2 Makabe 6 - Yálá laawoo hɛɓɛ (dc)

Di hali kɔiɠaa pɛli

¹ Ɉu hvo kwɛa, tɔɔmun ə Atɛnə kalanɉon da tɔɔ, yɛ Ɉuifəɠaa koo hee pɛ́lɛ ɓa, diɛ di pulu tinɛ̨n di nąnni yíi pələ ɓa, ɛlɛɛ, di hvo kɛli kɛa Yálá nwɔ tiɓoɠaa kɛ di wɔ yɛnɛ̨ɛ̨ hu.

² Diɛ Ɉerusalɛmə hɛli pɛlɛ́i laa pu, diɛ Ɉeusə bə́lə́ hali laa hee mą, ɛlɛɛ, diɛ Ɉeusə nwɛ̨ąlaa-kɛ hali laa hee ɉɛli pɛlɛ́i kɛ Garizimə yee nwuɔ̨ mą, yɛ bələi daa lonnii di ɉuhvɛli la.

³ Mɔnɔ̨ɠaai ti di hee nu kəlee hu, a ɲąąnwąnąą.

⁴ Ɉɛli pɛ́lɛ ə kɛ a wɛlikɛi da kɔnɔ̨n gbɛa-kpɛa mįi, halipulunuą da wɛlikɛnuą diɛ pələ kɛ laa, da nɛ̨ąą diɛ laa gɛɛnąą mąąhəɠɛɛ ɓa, diɛ pa laa a ɉɛnŋaai tɔn ə kɛ diɛ.

⁵ Ɉuwo ɲɔ̨nwɔ̨ɔ̨ɠaa, tɔn ə kɛ diɛ, di kɛi di paa ɉaláá kulɔi.

⁶ Di tɔn dɔɔ hvįįtɔɔ yələ mąąhəɠə mɛ̨nį ɓa, ə mą kɛ ku nąnni di wɔ hɛliɠaa pu mɛ̨nį, a wala kɛ ti, nu ə kɛ lɔ mą, gáá a Ɉuifə mun.

⁷ Di kɛi nuą kpaan gbɔ a nwala walaa, diɛ di yee pɛ́lɛ́ ɲąni dɛi tɛi yeemu halaa kɔnɔ̨n ma, a tɔɔmun gaa yələ ɲɔ̨nwɔ̨ɔ̨man yələ; ɛlɛɛ, Dionisiɔsə hɛli a həli kɛ, di kɛli ku kpaan, kuɔ wulu powa lɔ ku nwuɔ̨, kuɔ hvilɛn na Dionisɔsə mąąwiɛ wələ yɛli hu.

⁸ Ptolemaisə nuą di ɉu hvɛli, di nɔi tɔn da laa diɛ kɛ, Ɉuifəɠaa ti kɛ Grɛkə taaɠaa hu, nąą nɔi, di di hon nɔ ti, ya ɓaa diɛ di kanan diɛ ɉalaa kɔnɔ̨n mįi,

⁹ ɛlɛɛ nuąi da wala gɛ di hvo di yee too Grɛkəɠaa yíi pələ hu, da di nwun dee. Mɛ̨nį ɲąą nwąnąą kɛnɛ̨ɛ̨ hɛlɛnŋa kɛ nuą nwun mɛ̨i.

¹⁰ Di nɛ̨ąą hveelɛ tolu kiti ɓa mąąhɔlɔɓo di di lonnii hee kɛnɛ̨ ɓa. Di di lonnii hɛlɛn diɛ, di daa mąątinɛn a diɛ nu kəlee ɲɛ̨i ɓa, di hvo tɛɠa kɛ di kulɔi ɉįį nwąną nwuɔ̨ diɛ di pili nɔi ɓa.

