Azaya 25 - Yálá laawoo hɛɓɛ (dc)Yai-Laa ɓə gaa a mąąwɛli nuą mąąkɔ̨nwɔ̨ mun 1 Yai-Laa! Yɛ́ ɓə a nwɔ́ Yálá, gáá Ə́ laa mąąwiɛi, gɛ́ Ə́ laa too a wələ, mąąhɔlɔɓo, mɛ̨nįɠaai kpɔ wɔlɔ, Ə́ gili tee Ə́ kwəi, Yáá gəlee pɔ mɛ̨nį kɛ, dai lɔpee mąą hvo hvalin ni. 2 Yáá daa kɛ a taa kpoloon, daa yii kɛ mąątínɛ̨n ŋąą a hįį, Yáá nɛɛ a lɔi pun, Túwɔ́ pələ ɲɔ̨n gulɔ nuą, di wɔ taai, hvo kɛa a taa, hva kɛa pənə hvo tɔɔ kpɔ tanɔ̨n gbɛli. 3 Yili mąą mɛ̨nį ɓə nu huwu huwala walaai kaa Ə́ mąąwiɛi la, lɔi ɲąąwooɓo nuą di wɔ taai yɛ ɲɔw Yɛ́. 4 Mąąhɔlɔɓo, nui ɲee hva lɔ, mąą kɔ́nwɔ̨mun maa a Yɛ́, Yɛ́ mąąwɛlimun mąą kɔ́nwɔ̨ nwɔ mɔ̨nɔ̨i hu, Ə́ ɓo a nu mąąkilɛi, tulɔ hvaŋą tɔwɔ, Ə́ kaa a nįnįn, wəleen dɔwɔ; mąąhɔlɔɓo, wea-tɔɔɓɛlaa nɔ̨ɔ̨ kaa yɛ, tulɔ hvaŋą a kɛi kɛlɛ bɛlɛ́ nwąną hu. 5 Yɛ wəleen a hee lɔi kələnŋąą hu. Yá túwɔ́ pələ ɲɔ̨n gulɔ nuą tin gbɛla bələi, lɔ yɛ bələi tulɔ kpinįn nįnįn a wəleen gɔlɔ haa la mą, Yá wea-tɔɔɓɛlaa di wɔ hvɛli laa pilɛ. Ɉɛli kɔ̨nɔ̨n di bɛli a nu kəlee nwɔɔ 6 Yai-Laa Mɛ̨nį Kəlee ŋą Hééɓomun, gaa pai hɛli kɔ̨nɔ̨n bɛlii nu kəlee ɓa ɲee ŋɛ̨i nwuɔ̨, a huwɔ wulaa kɔ̨nɔ̨n, da lɔɔ nɛ̨ɛ̨ɠaa, huwɔ wulɔɠaa, da lɔɔ nɛ̨ɛ̨. 7 Ɉəɠə ɓɛlai kɛ pɛlɛ ni nu huwu kəlee ɲɛ̨i, ɉəɠəi kɛ pɛlɛ ni lɔi kəlee mɛ̨i, gaa pai gəlee həɠəi di mɛ̨i ɲee ŋɛ̨i nwuɔ̨. 8 Gaa pai haa nwun na pilii a yələ kəlee mɛ̨nį, Nąmu Yálá kaa pai nu kəlee ɲɛ̨iyá kələi ɲɛ̨i, yɛ nwɔ nuąi di wɔ laa nɔ̨nwɔ̨ mɛ̨nį həɠə di mɛ̨i, lɔi kəlee hu, Yai-Laa yaa kpinįi ɓə mo. 9 Mąą yələ, di kaa pai kɛi kɛi diɛ: Ya ɓə a ku wɔ Yálá, ku kilitɔɔi mą, ɛlɛɛ, a ku nwun mąąɓo; Yai-Laa li, ya ɓə ku kilitɔɔ mą, 'ka gu mąną, 'ka gu kwəinɛ̨ɛ̨ kulɔ, mąąhɔlɔɓo, aa gu ɓalo. Di kaa pai Moabə nuą ɲɛ̨i paai 10 Yai-Laa kaa pai ɲee pɛlɛi ɲeei ŋɛ̨i mɛ̨i, Kɛlaa, di kaa pai Moabə hu woloi ɲąą ɓa, yɛ bələi mɔ̨nun-danmun a mɔ̨nun dan na. 11 Gaa pai ɲee haŋąi, yɛ bələi yá-kɛlɛmun a ɲee haŋą la. Nwɔ ɲɛ̨i tɛi mąą kaa pai yɛɛi, da ɲee kɔ̨nwɔ̨n ɉu hvaŋą. 12 Ə́ wɔ taa mąąkpɛ hįi huwiaaɠaai, Yai-Laa kaa pai gəlee pui, yɛ di hu taɠa taɠa, yɛ di pu lɔi ɓa, munuun ɉu. |