2 Makabe 8 - Yálá laawoo hɛɓɛ (dc)

Ɉudasə Makabe ə nuą muhəɠə a kɔ́

¹ Ɉudasə Makabe da mɛlaa di kɛi tɛ daaɠaa hu kwii hɛ̨ą, diɛi ti a huwu tɔnɔ̨, diɛ di keeni təli, nuą ti ni kɛ Ɉudasə yíi pələ pulu, diɛ yiliɠaa too di pɔ, di nuą ɲąąkpɔn a nu waa mɛ̨ida ɲɔ̨nwɔ̨mąn.

² Di kɛi gu Nąmu mąąnɛ̨ɛ̨, əgɛ ə ɲɛ̨i kɛ diɛi nuą kaa mɔ̨nɔ̨ɓoi diɛ, da ɉɛli pɛlɛ́i nu ɲɔ̨nwɔ̨ɔ̨ɠaa daa kɛ mɛlɛkpɛɛ mą.

³ Ə daa ɲɛ̨i mąąwɛli kaa, yai di kɛi nwolo diɛ bɛ́lɛ́ lɔi ɓa, ə nwəli tɔɔ ɲąmąi kɛi tomą bɔ pələ nwoo ɓa,

⁴ ə giliŋąhiɛ kwəi kwələ lɛapɛlɛɛ paa mɛ̨nį hu, a kɛɛ-kala pələ, ɛlɛɛ, ə nwɔ lii holui muhəɠə kɛa naa ɓɛlɛtoo nuą mɛ̨i pɔ.

⁵ Yii kpɔ kɛa Makabe ə kɛ gɔ́ laɠaa nwun na, lɔi ta yee hvo kɛi tɛɛ mą: gu Nąmu ŋą lííholi aa kɛ mąąpənə a nuą di wɔ ɲɛ̨imaawɛli kaa.

⁶ Ə kɛi too daa kpɛa-kpɛa da daa pɛlɛɛɠaa mɛ̨i, di tɛɠii, yɛ di kələn, yɛ kɛɛnąą walawalaɠaa hon, yɛ kɛɛ kala lɔ poto-poto ɲowoɠaa diɛ.

⁷ Gɔ́ taaləi ti, ə kɛli gɔ, a kpinį; nwɔ kulaláá bələ yɛ taɠaa kɛɛnąą kəlee ɓa.

Nikanɔrə da Gɔrgiasə di wɔ kɔi

⁸ Gaai Filipə ə mo yɛ kɛ ɉulɔnui ti hvaŋą ta kaa lɔ pɛlɛi mą, a bɛlɛɛ-pɛlɛɛ, gɔ́ yɛ nɛ̨ɛ̨ lɔ mą, Filipə ə hɛɓɛ́ tɛɛ Ptoleme ɓa, Siri kɛnɛ̨mun da Fenisi lɔi ɲąąwooɓomun, yɛ dəli tɔɔmun ŋą mɛ̨nįɠaa mąą kɔnwɔ̨ mɛ̨nį ɓa.

⁹ Patroklə lon Nikanɔrə ə kɛ Ptoleme kwɛlɛ nąą lɔwai, mɛlan gɛnɛ̨mun da li kɛ, ə dɔɔ nu waa pow hveelɛ kɔ laɠa ə ɓo ɲeemu, nu huwu lɔpee ə ɓo ɉu, Ɉuifə huwu kəlee paa mɛ̨nį ɓa. Ə Gɔrgiasə laŋan mą, kɔ kulaa pɔlɔ-pɔlɔ li kɛ, kɔ́ mɛ̨nį kəlee kpaɠala ə ɓo mą.

¹⁰ Romə nuą di wɔ wali kilə waa pow lɔɔli kɔw nąąn gwələ ə kɛ tɔɔmun ma, Nikanɔrə ə kɛi gwələi ti kulɔ a Ɉuifəɠaai ə kɛi pa di kɛi a kɔ́ luwɔɠaa di lɔwɔtɔɔ wali.

¹¹ Ə wɛlɛɛ tɔɔ gboloyá kwɛlɛ taaɠaa hu, yɛ nuą təli Ɉuifəɠaa ya mɛ̨nį ɓa a luwɔ, yɛ kɛ diɛ gaa pai nu pow mɛ̨inąąn nɔwɔtɔɔi a wali kilə pow hveelɛ kɔw mɛ̨ihveelɛ, bələi Heɓolaa Kəlee Nąmu ə kɛi pa ɉu tɔɔi la, gili hvo kɛ ɉu.

¹² Di ɉu kulɔ Ɉudasə ɓa; diɛ mą Nikanɔrə kaa pai. Moi ə mo nwɔ nuą diɛ, yɛ kɛ di yowoɠaa di wɔ kɔ́-laɠsa aa lɛɠɛ diɛ,

¹³ nuąi di lii hvo kɛ kpələ li, da nuąi di kili hvo kɛ tɔɔ li Yálá nwɔ tələnmolaa ɓa, di pu, di li pələ takpɛli.

