ဤစာအုပ်သည် ဘုရားသခင်မှ အားသွင်းပေးထားသော စာအုပ်မဟုတ်ပါ။ ၎င်းသည် ခရစ်ယာန်၏ ကာနွန် သို့မဟုတ် ယုဒလူမျိုး၏ တာနာ့ခ်၏ အစိတ်အပိုင်းမဟုတ်ပါ။ သမိုင်းနှင့် သုတေသန ရည်ရွယ်ချက်များအတွက်သာ ပြသထားပါသည်။ အပြည့်စုံသော ရှင်းလင်းချက်ကို ကြည့်ရန် 2 Makabe 7 - Yálá laawoo hɛɓɛ (dc)Di Leegaa mɛ̨ihveelɛ paa Yálá mąą mɛ̨ni ɓa 1 Di leegaa mɛ̨ihveelɛ hon da di lee. Tɔɔmun Antiokusə ə kpɔlu di la, a hvaɠaa tɛi ə mo a diɛ da nįŋɛ̨ tówo, yɛ kɛ hvo kɛ li di ɓoi huwɔ mįi, yai tɔn ə kɛ mą di yíi pələ hu. 2 Di tɔ̨nɔ̨ yɛ tɔɔmun ma, mɛlaa kəlee laa hu: «Yɛ́ lə? Lə ɓə ə́ kaa gwɛli ku la? Ku hąą yilɛɛi ku haa, ku hvo pa nee ku nąnni di wɔ tɔn woo kala.» 3 Tɔɔmun ə nííholi, ə mo di ləɠi da kwɛli-ləɠiɠaa hee nwɔn ɲą, 4 kpɔlui di mo, tɔɔmun ə mo di nui kɛi mɛ̨nį ɓo mɛlaa laa hu, di nɛn dee di nwun ganin gɔlɔ ɓo, di ɲeeɠaa tee mą da gɔwɔɠaa, nee da nee lonnii ɲɛ̨i ɓa. 5 Yii kɛa di nɛɛ tii a gbunwunun, ə mo di paa la nwɔn gwɛlɛ, nɔ̨ɔ̨ ə ɓo nii ɉu, ɛlɛɛ, di bili gwɛa kələn tii ɓa; gɛɛ mɔ̨nɔ̨i ti mįi, gələn gun yɛ tɛ, yiiɠaai ti di kɛi di keeni hvaŋą lɔ, da di leeni, diɛ di lii kpələ haa tɔwɔ, di kɛli kɛ di keeɓa: 6 Gu Nąmu Yálá kaa nąą kaai; a tɛ̨ą gu mąąwɛli kaa mą, yɛ bələi Moisə ə mo la, a ɉu ponɔɔ a wələ, yɛ kɛ diɛ: «A ŋa tínuą ɲɛ̨i mąąwɛli ka!» 7 Dolo-toloo ə haa ti. Di pa a veelɛnan mɔ̨nɔ̨ɓo mɛ̨nį ɓa. Di nwunganin gɔlɔɓo, yili pulu di mąąni kɛ, diɛ mą: «Ə́ kaa moi huwɔ mįi, a wala kɛ ti viɛlaɓoɔi yɛ́ di ə́ kɔlɔ tɔɔ-tɔi dɛi tɛi mɔ̨nɔ̨ ɓo?» 8 Kɛlaa ə di woo pulu pənə nąnni laa woo, yɛ diɛ: «Vá gɛ!» Yaa kpɛliman di mɔ̨nɔ̨ ɓo ti. 9 Veelɛnan, ɓɛlɔwai ə kɛi pa nii tooi la, yɛ mą: «Nu ɲɔ̨nwɔ̨ɔ̨ kɛnɛ̨ɛ̨ ɓa a yɛ́: yɛ́i