Hebreu 11 - Yálá laawoo hɛɓɛ (dc)

Laa na laa

¹ Laa na laa ɓaa: Mɛ̨nįi nu ɲɛ̨i hvo mą, ə́ kilitɔɔmą, yɛ́ kɛ gaa kɛa ə́ yəi, a kpaaləi yá mɛ̨nį kili kɔlɔn na a tɛ̨ą, ə́ ɲɛ̨i hvo mą.

² Yaa ɓə wɔlɔ gɛ, gu nąnni pɔlɔɠaa diɛ kɛla hvaa lɛlɛɛ hɔlɔɓo.

³ Laa na laa háálai ɓə, gu gɔlɔn na guɔ kɛ, Yálá ə yɛnɛ̨ɛ̨ pɛli a naa woo, hɛnŋaai kaa hvo kɛ diɛ, diɛ hvo kulɔ li, yiiɠaa kaa hvo diɛ, ɉu.

⁴ Laa na laa háálai ɓə gɛ, Abɛlə yɛ haláá lɛlɛɛ kulɔ la Yálá ɓa, ə tɛɛ la Kain nwɛi ɓa. Laa na laa háálai, di mąą kɛla hvaa lɛlɛɛ ɓo, diɛ mą: Dələnmoɔi kɛ. Mąąhɔlɔɓo, Yálá kpinįi ə ɲee hee nwɔ haláá hɛn mu. Abɛlə nwɔ laa na laa mąą mɛ̨nį ɓa, bələi mąn, aa haa la, a kɛ lɔ nii hvaai.

⁵ Laa na laa háálai ɓə gɛ, Yálá ə Henɔkə həɠə, hvo haa kaa, nu ta hvo kɛa gaa yili pulu. Gbala ə tɔɔ, Yálá ə ɉəɠə. Gɛɛ di hvo ɉəɠə, di mąą kɛla hvaa ɓo, diɛ mą: ə Yálá liihon.

⁶ Yaan, a kɛ laa na laa hvəə, nui lɔpee ta hva pɛli Yálá liihon ɉi; mąąhɔlɔɓo, nui a kɛ mąąlɛɠɛi Yálá ɓa, mąąnɛ̨ɛ̨ ə laa na yɛ, Yálá kaa laa, ɛlɛɛ, nuą da gwɛli, a di hvɛla kulɔ.

⁷ Laa na laa háálai, Noe ə nwəli tɔɔ, Yálá ə pələ ɓo mą, yɛ hvilɛn na mɛ̨nįɠaai pai kɛi, yai nu hva gaa, mąą mɛ̨nį ɓa. Ə Yálá woo kaa a tɛ̨ą, ə kələn da bɛli, yɛ pɛli ɲəi bɛlɛ́n nuą ɓaloi. Bələ ə yɛnɛ̨ɛ̨ kəlee nwun na pili la, ə kɛ a tələnmolaai a hɔlɔɓo laa na laa hu, ŋą kwɛlin ɉəɠəmun.

⁸ Laa na laa háálai, Abrahamə ə Yálá woo mu hon, ə lɛɛ nwoo mu, ə həɠə, ə li lɔi ta hu, yai gaa pai ɉɔlɔɓoi a gwɛlin, ɛlɛɛ, yɛ li, ɓɛimun gaa lii laa hvo nąą kɔlɔn.

⁹ Laa na laa háálai, ə pa, ə hee nwɛ̨ą lɔi hu, ɓɛi di nąą laakwɛlanmo mą; di kɛ lɔ həɠə-kələɠaa mu, yaa da Isaakə, ɛlɛɛ Ɉakɔbə, a diɛi tii kɛ a mɛ̨nį laakwɛlanmoɔ ŋą kwɛlin ɉəɠə nuą.

¹⁰ Mąąhɔlɔɓo, taai dɔɔ mun, da ɲɛlɛkɛmun gaa a Yálá kpinįi, ya ɓə Abrahamə ə kɛli mąąkpɔn.

¹¹ Laa na laa háálai ɓə gɛ, Sara yaa kpɛlimąn, bələi mąn bɔlɔɔ kɛ la, ə lon ɉɔlɔɓo, mąąhɔlɔɓo, nui mɛ̨nį laakwɛlanmo diɛ, ə laa na, yɛ, a kulɔ nwoo ɓa.

¹² Yili ɓə gɛ, nu tanɔ̨n gbən, yai haa ə kɛ bulu, ə lon gbulu tamąą kaa, di kpulu hu kɛnɛ̨ɛ̨ ə ɓo yɛ, yələkɔlɔn ɉu pɛmɛ̨lɛ̨n-gɔw da gboloyá kwɛlɛ ɲɛ̨ą kɔw.

