Hebreu 13 - Yálá laawoo hɛɓɛ (dc)

Galan gbɔn neelee

¹ Lee-lon nwɛlikɛmąą laa ə ɉeei kulɔ ká lɔwai.

² 'Ká hvo lɛ̨ą nwɛ̨ąlaa kɛɛ ɓa, hvo gaai, nu taɠaa di lɛɛ kpɔ nwɛ̨ąlaa kɛi, di malakaɠaa nwɛ̨ąlaa kɛ di tɛɠi.

³ Nuąi gaho ŋą, 'ká ká kili kɛ di hu, yɛ ká diɛni ká kɛ gahoi ti ŋą. Yiiɠaai di kaa mɔ̨nɔ̨ lɔi di pɔ, 'ká ká kili kɛ di hu, hvo gaai, káá kpɛlimąn, ká káá a nu yɛ diɛ.

⁴ Hílɛtai yíi mɛlɛ ə kɛ mą nu kəlee ɲɛ̨i ɓa, ɛlɛɛ, hilɛtai gbin, hvo kɔhɔɓo; mąąhɔlɔɓo, túwɔ́ pələ ɲɔ̨n gulɔ nuą, da wɛlikɛ nuą, Yálá kaa pai di kiti teei.

⁵ 'Ká hvo nɛɛ laa, wali lii yee hvo tɛɛ káá, ká túwɔ́ pələ hu. Yii gaa ká yəi, yili ə ká lii hon. Mąąhɔlɔɓo, gu Nąmu kpinįi ɓo mo, yɛ mą: «Kpaa-o! Vá ə́ lɛɛ laa, vá gíli kulɔ ə́ hu tanɔ̨n gbɛli!»

⁶ Yili ɓa, gwa pɛli gu mo kpɔ a kilitɔɔmąą laa, guɔ mą: «Ną́mu kaa a dɔ́ɔ́ búlú, vá ɲɔw hɛn nɔpee ta ɓa. Lə kpɔ ɓə nu kan a pɛli gɛi a ɲą́ą́?»

⁷ 'Ká ká kili kɛ, nuąi Yálá laa woo laa həli káá, di hu; 'ká di wɔɔ yɛnɛ̨ɛ̨ ɲąąkpɛɛ pələ kaa, ɛlɛɛ, 'ká ká kɔɔn di wɔɔ laa na laa ɓa.

⁸ Jesus Kristə kaa lɔ a gɛ pələ yələ kəlee, wɛi, háákələi, ə lɛɛ ɉu, wɔlɔ-wɔlɔ ɓa.

⁹ 'Ká hvo ka kpɔwɔ lɛɛ laa, kalan bələ takpɛli hu wooɠaa di hvo ká həɠə tɛ̨ą pələ mɛ̨i. Mąąhɔlɔɓo, viɛlaɓoɔi, nu lii ə pilɛ a Yálá yəi mɛ̨inɛ̨ɛ̨, ə tɛɛ la, koolon gɔ̨nɔ̨n ma, yai, ŋą tɔn ɉon nuą di hvo ta dɔlɔ kaa lii.

¹⁰ Guɔ gu wɛi, yiihu, haláá kulɔi ta kaa gu yəi, ɓɛi, ɉaláá laa həli nuąi ɓɛ lɔi mɛ̨i, di hva kɔ̨nɔ̨n ɉəɠə laa hvo mįi.

¹¹ Mąąhɔlɔɓo, daatɛlɛɛɠaai ɉaláá laa həli mun gɛnɛ̨ɛ̨ ə kɛli ɲąmą həɠə, yɛ lɔ la ɉəɠə pɛlɛ́ mu, yɛ nɛ̨ŋɛ̨nŋaa mąąhvaalɛɛ haláá kulɔ la, di kɛli daatɛlɛɛɠaa tii powaɠaa kələn, ɉį́i pulu pələ.

¹² Yili ɓə gɛ, Jesus yaa kpɛlimąn, di baa daa pulu pələ, ə gɛ, ə nuą mąąhəɠə a gbɔwɔ ɲąmą.

