Izikiɛ 40 - Yálá laawoo hɛɓɛ (dc)

Yálá hee pɛlɛ́ nįnɛ̨

¹ Ku wɔ luwɔlaa gwɛlan bow hveelɛ gɔw lɔɔli kpala tɔɔi lɔwai, ɲąnin nwɔ hvóló pow yələ, daa hon ŋąą a kɔ́, gwɛlan bow gɔw nąąn dɛɛ pulu, Yai-Laa yee ə yɛɛ mɛ̨i, ə li a ɲą́ą́ daa kpoloon ŋą.

² Ə kɛ yɛ hį́i pələ, Yálá ə li a ɲą́ą́ Israɛlə lɔi hu, ə vílɛn yee tɔɔ ta ton na, ɲeei tii mɛ̨i ɉɛɠɛɛ pələ, ə kɛ yɛ pɛlɛ́ɠaa da kɛ laa a taa kɛ pələ.

³ Ə li a ɲą́ą́ gɛɛnąąi tii, ŋą́ nu ta kaa laa, gɛ pələ ə kɛ yɛ ɓala kwɛli; hɛn da ə kɛ ɲəi yɛ gɔtɔyɛli, da hɛn gɔɔn nwulu kpiɛn. Ə kɛ tɔɔni bɛlɛ́ laaləi.

⁴ Ɉulɔnui tii yɛ mą́ą́: Hulɔnu lon, ə́ ɲɛ̨i hee kpɔ laa a nɛlɛɛ; ə́ ə́ wəli tɔɔ kpɔ a nɛlɛɛ, mɛ̨nįɠaai kpɔ gáá pai nɛi yɛ́, ə́ kili lɛɛ gəlee hu. Maahɔlɔɓo, di lɛ yɛ́ mɛ̨nį ɓə gɛ diɛ pa a yɛ́ ɓɛ. Mɛ̨nįɠaai kpɔ ə́ kaa pai gaai, a kɛ ə́ gəlee hukulɔ Israɛlə nwɔ pɛlɛ́i mu nuą diɛ.

⁵ Ŋą́ bɛlɛ́ nwąną ɲɛnɛ̨ɛ̨ pələ kaa, ə Yálá hee pɛlɛ́ mąątínɛ̨n ə doo gee hu. Wulu kpiɛn ə kɛ nui tii yəi hɛn gɔɔn mɛ̨nį ɓa; gwɛa kɛ a yee tɔɔɉu mɛ̨ida, da nu yee ɓa ŋą tɔ̨nɔ̨. Ə bɛlɛ́ kɔ́ɔn a nwulu kpiɛn dɔ̨nɔ̨, ə gwɛa pələ kɔ́ɔn a nwulu kpiɛn dɔ̨nɔ̨.

⁶ Ə li bɛlɛ́ laaləi tii voló ɓɛlai pələ, ə tɛ, ə bɛlɛ́ laaləi kɔ́ɔn; ɉu wiɛ yee ə kɛ a bɛlɛ́ kɔ́ɔn nwulu kpiɛn dɔ̨nɔ̨. Bɛlɛ́ laaləi tɛi tɛi gɔnɔ nwulu kpiɛn dɔ̨nɔ̨.

⁷ Gulɔ-gbin-maɠaa kwɛa pələ ə kɛ a gɔɔn nwulu kpiɛn dɔ̨nɔ̨, ɲąą kɛnɛ̨ pələ ə ɓo a nwulu kpiɛn dɔ̨nɔ̨. Di lɔwai ə ɓo a yee tɔɔɉu lɔɔli; ɲiman mu kɛnɛ̨ ŋɛ̨i kɛ bɛlɛ́ laaləi kwɛlɛ, ɲɛ̨i heɛ Yálá hee pɛlɛ́ ɓa pələ, gwɛa yee ə kɛ a nwulu kpiɛn dɔ̨nɔ̨.

⁸ Ɲiman tii kɛ bɛlɛ́ laaləi, ə gɔɔn; ə ɓo a nwulu kpiɛn dɔ̨nɔ̨.