ŋɛ̨i, yɛnɛ̨ɛ̨ kulɔi ku yei dɔn nwooɠaa mąą mɛ̨ni ɓa; kɛlaa yɛnɛ̨ɛ̨ tɔɔmun kaa pai ku nwun ɉi, yɛnɛ̨ɛ̨ yii kpɛɛ hvo mą, yɛ ku lɔ ɉu.» 10 Yili həɠɛɛ laa, di pɛ́lɛ́ ɉaaɓanan mɔ̨nɔ̨ɓoɔ ɓa; diɛ mą ə nɛn gulɔ; ə nɛɛ mą ə gulɔ, ə ɲeeɠaa hanŋan a liikpələ. 11 Ə mo a gili tɔɔ pələ Yálá ɓa, yɛ diɛ: «Ŋį́ dɔɔtɔiɠaa ŋɛ̨i hɔlɔɓo yələkɔlɔn ɉu Yálá yei, kɛlaa nwɔ tɔn woo mąą mɛ̨nį ɓa, gáá gíli kulɔi di hu, mąąhɔlɔɓo náái na gɛ́ gáá pai pənəi ŋį́ di hɔlɔɓo ɲei.» 12 Dɔɔmun da bɔnuą di kwəi ə pili diɛ ɉulɔnon ti liikpələ pələ ɓa, yai nwɔ mɔ̨nɔ̨ɠai hvo kɛ ɲɛ̨i mu a hɛn da. 13 Haai yili ə mo, di naan nąn mɔ̨nɔ̨ɓo lɔ ti. 14 Ɓɛlɔwai ə kɛi pa haai la, yɛ tɔɔmun ma: «Viɛlaɓoɔi nu ə haa a nuą laa pɔɔ, kɛlaa, ə́ kili ə kɛ ɉu yɛ́ Yálá kaa pai ku nwunɉi. Kɛlaa ə́ wɛi hvo pai nwun ɉii ɓalo hva kpɛɛ hɔlɔɓo mɛ̨nį ɓa.» 15 Di pa a nɔɔlinąn, di mɔ̨nɔ̨ɓo. 16 Ə ɲɛ̨i hee tɔɔmun ma hįį, yɛ mą: «Ə́ hvaŋą kɛnɛ̨i nuą lɔwai, kɛlaa ə́ kaa pai luwunɉi. Ə́ kaa ə́ liiɓa kɛi, kɛlaa hvo kɛ ə́ kwəi yɛ Yálá aa ɲee kulɔ ku huwu mu, 17 ə́ wɛi, ə́ ɲɛ̨i hee lɔ, ə́ kaa pai vaŋa kɛnɛ̨ pələ kaai, a kɛi pa ə mɔ̨nɔ̨ɓoi yɛ́ ka ə huwu.» 18 Yili pulu di pa a mɛ̨idanąn: gɛɛ pai haai, yɛ mą: «Hvó ə́ kpɔwɔ ɓowo kuɔ kpįnįi ku laa pɔɔ ka ɲɛ̨i gɛi mɔ̨nɔ̨ɠaai ŋɛi diɛ laa kuɔ, mąąhɔlɔɓo ku nɛŋɛn ɉəɠə ku wɔ Yálái ɓa; yili mąą mɛ̨nį ɓə kwəipilimąą mɔ̨nɔ̨ɠaa daa laa kuɔ. 19 Kɛlaa yɛ́, hvo kɛ ə́ kwəi yɛ kɛ di hvo pai di nwąną kulɔi yɛ́, a yɛ́i ŋɛi yaa tɔɔ yɛ kɔ pɛ́lɛ́ Yálá ɓa.» 20 Di lee nwɛi, ə nuą kwəi pili diɛ; mąąnɛ̨ɛ̨i naa kili ə lɛɛ nuą ŋą́. Bələi mą ti ə nonnii mɛ̨ihveelɛi kaa la diɛ haa, hvoló tɔnɔ̨ yee mu, ə nii kpələ mu, aa kɛ gili tɔɔ gu Nąmu ɓa. 21 Ə kɛli di tɛitɛi di hvaŋą lɔ a di pɔ taai woo. Ə kɛi pələ ɓo diɛ yɛ hulɔnu a kɛi pələ ɓo; yɛ kɛ diɛ: 22 «Bələi kpɔ ka too la gwə́i, və́ bələ kɔlɔn; ɲą́ą́ hve ka nįį da ka nɔ̨ɔ̨ tɛɛ ka pɔ, da ka tɔɔ-tɔiɠaa. 