¹⁴ Di ɓɛlaa di kɛi di yei hɛnŋąą kpəli lɔwɔtɔɔ, diɛ gu Nąmu hvɛli nuą ti nwɛalon Nikanɔrə aa kɛ di lɔwɔtɔɔ giikaa tɔwɔ, ə di ɓalo,

¹⁵ a wala di ɓalo, diɛi ti di kpįnilee mąą mɛni ɓa, ə di ɓalo mįnɛ̨ɠaai da di nanni di ɉəɠə di mąą mɛ̨nį ɓa, ɛlɛɛ, mąąhɔlɔɓo naa mąąwiai, mąąɲinɛ̨n gɛnɛ̨ɛ̨ ɓə di kaa vɛli di mąą mɛ̨nį ɓa.

¹⁶ Makabe ə nwɔ nuą ɲąąkpɔn, nu waa mɛ̨ida; yɛ di hvaŋą lɔ, yɛ kɛ diɛ di hvo ɲɔw di yowoɠaa diɛ, ɉalipulunuą ti wɛa kɔ pɛlɛ́i diɛ, di kpulu kɛnɛ̨ pələ hvo di liihɛlɛn, kɛlaa di gɔ́ a kulalaa,

¹⁷ diɛ di kiliŋąhiɛ gɛɛnąą mąąhəɠɛɛ kala mɛ̨ni ɓa, di di kiliŋąhiɛ daa nwumɛ̨ pələ ɓa, ɛlɛɛ, di di kili hvilɛn gɛa nɔi mąą tɔnŋaa kala mɛ̨ni ɓa.

¹⁸ «Di wɛi, di kaa di kili tɔɔi di wɔ kɔ́ kɔ hɛnŋąą ɓa da di wɔ huwalawalalaa; gu wɛi, Yálái ɲee a pɛli mɛ̨nį kəlee ɓa, ya ɓə gu kili tɔɔ mą, yai a pɛli, nuą ŋɛ̨i pai woloi guɔ da yɛnɛ̨ɛ̨ pilɛɛ geemɛ̨i, a di kaa lɔ hįį, di lɔ lɔ sɔɛi.»

¹⁹ Bələi nwɔ̨nɔ̨ Yálá ə tɔɔ la di kalani pɔlɔ-pɔlɔɠaa pulu ə ɉu kulɔ diɛ, a Senakeribə nwɔ yələ, ɲələi nu waa nwun dɔnɔ̨ ɲee mɛ̨ihaaɓa kɔw lɔɔli ə haa la,

²⁰ Gɔ́i di bɛlɛ Galatə nuą diɛ Babilonə lɔi hu, nuąi kɛi gɔ́ kɔ, gəlee pilɛɛ geemɛ̨i, di kɛ a nu waa mɛ̨ihaaɓa, da Masedoanə nu waa naan; Masedoanə nuą hvanąąi kɛa kɛ; nu waa mɛ̨ihaaɓai ə nu waa nwun dɔnɔ̨ pulu waa pow hveelɛ paa, mąąhɔlɔɓo yələ kɔlɔn ɉu Yálá ə tɔɔ di pulu; ɛlɛɛ, di hɛn ɉɔlɔɓo kpɔ kɛnɛ̨, a kɔ-hon.

²¹ Ə di hvaŋą lɔ a nwooɠaai ti; ə di liikpələ diɛ pɛli haai dɔnŋaa da nɔi di pulu; ə nwɔ kɔ́ laɠa ɲąąkwɛlɛ ɉu nąąn,

²² ə nąn nonnii tɔɔ nu kpulu tɛitɛi nwun na: Simɔn, Ɉosɛfə da Ɉonatan, yɛ nu waa tɔnɔ̨ pulu nwun nɔɔli tɛɛ di tɛitɛi di pɔ.

²³ Yili pulu ə mo Ɛsdriasə ɓa: ə ɉɛɓɛ́ mąąhəɠɛɛ hu woo ta ɓo, yɛ diɛ gu keeni kɔlɔn woo ɓa: «Yálá nwɔ kpɔnmąą.» Yaa kpinįi tii ə tɔɔ nu kpulu dolo-tolo nwun na, ə wolo Nikanɔrə ɓa.

²⁴ Yii Mɛ̨ni Kəlee nwɔ Heeɓomun dɔɔi kɛ di pului, di Nikanɔrə nwɔ holahiɠaai nu waa mɛ̨inąąn da da paa ɉu, di mɔlɔɓɛlaa mąąnwąną, di daɠaa tɔɔ-tɔɔɠaa tee diɛ, gbəliɠaa di pu;

²⁵ ə mą kɛ, nuąi Nikanɔrə ə di təli gɔ́luwɔɠaa yá mɛ̨nį ɓa, Ɉudasə Makabe ni di too di mɛ̨i, di nwaliɠaa gulɔ di yəi. Di di kpɛ a ɉu kwɛaa koloɓo, di yali di pulu, yələ ə kɛli kɛa wulu,

²⁶ mąąhɔlɔɓo, vįitɔɔ hvoló mąą yíi li kɛ, yili ɓə gɛ, di hvo li kwɛaa la a di kpɛɛ.

