ဤစာအုပ်သည် ဘုရားသခင်မှ အားသွင်းပေးထားသော စာအုပ်မဟုတ်ပါ။ ၎င်းသည် ခရစ်ယာန်၏ ကာနွန် သို့မဟုတ် ယုဒလူမျိုး၏ တာနာ့ခ်၏ အစိတ်အပိုင်းမဟုတ်ပါ။ သမိုင်းနှင့် သုတေသန ရည်ရွယ်ချက်များအတွက်သာ ပြသထားပါသည်။ အပြည့်စုံသော ရှင်းလင်းချက်ကို ကြည့်ရန် Bɛlə 1_1 - Yálá laawoo hɛɓɛ (dc)Daniɛlə da Bɛlə nwɔ halaa laa həli nuą 1 Tɔɔmun Astiazə laa kɛa nąnni kwɛlɛ, ɛlɛɛ, nwɔ lɔi ə lɛɛ Pɛrsə mun Sirusə yəi; 2 Daniɛlə ə kɛ a tɔɔmun ɉee gwɛlɛmun, ɛlɛɛ, naa tɛɛi kɛ mɛlaa kəlee diɛ, 3 Hali ta ə kɛ Babilonə nuą yəi, naa ɓaa a Bɛlə. Yələ ɓɔ pələ kəlee, di kɛli gɔ a lɛɠɛhunwɔ̨ gəgən ɲąą pow lɔɔli kɔw mɛ̨ida da ɓɛlaa pow nąąn, ɛlɛɛ, lɔɔyáləɠi nąąn. 4 Tɔɔmun ə kɛli kwɛli hvilɛn mą a yələ kəlee. Daniɛlə nwɛi, nwɔ Yálái ɓə ə kɛli kwɛli hvilɛn mą. Tɔɔmun yɛ Daniɛlə ɓa: «Lə ɓə kɛ, yai hvá kwɛli hvilɛn Bɛlə ɓa?» 5 Daniɛlə yɛ mą: «Gbala ə tɔɔ, vá kwɛli hvilɛn hali ɓa, yai nu ə bɛli a ɲee; kɛlaa Yálá hvulúmąą ɓə ŋą́ kwɛli hvilɛn mą, yai yələkɔlɔn da lɔi di pɛli. Ɛlɛɛ, yɛ hɛn gəlee ɲąąwooɓo.» 6 Tɔɔmun yɛ mą: «Gáá ə́ kwəi Bɛlə hvo a vulú? Ɉɛn a mįi da yii a kɛ gbələi a hvoló tɛitɛi gbaɠala hvó yɛ́?» 7 Daniɛlə ə yɛlɛ, yɛ mą: «O tɔɔmun hvó ə́ kpɔwɔ ɓowo, ɉu pələ kaa lɔ a ləɠipɔlɔ́ kpɛli-kpɛli, gɔlɔ ɓa ə ɓo a kwɛli kpɔlu, ɛlɛɛ, hvo ta hɛn lɔpee ta mįi li; hvo ta gbələ li.» 8 Tɔɔmun gwəi ə pili mą, níí ə holi; ə nwɔ halaa laa həli nuąi təli, yɛ diɛ: «Nui a kɛ ɉɛnŋaa tii mįi, ka wala di laa ɓo, ka kəlee ka haa. 9 Kɛlaa, ka kɛ diɛ: Bɛlə ɓə a kɛ mįi Daniɛlə a haa. Mąąhɔlɔɓo, aa Bɛlə ɓɛlɛtoo.» Daniɛlə yɛ mą: «Bələi tɔɔmun ə mo la, ə kɛ tii.» Bɛlə nwɔ halaa laa həli nuą di kɛ a nu pow mɛ̨ihveelɛ, di nɛ̨ąni da di lonnii laa kulaa ɉu. 10 Tɔɔmun da Daniɛlə di pa Bɛlə nwɔ pɛlɛ́i mu. 11 Bɛlə nwɔ halaa laa həli nuą diɛ mą: «Ku kaa kulɔi, tɔɔmun ə́ wɛi, pa a Bɛlə kɔ̨nɔ̨n, ə́ lɔɔ hee gwɛlɛ, ə́ bɛlɛ́ laa kpulu, ə́ ə́ kɔlɔn ɉɛn gɛ mą a yɛ́ gbonoi. 