¹³ Nuą ti kəlee di lɛɛ laa na laa hu, di haa, mɛ̨nįɠaai di naakwɛlanmo diɛ, di hvo naa honŋąą kaa li. Kɛlaa, ə mą kɛ tii, di gaa kwɛaala, di nɛ̨nɛ̨ɓo, di di kpɔwɔ kɔlɔn a nwɛ̨ąą, da hiɛ kulɔ nuą ɓɛ lɔi mɛ̨i.

¹⁴ Gbala ə tɔɔ nuąi da hvaa tii, da nɛ kpɔ a ɉu ponoɔ diɛ, di kaa di hee lɔi kwɛlii;

¹⁵ ɛlɛɛ, akɛ ɓɛi di həɠə laa nąą kili ə lɛɛ di ɲą, də li kɛ pənə di pulu.

¹⁶ A tɛ̨ą, lɔi yii viɛlaɓoɔ, yai gaa yələkɔlɔn ɉu, ya ɓə di kɛli gwɛli. Yili ɓə gɛ, Yálá hva nwumɛ̨ naa heei a di wɔ Yálá, hvó gai, aa taa nįnɛ̨ ta tɔɔ, a di wɔɔ.

¹⁷ Laa na laa háálai, Abrahamə hukɔɔn di mo, diɛ mą ə Isaakə kulɔ a haláái, ə non gɔw tanɔ̨n tii kulɔ a haláá, ya pa, daa gbɛa kɛ mɛ̨nįɠaa laakwɛlanmo mą,

¹⁸ ɛlɛɛ, diɛ kɛ mą: «Isaakə pɔ pələ ɓə, ə́ huwu kaa pai ɓɛlɛi la.»

¹⁹ Abrahamə ə kɛli kɛ gbɔwɔ ɓa; nu ə mą haa, Yálá a pɛli nwun ɉi; yili ɓə gɛ non ə pənə ə lɛɛ ɲəi, yɛ a nwun yɛ kulɔ haa yəi.

²⁰ Laa na laa háálai ɓə nwɔ̨nɔ̨ gɛ, Isaakə ə lúwɔ́ tɔɔ Ɉakɔbə da Esau diɛ, di tinąą mąą mɛ̨nį ɓa.

²¹ Laa na laa háálai, Ɉakɔbə kɛɛ pai laai nąnni kwɛlɛ, ə lúwɔ́ too Ɉosɛfə nonnii tɛitɛi ɓa, ə nwɔ túnwɔ̨n hvilɛn, ə gwɛli hvilɛn Yálá ɓa.

²² Laa na laa háálai, Ɉosɛfə kɛɛ pai lii nąnni pɔ, ə Israɛlə lonni kulɔ mɛ̨nį Eziptə lɔi hu, mąą mɛ̨nį ɓo, ɛlɛɛ, a haa, bələi mąąnɛ̨ɛ̨ di gɔw mąą mɛ̨nį kɛ la, ə mo diɛ.

²³ Laa na laa háálai ɓə gɛ, Moisə hɔlɔɓoɔ, gaa-nuą di noo ɲąnįn ɉaaɓa yee mu. Mąąhɔlɔɓo, di di lon nɛlɛɛi kaa, ɛlɛɛ, di hvo ɲɔw tɔɔmun nwɔ tɔ́n ma.

²⁴ Laa na laa háálai, Moisə kɛnɛ̨i ə mo, hvo hvaa mą di hvo dəli a Faraɔn lon nɛ̨ɛ̨nu, lon.

²⁵ Hvo hvaa mą, hvo niiɓa kɛ nɛ̨ŋɛ̨n ɉu kpɛli tiikpə, kɛlaa yaamun, ə hvaa mą da Yálá nwɔ nuą di mɔ̨nɔ̨ mįi gee pɔ.

²⁶ Ə Kristə ŋą mɔ̨nɔ̨i kaa a hɛn viɛlaɓoɔ ə tɛɛ Eziptə hɛn gɔw ɓa. Mąąhɔlɔɓo, ɲɛ̨i heɛi kɛ hvɛla kulɔ ɓa.

²⁷ Laa na laa háálai, Moisə ə həɠə Eziptə lɔi hu, hvo ɲɔw tɔɔmun ŋą lííholi ɓa, ɛlɛɛ, ə tɔɔ kpąą, yɛ ɲɛ̨i a kɛ nui hva kaa, mą.

