2 Makabe 9 - Yálá laawoo hɛɓɛ (dc)

Antiokusə Epifanə ɲąąkpɛɛi

¹ Nąąlɔwai ti, Antiokusə aa kɛ həɠə a nwun mɛ̨, Pɛrsə lɔi hu, aa pa.

² Hvo gaai ə lɔ Pɛrsepolisə daai, yɛ ə too mɛ̨i Yálá kɔ pɛ́lɛ mɛ̨i, ɛlɛɛ ə hee daa mɛ̨i. Kɛlaa nuą di di muhəɠə bɔ, di kwɛli hɛnŋąą həɠə; Antiokusə ə pu nɔi hu nuą diɛ, ə yali bulu a nwun mɛ̨.

³ Gɛɛ Ɛkbatanə pələ, mɛ̨nįi laa Nikanɔrə da Timote nwɔ nuą diɛ, ə bələ mɛ̨n.

⁴ Níí ə holi, yɛ kɛ nwumɛ̨i ti nuąi gbɛ di ɉee mą, ə gwələ kulɔ Ɉuifəɠaa diɛ. Ə mo nwɔ wotolo hiɛmun ma, yɛ mą: ə nwotolo wean, hvo tɔɔ, diɛ pɛli ɉiɛ laa kulɔi ɉa, ya pa yələ kɔlɔn a gɛa kɛ giti tee. Ə gbɔwɔ ɲąąkɛnɛ̨, yɛ kɛ diɛ: «'Gáá Ɉerusalɛmə kɛi a Ɉuifəɠaa loo kamą; yaa lɔ ɓa ŋą́ həli laa.»

⁵ Kɛlaa Nąmu, yai a mɛ̨nį kəlee kaa, Israɛlə nwɔ Yálá ə pala pɛ́lɛ mą, ɉali hva kɛ. Ə kpɛɛ kpɔlɔ a mɛ̨nį ti ɓoɔ, kwəi-kpəlaan ə pɛlɛ mą ɉali hvo hɔlɔɓo, da gala pulu ɲąą nwąnąą ta;

⁶ kwələ kulɔ li kɛ, hvo gaai ə nu takpɛliɠaa mɔ̨nɔ̨ɓo a mɔ̨nɔ̨ huwu tamąą, yii di hvo ta kɛ gaa li.

⁷ Ə mą kɛ ti, ə kɛi lɔ nwun dɛ, vɛɛi lɔ kɛ a kpɔwɔ ɲąąkɛnɛ̨, yɛ gɛ lɔ gɛnɛ̨-gɛnɛ̨ Ɉuiɠaa pɔ, yɛ ɉiɛ hu wəleein. Nwotolo ə lɛɛ lɔ gilɛ həɠəi a hvaŋą ə kulɔ ə too; doo pələi ti a ɲąą nwąnąą, dɔɔ-tɔɔiŋaa kəlee di mąą ə tee-tee.

⁸ Nui ti kɛi gbɔwɔ nwun dɛ, yɛ dɛɛ ɲɛn ɉu, a lɔ gwəi yɛ kɛ a pɛli gboloyá ɲąąwooɓoi, yɛ pɛli yeeɠaa kɔɔnɉi kilə ɓa, ə kɛ tooni lɔi ɓa, hvo kɛi di gbiŋə luwu hu; Yálá hvaŋą kɛnɛ̨ pələ yɛ too la pono ɲą nu kəlee ɲɛ̨i ɓa.

⁹ Ɲɔ̨n nwalawala pələ, koolo ə pu ɲɛ̨i kɔw pɔ, ə ɓo nii a vulu; kɛlaa gɔlɔ yɛ ɓo, yɛ kulɔ mą a gbuo-kpuo a nwąną pələ, gun dɛ pələ ɓaɠi lii ə kɛi tɛ a ɉolahi kpulu kəlee.