⁹ Bɛlɛ́ dɔɔmu ə kɛ a yee tɔɔɉu mɛ̨ihaaɓa, bɛlɛ́ laaləi ə ɓo a yee tɔɔɉu mɛ̨ihaaɓa. Ɲiman ɲɛ̨i tinɛ̨n ŋąąi kɛ bɛlɛ́n bələ.

¹⁰ Gulɔ-gbinma-ɠaai tii voló ɓɛlai pələ, bɛlɛ́ laaləi kwɛlɛ, ɉaaɓa ə kɛ ɓɛ pələ, ɉaaɓa ə ɓo ɓɛ pələ. Gəlee haaɓai ɲąą kɛnɛ̨ pələ ə ɓo lɔ tanɔ̨n. Bɛlɛ́ dɔɔmuɠaai tii kɛ ɓɛ pələ da ɓɛ pələ, di kɛ pələ, da di kpinį ə kɛ lɔ tanɔ̨n.

¹¹ Ə bɛlɛ́ laaləi ɲąą kɛnɛ̨ pələ kɔ́ɔn, ə kɛ a yee tɔɔɉu pow. Bɛlɛ́ hu wiɛ pələ ə ɓo a yee tɔɔɉu pow kɔ́w haaɓa.

¹² Kɛɛnąą ta ə kɛ gulɔ-gbinmaɠaa ɲɛ̨itɔwɔ, a yee tɔɔɉu tɛi tɛi, ɓɛ pələ da ɓɛ pələ. Gulɔ-gbinmaɠaa di kɛ a yee tɔɔɉu mɛ̨ida bələ kəlee.

¹³ Ə həɠə bɛlɛ́ laaləi ɓa, ə həli gulɔ-gbinmaɠaa diɛ, ə yili kɔ́ɔn; ə kɛ a yee tɔɔɉu pow hveelɛ kɔ́w lɔɔli. Di laaləi heɛ kɛ gee ɓa.

¹⁴ Ə ɲiman mu kɔ́ɔn, ə ɓo a yee tɔɔɉu pow mɛ̨ida, ɲiman ə kɛi nąą mąątinɛ̨n.

¹⁵ Nu tɛɛi ə kɛ laa, yɛ həli bɛlɛ́ laaləi ɓa. Ə həɠə laa ə həli ɲiman mu, bɛlɛ́ laaləi tənən ma, ə kɛ a yee tɔɔɉu pow lɔɔli.

¹⁶ Woloɠaa ɓɔɔ kɛ gulɔ-gbinmaɠaa diɛ, da bɛlɛ́ dɔɔmuɠaa; kwɛli hɔlɔɔnŋaa tɔɔi kɛ nwoloɠaai tii la, bɛlɛ́ bələ kəlee woloɠaa ɓɔɔ lɔ nwɔ̨nɔ̨ kɛ ɲiman bɛlɛ́ nwąną ɓa, doɔ gee hu. Bɛlɛ́ dɔɔmu kəlee mąąpuɔi kɛ a gwala laa.

¹⁷ Ɓɛi nuą da tɔɔ laa ɲɛnɛ̨ɛ̨ pələ, ə li laa a ɲą́ą́, pɛlɛ́ɠaa di kɛ laa; mu laa, ɓɛi nuą da tɔɔ laa, di kɛ kpɔ nąą kwɛlɛ kəlee, di doo gee hu. Pɛlɛ́ pow haaɓa ə kɛ gɛɛnąąi tii ɓa.

¹⁸ Bɛlɛ́ laaləi tənə ma mu laa pələ ɲąą kɛnɛ̨i lɔ kɛ yɛ bələi bɛlɛ́ laaleeɠaa ɲąą kɛnɛ̨ la. Bɛlɛ́n bələ nwɛi li kɛ.

¹⁹ Ə həɠə bɛlɛ́ laaləi ɉu pələ ɓa, ə həli la ɓɛi nuą da kɛ tɔɔi laa ɲɛnɛ̨ɛ̨ pələ, di nąą kɔ́ɔn ə ɓo a yee tɔɔɉu nwun dɔ̨nɔ̨. Voló həɠəi pələ nwɛi ka tii.