12 Yá pa yələ wala pɔ, yɛ́ wala gaa Bɛlə aa gəlee mįi, kwa haa, awala kɛ tii, Daniɛlə ə haa, yai lɛɛ pɛlɛ kuɔ.» 13 Di kɛli wɛlikpɛɛmąą laa kulɔ a Daniɛlə, ya pa, daa kɛ wolo təɠə daɓali mu, nąą bələ ɓə di kɛli tɛɠɛ la a yələ kəlee diɛ gɔ̨nɔ̨nŋaa kulɔ laa. 14 Gɛɛ ti, di kulɔ lɔ, tɔɔmun ə pa a kɔ̨nɔ̨n Bɛlə pɔ. Daniɛlə ə mo nwɔ nuą diɛ, di pa a luwu, Daniɛlə ə gbɛŋɛn bɛlɛ́n tɔɔmun yaa tanɔ̨n ɲɛ̨i ɓa. Di kulɔ kɛa, di bɛlɛ́ laa kpulu, di tɔɔmun gɔlɔn ɉɛn gɛ naa kpulu hɛn ma a tɔɔmun ŋį gbonoi, diɛ kɛa li. 15 Ɉalaa laa həli nuą di pa a kwiihɛ̨ą, da di nɛ̨ąni da di lonnii, yɛ bələi l da gɛ la a bɔlɔi, di gəlee mįi kpɔ kpai kɔlɔlɔi. 16 Yələwala pɔ, tɔɔmun ə muhəɠə da Daniɛlə. 17 Yɛ Daniɛlə ɓa: «Gɔlɔ́n ɉɛn gaa a gɛ pələ kɛlɛi?» Yili yɛ mą: «Tɔɔmun, gaa a gɛ pələ-o.» 18 Yii kɛa di bɛlɛ́ laa ɓo, tɔɔmun ə daɓali ɲą kaa, ə tomą kpɔ a nwoo kɛnɛ̨ɛ̨, yɛ mą: «Bɛlə ə́ kɛnɛ̨i tai! Ɛlɛɛ, gbąną mɛ̨ni lɔpee hvo ə́ hu.» 19 Daniɛlə ə yɛlɛ, ɛlɛɛ, hvo gɛ tɔɔmun hvo lɔ bɛlɛ́n, yɛ mą: «Ə́ ɲɛ̨i hee nɔi ɓa, gbɛɛ nuą kɔwɔ pɔɔ ɓə tii laai?» 20 Tɔɔmun yɛ mą: «Gáá hinąą kɔwɔ pɔɔ kaai da nɛ̨ąą ɛlɛɛ, da lɛapɛlɛɛ.» 21 Tɔɔmun níí ə holi, ə mo di ɉalaa laa həli nuą hon da di nɛ̨ąni da di lonnii. Bələi di tɛɠɛ la diɛ lɔ, diɛ ɉɛnŋaa mįi daɓali ɲą, di bələ lɛ. 22 Tɔɔmun ə mo di gəlee paa, ɛlɛɛ, ə Bɛlə tɛɠɛ Daniɛlə pɔ loo pələi. Daniɛlə ə ɉukala ə ŋą pɛlɛ́i pu. Daniɛlə da mąąɲɔw huwɔi 23 Mąąɲɔw hɛn gɛnɛ̨ ta ə kɛ laa, yɛ huwɔ yɛ ɓo lɔwa hu, Babilonə nuą diɛ kwɛli hvilɛn mą. 24 Tɔɔmun yɛ Daniɛlə ɓa: «Hvá pɛli kɛi diɛ, yii hvo a yálá hvulúmąą? Kwɛli hvilɛn gani mą.» 25 Daniɛlə yɛ mą: «Nąmu nwɔ́ Yálái ɓə ŋą́ kwɛli hvilɛn mą; gbala ə tɔɔ, yaa lɔ ɓə a vulúmąą. 