Azaya 51 - Yálá laawoo hɛɓɛ (dc)Yálá nwɔ tɔɔlaai kaa pai heei lɔi kəlee mɛ̨i 1 'Ka ka wəli tɔɔ mą́ą́, kaai kpɔ tələnmolaa kwɛlii, kaai kpɔ Yai-Laa kwɛlii: 'Ka ka ɲɛ̨i hee, gwɛnii ɲɛ̨i di ka kulɔ ɉu, 'ka gaa, da nɔɠai di ka yala ɉu, diɛ ka tɛ. 2 'Ka ka nąn Abrahamə kaa, da ka lee Sara, yai ka káá, yɛnɛ̨ɛ̨; hvo gaai tii, yaa tanɔ̨n gbən nɔ ɓə kɛ laa, gɛ́ dəli; yili kɛɛ tii, ŋi luɠo too mą, ŋi ɉuwu hu kɛnɛ̨! 3 Gaa tii, Yai-Laa aa Siɔn mąą wɛli kaa, Aa nwɔ taa kpoloonŋąąi mąą wɛli kaa; gaa nwɔ ɲɛą lɔi mąą pɛ̨nɛ̨i a Yálá-taa lon ma, ə nwɔ kpomóɠaai mąą pɛ̨nɛ̨ a, Yai-Laa nwɔ nɔw yɛa; kwəinɛ̨ɛ̨ da mąną ɓə nu a di kaa laa, hɛɠɛɛɓo da hvɛ́li woo lɔ ɓə nu a di mąn naa. 4 'Ka ka ɲɛ̨i hee mą́ą́, kaai a ŋi nu kanŋaa, ŋi taai hu nu kan, ə́ wəli tínɛ̨n nɔ bɔ pələ: Mąąhɔlɔɓo, ɲą́ą́ ɓə pai tɔ́n naai, nwɔ́ kitii kaa pai kɛi a yɛnɛ̨ɛ̨ nuą di wɔ kɛɛ pɔ̨nɔ̨! 5 Nwɔ́ kiti mɛ̨nį aa lɛɠɛ, nuą ɓalo mɛ̨nį pa hiɛ ka, ɛlɛɛ ɲéé kaa pai huwu kəlee kiti teei, ɲą́ą́ ɓə gboloyá hu lɔiɠaa kaa pai di kilitɔɔi mą́ą́, di ɲɛ̨i kaa pai kɛi dɔ́ɠɔ. 6 'Ka ka ɲɛ̨i hee yələkɔlɔn mą, yili pulu ka lɔi ɓa kaa, yələkɔlɔn gaa lɔ pai lɔi gbąi yɛ nwɔ̨n nulu, lɔi yɛ haɠa yɛ həɠə; ɉu nuą diɛ haa yɛ koo koon ɉɛnŋąą. Kɛlaa nwɔ́ ɓalo mɛ̨nįi nwɛi gaa lɔ laa a yələ kəlee, nwɔ́ tələnmolaai hva too. 7 Kaai tələnmolaa kɔ́lɔn, 'ka ka wəli tɔɔ nwóó ɓa, kaai a nu huwui nwɔ́ tɔ́n kaa ɉui, ka hvo ɲɔwnuą di wɔ yɛlɛ mąą laa ɓa, da kɛi ka lalan, yili hvo ka hviikpɛɛ, 8 mąąhɔlɔɓo, hvili kaa pai di mįi yɛ həɠə, di hviliin yɛ huwɔ ləɠa. Kɛlaa nwɔ́ tələnmolaa nwɛi, gaa laa a yələ kəlee, ɛlɛɛ nwɔ́ ɓalo mɛ̨nįi ə ɓo laa a yələ kəlee da nwɔɔ. 9 'Ə́ muhəɠə, 'ə́ muhəɠə, ə́ wɔ huwala walai ɲąątɛ, Yai-Laa yee kɔ̨nwɔ̨n ɉu kɛnɛ̨ɛ̨, 'ə́ muhəɠə yɛ bələi wɔlɔ ə́ kɛi gɛ la, a tɔwɔ tɔwɔ yələɠaai tii, kɛlɛi yɛ́ ɓə Rahabə hu tee-ee, yɛ́ ɓɔ gboloyá hu kaalə kɛnɛ̨i hu, 10 kɛlɛi yɛ́ lɔ ɓə nwɔ̨nɔ̨ gboloyá kpala, yii gaa a moloon gɛnɛ̨ɛ hu yai, gbɛɛ ɓə pələ laa gboloyá ɲa kɔ́w ɓa, ə gɛ nuąi di nwun mąą aa ɓo diɛ pɛli tɛɛi laa? 11 Nuąi Yai-Laa ə di nwun mąąɓo, di kaa pai pənəi di pa, di kaa pai lɔi Siɔn, nuą diɛ di yee lɔwa diɛ, diɛ kwəinɛ̨ɛ̨ kulɔ yii kpɛɛ hva kɛ mą, kwəinɛ̨ɛ̨ da mąną di hvilɛn ŋąą di pulu, a kɛ tii kɛa wɔlɔ da ɲin ŋą mįi daa li. 12 Ɲą́ą́ ɓə, ɲą́ą́ ɓə ka hvaŋą lɔi, gbɛɛ ɓaa yɛ́ yai ya ɲɔw nui gaa a haa mun mą, a Adamə lon yai gɛ pələ kaa yɛ kala tiliin? 13 Yɛ́ lia ə́ pɛli mun Yai-Laa ɓa, yai yələkɔlɔn bɛli, yɛ lɔi laa, ə́ mąą yɛ kpɛlin nɔ a yələ kəlee ə́ mɔ̨nɔ̨ ɓomun dɔwɔ, yɛ a kɛi pa lamui gɛɛ kalaa tii hu? A kɛ tii, ə́ mɔ̨nɔ̨ ɓomun nwɔ liiholii tii kaa mį? 14 Nui kɛ tooni a hviikpɛɛ, ya ka muhəɠəi, hvo pai haai, kámą nwɔ mɛ̨nį hvo mą, ɛlɛɛ, hvo pai hvɛɠɛi kɔ̨nɔ̨n ɉu. 15 Ɲą́ą́ ɓə gáá a Yai-Laa ə́ wɔ Yálá, yai a wəleen ɉee gboloyá hu, yilinŋąą diɛ huluun, naa ɓaa Yai-Laa Mɛ̨nį Kəlee ŋą Hééɓomun. 16 Ŋą́ nwóóɠaa pu ə́ la, ŋį́ ə́ mąąkɔ̨nwɔ̨ ɲéé nįnįn mu, gɛ́ yələkɔlɔn naa, gɛ́ lɔi hvilɛn, ɛlɛɛ, gɛ́ kɛ Siɔn ɓai: «Nwɔ́ nu huwu ɓaa yɛ́.» 17 'Ə́ muhəɠə, 'ə́ muhəɠə, 'haŋą ə́ tɔɔ Ɉerusalɛmə, yɛ́i ŋɛ̨i Yai-Laa yee ə nwɔ liiholi ya tɔɔ ə́ lai, ə nwun ɉu tínɛ̨n gbama tɛɛ ə́ pɔ, ə́ ɉu lɔɔ kpələ, ə́ ɉu ɓo. 18 Non kpɔ ə gaa, da hvo kɛa laa, yɛ pɛli lii a yaa, yɛ kpələ wɛli kulɔ mą, non kpɔ ə gulɔ ɉu, da lɔpee hvo laa, yɛ pɛli ɉon ɉii a ɲee. 19 Mɔ̨nɔ̨ hveelɛi daa laa ə́ mɛ̨i, gbɛɛ ɓə pai ə́ wɔ woo laa kɛi? Kɛɛ kalaa da hukala ɓo, pulu da kɔ́ kɔ́ ɓɔwa; gbɛɛ ɓə pai ə́ kpəla ɓoi? 20 Ə́ lonnii kaa puuni kwəli kəlee pɔ, daa kpɔlɔɔn yɛ lómą a kɔ́ a ɓaalə, Yai-Laa nwɔ liiholi, ə́ wɔ Yálái tómą pələ di mɛ̨i, aa di huwolo. 21 'Ə́ wəli tɔɔ kani mɛ̨nįi ŋɛ̨i ɓa mąąwɛli nɛ̨ɛ̨nu, ə́ ɓo yɛ lɔɔ-hon, ɛlɛɛ yaan hvo lɔɔ kpələ li. 22 Mɛ̨nįi ə́ Nąmu, Yai-Laa ə́ wɔ Yálái kaa moi, yai a nwɔ nu kan mąąkɔ̨nwɔ̨, gaa moi ya ka: Gáá nwu ɉu tínɛ̨n nɔɔ gbama kulɔi ə́ yəi, hva kɛa nwɔ́ liiholi lɔɔi ta kpələ a yələ ta, 23 gáá pai nɔɔi tii tɛɛi ə́ mɔ̨nɔ̨ ɓo nuą pɔ, diɛi tii kɛi kɛ yɛ́: «'Pɛlɛ, ə gɛ ku tɛɛ», ɛlɛɛ yɛ́ kpɛli yɛ́ ə́ hɛ̨ą kɛ a pələ, a nuą tɛɛ kpaalə. |