Hanwon 8 - Yálá laawoo hɛɓɛ (dc)

Kili kaa təli ɓo nįnɛ̨ kɛi

¹ Kili kaa təli ɓo kɛi, nwun gɛ ɉu laa yɛ nwoo pili. Ka hvo nwoo mɛ̨n ɉii?

² Ɲee kpu kpuɠaa ɓa, bələɠaa pɔ, bələ taŋanaɠaa ɓa, kili kaa laa tɔɔni.

³ Gaa tɔɔni ɉįi la, yɛ ɓo daa pələ leeɠaa pɔ, yɛ nwoo pili, yɛ kɛ mą:

⁴ «Kaai ɓaa nu lonnii, kaa ɓə gáá ka təlii, Nu kəlee ɓə gáá dəlii.

⁵ Kaai ka hva mɛ̨nį ŋąą kaa, ka pa ŋį́ ka mąąkwɛli. Kaai ɓaa hupu nuą, ka pa ŋį́ ka nwun gɛ ka hu.

⁶ Ka ka wəli tɔɔ, mɛ̨nįi gáá moi kaa, viɛlaɓoɔi; kaa ka tii gáá pələ ɓoi kaa a ɉu pɔ̨nɔ̨ɔ̨.

⁷ Tɛ̨ą mɛ̨nį ɓə gáá naa həlii kaa. Mąąhɔlɔɓo, lɛɛ mɛ̨nį wɛli hvo mą́ą́.

⁸ Váá wooɠaa kəlee haŋąąi, da hvo a lɛɛ, nu ɓowo woo hvo ná.

⁹ Nuąi di nwun gaa di hu, da gaa a ɉu həɠəən ŋąą, nuąi da mɛ̨nį ŋąą kaa, da gaa diɛ nwóó haŋąąi.

¹⁰ Mɛ̨nįi gáá ka kalan ɉii la, ka yili wɛlilakɛ, ka dɛɛ wali ɓa. Ka mɛ̨nį kɔ́lɔn ŋąą wɛlilakɛ, ka dɛɛ hɛni leelee ɓa.»

¹¹ Mąąhɔlɔɓo, kili, hvíɛlaboɔi dɛɛ hɛn gɔw mąąwiaɠaa diɛ. Hɛn gɔwi nwɛli a pɛli ə too nuą diɛ, kili hviɛlaɓoɔi dɛɛ mą.

Kili kaa gbɔwɔ lɛi

¹² «Ɲą́ą́ Kili, kwa mɛ̨nį kɔ́lɔn ŋąą ɓə ku heei kaa tanɔ̨n. Gɛ́ mɛ̨nį ɲąąlaai.

¹³ Nui a mɛ̨nį ɲɔ̨n nwɛli kpɛɛ mą, a kɛ tii, aa ɲɔw Yai-Laa ɓa. Ɲą́ą́ nwɛ́i, kpɔwɔ ŋąą kɛnɛ̨ da ɲɛ̨itɛ di wɛli hvo mą́ą́. Túwɔ́ pələ ɲɔ̨n da lɛɛ hvaa, di wɛli hvo mą́ą́.

¹⁴ Ɲą́ą́ ɓə liɛwoo kaa ɲə́i da mɛ̨nį kɔ́lɔn ŋąą, ɲą́ą́ ɓə gáá a nwun gɛ ɉu, ɲą́ą́ ɓə Heeɓolaa kaa ɲə́i.

¹⁵ Ɲą́ą́ ɉáálai ɓə tɔɔɓɛlaa da tɔɔlaa kɛ la, ɉáálai ɓə kiti tee nuą da dee la a ɉaŋąą.

¹⁶ Ɉáálai ɓə ɲɛ̨itɔwɔ nuą da ŋąąwooɓo kɛ la. Ɉáálai ɓə kalanɉonŋąą, nwun nąmįną, da di kɛ mɛ̨nį kɛ la.

¹⁷ Nuąi da nwɛ́lilakɛ, diɛ gwɛ́li a di lii kəlee, da gáá.

¹⁸ Hɛn gɔw da mąąwiɛ di kaa ɲə́i, da hɛn gɔwi a lamun da tələnmolaa.

¹⁹ Nwɔ́ mɛ̨inɛ̨ɛ̨ hviɛlaɓoɔi hɛni huwaa ɓa, ɛlɛɛ, di tɔlɔ viɛlaɓoɔi wali ɓa.

