Azaya 10 - Yálá laawoo hɛɓɛ (dc)1 Kpalo ɓɛlaai tɔ́n ɲɔ̨nwɔ̨ɔ̨ laa nuą diɛ, nu mɔ̨nɔ̨ɓo hɛɓɛ́ ɓə da bɛ̨ɛ̨. 2 Di hva mąąwɛli nuą mąą mɛ̨nį ɓo, diɛ nwɔ́ lɔi hu yeehvowolo nuą di wɔ tɛ̨ą mɛ̨nį kpɛlaan, diɛ kalaninŋaa kɛ a di laa mįi hɛnŋąą, diɛ too təlilɛa mɛ̨i. 3 Ka káá pai gɛi ləi a nwąnąkulɔ yələ? A ɲələi ka hu kala hɛn a həɠə la kwɛala yɛ pa? Gbɛɛ ka káá pai pui kaa li bɔ, yɛ ka mąąkɔ̨nwɔ̨? Mįnɛ̨ ɓə ka káá pai ka wɔ hɛn gɔwɠaai laaikɛi laa? 4 Mɛ̨nįi lɔ ka pɛli gɛi, ya ɓaa, ka ka nwun vilən gɔ́ honŋąą lɔwai, ka too nuąi daa lɛɛ gɔ́ hu, di pɔ. Kɛlaa mɛ̨nįɠaai tii kəlee di mą kɛ kɛi, nwɔ liiholii hvo ni yali li bulu, ɛlɛɛ, ɲee haŋąą lɔ ni di mɛ̨i. Asiri lɔi da nwɔ tɔɔmun di nɛ̨ŋɛ̨n naai 5 Asiri nwun na ɲɔ̨nwɔ̨ɔ̨ ɓə, yai a nwą́ną́kulɔ gbɔn, ə ɓo ɲə́i ɲą, ŋį́ líiholii ka tii. 6 Gáá ɲąątɔɔi lɔi ɲɔ̨nwɔ̨ɔ̨ ɓa, gáá dɔɔi nu huwui niiholii bɔ́, yɛ di wɔ hɛn gɔwɠaai həɠə, yɛ too di mɛ̨i, yɛ di kiin giin, gɔwɔ mu yɛ da kɛli pɔlɔ tan. 7 Kɛlaa nwɛi, hvo mɛ̨nįi tii kpaɠala kaai, gili hvo mɛ̨nįi tii kɔ́lɔn ni tii, yii lɔ gwəi, ya ɓaa nu paa, da lɔiɠaa hu kalaa lɔ poto poto. 8 Hvo gaai, gaa kɛi diɛ; «Ŋą́ kɔ́ kuláaɠaai di hvo mɔ̨ɔ̨ ɓɔ́ a tɔɔɓɛlaa? 9 Kɛlɛi Kalno aa kɛ kɛa yɛ Karkemisə Hamatə ə ɓo yɛ Arpadə, Samari ə ɓo yɛ Damasə? 10 Yii ɲéé ə pɛli hali lɔiɠaa diɛ, kɛlaa, yá pa, di wɔ hali mąą nįnįnŋąą hviɛlaɓoɔi kɛ Ɉerusalɛmə da Samari di wɛiɠaai diɛ, 11 vá mɔ̨ɔ̨ pɛli, Ɉerusalɛmə hon ɉii da ŋą hali mąą nįnįnŋąąi, yɛ bələi ŋį́ Samari hon na da ŋą haliɠaai.» 12 Kɛlaa, ɲələi Yai-Laa kaa pai ɲee laa kulɔi la nwɔ koloi kəlee ɓa Siɔn yee nwuɔ̨ da Ɉerusalɛmə daai, gaa pai kɛi diɛ: «Gáá kɛa nwɔ́ nąą kɛi Asiri tɔɔmun ŋą kpɔwɔ ɲąą kɛnɛ̨ mɛ̨nįi ŋɛ̨i hu, da ŋą tɛɠɛɓoɉulaa. 