Ikilisiati 9 - Yálá laawoo hɛɓɛ (dc)

Nu nwɔ kɛ yɛnɛ̨ɛ̨ kaa lɔ a hvóló tɔ̨nɔ̨

¹ A tɛ̨ą, mɛ̨nįɠaa tii kəlee ɓə ŋą́ nį́í lɔ ɉu, ŋį́ gaa, gɛ́ diɛ: Yálá tanɔ̨n gbən mə mɛ̨nį kəlee kaa ɲeekɔn ma, yɛ ə kɛ a nu haŋąą, yɛ ə kɛ a kilimąą mun, yɛ ə kɛ a di kɛ kólóɠaa. Mɛ̨i, ə mą kɛ di kɛ mɛ̨nįɠaa hu. Nu kanŋaa di hvo kpɛli pai wɛlikɛmąą, yowolaa da wɛlikpɛɛmąą di kɔlɔn ɉi; ə ma kpɛli kɛ tinąą mɛ̨nį.

² Hɛn gəlee ŋąąkpɛɛi kaa tanɔ̨n: tələnmomun da nwąnąlɔmun di ŋąąkpɛɛi kaa tanɔ̨n. Nɛlɛɛ da ɲɔ̨nwɔ̨ɔ̨ di ŋąąkpɛɛi kaa tanɔ̨n. Nui a ɲɔw Yálá ɓa, da nui hva ɲɔw Yálá ɓa, di ŋąąkpɛɛi kaa tanɔ̨n. Bələ lɔ ɓə gaa la, nui a Yálá kɔ, da nui hva Yálá kɔ di lɔwai, ə mą kɛ, mɛ̨nį lɛlɛɛ kɛmun da, nɛ̨ŋɛ̨n ɉəɠəmun di lɔwai, nui a hɛn naakwɛlanmo Yálá ɓa, da nui hva hɛn da laakwɛlanmo Yálá ɓa, di lɔwai.

³ Mɛ̨nį ɲąąnwąnąąi gaa lɔi mɛ̨i, ya ɓaa: hɛn gəlee ŋąąkpɛɛi kɛ mɛ̨nį tanɔ̨n. Nuąi da di kpɔwɔ lɔ mɛ̨nį ɲɔ̨n gɛɛ hu, ɛlɛɛ, di liiɓa yɛ ɓo a kilikpɛɛgwəi túwɔ́ ɓoɔ, yii lɔ a lɛɛ nąą pulu, ya lɔ ɓaa a haa.

⁴ Kɛlɛi, nui gaa yɛnɛ̨ɛ̨, yaa lɔ ɓə kiliŋąhiɛ kaa mą-ee! Yilɛ hvulú hviɛlaɓoɔi yala powa ɓa.

⁵ Nuąi di kaa a di hvulú, di kili kaa ɉu diɛ: di kaa pai haai. Kɛlaa, nuąi daa haa, di hvo haa ŋą mɔ̨nɔ̨ kɔ́lɔn. Mąąhɔlɔɓo, daa li lɛ̨ąmąątaa.

⁶ Di wɔ wɛlikɛmąąlaa, di wɔ wɛlikpɛɛmąąlaa, di wɔ tolo kulaa, gəlee daa haa. Mɛ̨nįɠaai kɛi lɔi mɛ̨i, di wɔ nąą hvo ɉu.

⁷ Yili ɓa, ə́ laa mįi, ə́ wɔ lɔɔi kpələ a ə́ kwəinɛ̨ɛ̨; mąąhɔlɔɓo, Yálá aa ə́ kɛ mɛ̨nįɠaa hu nɛ̨ɛ̨.

⁸ Ə́ mąąyili a həɠə nįnɛ̨, ə́ ə́ mąątí a wulɔ kun-nɛ̨ɛ̨.

⁹ Ə́ wɔ yɛnɛ̨ɛ̨ ɲąąnɛ̨ɛ̨ kulɔ ká ə́ wɛlikɛmąą nɛ̨ą, ɲíi kuu kpuɔ lon ŋɛ̨i Yálá aa dɛɛ ə́ pɔ, ɉu. Yili lɔ ɓə gaa a mɔ̨nɔ̨i ə́ kaa mįi ɓɛ lɔi mɛ̨i, dɔlɔ.