²⁰ Bɛlɛ́ laaləi ɲɛ̨i həɛ ɲanwuɔ̨ pələ, ə yili kwəa yee da ɲąą kɛnɛ̨ yee di kɔ́ɔn, ɓɛi nuą da tɔɔ laa ɲɛ̨nɛ̨ɛ̨ pələ.

²¹ Kulɔ-gbinma haaɓa ə ɓo ɓɛ pələ, ɉaaɓa ə ɓo ɓɛ pələ, bɛlɛ́ dɔɔmuɠaa, da ɲimɛ̨n mu di kɛnɛ̨ pələ ə kɛ lɔ yɛ bɛlɛ́ laaləi toloo toloo nwɛiɠaa, di kwəa pələ ə kɛ a yee tɔɔɉu pow lɔɔli, di ɲąą kɛnɛ̨ pələ ə ɓo a yee tɔɔɉu pow hveelɛ gɔw lɔɔli.

²² Nwɔ woloɠaa, nwɔ ɲimɛ̨n mu, da nwɔ gwala laaɠaa di kɛ lɔ yɛ voló ɓɛlai pələ pɛlɛ laalei nwɛiɠaa. Gbəlin kɛi tɛ laa ə kɛ mɛ̨ihveelɛ, ɲimɛ̨n mu ə kɛ nąą ɲɛ̨i tɔwɔ.

²³ Ɓɛi nuą da tɔɔ laa, kpon ə kɛ laa, ɲɛ̨i həɛ ɲánwuɔ̨ pələ pɛlɛ laaləi ɓa, lɔ yɛ voló ɓɛlai pələ nwɛi, ə həɠə bɛlɛ́ laaləi yii ɓa ə həli yii tii ɓa, ɉulɔnui tii ə nąą kɔ́ɔn, ə ɓo a yee tɔɔɉu nwun dɔ̨nɔ̨.

²⁴ Ku li ɉɛɠɛi pələ, pɛlɛ́ laaləi ta ə kɛ laa, ɲɛ̨i həɛ ɉɛɠɛi pələ, ə bɛlɛ́ dɔɔmuɠaa kɔ́ɔn da ɲimɛ̨n mu, di kɛ pələ ə kɛ lɔ yɛ yiiɠaai tii.

²⁵ Woloɠaa ɓɔɔi kɛ bɛlɛ́ laaləi kwɛlɛ da ɲimɛ̨n mu kwɛlɛ, ə tinɛ̨n mą ə too gee hu; di kɛ pələ ə kɛ lɔ yɛ nwolo yiiɠaai tii. Di kwəa pələ ə ɓo a yee tɔɔɉu pow lɔɔli, di ɲąą kɛnɛ̨ pələ, yee tɔɔɉu pow hveelɛ gɔw lɔɔli.

²⁶ Gbəlin kɛi tɛ laa, ə kɛ mɛ̨ihveelɛ, dɔɔmuɠaa mąą puɔ a gwala laa nąą kəlee.

²⁷ Ɓɛi nuą di kɛi tɔɔ laa bɛlɛ́n bələ, pɛlɛ́ laaləi ta ə kɛ laa ɲɛ̨i həɛ ɉɛɠɛí pələ, ə nąą kɔ́ɔn, ə həɠə bɛlɛ́ laaləi yii ɓa, ə həli yii tii ɓa, ə kɛ a yee tɔɔɉu nwun dɔ̨nɔ̨.

²⁸ Ɓɛi nuą da tɔɔ laa, bɛlɛ́n bələ, ə li laa a ɲą́ą́, ku tɛɛ a bɛlɛ́ laaləi tii kɛ ɉɛɠɛi pələ, ə nąą kɔ́ɔn, ə kɛ lɔ yɛ yiiɠaai tii.

²⁹ Nwɔ gulɔ-gbinmaɠaa da dɔɔmuɠaa, da ɲimɛ̨n mu, di kɛ pələ ə kɛ lɔ yɛ yiiɠaai tii; woloɠaa ɓɔɔ kɛ bɛlɛ́ laaləi da ɲimɛ̨n mu ɓa, yɛ di mąą tinɛ̨n yɛ doo gii hu. Di kwəa pələ ə kɛ a yee tɔɔɉu pow lɔɔli, di ɲąą kɛnɛ̨ pələ ə ɓo a yee tɔɔɉu pow hveelɛ gɔw lɔɔli.