13 «Mąąhɔlɔɓo, gaa moi gwəi pələ, yɛ kɛ: ‹Ɲéé nwɔ huwalawala ɓə gɛ, gɛ́ mɛ̨nįi ŋɛ̨i kɛ, da nwɔ́ kili kɛ ɲəi laa, mąąhɔlɔɓo, nwún gaa ɉu; ŋą́ą́ nuą di wɔ lɔiɠaai ɲɛn mɛ̨nį pili ɉu, ŋą́ą́ di kwɛlin gulɔ di yəi, ŋą́ą́ tɔɔɓɛlaa kulɔ di wɔ tɔɔ kpəlinŋaa hu. 14 Ɲéé aa pɛli nuą di wɔ hɛn gɔwɠaai mɛ̨i, yɛ nu a kwiɛn a nwɛ̨ni ɲąnin, yɛ ɲɛɠɛ, nwɛ̨ni taa hu, yii nee hvo mɛ̨i. Bələ lɔ ɓə ŋą́ą́ lɔi nąą kəlee həɠə la, ɛlɛɛ, nu ta lɔpee hvo gonon gɛlɛ li mą, pələ hvo kulɔ li da la.›» 15 Akɛtii, yowa a mɔ̨ɔ̨ nwun dɛ, nui kóló kɛi la mɛ̨i? Gbɛa a mɔ̨ɔ̨ nwun dɛ nui kóló kɛi la mɛ̨i? Awala kɛtii, gbɔn a mɔ̨ɔ̨ pɛli nui gaa ɲee ŋą, ə dənən dɔɔi? Tunwɔ̨n a mɔ̨ɔ̨ pɛli dumo dɔɔi, nąmu tɛɠii? 16 Yili mąą mɛ̨nį ɓa, Nąmu Yai-Laa Mɛ̨nį Kəlee ŋą Hééɓomun, kaa pai nuą koohaɠa kpɛa-kpɛaɠaai tii kpalai, nwɔ̨n ɲɛ too di wɔ hɛn gɔwii hu, yɛ kpaɠa nwɔ̨n a muhəɠə. 17 Israɛlə nwɔ kɛɛ pɔ̨nɔ̨i kaa pai kɛi yɛ nwɔ̨n, nwɔ Yálá mąąhəɠɛɛi ə ɓo yɛ nwɔ̨n nən, yɛ nwɔ kpomóɠaai da nwɔ ɲąąlənŋaai kələn, yɛ di kpɛɛ a hvóló tɔ̨nɔ̨. 18 Nwɔ lɔwɔ lɛlɛɛ da nwɔ ɓá wulu yɛa lɛlɛɛɠaai, gaa pai di kələn ɉii, diɛ lɛɛ a tiɠi; a kɛ yɛ ɲɔ̨n gɛ mun aa kulɔ nwului. 19 Ɲəi nwɛlai wulu kpəliɠaai pai lɛɛi, ə mą kɛ lolokolo ɓə, a pɛli di lonoi. Nu kpəli wolo a pənə ə pa 20 Ɲələi tii a həli, Israɛlə nu kpəli, da Ɉakɔbə nwɔ pɛlɛ́i mu nuąi pai kulɔi ɉu, di hva kɛa di kilitɔɔ di kɛlɛmun mą; di kaa pai di kilitɔɔi Yai-Laa ɓa, Yai gaa a Israɛlə nwɔ Mąąhəɠəmun. 