26 Kɛlaa, yɛ́ tɔɔmun, mąą laa tɛɠɛ bɔ́ gɛ́ pɛli mąąɲɔw hɛn ŋɛ̨i paai, bowa da gbɔn di laa hva kɛ ɉu.» Tɔɔmun yɛ mą: «Ŋą́ą́ hvaa mą.» 27 Daniɛlə ə wulu kpunɔ̨ ta həɠə, ə bɛlɛ wulɔ ɓa, da huwɔləɠa. Ə ɲili, ə bɛli a gbuwu pɛlɛɛ, ə nɔ mąąɲɔw hɛn ma, mąąɲɔw hɛn ə mįi, ə haa. Daniɛlə yɛ diɛ: «Ká wɔɔ hɛn ká kɛ gwɛli hvilɛn ɉii mą, ká gaa li!» 28 Gɛɛ ti, Babilonə nuą di bələ mɛ̨n, di líí ə holi kpɔ kɛnɛ̨; di di ɲąąkpɔn tɔɔmun mąą la, diɛ mą: «Tɔɔmun aa kɛ kɛa a Ɉuifə mun. Mąąhɔlɔɓo, aa Bɛlə kala, aa mąąɲɔw hɛn paa, aa ɉalaa laa həli nuą nwun na pili.» 29 Gɛɛ ti, di li tɔɔmun niila, diɛ mą: «Daniɛlə tɛɛ ku pɔ; awala kɛ tii kwa ə́ paa ka ə́ yəi bɛlɛ́n nuą.» 30 Tɔɔmun ə gaa yɛ daa hee ɉu kpɔ kɛnɛ̨, yii di kɛ bɔ ə gɛ, ə Daniɛlə tɛɛ di pɔ. 31 Di wɛi di Daniɛlə pili yala kwɛnąn ɉu. Daniɛlə ə hvoló mɛ̨ida kɛ laa. 32 Yala mɛ̨ihveelɛ ɓə kɛ laa, hvoló kəlee, powa hveelɛ da ɓɛlaa hveelɛ ɓə di kɛli ɲalaɠaa kɔ la. Gɛɛ ti, di hvo kɛli kɔ̨nɔ̨n dɛɠɛ di pɔ, diɛ kɛ di gɛ tii, di Daniɛlə mįi. 33 Yálá kwəi mɛ̨ni hukulɔ mun Habakukə ə kɛ Ɉude lɔi hu, ə mo di kɔ̨nɔ̨n ɲili da lɛɠɛ, yɛ li la ɲəi yɛaa mɔnun deɠe nuą pɔ. 34 Nąmu nwɔ malaka yɛ Habakukə ɓa: «'Li a gɔ̨nɔ̨n ŋɛ̨i ə́ yəi Babilonə lɔi hu Daniɛlə pɔ ɲala kwɛnąn ɉu.» 35 Habakukə yɛ Nąmu ɓa: «Və́ ta li li Babilonə, ɛlɛɛ, və́ ɲala kwɛnąn na kɔlɔn.» 36 Nąmu nwɔ malaka ə gbəɠə a nwun nɛɠa, ə vilɛn Babilonə ɲala kwɛnąn na, a nɔ̨ɔ̨ puɔ mą. 37 Habakukə ə tomą yɛ mą: «Daniɛlə! Daniɛlə, ə́ kɔ̨nɔ̨n ga Yálá ə gɛ! Ɉon.» 38 Daniɛlə yɛ mą: «Oo Yálá, gílí aa too ə́ ɲą, ɛlɛɛ, nuąi ə́ wɛlikaa diɛ, hvó ə́ kili kulɔ li di hu.» 39 Daniɛlə ə muhəɠə ə kɔ̨nɔ̨n mįi. Nąmu nwɔ malaka ə pənə ə Habakukə hvilɛn bɔɔli. 40 Volo mɛ̨ihveelɛ yələ, tɔɔmun yɛ pa Daniɛlə wɔlɔɓoi. Ə pa ɲala kwɛnąn na, ə ɲɛ̨i hee, ə Daniɛlə kaa heeni, 41 ə tomą kpɔ a nwoo kɛnɛ̨, yɛ mą: «Ee kə Nąmu Daniɛlə nwɔ Yálá, ə́ kɛnɛ̨i tai! Ɛlɛɛ, yálá takpɛli hvo laa, ə kulɔ ə́ pulu.» 42 Di Daniɛlə kulɔ ɲala kwɛnąn ɉu. Nuąi kpɔ tii kɛli kɛ di Daniɛlə nwun na pili, di di kəlee di pili laa; ɲalaɠaa daa mąn di huhvala-hvala daa di mįi ɲɛ̨i ɓa. |