²⁸ Laa na laa háálai, ə pakə hɛli pu, ə ɲąmą hiɛ gbonŋaa mɛ̨i, ə gɛ Nwun na pili kɛmun hvo pa túnwɔ̨n Israɛlə lon dɔlɔɔɠaa diɛ.

²⁹ Laa na laa háálai ɓə, Israɛlə lonnii di gboloyá kpɔlu teen na a di kɔ́wɔ mąą kpalaa, ya pa, Eziptə nuąi kɛ bɔ di ɉukɔɔn, ɲá ə di mɛ̨i kpulu.

³⁰ Laa na laa háálai ɓə gɛ, Ɉeriko mąąkpɛ hį́iɠaa diɛ too, di kpɛɛ a daa mąątínɛ̨nŋąą a hvóló mɛ̨ihveelɛ.

³¹ Laa na laa háálai, Rahabə kɛ a wɛlikɛnɛ̨ɛ̨nu, da kwɛli tee nuąi di nwun na hvo pili a gee; mąąhɔlɔɓo, ə ɲee hee gɔ́ nɛ̨lɛ̨ɛ̨nŋaa mu a nɛlɛɛ.

³² Lə mɛ̨nį kpɔ ɓə nwɔ̨nɔ̨ kɛa ŋą́ pɛli moi? Lɔwai hvo ɲə́i, gɛ́ pɛli mɛ̨nį tamąą huyɛɠɛi káá, yɛ bələi: Zedeɔn mąą mɛ̨nį kaa la, Barakə, Samsɔn, Ɉɛfte, Davidə, Samuɛlə da Yálá kwəi mɛ̨nį hukulɔ nuą,

³³ a diɛi, laa na laa háálai, di yee ə tɛɛ tɔɔ lɔi tamąą ɓa, di tələnmolaa pɔ túwɔ́ ɓo, di mɛ̨nį laakwɛlanmoɔɠaa kaa, di laa yɛ hon, diɛ yalaɠaa laaləi hon,

³⁴ diɛ nwɔ̨n gbɔluɠaa luwun, diɛ kulɔ ɓɔwa kwɛaaɠaa yee mu, diɛ kulɔ ɲɔ̨n nwalawalaɠaa hu, diɛ kuláálaa kɛ kɔ́ hu, di yee yɛ tɛɛ kɔlaɠaɠaa diɛ.

³⁵ Laa na laa háálai, nɛ̨ąąi di wɔ nuą daa kɛ haa, diɛ pənə diɛ nwun. Kɛlaa, nu taɠaa diɛ hvaa mą, diɛ di mɔ̨nɔ̨ɓo, diɛ di paa, ə gɛ, di pa yɛnɛ̨ɛ̨ hva kpɛɛ hɔlɔɓo di nwunŋąą pulu.

³⁶ Daɠaa, diɛ di liikpələ yɛlɛkulɔɉu mu, da hvaɠa, diɛ daɠaa yili a yɔwɔn, diɛ daɠaa too gaho ŋą;

³⁷ diɛ daɠaa hɔɔ a kwɛni diɛ haa, diɛ daɠaa hutee a gbɛa haɠa, diɛ daɠaa paa a ɓɔwa kwɛaa. Di kɛ lɔ tii kɛa lɔi mɛ̨i diɛ tɛɛ, ɓɛlaa kɔ́lɔ da ɓooli kɔ́lɔ ɓə kɛ a di mąąhəɠəɠaa, di ɓo a yeehvowolo nuą, diɛ di mɔ̨nɔ̨ɓo, diɛ di hon a ɲɔ̨nwɔ̨ɔ̨,

³⁸ diɛi tii, ɲɛnɛ̨ɛ̨ ŋɛ̨i hvo kɛ a di wɔɔ, di kɛli lɔ li di nwun ma nɔi pun ɉu, da ɲeeɠaa nwuɔ̨, diɛ ɓo kwɛni woloɠaa hu, da yaɓoloonŋaa pɔ.

³⁹ Di kəlee kpɔ, akɛ di kɛla hvaa lɛlɛɛ hɔlɔɓo di wɔɔ laa na laa háálai; bələi mąn ə kɛ la tii, mɛ̨nįi di naakwɛlanmo, di hvo naa honŋąą kaa ɓɛ lɔi mɛ̨i.

⁴⁰ Hvo gaai, Yálá ə mɛ̨nį lɛlɛɛ mąą kili tee gwəi nwɔ̨nɔ̨ a gu wɔɔ, ya ɓaa, mąą hvo nɛ̨ɛ̨li, di hvo həli mɛ̨nį kəlee laa kulɔi ɓa, gu tɔwɔ.