2 Makabe 13 - Yálá laawoo hɛɓɛ (dc)

Antiokusə ə Menelasə paa

¹ Gwɛlan nwun dɔnɔ̨ yee nąąn kɔw mɛ̨inąąn yee mu, bələ ə həli Ɉudasə da nwɔ holahiɠaa diɛ, diɛ kɛ Antiokusə Eupatɔrə kaa pai Ɉude a kɔkulaa kpulu kɛnɛ̨;

² ɛlɛɛ da ɲąąkɔn mun Lisiasə, yai kɛ nɔi mɛ̨nįɠaa nwun na, ya ɓə pai Grɛkə kɔkulaa kpulu ɓə ɲei: nu waa nwun dɔnɔ̨ pulu waa pow, di kɔwɔŋą, hoogilɛhəɠənuą waa lɔɔli pulu nwun ɉaaɓa, hə́lə́ pow hveelɛ kɔw hveelɛ, ɛlɛɛ kɔ́-kɔ wotolo nwun ɉaaɓa kɛlɛlɛ kpɛa-kpɛa nąmįną di ɓo ɉu.

³ Menelasə ə too di pɔ, yɛ nɔ pələ kwɛli Antiokusə kilii, a gbąnąlaa kɛnɛ̨ɛ̨; hvo kɛ a gaa lɔi ɓalo mɛ̨nį, kɛlaa bənə mɛ̨ni ə nwunąmulaa hɔlɔɓo mɛ̨nį ɓə kɛ.

⁴ Kɛlaa tɔɔɓɛlaa di wɔ tɔɔmun ə gɛ Antiokusə ə nííholi Menelasə nu kpoloon ti pɔ; ɛlɛɛ moi kpɔ Lisiasə ə mo tɔɔmun ma yɛ kɛ mą Menelasə ti ɓə kɛ a mɔ̨nɔ̨ɠaai ti kəlee nwun, tɔɔmun ə mo di li la Bere, ɛlɛɛ, di baa laa, yaa kpɛlimąn, a nąą nuą yíi pələ;

⁵ ɛlɛɛ yan, gɛɛnąą ti, pɛ́lɛ huwu ta kaa laa, dɔɔmɛ̨i kwɛaa a nu yee-tɔɔ-ɉu pow lɔɔli, naa hvɛɛ a luwu; hɛn da kpuwulu ta ə kɛ nąą, ɉɛnŋɛ̨nɛ̨n ma tɔɔ kpɔ kɛnɛ̨, pələ kəlee, nuwui ti pɔ pələ.

⁶ Nui a hɛn mąąhəɠɛɛ ta nwuɔ̨ kɛ a wala kɛ ti nɛŋɛn gɛnɛ̨ɛ ta, di kɛi dɛ bɛ́lɛi ti ton na, diɛ bili, baa mɛ̨nį ɓa.

⁷ Bələ ɓə Menelasə ə haa la, yai gɛ-kóló pulu kulɔ, ɛlɛɛ di hvo mąn pɛli nooi,

⁸ ɛlɛɛ, tələnmolaa li kɛ, maąhɔlɔɓo aa kɛ nɛŋɛn damąą həɠə ɉaláá kulɔi ɓa yai ŋą nwɔ̨n, da nwɔ luwu, di mąąhəɠɛɛ; ya ka ti ə haa luwu hu.

Kɔ́ ə nɛ̨ɛ̨ Ɉudasə ɓa Modin daai

⁹ Kiliŋąhiɛ ɲɔ̨nwɔ̨ɔ̨ɠaa di kɛ tɔɔmun gwəi yɛ pa, yɛ kɛ ə mɔ̨nɔ̨ɠaa laa Ɉuifəɠaa diɛ di kpɛa-kpɛa di tɛɛ yii nąn ə naa diɛ mą.

¹⁰ Bələ mɛ̨n Ɉudasə ə mo, yɛ nuą kəlee diɛ, di Nąmu hvɛli hvoló da kpįnį, yɛ pɛli kpɔnmąą tɛɛi di pɔ, ɉɛnɛ̨ ə mą kɛ lei gɔ yii ŋɛ̨i hu, hvo gaa dɔn nwoo, di kaa-lɔi da ɉɛlipɛ́lɛ kulɔ mɛ̨nį di yei hɛlɛnŋąąi kɛ di mɛ̨i;

¹¹ ɛlɛɛ, hvaŋą lɛlɛɛ ə kɛi pu koloɓo nuą diɛ, hvo di lɛɛ laa di hvo too tɛɠɛɓoɉu-lɔiɠaa yee kɔn ma.

¹² Nu kəlee ə gɛ ti, diɛ Nąmu, yai a nuą ɲɛ̨i mąąwɛli kaa, mąąnɛ̨ɛ̨ a wɔlɔ da hinɔɔ, hvoló haaɓa yeemu, di pɛ́lɛ́ nɔi ɓa, diɛ tuwo ɉu, diɛ yíi ɉu, Ɉudasə ə di hvaŋą lɔ yɛ diɛ di tɔɔ gwɛlɛ.