23 Yɛnɛ̨ɛ̨ pɛli Yálá kɛ tíi li, ya ɓə a nu pɛli a gaa-yələ, ə ɓo a hɛn gəlee nwun guloi. Ya ɓə pai pənəi ə ka nɔ̨ɔ̨ da ka nįį tɛɛ ka pɔ, mąąhɔlɔɓo nwɔ mɛ̨nį lɛlɛɛi, hvo gaai ka kaa ka yee kulɔi ka wɔ yɛnɛ̨ɛ̨ hu, nwɔ tiɓoɠai wɛli ɓa.» 24 Antiokusə ə gaa yɛ di kaa viiɓoi; gili ə pu ɉu yɛ di kaa nalan ɉi. Yii nolokololaamun ə kɛ ni a vulú, hvo ɲąąnɛ̨nɛ̨n nɔ a pələ kpɛli kpɛli, kɛlaa ə gwəla yɛ gaa pai hɛn gɔw tiɛ̨i mą, yɛ yɛnɛ̨ɛ̨ nɛ̨ɛ̨ mą, ɉulɔnon a nanni yíi pələ lɛɛ lɔ laa; gaa pai gɛi a mɛlan, yɛ ɉee nɔi kolo kɛnɛ̨ɛ̨ ta nwun na. 25 Kɛlaa ɉulɔnon hvo ma kɛi nwəli tɔɔ nwooɠaa diɛ; tɔɔmun ə nee təli, yɛ kɛ yili ə pili non nwəlii, mɔlu mɛ̨nį ɓa; 26 tɔɔmun ə yili ɓo kpɔ a ɉu kwɛaa nɛ̨ɛ̨nui ti ɓa; yili ə hvaa non niɛwoo ɓo mɛ̨nį ɓa. 27 Ə tinɛ̨n non bɔ pələ, yɛ naa pu dɔɔmun ɲɔ̨nwɔ̨ɔ̨ ti hu, ə mo mą a di pɔ taai woo, yɛ mą: «Nón, ɲɛ̨́imaawɛlikaa; ŋį́ ə́ laahɔnmo goolon ɉu ɲąni mɛ̨inąąn ɲeemu, ŋį́ ɲini tɔɔ ə́ la kwɛlan ɉaaɓa yeemu; ŋą́ ə́ kɔnɔ̨n gulo, gɛ ə́ mąą liihɛlɛn ɉee, ə lɛɛ ɉu ə həli la háákələi yələ ɓa. 28 'Nɛ̨ɛ̨ kpɔ yɛ́ nón, ə́ ɲɛ̨i hee lɔi da yələkɔlɔn diɛ, da di hu hɛnŋąą; ə́ kili ə pu ɉu yɛ́ Yálá ə gəlee pɛli lɔ a naa woo; ɛlɛɛ nu kanŋaa kulɔ pələ yɛnɛ̨ɛ̨ kaa lɔ ti, hvo di kulɔ hɛn da hu. 29 Hvo ɲɔw nu paamun ŋɛ̨i ɓa, hvilɛn ə́ liɛni kpaalə hu; ə́ yee hee haa mu, gɛ́ pɛli pənəi gɛ́ ə́ kaa, ka diɛni wɛlikɛmalaa hu.» 30 Ə kpɛɛ lɔ a bələ ɓoɔ, ɉulɔnon yɛ́ kɛ: «Lə ɓə ka kaa mąąkpɔnɉi? Və́ gɛi, və́ hvaai tɔɔmun nwoo ɓa! Diɓoɠaai Moisə ə dɛɛ ku nąnni pɔ, diɛ ɓə gaa di woo mu. 31 Ə́ wɛi, yɛ́i kpɔ mɛ̨nį ɲąą nwanąą ŋɛ̨i laai Hebreuɠaa diɛ, hvó pai kulɔi Yálá yee ŋą́. 