¹¹ Daɠaa di kɛli li a di kpulu kwɛni woloɠaa hu, daa kwɛlɛ diɛ hvįįtɔɔ yələ mąąhəɠə laa, a loo pələ. Di di nąą lɛ Filipə ɓa, di di kəlee di kələn, mąąhɔlɔɓo, di hvo gɛ di hvo di kpɔwɔ mąąkɔnwɔ̨, gbala ə tɔɔ hvoló mąąhəɠɛɛ li kɛ.

Ɓalo mɛ̨nį a kulɔ Yálá mąą mɔ̨nɔ̨ mįɛ̨ hu

¹² Nuąi pai ɉɛɓɛ́i ŋɛ̨i ɓoi, gáá di mąąnɛ̨ɛ̨i, mɔ̨nɔ̨ɠaai ti hvo di hvįįkpɛɛ, mɔ̨nɔ̨ɠaai ti di hva laa lɔ nuą diɛ di nwun na pili mɛ̨nį ɓa, kɛlaa gu huwu mąą kwɛli mɛ̨nį ɓə.

¹³ Di hva lɛ̨ą nu ŋɔ̨nwɔ̨ɔ̨ɠaa diɛ a ɉu kwɛaa, kɛlaa da di hutɔɔ ɉa, Yálá nwɔ wɛlikɛmalaa lɛ pələ ta li.

¹⁴ Nąmu a kɛ bɔ ə lɔi takpɛliɠaa hu tɔɔ, a nąą mąąkpɔn gbɔɔ a ɉu kwɛaa, di yee ə ɓo di wɔ tuwo pələ ɲɔn ɉu; kɛlaa ə gaa yɛ mąą hvo nɛ̨ɛ̨ li hvo gu hon di,

¹⁵ yɛ gu lɛɛ laa gu wɔ nɛ̨ŋɛ̨nŋaa diɛ tamą, diɛ tɛɛ ɲɛn ɉu, yɛ kɛa gu hutɔɔ, a gbɛlamąą.

¹⁶ Bələ ɓə hva kpɛla la gu wɛlila kɛi; a kɛi nu mąą kwɛli a mɔ̨nɔ̨, hvo kulɔi bulu.

¹⁷ Nɛlɛɛ ɓaa kɛ, ku dɛ̨ą mɛ̨nį ti kili too ka ŋą. Niɛwooi ŋą́ kɛ bɔ ŋą́ gɛ káá yaa li, gu pənə gu pa gu wɔ lonoi ɓa.

Eleazarə paa mɛ̨ni

¹⁸ Eleazarə ə kɛ a dɔn ɉɛɓɛ́ kɛmun da, bɔlɔɔ kɛa kɛ, nɛlɛɛ kpɔɔ a nelee. Di kɛi kɛ ə ɓoi huwɔ mįi, diɛ kɛ di nɔ na a yeetɛɛmalaa.

¹⁹ Kɛlaa, ə ɲɛ̨i pono haa hviɛlaɓo, ɓɛlɛkpɛɛmąą yɛnɛ̨ɛ̨ ɓa, ə tɛɛ yɛ li gbɔwɔ ɓa, ɓɛi di kɛi li mɔ̨nɔ̨ɓoi laa;

²⁰ nuąi di lii a kpələ diɛ lənə kɔnɔ̨n tɔn gaa mą, mįɛ̨ ɓa, diɛ haa hviɛ̨laɓo di nɔ̨ɔ̨ ɓa, bələ ɓə ə pələ hvala la di tɔwɔ.

²¹ Nuąi kɛ gɔ̨nɔ̨n ti nwun na, yai tɔn ə kɛ mą di yíi pələ hu, da diɛni di kɛ nɛ̨ɛ̨laa ɓa a bɔlɔ-pɔlɔ; di ɉon a dee, diɛ mą: 'Mo di pa a huwɔ yíi di ɲili ə́ yei bɛlɛ́n, yɛ́ yili mįi yɛ a kɛ a ɉalaa huwɔ ta, yɛ bələi tɔɔmun ə mo la;

²² ə́ pɛli ə́ nwun gulɔi la ti haa yei; ɛlɛɛ di wɔ nɛ̨ɛ̨laa hu kwɛa mɛ̨nį ɓa, diɛ pɛli ɉon ɉi ti a ɓɛlɛ.

