Gɛlaɠaa 10 - Yálá laawoo hɛɓɛ (dc)Piɛrə da Kɔrnɛyɛ 1 Hulɔnu ta ə kɛ Sesare daai, diɛ kɛ mą: Kɔrnɛyɛ. Ə kɛ a Romə kɔlaɠai da kɛ mą: «Italikə» nwun nąmu kɛnɛ̨ ta. 2 Dələnmoɔ kɛ yɛ ɲɔw Yálá ɓa da ɲəi bɛlɛ́n nuą kəlee. Ə kɛli mɛ̨inɛ̨ɛ̨ kɛ Ɉuifəɠaa diɛ, yɛ Yálá hvɛli a yələ kəlee. 3 Yələ ta, hvóló mąąlaa, ə malaka ta kaa a mąą ponɔɔ, ə lɔ ɲəi bɛlɛ́n, ə dəli, yɛ mą: «Kɔrnɛyɛ!» 4 Kɔrnɛyɛ ə ɲɛ̨i hee mą hįį, ə ɲɔw, yɛ mą: «Ną́mu! Yɛ́ lə?» Malaka yɛ mą: «Yálá hvɛlii yá kɛ moi, yɛ́ kpɔnmąą tɛɛ mąąwɛli nuą pɔi, Yálá aa ɲee hee yili mu, 'hvó lɛ̨ą li yɛ́. 5 'Nuą tɔɔ yiihu Ɉope, Simɔn laamun da kaa laa, naa mɛ̨i hee ɓaa: Piɛrə, di dəli. 6 Gaa kɔlɔtɔɔmun da yəi bɛlɛ́n, da kɛ yaa kpɛli mą Simɔn. Nwɔ pɛlɛ́i kaa gboloyá kwɛlɛ.» 7 Malakai tii kɛli mɛ̨nį ɓo Kɔrnɛyɛ ɓa, yii kɛa ə li, Kɔrnɛyɛ ə nwɔ tínuą hveelɛ tɔɔ, da nwɔ holahii tɔ̨nɔ̨, diɛi kɛ ɲee mu. Gɔ́kulaa ti yaa kpɛli ə kɛi ɲɔw Yálá ɓa. 8 Mɛ̨nįi ti ə gaa, ə ɉukulɔ diɛ, yili pulu, ə di tɔɔ Ɉope. 9 Mąą yələ laaɓoɔ, ɓɛlɔwai di kɛi li la Ɉope daai, di lɛɠɛɛ kɛa daa kpala, ə kɛ a hvoló tɛɛ nwun ma lɔwai, Piɛrə ə tɛ ɲələi pɛlɛ́ ɲįmąn mu, yɛ Yálá hvɛli. 10 Kɛlaa, pulu ə ɉon. Di lɛɛ gɔ̨nɔ̨n ɲilii, ɲɛ̨i ə tɔɔ kwɛlɛɛn mɛ̨nį ta hu. 11 Ə yələkɔlɔn gaa naa ə ɓo, hɛn da ə həɠə laa, yɛ yɛɛ, yɛ ɓo yɛ kpɔlɔ kɛnɛ̨ yɛli nąąn gbulɔn ŋąą mą, yɛ yɛɛ nɔi ɓa. 12 Gbɔlɔi ti hu, huwɔ huwui kpɔ gɔwɔ kaa mu nąąn, da tala huwɔɠaa, ɛlɛɛ, nwɛ̨nį huwu lɔpee gəlee, di ɓo ɉu. 13 Woo ta ə tɔɔ, yɛ Piɛrə ɓa: «'Ə́ muhəɠə, 'ə́ da paa ə́ mįi!» 14 Piɛrə ə nwoo ɲąąpənə yɛ mą: «Oo Ną́mu! Və́ hvaa li mą! Mąąhɔlɔɓo, nwɔ́ yɛnɛ̨ɛ̨ kəlee yee mu, hɛnŋąai mąą hvo həɠə li, di kɔ́hɔɓoɔ, və́ ta da mįi li.» 15 Nwoo ti ə pənə nwɔ̨nɔ̨ yɛ mą: «Ɉɛn Yálá ə mąąhəɠə, 'hvó kɛ mą: gɔhɔɓoɔi.» 16 Di gɛi kɛ kpɔ ti gee mɛ̨i haaɓa, yili pulu, ɉɛn ti ə pənə ə tɛ. 17 Ɓɛlɔwai Piɛrə ə kɛi gwəi kwɛli la gɛɛ tii ə gaa mukulaa ɓa, nąąlɔwai ɓə nuąi Kɔrnɛyɛ ə di tɔɔ, di Simɔn nwɔ pɛlɛ́i nąą mąąni kɛ la, di nɛ diɛ; di pa kɛa di həli bɛlɛ́ laaləi. 