³⁰ Ɲimɛ̨n dinɛ̨ŋąąi kɛ mą doɔ gii hu, di kwəa yee ə ɓo a yee tɔɔɉu pow hveelɛ kɔ́w lɔɔli, ɲąą kɛnɛ̨ yee ə ɓo a yee tɔɔɉu lɔɔli.

³¹ Ɲimɛ̨n naa ə kɛi ɓo ɓɛi nuą di kɛi tɔɔ laa ɲɛnɛ̨ɛ̨ pələ; dɔɔmuɠaa mąą puɔi kɛ a gwala laa mąąnįnįn, gbəli kɛi tɛ laa ə kɛ mɛ̨ihaaɓa.

³² Ɓɛi nuą da tɔɔ laa bɛlɛ́n bələ, kwa yaa ku lɔ laa, ku tɛɛ a voló ɓɛlai pələ pɛlɛ́ laaləi; ə bɛlɛ́ laaləi kɔ́ɔn, ə ɓo lɔ yɛ yiiɠaai tii.

³³ Nwɔ gulɔ gbimaɠaa, dɔɔmuɠaa, da ɲimɛ̨n di kɛ lɔ yɛ yiiɠaai tii. Woloɠaa ɓɔɔ kɛ bɛlɛ́ laaləi da ɲimɛ̨n mu ɓa ə too gii hu; di kwəa yee ə ɓo a yee tɔɔɉu pow lɔɔli, di ɲąą kɛnɛ̨ yee ə ɓo a yee tɔɔɉu pow hveelɛ kɔ́w lɔɔli.

³⁴ Ɲimɛ̨n naa ə kɛi ɓo ɓɛi nuą da tɔɔ laa ɲɛnɛ̨ɛ̨ pələ, dɔɔmuɠaa mąą puɔi kɛ a gwalalaa mąąnįnįn.

³⁵ Ə pənə ə li a ɲą́ą́ ɲanwuɔ̨ pələ pɛlɛ laaləi, ə nąą kɔ́ɔn, ə ɓo lɔ yɛ yiiɠaai tii.

³⁶ Gulɔ gbin maɠaa di kɛ mą, da dɔɔmuɠaa, da ɲimɛ̨n mu, ɛlɛɛ, woloɠaa di ɓo diɛ yɛ tinɛ̨n ma ə doo gee hu. Di kwɛa pələ ə ɓo a yee tɔɔɉu pow lɔɔli, di ɲąą kɛnɛ̨ pələ, ə ɓo a yee tɔɔɉu pow hveelɛ gɔw lɔɔli.

³⁷ Ɲimɛ̨n da ə kɛ ɲɛnɛ̨ɛ̨ pələ, a nuą tɔɔi, bɛlɛ́ dɔɔmu mąąpuɔi kɛ a gwala laa mąąnįnįn. Gbəlin kɛ mą, ə kɛ mɛ̨ihaaɓa.

³⁸ Bɛlɛ́ laaləi ta kulaa kɛ ɲimɛ̨n mu, nąą ɓə di kɛi Yálá kɔ́ haláá taatɛlɛɛ waa laa.

³⁹ Bɛlɛ́i tii ɲimɛ̨n mu, taɓali hveelɛ ə kɛ ɓɛ pələ, da ɓɛ pələ; di mɛ̨i ɓə, da Yálá kɔ́ haláá taatɛlɛɛ nwun dee laa, da nɛ̨ŋɛ̨ɲ mąąhvaalɛɛ haláá taatɛlɛɛ, da nu pɔɔ ŋą pɛli haláá nwɛi.

⁴⁰ Nu a kɛi tɛ ɲələi pələ pɛlɛ laaləi, ɲɛnɛ̨ɛ̨ pələ, taɓali hveelɛ di kɛ laa bələ tɔ̨nɔ̨, ɛlɛɛ bɛlɛ́ ɲimɛ̨n mu bələ tɔ̨nɔ̨, taɓali hveelɛ di kɛ laa.