¹⁰ Yii kpɔ ə́ yee a pɛli mą, gɛ a huwalawalai gaa ə́ yəi. Mąąhɔlɔɓo, ɓɛi ə́ kaa pai lii laa haaɓɛlaataa, kóló hvo laa, mɛ̨nį dɛ̨ą kwɛliɛ hvo laa, mɛ̨nį kɔ́lɔn ŋąą hvo laa da kili mɛ̨nį.

Kili mɛ̨nį hvaŋą hvo ɉu a yələ kəlee

¹¹ Ŋą́ą́ nwɔ̨nɔ̨ mɛ̨nį takpɛli kaa ɓɛ lɔi mɛ̨i, ya ɓaa: Nui mąąhulaa gilɛ həɠəi, ya lɔ hvəi a gilɛ həɠɛɛ dɔlɔ hɔlɔɓo; ɛlɛɛ, hvaŋą nąmįną lɔ hvəi kɔ́ a nɛ̨ɛ̨ diɛ; yili pulu, kilimąą mun nɔ hvəi a gbɔwɔ hɔlɔɓo yɛnɛ̨ɛ̨, ɛlɛɛ, nui nwun gaa ɉu, ya lɔ hvəi a kɛ a hɛn gɔw nąmu; kili mɛ̨nį kwɛli nuą lɔ hvəi da mąąwiɛ hɔlɔɓo. Mąąhɔlɔɓo, mɛ̨nį ɲąąnɛ̨ɛ̨ da ŋąąnwąnąą a həli nu kəlee ɓa.

¹² Yan, nu lonnii di hvo mɛ̨nį ɲąąnwąnąą pai yələ kɔ́lɔn. Bələi lɔ hɔ̨nwɔ̨lee a too la yá-tuluun dumɔ̨ hu, a wala kɛ tii, nwɛ̨nį yɛ too nwɛ̨nį kpɛ diŋɛ̨n ɉu, di ɲɛ̨i heɛ haa ɓa yɛ pa di pɔ, bələ lɔ ɓə nu kanŋaa kaa la.

¹³ Ŋą́ą́ mɛ̨nį ta kaa yələkɔlɔn mu, a viɛlaɓoɔ yii kili ə gɛ, nɛlɛɛ ɲɛ̨́i ɓa, ya ɓaa:

¹⁴ Taa ta ə kɛ laa, ɉu nuą di hvo kɛ tamą li. Tɔɔmun ɉuwala-walaa ta ə pa, yɛ kɛ ə kɔ́ pɛlɛ daa lon tii ɓa. Ə daa mąą tinɛ̨n a kɔlaɠa, ə gɛ, ɉu nuą hon a kɔluwɔ.

¹⁵ Kɛlaa, hulɔnu ta ə kɛ daai tii hu, nuą ɲɛ̨itɛɠɛɓoɔ ɉu, kili yɛ ɓo mą; ə daai tii nwun mąąɓo a nwɔ kilikɛɲəilaa. Kɛlaa, nui lɔpee ta hvo gili lɛɛ ɉulɔnui tii mąą mɛ̨nį hu.

¹⁶ Ya ɓə ŋą́ kɛ gbɔ́wɔ́ ɓa: Kili hviɛlaɓoɔi huwalawala ɓa. Kɛlaa, nui nuą ɲɛ̨itɛɠɛɓoɔ ɉu, a kɛ a kilimąą mun, da mɛlɛkpɛɛ mą, ɛlɛɛ, di hva di wəli tɔɔ nwɔ liɛwoo ɓa.

¹⁷ Kɛlaa yaamun, viɛlaɓoɔi nu ə́ ə́ wəli tɔɔ kilimąą mun ma a nɛlɛɛ, ə tɛɛ, tɔɔmun a kɛ mɛ̨nį ɓoi kilikpɛɛgwəi nuą diɛ yɛlɛ, mą.

¹⁸ Kili hviɛlaɓoɔi, kɔ́ kɔ́ kwɛli hɛn ma. Kɛlaa, kilikpɛɛgwəi mun nwoo ɲąą tanɔ̨n gbən a mɛ̨nį lɛlɛɛ tamąą hukala.