18 Di nąą bɛlɛ́nmun da təli, di mąąni kɛ, diɛ mą: «Simɔn da kɛ mą: Piɛrə, ɓɛ ɓə gaa laa?» 19 Piɛrə nwɛi ə kɛli lɔ ni giliŋąhiɛ gɛɛ ti ə gaa mą, Kili-Mąąhəɠɛɛ yɛ mą: «'Ə́ wəli tɔɔ, nu hveelɛ daa pa ɓɛ bɛlɛ́ laaləi, diɛ ə́ kwɛli. 20 'Ə́ muhəɠə, ə́ yɛɛ, ka diɛni ka li, ə́ kwəi hvo pili yɛ́, ɲą́ą́ ɓə di tɔɔ.» 21 Piɛrə ə yɛɛ nu hveelɛi ti pɔ, yɛ diɛ: «Nui ka káá gwɛlii, ya ɓaa a ɲą́ą́; lə mɛ̨nį ɓə ka paa la?» 22 Di nwoo ɲąąpənə diɛ mą: «Ɉolahi nwun nąmui a Kɔrnɛyɛ, ya ɓə ku tɔɔ, tələnmomun ni, naa lɛlɛɛ tɛɛi Ɉuifəɠaa lɔwai. Malaka mąąhəɠɛɛ ta ə mo mą, yɛ mąąnɛ̨ɛ̨ ə ə́ təli ɲəi bɛlɛ́n, mɛ̨nįɠaai ə gaa, ə mo yɛ́.» 23 Piɛrə ə di lɔ bɛlɛ́n, ə di nwɛ̨ąlaa kɛ. Mąą yələ laaɓoɔ, da diɛni di bələ həɠə diɛ li, Ɉope kalan nɛa taɠaa di lɛɛ Piɛrə pulu da diɛni də li. 24 Yili pulu, yələ laa ɓoɔ, di həli Sesare daai. Kɔrnɛyɛ nwɛi, gɛɛ di mąąkpɔn ɉii, ə nwɔ nuą da nwɛlikɛmąą nuą təli. 25 Piɛrə kɛɛ pai, Kɔrnɛyɛ ə pa, ə nɛ̨nɛ̨ɓo, ə pu nwungbəla, a mąąwiɛ pələ. 26 Kɛlaa, Piɛrə ə ɲee too ɉu ə ɉaŋą ə dɔɔ, yɛ mą: «'Ə́ muhəɠə! Mąąhɔlɔɓo, gáá lɔ a nu yɛ bələi ə́ kaa la.» 27 Di lɛɛ nonó kɛi di lɔ bɛlɛ́n, nu kpulu kɛnɛ̨ kaai ə mo, 28 yɛ diɛ: «Ká kili kaa ɉu kaa kɛ, tɔn nwalawala kaa Ɉuifəɠaa mɛ̨i, di ta hva pɛli lɔi huwu takpɛli yəi bɛlɛ́n, di hvo nulaa kɛ. Kɛlaa, nwɛ́i, Yálá aa gilaa pono, yɛ, mąą hvo nɛ̨ɛ̨li və́ nui lɔpee ta kaa a nu kɔ́hɔɓoɔ, a wala kɛ ti a nu ɲɔ̨nwɔ̨ɔ̨. 29 Yili ɓə gɛ, və́ lənə pai ə́ wɔ təli ɓa, ŋą́ą́ pa, yɛ́ lə?» 30 Kɔrnɛyɛ ə nwoo ɲąąpənə yɛ mą: «Aa kɛ a hvoló haaɓa, kpɔlɔ a ɓɛlɔwai, hvóló mąąlaa, ŋį́ kɛ ɲə́i bɛlɛ́n gɛ́ Yálá hvɛli, kpɔlɔ ɲąąɓa, ŋį́ nu ta kaa tɔɔni níí la, mąąhəɠəɠaa yɛ kwələ kpɔ pə-pə. 31 Yɛ mą́ą́: ‹Kɔrnɛyɛ! Yálá hvɛlii yá kɛ moi, aa mɛ̨n, mɛ̨inɛ̨ɛ̨i yá kɛ gɛi nuą diɛ, hvo lɛ̨ą li mą. 32 Nu ta tɔɔ ə li Ɉope daai, Simɔn, naa mɛ̨i hee ɓaa: Piɛrə, ə dəli ə pa. Gaa gɔlɔtɔɔmun da kɛ mą Simɔn ɲei bɛlɛ́n, gboloyá kwɛlɛ.