Dutɛrɔnome 29 - Yálá laawoo hɛɓɛ (dc)

Mɛ̨nįɠaai Yálá aa gɛ Israɛlə mąą mɛ̨nį ɓa

¹ Moisə ə Israɛlə nuą kəlee təli, yɛ diɛ: «Mɛ̨nįɠaai kpɔ Yai-Laa ə gɛ, Eziptə lɔi hu Faraɔn ɓa, da nwɔ tínuą kəlee, da nɔi nuą kəlee, ka ɲɛ̨i ɓa, kaa kpinįi ka di kaa.

² Mɔ̨nɔ̨ kpɛa kpɛaɠaai ka ɲɛ̨i ə tɔɔ di hu, da kpalo mɛ̨nį kpɛa kpɛaɠaa tii;

³ kɛlaa, ə mą kɛ tii háá ɓa háá Yai-Laa hvo ni kili tɛɛ li ka pɔ, kaa mɛ̨nį kɔ́lɔn na, hvo nii ɲɛ̨ikɔw tɛɛ li ka pɔ, kaa kɛɛ kaa la, da wəli, kaa mɛ̨nį mɛ̨n na.

⁴ «Kwɛlan bow nąąn ɲee mu, ŋį́ tɔɔ ka ɲɛ̨i tɔwɔ nɔi pun ɉu. Ka mąą həɠəɠaa di hvo haɠa, ka kɔ́ɔŋą kɔ́lɔɠaa di hvo haɠa.

⁵ Lɛɠɛ hvəi kɛ a ka kɔ̨nɔ̨n, lɔɔ da hɛn a nu nwun ɉu tinɛ̨n, ya hvəi kɛ a ka kpələ yá. Mąą nɛ̨ɛ̨i kɛ ka gbaɠala kaa, kaa diɛ: Ɲą́ą́ gáá a Yai-Laa ka wɔ Yálá.

⁶ Yili pulu, ka həliɛ ɓɛ gɛɛnąą ŋɛ̨i ɓa, Hɛsbɔn tɔɔmun Sihɔn da Basan tɔɔmun Ogə, di pɛlɛ guɔ a kɔ́; gu yee ə tɛɛ diɛ.

⁷ Gu yee ə tɛɛ diɛ, gu di wɔ lɔi həɠə di yəi, gu dɛɛ Rubɛn lonnii, da Gadə lonnii, da Manase huwu bələ tɔ̨nɔ̨ pɔ, a di hee lɔi.

⁸ «Yili ɓa, mąąnɛ̨ɛ̨ ka ka yee kɛ mįnɛ̨i ŋɛ̨i ka Yálá ni ka ɉəɠə ɉu wooɠaa diɛ, kaa bɔ túwɔ́ ɓo. Yili pɔ pələ ɓə ka kɛ́ mɛ̨nįɠaa hu a nɛ̨ɛ̨ la.

Mįnɛ̨i ka Yálá ni ka ɉəɠə ka kanąn mą

⁹ «Kaa háákələi ka ɲąąkpɔn Yai-Laa ka wɔ Yálái lííla, ka huwuɠaa ɲɛ̨i tɔwɔ nuą, ka wɔ kalanɉonŋąą da nɔi nuą mɛ̨i kaa nuą; Israɛlə lonnii kəlee, kaa ka.

¹⁰ Ka ka lonnii, ka nɛ̨ani, ka mąą nwɛ̨ąi heeni ka kɔ́wɔ mɛ̨i, ka wɔ taaɠaai hu, diɛ ka wɔ kwɛi kwɛli, diɛ ka wɔ yá haɠa.

¹¹ Ka kəlee ka káá ɓɛ, kaa pa ka Yai-Laa ka wɔ Yálái, ka diɛni ka wɔ mįnɛ̨i hu nwun ɉii. Di kaa naa həlii a lolo woo diɛ di kwɛla; mįnɛ̨i ŋɛ̨i Yai-Laa ka wɔ Yálái kaa naai ka diɛni ka lɔwai.

¹² Yai-Laa kaa bɔ, ə ka kɛ háákələi a nwɔ nu huwu; yaa kpinįi lee yɛ kɛ a ka wɔ Yálá, yɛ bələi ə naakwɛlanmo la kaa, ɛlɛɛ, yɛ bələi ə gwɛla la ka nąnni diɛ; diɛi ɓaa: Abrahamə, Isaakə da Ɉakɔbə.

¹³ Mįnɛ̨i ŋɛ̨i di kaa naa həli kaa diɛ di kwɛla la, gwa gaani lɔ hvəi gáá naai gu lɔwai;

¹⁴ Nuąi kpɔ gwa diɛni gu kaa ɓɛ tɔɔni háákələi Yai-Laa ka wɔ Yálái ɲɛ̨i ɓa, di laa kaa ɉu; ə mą kɛ, nuąi di hvo nii hɔlɔɓo li di laa kaa ɉu.

¹⁵ «Ka wɛi, bələi gu kɛ la Eziptə lɔi hu, gbaɠala kaa kaa, ka bələi gu tɛɛ la hį́i takpɛliɠaa lɔwai, ɓɛɠaai gu tɛɛ laa, gbaɠala kaa kaa.

¹⁶ Mɛ̨nį mąąliɓiɛɠaa, da haliɠaa kɛ ɉiiɠaa tii pɔɔli, a wulu, kwɛni, wali, hɛni, ka di kaa!

