2 Makabe 5 - Yálá laawoo hɛɓɛ (dc)

Eziptə kɔ veelɛnąą

¹ Nąąlɔwai, Antiokusə ə kɛli gbɔwɔ pɛli, yɛ li nwɔ̨nɔ̨ kɔ pɛlɛ́i Eziptə ɓa a veelɛnan.

² Hvoló pow naan yee mu, daa kɔlɔ kəlee, di kɛi hoogilɛhəɠənuą kaa, həɠə mąą puɔɔ a hɛni ə ɓo diɛ, da kɔlaɠaɠaa diɛ kɔ̨nwɔ̨ gwəli hɛ̨ąiɠaa ɓa.

³ Hoogilɛhəɠənuą di tɔɔ a di yɛli, yɛ da kɛi li kɔ ɓa, diɛ kɔ yili ɲą pələ kəlee, kpala kpulu tɔɔ, ɓowa kweaaɠaa kulaa daa hu, diɛ tonwąɠaa pili, kɔ-kɔ həɠəɠaa huwu lɔpee, a hɛni diɛ len.

⁴ Nu kəlee ə kɛli Yálá hvɛli diɛ gɛɛ ŋɛ̨i di kɛli gaa ɉu ə nɛ̨ɛ̨.

Ɉasɔn da Epifanə

⁵ Kɛlaa, Antiokusə haa mɛ̨nį bələ ə taɠaa a lɛɛ; ya ɓə Ɉasɔn a nu waa tɔnɔ̨ həɠə, ə kɔ pɛ́lɛ́ la daa ɓa, nu kəlee tɛɠii. Ə daa mąąkpɛ hįį hon, ə pili daai; Menelasə ə pu gɔ pɛlɛ́ mu.

⁶ Ɉasɔn ə pɛlɛ yɛ nwɔ lɔi hu nuą paa, hvo kɛi nu ta ɲɛ̨i mąąwɛli kaa; hvo kɛi giliŋąhiɛ yɛ kɛ, nu yee tɛɛ nuąi ka diɛni ka kaa a huwu tɔnɔ̨ diɛ, yee lɛɛ ɉu kɛnɛ̨ɛ̨ li, hvo kɛi giliŋahiɛ yɛ kɛ nwɔ lɔi hu nuą ka ti aa di hon kɔ hu, kɛlaa ɲowoɠaa li.

⁷ Ə mą kɛ ti ɲee hvo pɛli nwunąmulaa hɔlɔɓoi, ɛlɛɛ nwumɛ̨ ə ɲɛ̨i paa ɲąba lɔ mɛ̨nį ɓa nɔi ɓa, ə pənə ə li nu-mąąkilɛ taa hu Amanitidə.

⁸ Nɔi kala tuwoi ti ə mo, bələi naa ə kulɔ la, bələ ka: ə kɛ gahoɲą Arabə tɔɔmun Aretasə yei, ə kulɔ daai, nu kəlee hvilɛnŋa bulu diɛ gbɛ, nwɛli kpɛɛ nu kəlee ɓa, yɛ dɔn wooɠaa pulu kulɔmun, diɛ yowolaa hee mą mąąhɔlɔɓo ə kɛ a nwɔ lɔi da nwɔ lɔi hu nuą mɔ̨nɔ̨ɓomun, ə pu ə li Eziptə lɔi hu.

⁹ Yai ti aa kɛ nu tamąą kpɛ di kaa lɔi hu, ə haa nwɛ̨ą lɔi hu; ə li Lasedemonə, yɛ kɛ ə mąąkilɛ laa, hvo gaai di kɛ a huwu tɔnɔ̨.

¹⁰ Ə nu tamąą paa, di hvo kɛi di loo, nu hvo hɔlɔɓo, nu ta hvo noo mɛ̨nį ɲɛ̨i kulɔ, ɛlɛɛ, nooi hvo hɔlɔɓo nąnni kámą hu.

¹¹ Mɛ̨nįɠaai ti bələ ə həli tɔɔmun ma, ə kɛ gwəi yɛ kɛ Ɉude yɛ ə kulɔ bulu. Ə həɠə Eziptə, niikələnŋa gwəi yɛ lɔwɔ-huo, ə daa hon a kɔ.

¹² Ə mo ɉolahiɠaa diɛ, yɛ diɛ: nui lɔpee a too di yee ŋą, di di paa ɲɛ̨i mąąwɛli hvo ɉu; yiiɠai da kɛi tɛ di yəi gbaan ɉu, di di nwun dee.

¹³ Hilɛgoloɠaa, nu nwunuɠaa, di di paa, nɛ̨ąą, lɛapɛlɛɛ, di di ɲąą yii; həlakpɛlaɠaa, lon-gaa-ninɛ̨ɠaa, di kɛi di nwun dee.

¹⁴ Hvoló haaɓa yeemu, nu waa pow mɛ̨ihaaɓa ɓə lɛɛ ɉu; di nu waa pow nąąn paa a kɔ kɔ ɓowa, nuąi di di lɔwɔtɔɔ, di lononŋa hva too yili mu.

Di ɉɛli pɛlɛ́ mąą kpoloon

¹⁵ Hvo lɛɛ yili ɓa; ə niikpələ, ɉɛlipɛlɛ́i mąąhəɠɛɛ gəlee ɓa yɛnɛ̨ɛ̨ ɓɛ, ə lɔ mu, Menelasə ə ɓo ɲɛ̨itɔwɔ, yɛ kulɔ la ti dɔnwooɠaa da nwɔ lɔi pulu.

