Lɛɛ gbɔwɔ ɓa 29 - Yálá laawoo hɛɓɛ (dc)

Ɉaláá laa hɛli nuą hee mɛ̨nį

¹ «Bələi ə́ kaa pai gɛi la yɛ́ Aarɔn da nonnii di hee a nwɔ́ haláá laa həli nuą ə gɛ di lɛɛ lɔ kɛa nwɔ́ kólói hu, bələ ka: Nįŋɛ̨ hilɛ tɔ̨nɔ̨ həɠə da ɓɛlaa hilɛ hveelɛ, yii kpɛɠii hva kɛ diɛ.

² Ə́ bɛlɛ lɛɠɛ ɓa yii dɛ hɛn və ɉu, nwɔ̨mįi yii dɛ hɛn və ɉu, di ɲɔwɔɔn a wulɔ, di da kɛ a nwɔ̨mįi pɛlɛɛ di wulɔ pu mą, gəlee diɛ ɓo a mɔ̨nun.

³ Yá di pu kpɔlɔ ta hu, ɉɛnŋąąi tii da nįŋɛ̨ hilɛ, ə mą kɛ mɛlaa hilɛ hveelɛi tii, ə́ gəlee kulɔ a haláá.

⁴ «Yá pa a Aarɔn da nonnii gee kaa pɛlɛ laaləi, ə́ di waa,

⁵ Yili pulu, ə́ ɉaláá kulɔ həɠəɠaa too Aarɔn kwąną, ə́ ɉəɠə kɛnɛ̨ too gwąną, ə́ ɉəɠə mɛ̨i həɠə kwɛa too nwɔ həɠə kwɛa mɛ̨i, ə́ ɉəɠə mɛ̨i həɠə too yili mɛ̨i, yili pulu, gilɛn ɉəɠə too kɛa yili mɛ̨i, ɲɛliɠaai ti ɉɛlɛnŋąą ɉəɠə mɛ̨i həɠə ɓa, ə́ gbulɔn ɉəɠə ɓa.

⁶ Ə́ mɔlɔ pɛlɛ nwuɔ̨, ə́ gɔlɔ palaa hɛlɛn mɔlɔ ɓa.

⁷ Ə́ nwulɔ mąąhəɠɛɛ həɠə, ə́ bu nwuɔ̨, ə́ mąątí a da.

⁸ Ə́ mo Aarɔn lonnii diɛ, di lɛɠɛ laa, ə́ di wɔ həɠəɠaai too di kwąną.

⁹ Ə́ ɲala tɔɔ di ləɠəi, ə́ mɔlɔɠaa pɛlɛ Aarɔn da nonnii di nwuɔ̨, ɉaláá kulaa mąą laa ə kɛ kɛa diɛ a yələ kəlee. Ə́ Aarɔn da nonnii di lɔ kɛa di wɔ kólói hu.

¹⁰ «Ə́ pa a nįŋɛ̨ hilɛi ti gee kaa pɛlɛ laaləi, Aarɔn da nonnii di di yee pɛlɛ nwuɔ̨.

¹¹ Ə́ nįŋɛ̨ nwun dee Yai-Laa lííla, gee kaa pɛlɛ laaləi.

¹² Ə́ nįŋɛ̨ ɲąmą ta həɠə, ə́ ɉiɛ ɉaláá taɓali mįnɛ̨ɠaa diɛ a ə́ yee, yili pulu, ə́ ɲąmą kpəli pu ɉaláá kulɔ taɓali kɔ́wɔ mu.

¹³ Ɉuwɔ wulɔi ti a kɛ gwəi hɛnŋąą diɛ, ɲɛlɛ ɓa, da gwəi kwɛni kɔ́w hveelɛi ɓa, ə́ gəlee həɠə, ə́ gələn ɉaláá kulɔi.

¹⁴ Kɛlaa nįŋɛ̨ huwɔ nwɛi, gɔlɔ, da gbo, ya di kələn daa pulu a nɛ̨ŋɛ̨n mąąhvaalɛɛ haláá.

¹⁵ «Yili pulu, ə́ mɛlaa hilɛ tɔ̨nɔ̨ həɠə, Aarɔn da nonnii di di yee pɛlɛ nwuɔ̨.

¹⁶ Ə́ mɛlaa hilɛi ti paa, ə́ ɲąmą həɠə, ə́ daɠa ɉaláá kulɔ kəhi ɓa.

¹⁷ Ə́ mɛlaa hilɛ tee a gbuwulu kpɛa kpɛa, ə́ gbo-yɛliɠaa waa da gɔwɔ kwąnąɠaa, ə́ di laa ɉuwɔ kpuwuluɠaa da nwun galən di mɛ̨i.