¹³ Kɛlaa da galanɉonŋąą di di nwun dɔɔ, ə mo yɛ di bələ hon tɔɔmun nwɔ kɔ́-laɠaa hvo tɛɠa kɛ lɔi Ɉude lɔi hu, hvo pa nee daa hon; ɛlɛɛ, di mɛ̨nįi ti laa kulɔ mɛ̨nį kəlee lɛɛ Nąmu yee kɔn ma.

¹⁴ Ə mɛ̨nį ti kalihvaɓo kan Yɛnɛ̨ɛ̨-Pɛlimun ma, yɛ ɉu too, ə ŋą nuą hvaŋą lɔ, diɛ pɛli gɔi a hu wala-walalaa ə lɛɛ ɉu hąą, diɛ dɔnwooɠaa mąą kɔnwɔ̨ la, da ɉɛlipɛ́lɛ, da daa, di kaa-lɔi da di yíi pələɠaa; ə nwɔ kɔ́-laɠaai tɔɔi gulo Modin kwɛlɛ.

¹⁵ Ə gɔ́ muhəɠə woo ɓo nwɔ nuą diɛ: «Kɔ́ nɛ̨ɛ̨mąą Yálá», ə li kwiheąi, ə wolo ɓɛi tɔɔmun ə kɛ laa nąą ɓa, da laŋąą hu wala-walaa, ə nu waa hveelɛ paa di yowoɠaa lɔwai. Nwɔ nuą di ɉələ kɛnɛ̨mun baa da ɉiɛmun.

¹⁶ Di ɲɔw kɛnɛ̨ɛ̨ pili di yowoɠaa hu, di nąą kɛ lɔ ɉuwu-ɉuwu; mɛ̨nį kəlee ə nɛ̨ɛ̨ diɛ, diɛ di wɔ li ɓo.

¹⁷ Yələ ə kɛi kɛa ɓɔ, yaamun diɛ di yee laa kulɔ gulalaa ti ɓa, yai Nąmu ə tɔɔ Ɉudasə pulu yɛ gɔ.

Antiokusə da Ɉuifəɠaa di di lɔwai mɛ̨ni ɓo

¹⁸ Yii kɛa tɔɔmun ə Ɉuifəɠaa liikpələ pələ kaa ti; ə daaɠaa hu kɔɔn, a gbąnąlaa kɔ́ pɛ́lɛ́i ə mo diɛ.

¹⁹ Ə pɛ́lɛ́ Bɛtsurə ɓa, Ɉuifəɠaa di wɔ kɔ́ taa walawala ta, Kɛlaa di ɲali bulu, ɲee hvo lɔ, gɔ́ hvo nɛ̨ɛ̨ mą.

²⁰ Nuąi ti kɛ daa kwəi, ɉɛnŋąąi mąąkpaan ə kɛ diɛ, Ɉudasə ə gɛ mąą hɛnŋąą di həli diɛ.

²¹ Kɛlaa Rodokusə, Ɉuifə kɔkulaa ta, ə noo mɛ̨nįɠaa hu kulɔ di yowoɠaa diɛ; di mąąhɛn, di ɉon, di baa.

²² Veelɛnąn, tɔɔmun da Bɛtsurə nuą di woolaamąą wóó ɓo di kee ɓa, di di yee too geehu, ə həɠə laa; ə gɔ́ yili ɲą, da Ɉudasə nwɔ holahiɠaa, gɔ́ ə kala mą.

²³ Ə bələ mɛ̨n, diɛ kɛ Filipə ti ə nɛɛ mɛ̨nįɠaa nwun na, aa kɛ muhəɠə bɔ Antiɔsə, ɉu ə pu mą. Ə Ɉuifəɠaa hu hvɛli da diɛni di woo ə laa mą, ə gwɛla yɛ kɛ mɛ̨nįi lɔpee da mo, a tələnmolaa, gaa hvaai gəlee ɓa, da mąąwiɛ, a mɛ̨inɛ̨ɛ̨ kpɛa-kpɛa kɛ gɛɛnąą mąąhəɠɛɛ ɓa.

²⁴ Ə ɲɛ̨i lɛlɛɛ hee Makabe ɓa, ɛlɛɛ, ə Hegemonidə kɛ a Ptolemaisə da Gereni di lɔwai lɔi ɲąąwooɓomun.

²⁵ Ə li Ptolemaisə, kɛlaa nąą nuą kwəi hvo nɛ̨ɛ̨ gɔ́ hee wooɠaai ti di mo ɉu; diɛ kɛ di lənə mą.

²⁶ Kɛlaa Lisiasə ə tɔɔ gwəli heąi, ə gɔ́ hee mɛ̨nį nwun nɛ a nɛlɛɛ, ə nuą kiliŋą pono, ə di liilaa a kili lɛlɛɛ woo, yɛ li Antiɔsə. Tɔɔmun nwɔ kɔ́i da ɲali mɛ̨nį bulu yɛ li, ɉu mɛ̨nįɠaa ka ti.