21 Nu kpulu wolo kaa pai pənəi ə pa, Ɉakɔbə nwɔ nu kpəlii pai lɛɛi, da pənə di pa Huwal-awla Yálá pɔ. 22 Israɛlə, ə mą kɛ, ə́ wɔ nuąi tamąąi yɛ gboloyá hu ɲɛ̨ą kɔ́w, gbəli wolo lɔ ɓə a pənə ə pa; daa ka hukala mɛ̨nį mąą kili tee di kwəi, yili ɓə pai giti mɛ̨nį ɲɛ̨i kulɔi, yɛ pɛli ɉu. 23 Nɔi hukala mɛ̨nįi tii Nąmu Yai-Laa Mɛ̨nį Kəlee ŋą Hééɓomun aa mąą kili tee gwəi, gaa pai bɔ mɛ̨nį kɛi nɔi kəlee ɓa. Mɛ̨nįi Yálá kaa moi yɛ hvilɛn na Asiri ɓa 24 Yili mąą mɛ̨nį ɓa, mɛ̨nįi Nąmu Yai-Laa Mɛ̨nį Kəlee ŋą Hééɓomun kaa moi, ya ka, yɛ diɛ: Kaai a nwɔ́ nu huwui, ka heɛ Siɔn, 'ka hvo ɲɔw Asiri ɓa, yai ka kɛlɛi a gbɔn; yɛ nwɔ tunwɔ̨n pili ɲee mɛ̨i, yɛ bələi Eziptə ə kɛi gɛ la. 25 Mąąhɔlɔɓo, ɉu hvo kɛa kwɛa li, nąą aa lɛɛ kpɔlɔɔ tiikpə, vá kɛa níí holi ka pɔ; Kɛlaa, gáá nwɔ́ liiholii ɲɛ̨i heei diɛ, di nwun na pili mɛ̨nį ɓa. 26 Yai-Laa Mɛ̨nį Kəlee ŋą Hééɓomun kaa pai nwɔ hvaɠai pilii ɲee mɛ̨i, yɛ Asiri kɛlɛ la, yɛ bələi ə Madian kɛlɛ la Orɛvə kwɛnii ɓa, yɛ nwɔ tunwɔ̨n ɉaŋą gboloyá mɛ̨i, yɛ bələi ə gɛ la Eziptə lɔi hu. 27 Mąą yələi tii, tiɛ̨i kɛ ə́ kalan ŋą da ɉəɠə ə́ kalan ŋą, di diɛ̨ həɠə ə́ nwuɔ̨, diɛ̨i tii a həɠə laa, hɛn gɔw yɛ laa laa; Asiri kɔ́i kaa a kɔ́ huwələən ŋąą 28 Daa həli Ayatə, aa tɛɛ Migrɔn, ə nwɔ tiɛ̨ɠaai lɛɛ Mikmasə, 29 di tɛɛ ɲee lɔwai, diɛ mą: «Ku kaa lii yii Gɛva!» Rama mąą kaa kpɛlin ɉii, Saulə pɔ taai Givea nuąi kaa pui. 30 Galimə lon nɛ̨ɛ̨nu, tómą! Ə́ wəli tɔɔ, Laisa! 31 Kpalo aa Anatotə kaa, Madmena kaa nwun mąą kilɛi. Gevimə nuą diɛ tɛɛ a gilɛ. 32 Voló tɔ̨nɔ̨i tii yeemu, a Nɔvə hon, ə nɛɛ mą ə Siɔn nɛ̨ɛ̨gbɛla nwɔ yeei mąą ɲɔw a ɲee, yai a Ɉerusalɛmə yee kpukpu. 33 'Ka Nąmu Yai-Laa Mɛ̨nį Kəlee ŋą Hééɓomun kaa! Gaa nwulu hulɛ kɛnɛ̨i woŋoɠaa pui nɔi ɓa a vaŋą kɛnɛ̨; yiiɠaai di tɔɔ nwun ɲą kwɛa, da yiliɠaai pɔn, yiiɠaai di yee muhəɠɛɛ di ɓɛlaa diɛ, da yiliɠaai pɛlɛ. 34 Daa kwɛli pɛlɛ nwɛla hu wuluɠaa diɛ, diɛ ka tooi, Liban mąą ɲįnɛ̨n aa too nɔi ɓa. |