Hebreu 4 - Yálá laawoo hɛɓɛ (dc)

¹ Yili ɓa tii, ɲɔw ə kɛ kani gu hu, hvo gaai, gu lɔ mɛ̨nį vįitɔɔ tii hu laakwɛlanmoɔi guɔ, ɲɔw ə kɛ kani gu hu, guɔ kɛ, nu ta hvo lɛɛ pulu, nąą mɛ̨nį hu.

² Mąąhɔlɔɓo, guɔ kpɛlimąn gwaa nwɛlɛɛ lɛlɛɛ hɔlɔɓo lɔ yɛ nuą tii, kɛlaa nwoo tii di mɛ̨n, dɔlɔ hvo kɛ mą di yəi, gbala ə tɔɔ, diɛi mɛ̨n, di hvo nɛɛlaa, laa na laa hvo ɉeei kulɔ di hu.

³ Guɔi gwaa laa na laa hɔlɔɓo, gu kaa pai lɔi vįitɔɔi tii hu, yai ə kɛ mą: Mąąhɔlɔɓo, ŋą́ gwɛ́la nwɔ́ lííholi hu, gɛ́ diɛ: Gu ɲɛ̨i kaa laa, akɛ di kaa pai lɔi ŋą́ hviitɔɔi hu! Ə nwoo ti ɓo, bələi mąn aa kpɛɛ la kɛ a gɛ kólo kəlee, a yɛnɛ̨ɛ̨ kɔ́wɔ tɔɔ yələ,

⁴ Hvo gaai, di kɛ voló mɛ̨ihveelɛ yələ ɓa: Yálá ə vįitɔɔ gɛ kóló ɓa a vóló mɛ̨ihveelɛ yələ.

⁵ Ɛlɛɛ nwɔ̨nɔ̨, a nįnɛ̨, yɛ diɛ: Akɛ di kaa pai lɔi ŋą́ hvįitɔɔi hu.

⁶ Yili ɓa, yii kpɔ yaan nwoo ə lɛ lɔ a nwoo, ɛlɛɛ, nu tɔlɔɔɠaai nwɛlɛɛ lɛlɛɛ tii mɛ̨n, di hvo lɔ, a di wɔɔ kili walawalalaa laa pɔɔ, dakpɛliɠaa da pɛli di lɔ,

⁷ Ə kuu nįnɛ̨ takpɛli tɔɔ, ya ɓaa a: háákələi; ə mo Davidə ŋą hɛɓɛ́i hu nąą ta, gwaa háá mo, yɛ mą: «Háákələi, ká Yálá laa woo mɛ̨n, 'ká hvo ká kili walawala.»

⁸ Akɛ, Ɉosue ə nuą lɔ vįitɔɔ tii hu, hvo li kɛ pənə yili pulu, yɛ hvóló takpɛli mąą mɛ̨nį ɓo.

⁹ Vįitɔɔ yələ ta kaa laa a Yálá nwɔ nuąi di wɔ.

¹⁰ Mąąhɔlɔɓo, nui a lɔ Yálá ŋą hvįitɔɔi hu, yaa kpɛlimąn, a vįitɔɔ gɛ kólóɠaa diɛ, yɛ bələi Yálá ə vįitɔɔ la nwɛiɠaai diɛ.

¹¹ 'Ká gu gu mąą hulɔ kani, gu lɔ vįitɔɔ tii hu, ə gɛ, gili walawala lii tii, hvo pa nu ta too.

¹² Hvo gaai, Yálá laa woo kaa a vulúmąą, vaŋą ə ɓo ɉu, ɲąąliɛ dɛɛ líikpakpa ɓa. A lɔ kpɔ nu hu, ə gili da nįį di ɓɛlaɓo, ə gbulɔn na da gbɔlɔ di ɓɛlaɓo. Yɛ nu kɛ mɛ̨nįɠaa da nwɔɔ kiliŋąhiɛɠaa di hukpɛ.

¹³ Hɛn nɔpee ta hvo yɛnɛ̨ɛ̨, noɔ mą, hɛn gəlee mąąkpoloonŋąąi ɲɛ̨i mu, gəlee laa niila. Yai gu kaa lii gu kwɛlanmoi mą.

Jesus ɓə a ɉaláá laa həli mun gɛnɛ̨mun

¹⁴ Yii kani haláá laa həli mun gɛnɛ̨mun gaa ká gu yəi, a Yálá Lon Jesus, yai yələkɔlɔn ɉuɓɔ, 'ká gu naa na laa wooi ŋɛ̨i hon gani kpąą.

¹⁵ Ɉaláá laa həli mun gɛnɛ̨mun gaa ka gu yəi, vįi hvo kpɛɛ li. A pɛli kpɔnmąą tɛɛi gu pɔ, gu wɔɔ hvįikpɛɛ laa hu. Yaa tii, ɲąąhɛn mɛ̨nį huwu kəlee ə həli mą, yɛ guɔ, kɛlaa, hvo nɛ̨ŋɛ̨n ɉəɠə da hu.

¹⁶ 'Ká gu gu mąąlɛɠɛ kan dɔɔkpəlin ma a kilitɔɔmąąlaa walawala, əgɛ, gu ɲɛ̨imąąwɛli kaa hɔlɔɓo da mɛ̨inɛ̨ɛ̨, yɛ pɛli kpɔn ɉii guɔ a ɲələi bɛliɛi mą.