¹⁷ Yálá hvo gɛ! Ə kɛ a hulɔnu ə kɛ a nɛ̨ɛ̨nu, a wala kɛ tii pɛlɛ ta ɓə, ə kɛ a huwu ta, hvo hɔlɔɓo ka lɔwai nwɔ kiliŋąhiɛ hvo həɠə Yai-Laa gu wɔ Yálái ɓa, yɛ hvilɛn nu huwuɠaa tii di wɔ haliɠaa pulu, ka kpuwun da hvo kɛ ka lɔwai, yii nwɔ kɛ pələ a kɛ yɛ pili mąą, a wala kɛ tii, yɛ kala ɲɔ̨n.

¹⁸ Ɛlɛɛ, mąą nu a nolo woo ŋɛ̨i mɛ̨n, yɛ gbɔwɔ kaa yɛ mąątɛ̨nɛ̨ gwəi pələ, yɛ kɛ mą: ‹Ŋą́ mą kanąn gwə́i kiliŋąhiɛ ɓa, ŋą́ pɛli mɛ̨nį kəlee hɔlɔɓoi, mąąhɔlɔɓo, lɔi tulɔ a pu mą, kpələ wɛli hvo laa.›

¹⁹ Nui taaləi tii, Yai-Laa hva mąą hvaalɛɛ. Yai-Laa nwɔ liiholi da nwɔ tolo kaa pai ɓɛlai mąą nu mɛ̨i, mɛ̨nį nwąnąąɠaa kpɔ di pɛ̨ɛ̨i ɉɛɓɛ́i ŋɛ̨i hu, di kaa pai pui mɛ̨i; ɛlɛɛ, Yai-Laa yɛ mąą nu laa kpɛɛ yələkɔlɔn mu.

²⁰ Yai-Laa a mąą nu huwu kulɔ Israɛlə nuhuwuɠaa kəlee lɔwai, ə nwun na pili, bələ ɓə, mįnɛ̨i ŋɛ̨i bɛ̨ɛ̨ dɔ́n ɉɛɓɛ́i ŋɛ̨i hu, ɉu mɛ̨nįɠaa a nɛɛ la ma.

Mɛ̨nįɠaa Yai-Laa ə mo a bɔ mɛ̨nį kɛ

²¹ «Nąąlɔwai, ka huwu yii pai muhəɠəi ka pulu, a ka lonnii, da nwɛ̨ąąi pai həɠəi kwɛaa la lɔi hu, da pa nɔi ŋɛ̨i nwɔ mɔ̨nɔ̨ɠaa kaai, da ɲɔ̨n Yai-Laa kaa pai bɛlɛi mą, di kaa pai kɛi diɛ:

²² ‹Nwɔ̨n aa nɔi ŋɛ̨i kəlee kələn a kpolo, nu ta hva kɛa hihɛn da hin naa, wulu hvo laa, kala tiliin da hva ɓɔn naa, nąą aa kɛ lɔ yɛ: Sodomə taa, da Gomorə taa; yɛ Adma taa da Sevoimə taa, diɛi Yai-Laa ə di kulɔ di pihɛi, níiholi pələ ɓa, da niikələn bələ ɓa gwəi.›

²³ Nąąlɔwai, hį́i kəlee kaa pai kɛi diɛ: ‹Lə ɓə kɛ yaai, Yai-Laa ə nɔi ŋɛ̨i hon bələ kɛ ŋɛ̨i-oo? Niiholi kɛnɛ̨i ŋɛ̨i ə gulɔ, nwun maa a lə?›

²⁴ Da di woo pulu pənə, diɛ kɛ diɛ: ‹Həɠəi di mo Yai-Laa di kalaɓɔlɔni di wɔ Yálái nwɔ mįnɛ̨i pulu ya ɓə; a yaai da diɛni di ɉəɠə, ɓɛlɔwai Ə di kulɔ la Eziptə lɔi hu.

²⁵ Di pɛlɛ diɛ tí haliɠaa diɛ, diɛ kwɛli hvilɛn diɛ; ya pa, di hvo wɔlɔ kɛ ɉaliɠaa tii kɔ́lɔn, ɛlɛɛ, Yai-Laa hvo dɛɛ li di pɔ a di kwɛlin da.

²⁶ Yili mąą mɛ̨nį ɓə gɛ, Yai-Laa yɛ níiholi la nɔi ŋɛ̨i pɔ, ɛlɛɛ, nɛ̨ŋɛ̨n naa wooɠaa kpɔ bɛ̨ɛ̨ ɉɛɓɛ́i ŋɛ̨i hu, yɛ gəlee laa diɛ.

²⁷ Yai-Laa ə di kulɔ a di nwun, di wɔ lɔi hu, níiholi pələ, niikələn pələ gwəi, ɛlɛɛ, da viikpɛɛi di mo mąą mɛ̨nį ɓa. Ə di pili lɔi takpɛli hu, yɛ bələi ka káá gaai la háákələi.›

²⁸ «Mɛ̨nį yiiɠaa noɔ, Yai-Laa ku wɔ Yálái nwɔɔ li; yaa tɔ̨nɔ̨ ɓə gɔlɔn. Mɛ̨nį yiiɠaai aa di kulɔ pɔ̨nɔ̨ŋą, yiliɠaa kaa a ku wɔɔ kwa ku lonnii, kuɔ pɛli dɔ́n ŋɛ̨i hu wooɠaa kəlee kɛi a yələ kəlee mɛ̨nį.