²⁷ Yii kɛa di di yowoɠaa di wɔ kwɛlin hɛnŋaa yɛɠɛ, di di yei hɛnŋaa həɠə, diɛ vįitɔɔ yələ mąą həɠə, diɛ lúwɔ too gee mɛ̨i pow-pow, diɛ gu Nąmu mąątɛnɛ̨, yai nwɔ wɛlikɛmąą mɛ̨inɛ̨ɛ̨ kɛ diɛ, yɛ yələ nįnɛ̨ laa a ɓɔ di mɛ̨i a voloi ti.

²⁸ Vįitɔɔ hvoló kulaa ɉu, ɉɛnŋąą di ɉon gɔ hu, di bələ tɔnɔ̨ ɲąąkwɛlɛ nuąi di yee ə lɛɛ galan gɔ hu diɛ, ə pɛlɛ la, galanənŋaa da dəlilɛa diɛ; di gbəli ɲąąkwɛlɛ da di lonnii di lɔwai.

²⁹ Yii kɛa di gɔ-honŋaa ɲąąkwɛlɛi, di, gu Nąmu, yai a nu ɲɛ̨i mąąwɛlikaa vɛli a gee, diɛ mąąnɛ̨ɛ̨, diɛ kɛ, da nwɔ tínuą di pənə di di lɔwai ponnaa kpɛɛ kpɔ tɛ̨ɛ̨tɛ̨ɛ̨, di kwəi tɔnɔ̨ mɛ̨i.

Gɔ ə kala Timote da Bakidɛsə diɛ

³⁰ Gɔ́ɠaa di gɔ da Timote ə lɛɛ Bakidɛsə di wɔ holahiɠaa, nuąi di di paa a tɛɛ nu waa pow hveelɛ hu, ɛlɛɛ, di kɔtaa kpɛa-kpɛa hon. Ɉɛnŋaa di ɉɔlɔɓo gɔ hu, ə kɛnɛ̨ kpɔ nwɔ̨nɔ̨, di ɲąą kwɛlɛ ɉu hveelɛ; bələ tɔ̨nɔ̨ ə lɛɛ a di wɔɔ, bələ tɔ̨nɔ̨ ə lɛɛ a nuą di yee ə lɛɛ galan gɔi hu, da galanənŋa, da dəlilɛa, ə mą kɛ ɉilɛgoloɠaa, di wɔɔ.

³¹ Yii kɛa di di yowoɠaa di wɔ kɔ́-kɔ hɛnŋaai həɠə, di ɲąąkpɔn a nɛlɛɛ, di naa geemɛ̨i kɛɛnąą lɛlɛɛɠaa ɓa; di yowoɠaa yei hɛnŋąą gbəlii ti, di li la Ɉerusalɛmə.

³² Di Timote mąąkpɛ holahiɠaa di nwun nąmu paa, nu ɲɔ̨nwɔ̨ɔ̨ kɛnɛ̨ɛ̨, aa kɛ mɔ̨nɔ̨ tamąą laa Ɉuifəɠaa diɛ.

³³ Gɔi ti nɛ̨ɛ̨ diɛ, di kɛɛ mąą kwəinɛ̨ɛ̨ kulɔi di wɔ lɔi hu, nuą ti gbon mąąhəɠɛɛ kələn, yili pulu di di loo pɛ́lɛ lon dɔnɔ̨ mu da Kalistɛnə ni, di nąą nuą kələn; Yálá mąą mɛ̨nį laa pui ti di mo; bələ ɓə di mąą hvɛla hɔlɔɓo la.

Nikanɔrə ə pu ə li Antiɔsə

³⁴ Nu kpoloon gbɛli-kpɛli Nikanɔrə yai ti pa a yɔw ɓɛlaa waa tɔnɔ̨, Ɉuifəɠaa ya mɛ̨nį ɓa,

³⁵ ɛlɛɛ yai, nuąi ə kɛi di kaa a nu kpɛli-kpɛliɠaa, di nwunmɛ̨, gu Nąmu ə tɔɔ yiliɠaa pulu, di nwunmɛ̨, Nikanɔrə ə ɉəɠə lɛlɛɛɠaa kulɔ gwaną, ə pu, yɛ luwɔ, a yɛɛkɔwɔ hu pələɠaa. Nu kəlee di tee mą, nwun na ə nɛ̨ɛ̨ kpɔ kɛnɛ̨, ə Antiɔsə mąą hɔlɔɓo, ya pa, daa kɛ nwɔ kɔlaɠai hu wolo.

³⁶ Ɛlɛɛ, yai ti nwoo kwɛlɛ Romə nuą diɛ, yɛ kɛ gaa di wɔ walii kulɔi a Ɉerusalɛmə luwɔɠaa hɔnwɔ̨, ə kɛi noloɓo, yɛ kɛ Ɉuifəɠaa di mąąkɔnwɔ̨mun gaa laa, yɛ kɛ nu yee hva pɛli tɛɛi juifɠaa diɛ, mąąhɔlɔɓo dɔnŋaa di Mąąkɔ̨ŋɔ̨mun ə naa diɛ, di yee kananŋąąi mą.