¹⁶ Ɉalaakulɔ hɛn ɲaŋaɠaa da mɛ̨inɛ̨ɛ̨ɠaa tɔɔɓɛlaa takpɛliɠaa di dɛɛ gɛɛnąą mąąhəɠɛɛ mąą yili mɛ̨nį ɓa, da mąąwiɛ mɛ̨nį da mąąɲinɛ̨n gɛ mɛ̨nį mą, ə di həɠə a ɲee mąąliɓɛɛ ti; ə kpolowa-yee pɛlɛ diɛ.

¹⁷ Antiokusə ə gbɔwɔ ɲąąkɛnɛ̨ gwəi pələ; hvo kɛ gwəi yɛ kɛ daa nuą di wɔ nɛnŋɛnŋa ka ti aa gu Nąmu liiholi; a lɔwai tawolo mɛ̨nį, ə ɓo yɛ a kɛi gili kulɔ gɛɛnąą mąąhəɠɛɛ hu.

¹⁸ Ə li kɛ di yee hvo kɛ nɛŋɛ̨n damąą ti hu, yaa kpɛliman ə li kpɔlɔɔ kɛ lɛɛ pai diɛ ɉu lowa, ɛlɛɛ diɛ gili həɠə la ti nwɔ liikpələ mɛ̨nį ti pulu, yɛ bələi di gɛ la a Heliodorə, yai Seleukusə ə dɔɔ ɉɛn gɔw nwuɔ̨ mɛ̨nį ɓa.

¹⁹ Kɛlaa gu Nąmu hvo nu huwu kɛ a niiɓa nuą gɛɛnąą mąąhəɠɛɛ mąą mɛ̨nį ɓa; kɛlaa ə gɛɛnąą mąąhəɠɛɛ kɛ a niiɓa kɛɛnąą nuą mąą mɛ̨nį ɓa.

²⁰ Yili ɓə gɛ, mɔ̨nɔ̨ ə lɔ gɛɛnąą ti bɔ ɓɛlɔwai mɔ̨nɔ̨ ə lɔ la nuą pɔ; yili pulu ə nwɔɔ hɔlɔɓo mɛ̨inɛ̨ɛ̨ɠaa hu: di nɛɛ gbɔwɔ ɓa a Hééɓolaa Nąmu nwɔ lííholi yələ; yili pulu mɛ̨nį kəlee Nąmu nwɔ nɛ̨ɛ̨laa yələ, di pənə di bu ninɛ̨ kɔlɔi, a mąąɲinɛ̨n gɛnɛ̨ɛ.

²¹ Antiokusə ə kilo waa pow nąąn kɔw mɛ̨įhaaɓa həɠə ɉɛli pɛlɛ́ mu ə gɔwɔ mąą hvulɔ yɛ li Antiɔsə; nwun dɛ pələ da gwəi kili kɛnɛ̨ pələ, ə kɛ gwəi yɛ kɛ a lɔi kpalan mąą pənə a gboloyá diɛ kələn ɉiɛŋą, ɛlɛɛ aa gboloyá mąą pənə a lɔi kpala, diɛ hiɛ mɛ̨i.

²² Kɛlaa ə nuą lɛɛ nɔi nwun na, diɛ mɛ̨nį ɲɔn gɛ nɔi ɓa; ə Filipə hee Ɉerusalɛmə, Frizi mun, ɉɔn ɲɔ̨nwɔ̨ɔ̨ dɛɠɛɛ nui ɉee laa mą,

²³ Garizimə yee nwuɔ̨, Andronikə; Menelasə pɛlɛɛ yiliɠaa diɛ; yai ti nwun dɛ nwɔ lɔi hu nuą mɛ̨i a kili ɲɔ̨nwɔ̨ɔ̨ dɛɠɛɛ gəlee ɓa. Kili ɲɔnwɔ̨ɔ̨ ə kɛ kpɔ gwəi yɛ hvilɛn na Ɉuifəɠaa diɛ.

Nui tɔɔmun ə dɔɔ ə Ɉuifəɠaa paa lɔ poto-poto

²⁴ Tɔɔmun ə doomɛ̨i-kɛ-nuą nwun nąmu Apoloniusə tɔɔ kɔ́kuláá waa pow hveelɛ kɔw hveelɛ nwun na, yɛ kɛ nuąi kpɔ kɛ a kpakoloɠaa, di di paa, ɛlɛɛ, yɛ nɛ̨ąą da nɛapɛlɛɛ lɔwɔtɔɔ.

²⁵ Apoloniusə ə pa Ɉerusalɛmə, ə gbɔwɔ kɛ yɛ liilaa heemun, yɛ hvįįtɔɔ yələ mąąhəɠɛɛ mąąkpɔn; vįitɔɔ yələ ə həli lɔ Ɉuifəɠaa yəi, ə mo ɲee-pɔnuą diɛ di gɔ kɔ hɛnŋąą həɠə.

²⁶ Nuąi kpɔɔ li bələ kɛi kaai ə di paa; ə pili daai da nwɔ holahiɠaa, gɔ kɔ hɛnŋąą ə ɓo di yei, ə nu kpulu kɛnɛ̨ɛ̨ paa.

²⁷ Kɛlaa Ɉudasə Makabe da mɛlaa pow di li nɔi pun ɉu; yaa da mɛlaa di kɛi yíi yɛ lɔwɔ-huwɔɠaa, yeeɠaa hu, diɛ kala mįi lɔ di hvo pa nee di mąą luwu.