¹⁸ Ə́ mɛlaa huwɔi tii kəlee kələn ɉaláá kulɔ kəhi mɛ̨i, yili a kɛ a haláá yii da gəlee kələn, gun nɛ̨ɛ̨ a Yai-Laa nwɔɔ.

¹⁹ «Yili pulu, ə mɛlaa hilɛ veelɛnąą həɠə, Aarɔn da nonnii di di yee pɛlɛ nwuɔ̨,

²⁰ ə́ mɛlaa hilɛi ti nwun dee, ə ŋąmą ta həɠə, ə da hiɛ Aarɔn ɓa-mįi-yee wəli kpɛlɛ ɓa, ə mą kɛ nonnii wəli kpɛlɛ ɓa, da di ɓa-mįi-yee kpiɛ-ɉɛnɛ̨ ɓa, da di ɓa-mįi-yee kɔ́wɔ kpiɛ-ɉɛnɛ̨ ɓa; ə ŋąmą taɠa ɉaláá kulɔ taɓali ɓa nąą kəlee.

²¹ Ɲąmąi ti a lɛɛ ɉaláá taɓali mɛ̨i, ə da həɠə, da nwulɔ mąą həɠɛɛ, ə da taɠa Aarɔn da mąą həɠəɠaa diɛ, ə mą kɛ da nonnii da di mąą həɠəɠaa, a kɛ ti, di mąą a həɠə, Aarɔn da mąą həɠəɠaa, nonnii da di mąą həɠəɠaa.

²² Mɛlaa huwɔ wulɔɠaa həɠə, nwon, nwulɔi ti a kɛ gwəi hɛnŋąą diɛ, ə́ ɲɛlɛ da gwəi kwɛni kɔ́w hveelɛi həɠə da nwulɔi a kɛ diɛ, da mamįiyee wɛlɛ, yili kaa a ɉaláá kulɔ nuą hee ɓɛlaa hilɛ.

²³ Yili pulu, ə́ lɛɠɛ həɠə gbɔlɔ hu, da nwɔ̨mįi yii bɛliɛ a wulɔ, yai ti nɛɠɛ tɛ hɛn və ɉu di kaa la Yai-Laa lííla.

²⁴ Ə́ gəlee laa Aarɔn da nonnii di yəi ŋą, ə́ mo, di naa həli Yai-Laa ɓa.

²⁵ Ə́ pənə ə́ ɉəɠə di yəi, ə́ gələn ɉaláá kulɔi, yili a Yai-Laa líílaa. Yili kaa a haláá yii gələn gun nɛ̨ɛ̨. Haláá kɔ̨nɔ̨n ni, yɛ́ gələn a Yai-Laa nwɔɔ.

²⁶ Ɉaláá kulɔ nuą hee ɓɛlaa hilɛi ti, yai ti a Aarɔn nwɔɔ, ə́ gəŋə həɠə, ə́ naa həli Yai-Laa ɓa, a haláá hɛn naa həli pələ. Yili a kɛ a ə́ wɛi.

²⁷ «Mɛlaa kəŋəi ti ə́ naa həli, da mɛlaa wɛlɛi ti ə́ naa a dee, yá di laa a dee, gɔnwɔ̨nai ti di naa həli, nwɛlɛi di naa a dee, ɉee hɛn mɛ̨ni ɓa, ya ɓə a Aarɔn da nonnii di wɛi.

²⁸ A kɛ a Aarɔn da nonnii di wɔɔ, yili kaa a tɔ́n yii hva ɉəɠə mą a yələ kəlee, da ɉɔlɔɓo ti Israɛlə lonnii yəi, yili ɓə gaa a di wɔɔ, ɉaláá kulɔ pələ tɛitɛi kəlee hu. Aarɔn da nonnii di tɔɔi li, niilaa haláái da kɛ gulɔi Yai-Laa ɓa ɉu.

²⁹ «Aarɔn nwɔ haláá kulɔ həɠəɠaai da lɛɛ nonnii yəi bulu, yiliɠaai diɛ doo di kwąną a volói ŋɛ̨i da di mąąti la, diɛ di hee.

³⁰ Non ɲii pai mąą hvalin ɉii ɉaláá kulɔi, a di kɛ mą, hvóló mɛ̨ihveelɛ yee mu, hvo tɛɠa kɛ lɔi gee kaa pɛlɛ́ mu, yɛ ɉaláá kulɔ.

³¹ Yá nuą hee ɓɛlaa hilɛ həɠə, ə ɉuwɔ yili kɛɛnąą mąąhəɠɛɛ ɓa.

³² Aarɔn da nonnii di mɛlaa huwɔ mįi, da nɛɠɛ ti a kɛ gbɔlɔ hu ɉaláá kulɔi, da mįi gee kaa pɛlɛ laaləi.