32 Ya gaa ku wɛi kuɔ mɔ̨nɔ̨ mįi, ku wɔ nɛnŋɛnŋaa laa pɔɔ li. 33 Ku hutɔɔ mɛ̨nį da ku mąąkwɛli mɛ̨nį ka ti ku nwun Nąmu, yai a vulúmąą, aa nii holi la ku pɔ, a lɔwai kpuɔ lon, kɛlaa da nwɔ tínuą di kaa pai pənəi di nɛ̨ɛ̨. 34 Kɛlaa yɛ́, hvo Yálá kɔlɔn, nu ŋɔ̨nwɔ̨ɔ̨ɠaa gbəli, hvo ə́ nwun dɛ, yɛ ə kpɔwɔ ɓowo a ə́ nwun ɉu lan giliŋahiɛ, yɛ Yálá nwɔ tínuą mɔ̨nɔ̨ɓo; 35 hvó ni kulɔ li Yálái ɲee a pɛli mɛ̨nį kəlee ɓa nwɔ kiti yei, gaa mɛ̨nį kəlee kaai. 36 Hvo gaai, mɛ̨nįi ku kaayɔwɔɠaa daa di yee hee la mɔ̨nɔ̨ɠaai aa gbɛa tɛɛ mu, ɲɛnɛ̨ɛ̨ ti hva kpɛɛ hɔlɔɓo mɛ̨nį ɓa; daa haa Yálá nwɔ minɛ̨i mąą mɛ̨ni ɓa; kɛlaa ə́ wɛi, Yálá kaa pai ə́ kiti teei, mɔ̨nɔ̨i yɛ́ kpɔwɔ ɲąąkɛnɛ̨ kaa gwɛli, yɛ́ ɉɔlɔɓo. 37 Nwɛ́i, gáá gɔ́lɔ da nwɔ́ yɛnɛ̨ɛ̨ tɛɛi, yɛ bələi niɛni di gɛ la, ku nanni yíi pələ pulu, gɛ Yálá hvɛli gɛ́ kɛ ə ɲɛ̨i lɛlɛɛ hee a ɉu kpuaa ku huwu ɓa; ɛlɛɛ, mɛ̨nį ɲąąnwąnąąɠaa da mɔ̨nɔ̨ hee pələ yɛ́ ɓə pai gɛi, yɛ́ pɛli gaai a tɛ̨ą yɛ́ kɛ yaa tanɔ̨n nɔ ɓə a Yálá. 38 Gáá Yálá hvɛli gɛ́ kɛ Heɓolaa kəlee Nąmu nwɔ lííholi ə kpɛla ɲą́ą́ kwa niɛni ku mɛ̨i; tɛ̨ą kaa bɔ yɛ nííholi ku huwu pɔ.» 39 Tɔɔmun líí ə holi kpɔ a gɔbulu pələ, ə nolokololaamun mɔ̨nɔ̨ɓo ə tɛɛ niɛni diɛ, yɛlɛkulɔɉu wɛli hvo kɛ mą kpɔɔ tikpə. 40 Ɉulɔnon ti ə haa, hvo gbɔwɔ mąąliɓi, gili tɔɔ gu Nąmu ɓa gwəi tɔnɔ̨ mɛ̨i. 41 Di lee ə haa a gbɛlamąą, nonnii pulu. 42 Ɉalaa kɔ̨nɔ̨n mɛ̨nį, da nuą mɔ̨nɔ̨ɓo mɛ̨ni hukulaa, gbɛlai ka ti. |