¹⁰ Nui ti kɛi kɛ nwun ə həli pɛmɛ̨lɛ̨n-gɔwɠaa diɛ, ɉu hvo kwea, nu ta hvo kɛi kea pɛli gbəŋəi, gun ɲɔ̨nwɔ̨ɔ̨ pələ ɓa.

¹¹ Nąąlɔwai ɓə ə gbala tɔɔ la yɛ nwɔ ɓələn ta kɔlɔ haa la mą, yɛ gbɔwɔ kɔlɔn, mɔ̨nɔ̨ ɓo pələ a ɲąąnwąnąą Yálá yei.

¹² Gun ɉeɛi kɛ gbɔwɔ hu kɛnɛ̨; yaa kpįnįilee ɓə kɛ diɛ: «'Hvo kɛi lɔ nu ə nwun vilɛn Yálá yee mu; nu kpɛli-kpɛli hva pɛli tɔɔi yɛ kɛ da Yálá di pɛli.»

¹³ Kɛlaa nu kpoloon gbɛli-kpɛli ti ə kɛi ɲąąwooɓomun vɛli, ŋa hvɛli woo hva kea kɛ pɛli gɛi yili yɛ mąąwɛli kaa.

¹⁴ Ə nwoo kwɛlɛ yɛ gaa pai daa mąąhəɠɛɛ lɛɛi gbɔwɔ yee kɔn ma, ya pa ə kɛi giliŋahiɛ nwolo mɛ̨nį ɓa yɛ naa kɛ a nu kəlee kamą;

¹⁵ yɛ gaa pai Ɉuifəɠaa da Atɛnə nuą pɛlii a di kee, ya pa hvo man kɛ tolo-tolo Ɉuifəɠaa kaa a nuąi mąą nɛ̨ɛ̨ di di loo, kɛlaa di kɛ lɔ a nwɛ̨niɠaa kɔnɔ̨n, a wala kɛ ti di di pili da di lonnii lɔwɔ huwɔɠaa diɛ,

¹⁶ ə mo yɛ ɉɛli pɛ́lɛ mąąhəɠɛɛ ti da ə tɔɔ mɛ̨i, gaa pai maa yilii a mɛ̨inɛ̨ɛ̨ kpɛa-kpɛaɠaa, yɛ ɉɛn ɲąŋą mąąhəɠɛɛɠaa pɔɔ tɛɛ geemɛ̨i tamąą, ɛlɛɛ yɛ ɉalaa kulɔ wali kulɔ gbɔwɔ nwuɔ̨.

¹⁷ Ə nwoo kwɛlɛ nwɔ̨nɔ̨ yɛ gaa kɛi a Ɉuifə mun, yɛ pa kɛi tɛɛi ɓɛi lɔpee nu kaa laa, yɛ Yálá nwɔ heeɓolaa hu kulɔ.

¹⁸ Kɛlaa mɔ̨nɔ̨ɠaa kɔlɔ hvo kɛi haa mą kpɔ tiikpə, Yálá nwɔ kiti woo tələnmoɔ aa kɛ kea ɉon gili hvo kea kɛ mɔlu mɛ̨nį hu; yɛ kea hɛɓɛ́ tɛɛ Ɉuifəɠaa diɛ, yɛ nɛ̨ɛ̨mąą hvə diɛ, maa hɛɓɛ́i hu wooɠaa ka:

Antiokusə Epifanə nwɔ hɛɓɛi ə dɛɛ Ɉuifəɠaa diɛ

¹⁹ «Tɔɔmun da nɔi nąmu Antiokusə ɓə ɉɛɓɛ́ ŋɛi tɛɛi Ɉuifəɠaa diɛ lɔi lon nɛlɛɛɠaa, yɛ di tuoɓo, yɛ kwəi nɛ̨ɛ̨, kɔlɔi pono da nwun na nɛ̨ɛ̨ mąą lúwɔ kɛ diɛ!