²³ Kɛlaa nwɛi, ə giliŋahiɛ, ə vilɛn gaa kwɛlan ma, da bɔlɔ pələ da mąąwiɛ pələ, da nwun bowa pələ da bələi ə nwɔ yɛnɛ̨ɛ̨ kɛ la, mąąkulɔi hvo kɛ mą, ə həɠə nolokolo yələ ɓa, ɉɛnɛ ə mą kɛ lei ə gili hvilɛn Yálá nwɔ tɔn nwoo mąąhəɠɛɛ ɓa; ə di woo pulu pənə, yɛ kɛ diɛ: yaamun di kɛhvi di báá.

²⁴ Yɛ diɛ: «Lɛɛ kɛɛ a kɛa ku mąą hon! Mąąhɔlɔɓo gaa pai kɛi hilɛlea tamąą kwəi diɛ kɛ, Eleazarə nwɔ kwɛlan bow mɛ̨inaan, aa ɲee too nwɛ̨ąą yíi pələ hu;

²⁵ ɉalaa huwɔ mįi mɛ̨nį pɔɔ kɔɔn mɛ̨nįi ti, di kaa pai lanɉi a náá pɔɔ, ɛlɛɛ yaan, ɲɛnɛ̨ɛ̨ mąąwɛliɛ ɲɛ̨i laa hɔnmo mɛ̨nį ɓə ŋą́ bɔ́lɔɔ yələ gbəli kɛ la nwumɛ̨ hu, da ɓɛlɛ kpɛɛmąlaa hu.

²⁶ Ə mą kɛ yiihu, ŋą́ą́ nwún gulo nu kanŋa di wɔ mɔ̨nɔ̨i mu, vá pɛli pui, vulúmąą-o, ɉáá-o, Yálái a pɛli mɛ̨nį kəlee ɓa ɲɛ̨i tɔwɔ.

²⁷ Yili ɓa, gáá kulɔi háákələi yɛnɛ̨ɛ̨ a liikpələ; yili a bɔ́lɔɔ laa mąą hon;

²⁸ ɛlɛɛ, ɲéé hee mɛ̨nį haa mu, gu wɔ tɔn nwooɠaa mąąwiɛ mɛ̨nį ɓa, ŋą́ nu haa pələ lɛlɛɛ lɛ hilɛlea diɛ.» Ə mo lɔ ti, di nɛɛ mą diɛ li la mɔ̨nɔ̨ɓoi.

²⁹ Nuąi kɛi li la, diɛi kɛi ɉon tɔwɔ a ɓɛlɛlaa, di lii holiɛ kɛa kɛ bɔ nwooɠai ti mąą mɛ̨nį ɓa; di kɛi gaa a ɓowo wooɠaa.

³⁰ Yaa nwɛi, ɓɛlɔwai ə kɛli pa haai la, gɛlɛ pələ ɓa, ə kɛi ɲiŋɛ, yɛ kɛ diɛ: «Yálá, ə́ mɛ̨nį kəlee kɔlɔn, gbaɠala kaa yɛ́, yɛ́ ŋą́ pɛli kɛ kulɔi haa yei, ya ka gáá mɔ̨nɔ̨ ɲąąnwąnąą mįi gɔ́lɔ hu, kɛlaa nįį pɔ pələ, gáá mɔ̨nɔ̨i ti mįi a gwə́inɛ̨ɛ̨, mąąhɔlɔɓo ŋá ɲɔw yɛ́.»

³¹ Bələ ɓə ɉulɔnui ti ə haa la. Ə kaalon naa da liikpələ laa lɛ, vá kɛ lɔ mą hilɛlɛa diɛ, kɛlaa ə mą kɛ, lɔi tamąą diɛ.