Izikiɛ 37 - Yálá laawoo hɛɓɛ (dc)Nu kɔw kpalaɠaa mąą mɛ̨nį 1 Yai-Laa yee ə yɛɛ mɛ̨́i, nwɔ Kilii ə li a ɲą́ą́ ɓoloon da hu, nąą laa hvɛɛ a nu kɔ́wɠaa. 2 Ə tɛɛ a ɲą́ą́ di lɔwai nąą kəlee, gu mɛ̨nį ɓo tɛ̨ą ɓa, di kpulu kɛnɛ̨ɛ kpɔ kɛ a mɔlɔɔ; ɛlɛɛ, di kpalaa kpɔ a nelee. 3 Nąąlɔwai, Yai-Laa yɛ mą́ą́: «Hulɔnu lon, nu kɔ́wɠaai ŋɛ̨i di nɔ̨ɔ̨ a pɛli mɔɔ tooi di hu?» Ŋą́ nwoo ɲąąpənə, gɛ́ mą: «Mɛ̨nį kəlee ŋą Hééɓomun Yálá, yɛ́ ɓə yili kpaɠala kɔ́lɔn.» 4 Ə pənə yɛ mą́ą́: «Gwə́i mɛ̨nį hukulɔ nu kɔ́wɠaai ŋɛ̨i diɛ, yɛ́ diɛ: Nu kɔ́w kpalaɠaa, ka ka wəli tɔɔ Yai-Laa woo ɓa, yɛ: 5 Mɛ̨nįi Mɛ̨nį kəlee ŋą Hééɓomun Yálá kaa moi nu kɔ́wɠaai ŋɛ̨i diɛ, ya ka; yɛ: Gáá pai ká nɔ̨ɔ̨ tooi ká hu, kaa pənə kaa kɛ a ká hvulú. 6 Gáá pai ka lanąɠaa laai ka hu, ŋą́ ka lúwú pɛlɛ mɛ̨i, ŋą́ kɔ́lɔ tɛ kaa, ŋą́ ká nɔ̨ɔ̨ too ka hu, ka kɛ a ka hvulú. Nąąlɔwai ɓə ka gili kɔ́lɔn na, kaa kɛ diɛ, ɲą́ą́ ɓə gáá a Yai-Laa.» 7 Bələi di dí la, ŋą́ gɛ tii. Ɓɛlɔwai ŋą́ kɛi Yálá kwəi mɛ̨nį hukulɔ la, woo ta ə tɔɔ, da tín gɛnɛ̨ ta, nu kɔ́wɠaai tii, di lɛɠɛ di kee ɓa, 8 ɲɛ̨́i ə lɛɛ lɔ laa, di laną ə laa di hu, di lúwú ə tɛ diɛ; yili pulu, di kɔ́lɔ ə pɛlɛ mɛ̨i, kɛlaa, di nɔ̨ɔ̨ hvo kɛ di hu. 9 Yai-Laa yɛ nwɔ̨nɔ̨ mą́ą́: «Hulɔnu lon! 'Mo nu nɔ̨ɔ̨ ɓa, 'mo mą, yɛ́ mą: ‹Nu nɔ̨ɔ̨! Mɛ̨nį kəlee ŋą Hééɓomun Yálá yɛ, ə́ həɠə lɔi wəlin na nąąn ɓa, 'ə́ pu nu powaɠaai ŋɛ̨i diɛ, di kaa pai kɛi a di hvulú.›» 10 Ŋą́ Yálá kwəi mɛ̨nį hukulɔ, yɛ bələi ə dí la; nu nɔ̨ɔ̨ ə too di hu, di kɛ a di hvulú, di haŋą di tɔɔ, di ɓo kpɔ a kɔlaɠa kpulu kɛnɛ̨ɛ. 11 Yálá yɛ mą́ą́: «Hulɔnu lon, nu kɔ́wɠaai tii, di kaa a Israɛlə nwɔ pɛlɛ́i kəlee. Mąąhɔlɔɓo, da kɛ kɛi diɛ: ‹Ku kɔ́wɠaa daa kpala, ku wɔ kilitɔɔi aa haa, ku lɛɛ li ɉu.› 12 Yili ɓə gaa mą, gwə́i mɛ̨nį hukulɔ diɛ, yɛ́ diɛ: Mɛ̨nįi Mɛ̨nį kəlee ŋą Hééɓomun Yálá kaa moi, ya ka, yɛ diɛ: Gáá pai ka kámąɠaa laa ɓoi, ŋą́ ka kulɔ laa, kaai ɓaa nwɔ́ nuąi, gáá pai pənəi ŋą́ pa a kaa Israɛlə lɔi hu. 13 Nąąlɔwai, ka gili kɔ́lɔn kaa diɛ, ɲą́ą́ ɓə gáá a Yai-Laa; ɓɛlɔwai ŋą́ ka kámąɠaa laaɓo la, gɛ́ ka kulɔ ɉu, kaai ɓaa nwɔ nuąi. 14 Ɓɛlɔwai gáá pai nwɔ́ Nɔ̨ɔ̨ tooi la ka hu, ka kɛ a ka hvulú, ɛlɛɛ, gɛ́ ka hee ka wɔ lɔi hu, ka gbaɠala kaa, nąąlɔwai, kaa diɛ, ɲą́ą́ ɓə gáá a Yai-Laa, ŋą́ mɛ̨nį ɓo, ŋą́ bɔ mɛ̨nį kɛ. Yai-Laa woo li.» Yálá kaa pai woolaa mąą kɛi nɔi 15 Yai-Laa ə hvaa bɔ́, yɛ mą́ą́: 16 «Hulɔnu lon, wulu kpuɔ ta həɠə, ə́ Ɉuda laa pɛ̨ɛ̨ mɛ̨i da Israɛlə lonnii da diɛni di kaa di kee ɓa, yili pulu, ə́ da kpɛli həɠə, ə́ Ɉosɛfə laa pɛ̨ɛ̨ mɛ̨i; yili ɓə pai kɛi a Ɛfraimə nwɛi, da Israɛlə lonnii yiiɠaai da diɛni di kaa di kee ɓai. 17 Yili pulu, ə́ nwulu kpuɔ hveelɛi tii pɛlɛ gee ɓa ə́ yee ŋą, di kaa pai kɛi ə́ yee ŋą a wulu kpuɔ tɔ̨nɔ̨. 