Hanwon 16 - Yálá laawoo hɛɓɛ (dc)1 Nu a mɛ̨nįɠaa mąą kili tee gwəi, Yai-Laa ɓə a ɉeegbąɲą. 2 Nu a ɉiɛ pələ kəlee kaa a ɉaŋąą gbɔwɔ ɲɛ̨i ɓa, Kɛlaa, Yai-Laa ɓə ə nu kwəi kiliɠaa kɔlɔn. 3 Ə́ kɛ kolóɠaa hu lɛ Yai-Laa ɓa, Yaa ɓə a gɛ, ə́ wɔ kwəi kiliɠaa laa yɛ hon. 4 Yai-Laa ə mɛ̨nį kəlee kɛ mɛ̨nį nwun gɛ mą. Ə mą kɛ, nwąnąlɔmun mə, ə bɛli mąąwɛli yələ mąą mɛ̨nį ɓa. 5 Kpɔwɔ ŋąą kɛnɛ̨ nuą kəlee wɛli kpɛɛi Yai-Laa ɓa, di hvo pai lɛɛi lɔ tii, di hutɔɔ mɛ̨nį hva ɉəɠə mą. 6 Ɲɛ̨imąąwɛli kaa da lɛɛ nwoomulaa da nɛ̨ŋɛ̨n nwaa, Yai-Laa nwɔ ɲɛ̨i ɲɔw mąąlaa yɛ nu pulu tɔɔ mɛ̨nį ɲɔ̨n ma. 7 Nui ɉiɛ pələ a Yai-Laa lii hon, Yálá a mąą nu da ɲowoɠaa di lɔwai pɔn naa kulɔ. 8 Hɛn gɛɛ nu yəi tiikpə tələnmolaa hu, hviɛlaɓoɔi hɛn gɔw kɛnɛ̨ ɓa, hvulu yɛnɛ̨ɛ̨ hu. 9 Nu kili a ɉiɛ pələ mąąkpɛɛ, Kɛlaa, Yai-Laa ɓə a gɔwɔ hukɔ́lɔ. Tɔɔɓɛlaa mąą mɛ̨nį 10 Tɔɔmun vaa woo kaa yɛ Yálá a kɛi kiti tee, hvo kɛ gaa ɲɛ̨i kɔ́lɔn mɛ̨nį kɛi ɉu. 11 Yai-Laa hvo bɔ hvulu hvo kɛ gu wɔ hɛn gɔwɔn ŋąą hu. Ya ɓə hɛn gəlee wiɛ pələ kpaɠala kaa mą. 12 Nwąnąlɔ túwɔ́ wɛli kpɛɛi kpɔ tɔɔɓɛlaa diɛ kpɔ tɛ̨ɛ̨tɛ̨ɛ̨?. Mąąhɔlɔɓo, tɔɔlaa lamun ɉɛn maa tələnmolaa. 13 Tələnmo pələ ɓoɔ, a tɔɔɓɛlaa ɲɛ̨i lɛlɛɛ hee nu ɓa. Nuąi da mɛ̨nį ɓo a tɛ̨ą, di wɛli kaa tɔɔɓɛlaa diɛ. 14 Tɔɔmun nii a holi, nu paa nuą too hiɛ li, Kɛlaa, kilimąą mun a tɔɔmun ɉu hon. 15 Tɔɔmun a yɛlɛ, yɛnɛ̨ɛ̨ nɛ̨ɛ̨ li, a ɲɛ̨i lɛlɛɛ hee nu ɓa, a kɛ yɛ weewaa tulɔ. 16 Kili hviɛlaɓoɔi, hɛni hu waa kɛɛ nu yəi ɓa. Nu nwun gɛɛ ɉu hviɛlaɓoɔi ə tɛɛ wali kɛɛ nu yəi ɓa. 17 Nu haŋąąɠaa kpaalə ɓaa, di di mąą kwɛa mɛ̨nį ɲɔ̨n ma. Mąąhɔlɔɓo, nu túwɔ́ pələ yɛlɛ kɛɛ a nu nwɔ yɛnɛ̨ɛ̨ mɛ̨i kaa. 18 Kpɔwɔ ɲąą kɛnɛ̨ a kɛɛ kala, ɲɛ̨itɛ yɛ nu hukala. 19 Ka kpɔwɔ mąą yɛɛ nuą ka kɛɛ ka kee ɓa, hviɛlaɓoɔi ə tɛɛ ka kpɔwɔ ɲąą kɛnɛ̨ nuą ka kɛɛ hɛn gɔw ɲąąkwɛlɛi ɓa. 20 Nui a giliŋąhiɛ yɛ mɛ̨nį ɓo, a kulɔ ɉu a nɛlɛɛ. Nui nwɔ̨nɔ̨ a nɛɛ ɲəi kɛ Yai-Laa ɓa, nwun na nɛ̨ɛ̨ lon ni. 21 Nui kili kaa mą, ya ɓə da kɛ mą nwun gɛ ɉumun. Woo ɲąąlaɠi ɓə a nu kili ta pɛlɛ mą. 22 Nuąi da kili mɛ̨nį kɛ, diɛ ɓə yíipoo kaa di yəi. Kilikpɛɛɲəi nuą di wɔ ɓowo ɓə gaa a di hutɔɔ hɛn. 23 Kilimąą mun a gbɛa giliŋąhiɛ, yɛ tɛɠa lɛɛ hvaai. Mɛ̨nį kɔ́lɔn mɛ̨nį a kulɔ na. 24 Wɛlikɛmąą woo kaa yɛ kwɛin nwulɔ, a nu lii laa, ə vaŋalɔ. 25 Túwɔ́ pələi nu a giliŋąhiɛ mą yɛ kɛ ɉaŋąąi, ŋąą a pɛli ə kpɛɛ a haa. 26 Pulu a kɛ kóló kɛmun ma, a gɛ kóló kɛ ɉa, ɉɛn mįi laaləi a mąą wəleen. 27 Nu kpoloon a gbɔwɔ too palə tee, nɛn gələn ŋąą na yɛ nwɔ̨n. 28 Gbąnąlaa ɲɔ̨nwɔ̨ɔ̨ kɛmun a hvaa too nuą lɔwai. Hiɛnɔwai yɛ ɓɛlan naa taɠa. 29 Toomɛ̨i kɛmun a mɛlan ŋąą hɛn, yɛ di hvilɛn pələ ɲɔ̨nwɔ̨ɔ̨ mɛ̨i. 30 Nui a ɲɛ̨i laa kpulu, yɛ giliŋąhiɛ mɛ̨nį ɲɔ̨n ma, yɛ ɲin gbɔn naa wulun ɉu, gaa mɛ̨nį ɲɔ̨n mąą kili teei gwəi, aa gbɛa kpɛɛ a gɛɛ nįį hu. 31 Nwun bowa kaa a mąąwiɛ ɓɔlɔ, nu a ɉɔlɔɓo tələnmo pələ mɛ̨i. 32 Nui hva níiholi ɉa, viɛlaɓoɔ ɓə kɔ́kuláá ɓa. Nui a gbɔwɔ hu hon, viɛlaɓoɔ ɓə dɛɛ taalee honmun ma a kɔ́. 33 Nuą da kpɛɛn bili, Kɛlaa, Yálá ɓə dɛ̨ą a kulɔ na. |