Hebreu 6 - Yálá laawoo hɛɓɛ (dc)

¹ Yili ɓa, nu mąąkwɛli mɛ̨nį dɔlɔɔɠaai vilɛnŋąąi Kristə ɓa, ká gu yiliɠaa lɛɛ kɛa laa, ká gu nu pɔlɔ-pɔlɔ mɛ̨nįɠaa kɛ, gu hvo pənə nwɔ̨nɔ̨ gu hvo pa mɛ̨nį pɔlɔɠaa mɛ̨i, yɛ bələi: nu pulu tɔɔ haa ŋą túwɔ́ pələɠaa diɛ, laa Yálá la mɛ̨nį,

² nu mąąwaa mɛ̨nį mąą kalan, nu yee pɛlɛɛ nu nwuɔ̨, haaɓɛlaa nwun mɛ̨nį, da giti kpəli tee mɛ̨nį.

³ Yiliɠaai ɓəmun, gu kaa pai kɛi gɛi, akɛ, Yálá a hvaamą.

⁴ Gɛ laa walaai mun, nuąi daa ta Yálá ŋą kɛɛ ponoi hɔlɔɓo, daa yələkɔlɔn ɉu mɛ̨inɛ̨ɛ̨ kɔɔn, ɛlɛɛ, daa di wɔɔ nąą hɔlɔɓo Kili-Mąąhəɠɛɛ hu,

⁵ diɛi daa Yálá laa woo lɛlɛi kaa, ɛlɛɛ, da ɲɛnɛ̨ɛ̨ nįnɛ̨i gaa pai ŋą hvaŋą,

⁶ ɛlɛɛ ə mą kɛ tii, daa həɠə laana pələ mɛ̨i, gɛ laa walaai di di yali di pulu, diɛ ɓə, da pənə nwɔ̨nɔ̨, diɛ Yálá Lon gbanwo kolɔwa ɓa a nįnɛ̨, diɛ gɛ nuą diɛ nalan.

⁷ Akɛ tulɔ́ a kɛi pu lɔi ɓa pɔlɔɔ-pɔlɔɔ, ɛlɛɛ, nɔi yɛ hihɛnŋaa lɛlɛ, ɉin nuą diɛ dɔlɔ hɔlɔɓo, mąą lɔi a lúwɔ́ hɔlɔɓo Yálá yəi.

⁸ Kɛlaa, akɛi, ŋąąlən gbɔlɔ da kala ɲɔ̨nwɔ̨ɔ̨ɠaa kulɔ mą, mąą lɔi, mɛlɛ hva kɛ mą, da nɛ̨ŋɛ̨n naa, ɛlɛɛ, di gələn.

⁹ Yii ɓaa ká wɛi, nwɛ́likɛmąą nuą, ku mą kɛ mɛ̨nįɠaa ti ɓoi, ku laai na kuɔ: Ká káá bələ haŋąa mɛ̨i, yai a ɓalo pələ.

¹⁰ Ɛlɛɛ, Yálá hvo hvulu li, hva pɛli lɛ̨ąi ka kɛ mɛ̨nį nɛ̨ɛ̨ɠaai ka káá gɛi, diɛ, gəlee ə mą kɛ, wɛlikɛmąąlaai ká kɛi tí la kristalɛa diɛi, diɛi wɔlɔ kɛ laa, ə mą nwɔ̨nɔ̨ kɛ, háákələi.

¹¹ Kɛlaa, yii kpɔ nwɛli kaa kuɔ, ya ɓaa: ká tɛitɛi, ká ká hvaŋąlɔ, ká gilitɔɔmąą laa tii hunɛ̨ɛ̨, ə lɛɛ la ɉu ɲąą kpɛɛ yələ,

¹² ká hvįi hvo kpɛɛ, kɛlaa, nuąi di liikpələ laa na laa pələ mɛ̨i, di kąnąn mą, di mɛ̨nį laakwɛlanmoɔ hɔlɔɓo, 'ká di pɔɔ kɔɔn.

Yálá nwɔ mɛ̨nį laakwɛlanmoɔ, da kilitɔɔmąą laa

¹³ Ɓɛlɔwai Yálá ə mɛ̨nį laakwɛlanmo la Abrahamə ɓai, yɛ bələi hɛn da hvo kɛnɛ̨ li la hvo tɛɛ Yaa mą, ə gwɛla a gbɔwɔ kpinįi,

¹⁴ yɛ mą: «A tɛ̨ą, gáá pai ə́ pilɛi lúwɔ́ hu, ŋą́ ə́ huwu hu ɓɛlɛ.»

¹⁵ Yii kpɔ Abrahamə ə niikpələ, ə mɛ̨nį laakwɛlanmoɔi tii, laa honŋąą kaa.

¹⁶ Nu kanŋaa da di kwɛla a hɛn gɛnɛ̨ dɛɛ diɛ, əgɛ, di hɛa mɛ̨nį kulɔ di wɔ mɛ̨nį ta hu, da mɛ̨nįi tii ŋą tɛ̨ą lɛ a di kwɛla woo.

¹⁷ Bələ lɔ ɓə Yálá ə gɛ la, əgɛ, ə nɛ ŋą mɛ̨nį laakwɛlanmoɔ hu mɛ̨nįi hɔlɔɓo nuą diɛ, yɛ, hva ɉəɠə mą, ə gwɛla.

¹⁸ Mɛ̨nį hveelɛ ka ti, hva ɉəɠə mą, lɛɛ mɛ̨nį hvo ɉu Yálá pɔ pələ, yili a hvaŋąlɔ tɛɛ gu pɔ, a guɔi gwaa mɛ̨nį kəlee lɛɛ laa, gu kilitɔɔ mɛ̨nį laakwɛlanmoɔ tii ɓa.

¹⁹ Gilitɔɔmąąlaai gu yəi, gaa a gu kpulɔn ɲɛli, a poną, ganąn ŋąą gu kili pɔ a nwala-walaa, ə ɓo a tɛ̨ą, yɛ lɔ ɉəɠə ɓɛla pulu pələ Yálá lííla.

²⁰ Nąą ɓə Jesus ə lɔ laa gu tɔwɔ, gu mąą mɛ̨nį ɓa. Yai gaa a ɉaláá laa həli mun gɛnɛ̨mun a yələ kəlee, yɛ Mɛlkisedɛkə.