18 Ɓɛlɔwai ə́ wɔ lɔi hu nuą da kɛ la yɛ́; mɛ̨nįi tii ə́ kaa gɛi mukulaa ɓaa ləi? 19 'Kɛ́ diɛ: Mɛ̨nįi Mɛ̨nį kəlee ŋą Hééɓomun Yálá kaa moi, ya ka; yɛ: Nwulu kpuɔi Ɉosɛfə laa kaa mą, yɛ ɓo Ɛfraimə yəi, da Israɛlə lonnii, da diɛni di tɔɔi, gáá pai ɉəɠəi, ŋą́ bɛlɛ́ nwulu kpuɔi ŋɛ̨i Ɉuda laa kaa mɛ̨i mą, ŋą́ di pɛlɛ di kee ɓa, di kɛ a wulu kpuɔ tɔ̨nɔ̨, ɛlɛɛ, di kɛ ɲéé ŋą tanɔ̨n. 20 Ɛlɛɛ, wulu kpuɔɠaai tii ə́ kaa pai ɉɛɓɛ́ pɛ̨ɛ̨i mą, di kɛ ə́ yee ŋą. 21 'Ə́ mo diɛ, yɛ́ diɛ: Mɛ̨nįi Mɛ̨nį kəlee ŋą Hééɓomun Yálá kaa moi, ya ka; yɛ: Gáá pai Israɛlə kulɔi lɔiɠaa lɔwai, ɓɛɠaai daa li laa; ŋą́ di kpɔn di kee ɓa di wɔ lɔi hu. 22 Gáá pai di kɛi a lɔi tɔ̨nɔ̨ nɔi hu; Israɛlə yeeɠaa mɛ̨i, tɔɔmun dɔ̨nɔ̨ lɔ ɓə pai kɛi di kəlee di nwun na. Di hvo kɛa pai kɛi a lɔi hveelɛ, dɔɔlaa hvo kɛa pai kɛi a mɛlaɓoɔ ɉu hveelɛ. 23 Di hvo kɛa pai kɛi di mąąliɓi a di wɔ haliɠaai, da di wɔ túwɔ pələ ɲɔ̨nŋaai, ə mą kɛ di wɔ kulɔ nwoo mu laai di kɛi gɛi. Ɓɛɠaai kpɔ di kaa laa, gáá pai di nwun mąąɓoi, ŋą́ di kulɔ laa; ɓɛɠaai di nɛ̨ŋɛ̨n ɉəɠə laa. Gáá pai di mąąhəɠəi, da kɛ a nwɔ́ nuą, ɲą́ą́n ŋą́ kɛ a di wɔ Yálá 24 Nwɔ́ tí mun Davidə ɓə pai kɛi tɔɔlaa kɛi di mɛ̨i; di kəlee di mɛ̨i kaa mun ə ɓo tanɔ̨n. Di kaa pai kɛi hiɛi a nwɔ́ lɔi hu yíi ɓo pələ, diɛ lɛɛ nwɔ́ tɔ́n nwooɠaa pulu, diɛ di pɔ mɛ̨nį kɛ. 25 Nɔi ŋɛ̨i ŋą́ dɛɛ nwɔ́ tí mun Ɉakɔbə pɔ, ya ɓə di kaa pai heei ɉu; ɓɛi wɔlɔ ka kala ɓɔlɔni di kɛ laa hee ni. Di kaa pai kɛi laa heeni, diɛ, di lonnii, da yiliɠaai di wɔ lonnii. Da lɛɛ laa a yələ kəlee; ɛlɛɛ nwɔ́ tí mun Davidə ɓə pai kɛi a di ɲɛ̨itɔwɔ mun a yələ kəlee da nwɔɔ. 26 Kwa diɛni ku kaa pai liilaa mįnɛ̨ həɠəi, gáá pai di heei kulɔi, ŋą́ di ɓuwu ɓo; gáá pai nwɔ́ pɛlɛ́ mąąhəɠɛɛi tɔɔi di lɔwai yɛ lɛɛ laa a yələ kəlee da nwɔɔ. 27 Ɉéé pɛlɛ́ kaa pai kɛi di kwɛlɛ, gáá pai kɛi a di wɔ Yálá, diɛn, di ɓo a nwɔ́ nuą. 28 Bələ ɓə hįį lɔi takpɛliɠaa da gili kɔ́lɔn na, diɛ kɛ ɲą́ą́ ɓə gáá a Yai-Laa, yai a Israɛlə kɛ a hɛn mąąhəɠɛɛ; a ɲələi gáá pai nwɔ́ pɛlɛ́ mąąhəɠɛɛi tɔɔi la di lɔwai, yɛ lɛɛ laa a yələ kəlee.» |