³³ Yii di gɛ a nɛ̨nŋɛ̨n gbɛɛ haláái, ɓɛlɔwai da kɛ ɉaláá kulaa mąą laa tɛɛ la di pɔ, diɛ di hee a ɉaláá kulɔ nuą, da yili mįi. Nu takpɛli lɔpee hva da mįi, mąąhɔlɔɓo, hɛn mąąhəɠɛɛ li.

³⁴ Nuą hee huwɔi ti kpəli a lɛɛ, ə lɛɛ ɉu yələ ə ɓɔ, ə mą kɛ nɛɠɛ ta, ə́ di kələn. Di hvo da mįi, mąąhɔlɔɓo, mąąhəɠɛɛi.

³⁵ Bələ ɓə ə́ kaa pai gɛi la Aarɔn da nonnii di mąą mɛ̨nį hu, yɛ bələi kpɔlɔ tii ŋą́ ə́ tí la, ə́ kaa pai di heei di wɔ kólói hu hvóló mɛ̨ihveelɛ yee mu.

Ɉaláá kulɔ kəhi mąą həɠə mɛ̨nį

³⁶ «Hvoló tɛitɛi yee mu, yá nįŋɛ̨ hilɛ kulɔ a haláá nɛ̨ŋɛ̨nŋąą mąąhvaa lɛɛ mɛ̨nį ɓa, yá nɛ̨ŋɛ̨n mąąhvaalɛɛ haláá kulɔ ɉaláá kulɔi, yɛ́ nɛ̨ŋɛ̨n gulɔ mą, ə́ nwulɔ mąą həɠɛɛ hiɛ mą. Yɛ kɛ la ti a Yálá nwɔɔ.

³⁷ Hvóló mɛ̨ihveelɛ yee mu, ə́ kaa pai kɛi nɛ̨ŋɛ̨n mąą hvaalɛɛ haláá kulɔi, yɛ́ gɛ ti ɉaláá kulɔ kəhi mɛ̨i, yɛ́ gɛ a Yálá nwɔɔ, bələ ɓə ɉaláá kulɔi mąą kaa pai həɠəi la. Hɛn lɔpee pai tunwɔ̨n ɉii ɉaláá kulɔ kəhi ɓa, gaa pai kɛi a mąąhəɠɛɛ ə mą kɛ nu ɓə.

Hvóló tɛitɛi haláá

³⁸ «Ɉɛnŋąąi nwɔ̨nɔ̨ mąąnɛ̨ɛ̨ ə́ di kulɔ a haláá, diɛ ka: kwɛlan dɔ̨nɔ̨ ɓɛlaa lon veelɛ həɠə, hvóló tɛitɛi kəlee.

³⁹ Yá mɛlaa lon dɔlɔɔ paa yələwala, ə́ veelɛnąą paa hvitili ɓa.

⁴⁰ Yili pulu, kilə haaɓa da gbulɔ, lɛɠɛ hunwɔ̨ hu, ɉumɔ̨ɔ̨ a wulɔ litɛlɛ tɔ̨nɔ̨ da gbulɔ, ə kɛ a wulɔ lɛlɛɛ, ɛlɛɛ, ə́ lɔɔ pu mą.

⁴¹ Mɛlaa lon veelɛnąą nwɛi, ya baa hvitili ɓa, bələi lɔ ə́ yələwala pɔ haláá kulɔ la, yá gɛ lɔ ti, da nɔɔ mɛ̨nį, haláá kun nɛ̨ɛ̨ li, yili kaa a kɔ́ɓo hɛn yii da gələn a Yai-Laa nwɔɔ.

⁴² Yələ kəlee haláá li, mąąnɛ̨ɛ̨ ka gulɔ kwɛlan gəlee da nwɔɔ, gee kaa pɛlɛ laaləi, Yai-Laa líílaa, ɓɛi gáá pai kɛi ka kaai laa, gɛ́ pələ ɓo kaa.

⁴³ Gáá pai kɛi pai kwa Israɛlə lonnii kuɔ ku kee kaa gɛɛnąą ti ɓa, nwɔ́ mąąwiɛ a nąą kɛ a kɛɛnąą mąąhəɠɛɛ.

⁴⁴ Gáá pai gee kaa pɛlɛ da ɉaláá kulɔ kəhi kɛi a hɛnŋąą mąą həɠɛɛɠaa, gɛ́ Aarɔn da nonnii di kɛ a nu mąą həɠɛɛɠaa.

⁴⁵ Gáá pai heei Israɛlə lonnii lɔwai, ŋą́ kɛ a di wɔ Yálá,

⁴⁶ diɛ pɛli gbaɠala kaai, diɛ ɲą́ą́ ɓə gáá a Yai-Laa; ɲą́ą́ ɓə a di wɔ Yálá, ɲą́ą́i di kulɔ Eziptə lɔi hu, gɛ́ pɛli lɛɛi di lɔwai. Ɲą́ą́ Yai-Laa, ɲą́ą́ ɓə a di wɔ Yálá.