⁴¹ Bɛlɛ́ laaləi kwɛlɛ, taɓali nąąn ɓɛ pələ, taɓali nąąn ɓɛ pələ. Daɓali mɛ̨ihaaɓai tii mɛ̨i ɓə di kɛi daatɛlɛɛɠaa paa laa.

⁴² Haláá kulɔi nąąn di kɛ a haláái da gəlee kələn Yálá ɓa nwɛi, di ɓo a kwɛni ɓɛla haɠaa. Di kwɛa pələ ə kɛ a yee tɔɔɉu tɔ̨nɔ̨ da gbulɔ; di ɲąą kɛnɛ̨ pələ ə ɓo a yee tɔ̨nɔ̨ da gbulɔ; di kɔ́wɔɠaa di ɓo a yee tɔɔɉu tɔ̨nɔ̨. Daɓaliɠaai tii mɛ̨i ɓə daatɛlɛɛɠaa nwun dee ɓɔwaɠaa kaa laa lani.

⁴³ Di kwɛlɛ laai kɛ a nu yee ɲa tɔ̨nɔ̨ ɉu pələ, ə tinɛ̨n ma ə doo gee hu; ɉaláá huwɔɠaa laai kɛ daɓaliɠaai tii mɛ̨i.

⁴⁴ Gwɛlɛ pələ, bɛlɛ́ laaləi pulu, nwələ too nuą di wɔ pɛlɛ́ɠaai di kɛ laa; ɓɛi nuą di kɛi tɔɔ laa, gwəlii pələ. Bɛlɛɛ́ tɔ̨nɔ̨ ə kɛ ɲələi pələ kpon tənən ma, naa heɛ ɉɛɠɛɛ pələ; dɔ̨nɔ̨ ə ɓo ɉɛɠɛɛ pələ kpon tənən ma, naa heɛ ɲələi pələ.

⁴⁵ Yili pulu, nui tii yɛ mą́ą́: Bɛlɛ́i tii ɲɛ̨i heɛ ɉɛɠɛɛ pələ, ɉaláá kulɔ nuą di wɔ kóló kɛ yələ a həli Yálá hee pɛlɛ́ mu, nąą ɓə da kɛ laa.

⁴⁶ Bɛlɛ́i tii ɲɛ̨i heɛ ɲələi pələ, ɉaláá kulɔ nuąi di yee kaa ɉaláá kulɔ koló ɓa, di wɛi li, a diɛi tii Sadɔkə lonnii da Levi lonnii di lɔwai. Diɛ ɓə da lɛɠɛ Yai-Laa ɓa diɛ nwɔ kólói kɛ.

Yálá hee pɛlɛ́ kɛ pələ

⁴⁷ Nui tii ə gwəli kɔ́ɔn, gwɛa yee ə kɛ a yee tɔɔɉu nwun dɔ̨nɔ̨, ɲąą kɛnɛ̨ yee ə ɓo a yee tɔɔɉu nwun dɔ̨nɔ̨; nąą kəlee pɛliɛ kɛ a gee. Ɉaláá kulɔi ə kɛ bɛlɛ́ laaləi.

⁴⁸ Nui tii ə li a ɲą́ą́ bɛlɛ́ ɲimɛ̨n mu, ə ɲimɛ̨n mu nwɔ dɔɔmuɠaa kɔ́ɔn, ə kɛ a yee tɔɔɉu lɔɔli ɓɛ pələ, da yee tɔɔɉu lɔɔli ɓɛ pələ. Gbon ɲąą kɛnɛ̨ pələ, ə kɛ a yee tɔɔɉu haaɓa, ɓɛ pələ, da ɓɛ pələ.

⁴⁹ Ɲimɛ̨n mu kwɛa yee ə kɛ a yee tɔɔɉu pow hveelɛ, ɲąą kɛnɛ̨ɛ a yee tɔɔɉu pow kɔ́w hveelɛ; gbəlinŋaa di kɛ mą, pɛlɛ́hɔlɔɔn veelɛ di kɛ dɔɔmuɠaa kwɛlɛ; dɔ̨nɔ̨ ə ɓo ɓɛ pələ, dɔ̨nɔ̨ ə ɓo ɓɛ pələ.