¹³ 'Ká gu kulɔ kani, gwə li, gu naakwiɛn daa pulu pələ, mɛlɛ too ti həli mą, ə həli gu kəlee guɔ.

¹⁴ Mąąhɔlɔɓo, ɓɛ lɔi mɛ̨i, taa ta hvo ɓɛ a gu hee taa, kɛlaa gu hee taai laa, ya ɓə gu kaa lii bɔ pələ.

¹⁵ Yili ɓa, Jesus pɔ pələ, 'ká gu mąąwiɛ haláá kulɔ Yálá ɓa a yələ kəlee, mukulaa ɓaa: 'Ká gu kɛ lɔ Naa tɛi.

¹⁶ 'Ká gu hvo lɛ̨ą mɛ̨nį lɛlɛɛ kɛɛ ɓa, ɛlɛɛ, guɔ kpɔnmąą tɛɛ gbɔn ɉu lonnii pɔ, mąąhɔlɔɓo, ɉaláá hɛn taaləi tii ɓə a Yálá liihon.

¹⁷ Nuąi da kɛ ká mąąkwɛlii, 'ká lɛɛ di woo mu, ɛlɛɛ, ká ká kpɔwɔ lɛɛ di yəi. Mąąhɔlɔɓo, diɛ ɓə da kɛ ka nįiɠaa mɛ̨ikaai, ɛlɛɛ, diɛ ɓə pai yili gwɛlan mo kɛi Yálá ɓa. Ká gɛ tii, da di kɛ-kólói tii a kwəinɛ̨ɛ̨, hva kɛ a lííholi, yili dɔlɔ lɔpee hva kɛ mą ká yəi.

¹⁸ 'Ká kɛ Yálá hvɛlii kuɔ, mąąhɔlɔɓo, ku kilaa ponoɔi kpɔ a nɛlɛɛ, ku kwəi kwɛlɛɛ, ku kaa bɔ, ku túwɔ́ a nɛlɛɛ mɛ̨nį lɔpee gəlee hu.

¹⁹ Gáá ɉu hvɛlii káá, gɛ́ ká Yálá hvɛli mą́ą́ mɛ̨nį ɓa, ə gɛ, ŋį́ pənə ŋį́ pa ka pɔ a mąą hulaa.

Yálá hvɛliɛ

²⁰ Yálá ɓə a liilaa tɛɛ gu pɔ; yai, gu Ną́mu Jesus, mɛlaa-pulumun gɛnɛ̨ɛ̨ nwun ə gulɔ haa yəi, ŋą haláá ɲąmąi haláái, mįnɛ̨ nįnɛ̨ kaa gwa Yálá ni gu lɔwai kpɛɛ hvo mą,

²¹ Yálái tii ə gɛ, káá pɛli niiɓa mɛ̨nį lɛlɛɛ lɔpee gəlee kɛi, yii a laa a nii, ə gɛ ká hu, Jesus Kristə háálai, yai, mąąwiɛlaa kaa mą a yələ kəlee kpɛɛ hvo mą. Mįiną!

Yələ wala too woo

²² Ną́n nonnii, gáá ɉuhvɛlii káá, gɛ́, niɛwoo ŋɛ̨i, 'ká ká yee hee mu! Hɔlɔɔmun, nwooi ŋą́ mo káá, ɉu hvo kwɛa li.

²³ 'Ká kili ə pu ɉu káá, gu nąn non Timote aa kulɔ gaho ŋą. A pa ɉa, kwa yaa kwa pa ká pɔɔli.

²⁴ Nuąi da kɛ tɔɔi gbɔn ɲɛ̨i tɔwɔ, 'ká di kəlee di túwɔ́ɓo, ə pɛlɛ la Kristalɛa kəlee diɛ. Gu nąn nonnii di kaa a Itali, diɛ ká túwɔ́ɓo.

²⁵ Yálá nwɔ nɛ̨ɛ̨laa ə kɛ ká kəlee ká pɔ.