Dutɛrɔnome 27 - Yálá laawoo hɛɓɛ (dc)Israɛlə ə mįnɛ̨ həɠə hɛli pu 27—28 1 Moisə da Israɛlə kalanɉonŋąą di mo kpɔ a nwalawalaa nɔi nuą diɛ, diɛ kɛ diɛ: Dɔnŋąą ŋɛ̨i gáá dɛɛi ka pɔ háákələi, ka ka yee kanąn gəlee ɓa ka bɔ mɛ̨nį kɛ. 2 Ɲələi ka káá pai Ɉurdɛn yá teen ɉii la, nɔi ŋɛ̨i Yai-Laa ka wɔ Yálái ə dɛɛ ka pɔ, kaa li ɉu, ka kwɛni kpuwulu kpɛa kpɛaa həɠə, ka di tɔɔ, ka di kwələ a wee. 3 Ka dɔ́n ŋɛ̨i hu wooɠaa kəlee pɛ̨ɛ̨ di mɛ̨i ɓɛlɔwai ka Ɉurdɛn teen na. Yili pulu, kaa lɔ nɔi Yai-Laa ka wɔ Yálái kaa dɛɛi ka pɔ ɉu; yai gaa a lɔi lɛlɛɛ yii hɛn gəlee a lɛlɛ laa, yɛ bələi Yai-Laa ka nąnni di wɔ Yálái ə naakwɛlanmo la kaa. 4 Ka pa Ɉurdɛn teen ɉii, ka gwɛniɠaa tii haŋą ka di tɔɔ Ebalə yee nwuɔ̨, yɛ bələi gáá ka tíi la háákələi, ka di kwələ a wee. 5 Ka haláá kulɔi pɛli laa Yai-Laa ka wɔ Yálái ɓa. Ka bɛli a kwɛni, kwɛli hɛn və tunwɔ̨n mą. 6 Kwɛni ɲąą pɛliɛɠaa ɓə ka káá pai ɉaláá kulɔi tii pɛlii la, Yai-Laa ka wɔ Yálái ɓa. Gɛɛnąą tii ɓə ka haláá yii da gəlee kələn gulɔ laa Yai-Laa ka wɔ Yálái ɓa. 7 Ka liilaa halááɠaa kulɔ, kaa ka laa mįi laa; kaa ka kwəinɛ̨ɛ̨ Yai-Laa ka wɔ Yálái lííla. 8 Ka dɔ́n ŋɛ̨i ɉu wooɠaa kəlee pɛ̨ɛ̨ gwɛniɠaa tii mɛ̨i; a ɉu pɔ̨nɔ̨ɔ̨, ka dɔɔ kɛɛnąą pɔ̨nɔ̨ɔ̨ ɓa. 9 Yili pulu, Moisə da ɉaláá laa həli nuą Levi lonnii, diɛ Israɛlə nuą kpulu kəlee diɛ: «Israɛlə lonnii! Ka ka mɛ̨ihaa, ka ka wəli tɔɔ! Yai-Laa ka wɔ Yálái aa ka kɛ a nwɔ nu huwu háákələi. 10 Mąąnɛ̨ɛ̨ kaa pa kɛi ka wəli tɔɔi Yai-Laa ka wɔ Yálái woo ɓa nwɔ tɔ́n nwooɠaa da nwɔ tíɓo wooɠaai gáá dɛɛi ka pɔ, kaa bɔ mɛ̨nį kɛ.» 11 Mąą yələ, Moisə ə kɛ nuą diɛ: 12 «Nuąi pai tɔɔi Garizimə yee nwuɔ̨, diɛ lúwɔ́ too nɔi lonnii diɛ, ɓɛlɔwai ka Ɉurdɛn yá teen na, diɛ ka: Simeɔn, Levi, Ɉuda, Isakarə, Ɉosɛfə da Bɛnɉamɛn. 13 Ɛlɛɛ, nuąi pai tɔɔi Ebalə yee nwuɔ̨, diɛ nɛ̨ŋɛ̨n naa kɛ, diɛ ɓaa: Rubɛn, Gadə, Asɛrə, Zabulɔn, Dan da Nɛftali. Nɛ̨ŋɛ̨n naa woo pow gɔw hveelɛi 14 «Levi lonnii di kaa pai moi a di woo kɛnɛ̨ diɛ kɛ Israɛlə nuą diɛ: 15 «‹Nui lɔpee pai hali ta pɛlii a wala kɛ tii, hɛn da mąą nįnįn, a yɛlɛ kɛ mun da yee pɔɔ, ɛlɛɛ, yɛ di tɔɔ kɛɛnąą loɔ ɓa! Mɛ̨nįi gɔhɔɓoɔ Yai-Laa ɲɛ̨i ɓa yaa li! Yálá! Mąą nu nɛ̨ŋɛ̨n naai!› Ɛlɛɛ nɔi lonnii kəlee di di nwoo mu hon, diɛ mą: ‹Mįįną!› 16 «‹Nui a tɛɠɛɓo nee da nąn di hu! Yálá! Nɛ̨ŋɛ̨n ə laa!› Ɛlɛɛ nɔi lonnii kəlee di mu hon, diɛ mą: ‹Mįįną!› 17 «‹Nui a mɛlan mun nwɔ lɔi ɲɛn ɉəɠə naai! Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną!› 18 «‹Nui a pələ ɲɔ̨nwɔ̨ɔ̨ lɛ ɲɛ̨ipumun ma, Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną!› 19 «‹Nui a nwɛ̨ą, təlilon da galanən di wɔ tɛ̨ą mɛ̨nį pili ɉu! Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną!› 20 «‹Nui a laa a nąn nɛ̨ą ta, yɛ nąn vulu pələ kɛ tii, Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną!› 21 «‹Nui lɔpee a laa a huwɔ ta, Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną!› 22 «‹Nui a laa a mąąhala, ə kɛ a nąn non nɛ̨ɛ̨nu, ə kɛ a nee lon nɛ̨ɛ̨nu Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną!› 23 «‹Nui a laa a nɛ̨ą nee, Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną!› 24 «‹Nui a mɛlan gaalon baa loo pələi, Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną!› 25 «‹Nui da nɔgwəi hɛn dɛɛ bɔ, ə gɛ, ə kwəi kwələ mun baa, Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną.› 26 «‹Nui hvo pai Yálá nwɔ tɔ́nŋąą ŋɛ̨i hon ɉii, Yálá! Nɛ̨ŋɛ̨n ə laa!› Nɔi lonnii kəlee di mu hon diɛ mą: ‹Mįįną.› |