔmun nwɛi, da diɛni da lɔ, ɓɛlɔwai da kɛi lɔ la, ə kulɔ ɓɛlɔwai da kɛi kulɔ laa. 11 Ɉiɛ kulɔ yələɠaa da ɉɛli yələɠaa, Yálá kɔ́ hɛn a kɛ a Eifa tɔ̨nɔ̨, a nįŋɛ̨ nwɛi, da Eifa tɔ̨nɔ̨ a mɛlaa hilɛ nwɛi; mɛlaa lonnii di wɛi, yii lɔpee a too ɲəi; nwulɔ nwɛi, Eifa tɔ̨nɔ̨ da hin tɔ̨nɔ̨. 12 Ɲələi tɔɔmun a lɛɛ la gbɔwɔ ɓa, yɛ kɛ ə haláá kulɔ a Yai-Laa ɓa, yɛ ə kɛ a, haláái da gəlee kələn, a wala kɛ tii, a liilaa haláá, gbon tii ɲɛ̨i heɛ voló kulɔi pələ, da naaɓo dɔwɔ; ə nwɔ haláái da gəlee kələn, da nwɔ liilaa haláái kulɔ, yɛ bələi a gɛ la a vįitɔɔ yələɠaa. Yili pulu, ə kulɔ, a kulɔ kpɔlɔ, di bɛlɛ́ laa kpulu. 13 Hvóló tɛi tɛi yeemu, yá haláá hɛn da gəlee kələn gulɔ, a kwɛlan dɔ̨nɔ̨ ɓɛlaa lon, kpɛɠii hva kɛ mą; mąąnɛ̨ɛ̨ ə gulɔ yələ wala pɔ tɛi tɛi, a Yai-Laa nwɔɔ. 14 Yii a Yálá kɔ́ mɛ̨nį yələ wala pɔ tɛi tɛi, da Eifa ɓɛlaɓo ɉu mɛ̨ida, yá gɔ́ a ɉeei tɔ̨nɔ̨; nwulɔ nwɛi, da hin ɓɛlaɓo ɉu haaɓa, ə́ ɉeei tɔ̨nɔ̨ tɛɛ a nɛɠɛ hunwɔ yɔwɔ hɛn. Yai-Laa kɔ́ hɛn ni, yili kaa a yələ kəlee tiɓo, kpɛɛ hvo mą. 15 Da gɔ a ɓɛlaa lon, di gɔ a wulɔ yələ wala pɔ tɛitɛi; a yələ kəlee mɛ̨nį. Dɔɔmun nonnii kɔ mɛ̨nį nɔi 16 «Mɛ̨nį kəlee ŋą Hééɓomun Yálá woo ka; yɛ: Dɔɔmun a nwɔ lɔi ta mɛ̨inɛ̨ɛ̨ kɛ non da ɓa, mɛ̨inɛ̨ɛ̨ tii a kɛ a non tii kwɛlin; ɉɛn tii a lɛɛ kɛa nui tii kpɔɔ-kpɔɔ lonnii yəi, a lɛɛ a di wɔɔ a yələ kəlee mɛ̨nį. 17 Tɔɔmun a nwɔ luwɔ ta kɔ́ a gbɔɔ kpɔɔ lɔi ta, nɔi tii a lɛɛ a nuwɔi tii nwɔɔ, ə lɛɛ ɉu gwɛlan mąąnɛ̨ɛ̨ nuwɔ ə lɛɛ la gbɔɔ ɓa, ɲələ ə həli. Yili pulu, nɔi ə pənə ə lɛɛ dɔɔmun ɲəi. Yii lɔ a tɛɛ dɔɔmun nonnii pɔ, yili ɓə a lɛɛ a di wɔɔ. 18 Mąą hvo nɛ̨ɛ̨li, dɔɔmun və nɔi lonnii di wɔ lɔi ta həɠə a toomɛ̨i; gbɔwɔ lɔi ɓə a nonnii kɔ́ ɉu, a kɛ ti, di hva nwɔ́ lɔi hu mun da həɠə nwɔ lɔi mɛ̨i.» Yálá hee pɛlɛ́ nwɔ ləɠi yiliɠaa 19 Yili pulu, ə li a ɲą́ą́ bɛlɛ́ laaləi tii ɲiman mu, gwɛlɛ, ə nɔ́ bɛlɛ́ mąąhəɠɛɛɠaa mu; diɛi tii di laa a ɓo ɲələi pələ, a ɉaláá laa həli nuą di wɔ pɛlɛ́ɠaai. Kɛɛnąą ta ə kɛ laa voló tooi pələ, hoŋon ɉu, 20 yɛ mą́ą́: «Gɛɛnąąi ŋɛ̨i ɓə ɉaláá laa həli nuą kaa pai kɛi Yálá kɔ́ haláá, da nɛ̨ŋɛ̨n gulɔ haláá huwɔɠaa yilii laa. Yii nwɔ̨nɔ̨ da Yálá kɔ́ la, diɛ ɲili laa; di hva kulɔ a da ɲɛnɛ̨ɛ̨ pələ ɲiman mu. Yili a nee nɔi lonnii mąąhəɠə.» 21 Ə gúlɔ ɲɛnɛ̨ɛ̨ pələ ɲiman mu, ku tɛɛ ɲiman ɉonwon ɉu nąąn gwɛlɛ, ɉoŋon ɉu ɉeei tɛi tɛi kwɛlɛ, kwəli hɛ̨ą ə kɛ laa. 22 Gwəli hɛ̨ąiɠaai tii di kɛ ɲiman mu ɉonwon ɉu nąąn gwɛlɛ. Di kwɛa pələ ə kɛ a yee tɔɔɉu pow nąąn, di koloon ɉu ə ɓo a yee tɔɔɉu pow haaɓa; nąąn ti gəlee ə kɛ lɔ tanɔ̨n. 23 Nąąn gəlee mąątinɛ̨n ŋąą a kumun, mąątínɛ̨n ŋąą a pɔlɔ kɔ́w. Daa kɛ ləɠi yiliiɠaa pɛli gumun tii kooɓa, daa dinɛ̨n mą daa doo gee hu. 24 Nui tii yɛ mą́ą́: «Nəɠi yiliiɠaa ka, ɓɛ ɓə Yálá hee pɛlɛ́ mu kóló kɛ nuą kaa pai kɛi nɔi lonnii di wɔ haláá hɛnŋaa yilii laa.» |