²⁰ Akɛ ka kɔlɔi ponoi, ka ka lonnii, akɛ ka kɛkólóɠaa hu kaa lɛlɛɛi a ka liiɓa, Yálá mąmą kpɔ kɛnɛ̨!

²¹ Kɛlaa nwɛ́i, ŋą́ą́ hvoló hveelɛ kɛ ɲɔn ɉaɠaa ɓa, hvaŋą hvo ɲei; kɛlaa ka mąą kiliŋąhiɛ lɛlɛɛ kaa mą́ą́. Gɛ́ɛ́ həɠəi Pɛrsə lɔi hu, ɉú ə kɛi lɔ haa kɛnɛ̨; ŋi gaa gɛ hvo kɛi ŋį́ nu kəlee mąą mɛ̨nį ɲɛ̨i kulɔ.

²² Gílí hvo həɠə li máló mɛ̨nį pulu; Kɛlaa gílí tɔɔi kpɔ mun hɔlɔ gúló mɛ̨nį hu ɉa, haa ɲɔn ŋɛi yei.

²³ Kɛlaa gbaɠala kaa mą́ą́ gɛ ɓɛlɔwai ną́n ə li la gɔ ɓa ɲa nwuɔ̨ pələ, ə mąą hvalin ɉee,

²⁴ a kɛ ti, mɛ̨nį ta a kulɔ nuą tɛɠi, a wala kɛ ti wɛlɛɛ ɲɔ̨nwɔ̨ɔ̨ a pa, nɔi hu nuą hu hvo pa pu diɛ; Kɛlaa nui mɛ̨nįɠaa ɲɛ̨i kulɔ mɛ̨nį lɛlɛɛ kaa ɲəi, di kɛ a gɔlɔnŋąą,

²⁵ Gbaɠala kaa nwɔ̨nɔ̨ mą́ą́ gɛ́ kɛ gu kwɛlɛ tɔɔɓɛlaa ɲɛ̨i gu kwɛlɛ, di kaa gu mąą hɛnɉi, diɛ mɛ̨nįɠaa tinɛn bələ mąą kpɔn, yili ɓə gɛ gɛ́ non Antiokusə hee a tɔɔmun; ŋą́ą́ lamu galihvaɓoi, gɛ́ mąą liɛwoo kɛ ka tamąą kaa, ɓɛlɔwai ŋą́ kɛi tɛ la a ɲɛ̨i weleenŋąą ɲa nwuɔ̨ pələ lɔiɠaa hu. Ŋą́ą́ hɛɓɛ́ tɛɛ mą, gaa ɉɛɓɛ́i yii pɔ.

²⁶ Gáá ka hu hvɛlii, gɛ́ ka mąąnɛ̨ɛ̨, ka ka kili ɲąhiɛ mɛ̨inɛ̨ɛ̨ɠaa ŋi gɛ kaa ponoŋą da loo pələi di hu, ɛlɛɛ gili lɛlɛɛi ka tɛitɛi ka kwəi yɛ hvilɛn na ɲąą kwa nón kuɔ, ə́ kɛ lɔ ti kaa.

²⁷ Náái na gɛ́ gaa pai nu kɛi, yɛ hvilɛn ŋą́ liɛwooɠaa pulu, ɛlɛɛ ka diɛni káá pɛli ɉu.»

²⁸ Bələ ɓə nu paamun ti, Yálá lalanmun ti ə gɛa mɔ̨nɔ̨ mįi la kpɔ kɛnɛ̨, lɔ yɛ bələi ə naa la nu takpɛliɠaa diɛ, yɛ kea ŋą yɛnɛ̨ɛ̨ laa kulɔ a mąąwɛliɛ, nweą lɔi hu, yee hu.

²⁹ Mɛlamun gɛnɛ̨ɛ Filipə ɓə pənə ə li a bowa, kɛlaa yii ə kɛi ɲɔw Antiokusə lon ma, ə li Eziptə Ptoleme Filometɔrə pɔ.