› 33 Ɲąąɓa ŋį́ nuą tɔɔ diɛ pa ə́ təlii, ya ka tii, ə́ gɛ a nɛlɛɛ ə́ pa. Yiihu kɛa, ku kəlee kuɔ ka ə́ liila, yii kpɔ gu Ną́mu ə mo yɛ́, ku wəli tɔɔi, mo kuɔ.» Piɛrə ə nuą kalan Kɔrnɛyɛ yəi bɛlɛ́n 34 Nąąlɔwai, Piɛrə ə mo kɛa diɛ yɛ diɛ: «A tɛ̨ą, ŋą́ą́ gɔlɔn gɛ́ diɛ Yálá hva nu hu yɛɠɛ. 35 Nui lɔpee a ɲɔw mą, yɛ tələnmo yíiɓo a ɲɛ̨i lɛlɛɛ hee mą. 36 Ə mɛ̨nįɓo Israɛlə lonnii diɛ, yɛ liilaa wəlɛɛ lɛlɛɛ laa həli diɛ, a Jesus Kristə yai a nu kəlee di Ną́mu. 37 Mɛ̨nįi kɛ Ɉude lɔi hu nąą kəle, ə gɔwɔ tɔɔ, Galile lɔi hu Ɉaan nwɔ nu mąąwaa kalan gɛɛ pulu, gbaɠala kaa káá. 38 Jesus ti həɠə Nazarɛtə, bələi Yálá ə ɉəɠə la ɉu ə maati a Kili-Mąąhəɠɛɛ da huwalawalalaa, ə tɛɛ kɛɛ nąą kəlee ɓa, yɛ mɛ̨inɛ̨ɛ̨ kɛ, nuąi kpɔ kɛ nąnį yee kɔnma yɛ di ɓalo, mąąhɔlɔɓo, Yálá ə kɛ bɔ. 39 Mɛ̨nįɠaai kpɔ ə gɛ Ɉuifəɠaa di wɔ lɔi hu da Ɉerusalɛmə, ku kaa a yili mąą kɛla. Di ɉon, di gbanwo wulu. 40 Hvóló haaɓa kulaa ɉu, Yálá ə nwun ə gulɔ haaɓɛlaa lɔwai, yɛ nwɔ̨nɔ̨ hvaa mą, Jesus yɛ gbɔwɔ lɛ, 41 hvo kɛ gbɔwɔ lɛ li nɔi nuą kəlee diɛ, kɛlaa, gɛlaɠaai Yálá ə gbɛa di həɠə ɉu diɛ ɓə, a kuɔi ŋɛ̨i, nwunŋąa pulu kwa diɛni ku kɔ̨nɔ̨n mįi gee ɓa, ku ku kpələ. 42 Ə vɛli kuɔ, yɛ ku mąą mɛ̨nį laa həli nɔi nuą diɛ, ɛlɛɛ, ku nɛ diɛ kuɔ diɛ yaa ɓə Yálá aa ɉəɠə ɉu, aa gɛ a nu hvulúmąąɠaa da haaɓɛlaa di kiti teemun. 43 Yaa ti ɓə Yálá kwəi mɛ̨nį hukulɔ nuą di mąą kɛla hvaa ɓo, diɛ kɛ mą: Nui lɔpee a mąą mɛ̨nį kaa a tɛ̨ą, mąą nui ŋą nɛ̨ŋɛ̨n mąą hvaa a lɛɛ Naa hu.» Hį́i takpɛliɠaa di Yálá nwɔ Kilii hɔlɔɓo 44 Piɛrə ə lɛɛ lɔ bələɠaai ti ɓoi, nuąi kpɔ kɛli nwoo mɛ̨n, Nįį-Mąąahəɠɛɛ ə yɛɛ gəlee mɛ̨i. 45 Laa na nuąi kɛ a Ɉuifəɠaa, diɛi lɛɛ Piɛrə pɔ diɛ pai, di kwəi ə pili diɛ, mąąhɔlɔɓo, Kili-Mąąhəɠɛɛ yəi mɛ̨inɛ̨ɛ̨ aa kɛ tɛɛ, ə mą kɛ, huwu takpɛliɠaa pɔ. 46 Hvó gaai, di kɛi nuąi ti woo mɛ̨n, diɛ hįi woo takpɛliɠaa ɓo, diɛ Yálá kɛnɛ̨ pələ hukulɔ. Piɛrə ə pənə nwɔ̨nɔ̨ yɛ diɛ: 47 «Akɛti, nu ta a pɛli mɔ̨ɔ̨ lənəi nuą ŋɛ̨i mąąwaa mɛ̨nį ɓa, a diɛi, daa Kili-Mąąhəɠɛɛ hɔlɔɓo lɔ yɛ guɔ?» 48 Piɛrə ə mo yɛ di di mąąwaa Jesus Kristə laa hu. Nuą ti di ɉuhvɛli Piɛrə ɓa, diɛ mą: gu yíikuu tawolo kɛ ni gu kee ɓa. |