²⁰ Pələ haŋąą ɓə ŋą́ hiɛ ɉu, da tələnmolaa pələ.

²¹ Nuąi da nwɛ́lilakɛ, ŋą́ di kɔ́ a hɛn gɔw, ŋį́ di wɔ hɛn gɔw puiɠaai laahvɛɛ.

²² Ɲą́ą́ ɓə gbɛa kɛ Yai-Laa yəi mɛ̨nį kəlee tɔwɔ, ŋį́ kɛ laa gɛ koló pɔlɔ-pɔlɔɠaa kəlee tɔwɔ.

²³ Ɲą́ą́ ɓə ə gbɛa ɉéé hɛn gəlee nwun na, ŋį́ gbɛa kɛ laa, gɛɛ hvo yɛnɛ̨ɛ̨ pɛli.

²⁴ Ɓɛlɔwai hɛn lɔpee ta hvo ni kɛ kɛli la, ŋį́ gbɛa kɛ laa, gɛɛ yátonŋaa di hvo kulɔ, ŋį́ gbɛa kɛ laa.

²⁵ Gɛɛ yeeɠaa di hvo kɛ tɔɔi, yee kpu kpuaa di hvo tɔɔ, ŋį́ gbɛa kɛ laa.

²⁶ Gɛɛ Yálá hvo lɔi kpalan naa da yɛɛkɔwɔɠaa, gɛɛ hɛn lɔpee ta hvo kɛ lɔi mɛ̨i,

²⁷ ɓɛlɔwai ə kɛi yələkɔlɔn ɉɛlɛn na, ŋį́ kɛ laa. Gɛɛ hvo lɔi ɲɛn dɔɔ, gboloyá mɛ̨i, ŋį́ gbɛa kɛ laa.

²⁸ Ɓɛlɔwai ə kɛi tulɔ kpinįn ɉɛlɛn na yələ kwəi, gɛɛ lɔi mɛ̨i yáɠaa ton və kɛ kulɔi,

²⁹ ɓɛlɔwai ə kɛi gboloyá ɲɛn dɔɔ la, yii mąą hvo nɛ̨ɛ̨li hvo lan mɛ̨i, gɛɛ lɔi kpon ɉeei,

³⁰ Ɲą́ą́ ɓə kɛ Yálá pɔ, gɛ́ mɛ̨nį kəlee ɲɛlɛ lɛ mą, gɛ́ ɓo goló nwun na. Ɲą́ą́ ɓə kɛ a niiɓa mɛ̨nį nwun a Yələ kəlee, gɛ́ pə́lə́ kɛ ɲɛ̨i a yələ kəlee.

³¹ Gɛ́ pə́lə́ kɛ nwɔ lɔi kpalan ŋɛ̨i ə naa mɛ̨i, gɛ́ mɛ̨nį nu hvúlúɠaa lɔwai, ə ɓo a gwə́inɛɛ mɛ̨nį.

Lúwɔ́ lon maa nui a nwəli tɔɔ kilimąą woo ɓa

³² Yiihu, nónnii, ka ka wəli tɔɔ mą́ą́. Ka nwɔ́ liɛwooɠaa hon, ka kɛ a lúwɔ́ lonnii.

³³ Mɛ̨nįɠaai gáá ka kili pui ɉu, ka hvo ɓo mą ka hvo doo. Ka kanąn mą, ka kɛ a kilimąą nuą.

³⁴ Lúwɔ́ lon maa nui a nwəli tɔɔ nwóó ɓa, dɔɔ ɲə́i bɛlɛ́ laaləi a yələ kəlee, yɛ ɓo a ɲɛ̨i yɛ ɲɛ̨i kɛ ɲə́i bɛlɛ́ laaləi ɓa.

³⁵ Mąąhɔlɔɓo, nui a ɉɔ́lɔɓo, aa yɛnɛ̨ɛ̨ hɔlɔɓo, a gɛ tii, a Yai-Laa nwɔ mɛ̨inɛ̨ɛ̨ hɔlɔɓo.

³⁶ Kɛlaa, nui a ɓaɠaɓo mą́ą́, a kɛ tii gaa gbɔwɔ nwąnąi. Nuąi nwɛ́li kpɛɛ diɛ, haa ɓə nwɛli kaa diɛ.»

« အရင်

နောက်တစ်ခု »

Bible Society in Guinea-Conakry

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