2 Makabe 11 - Yálá laawoo hɛɓɛ (dc)

Lisiasə kɔ dɔlɔɔ

¹ Ɉu hvo kwɛa, Lisiasə tɔɔmun kaayɔwɔ da ɲąąkɔnmun, ya ɓə kɛ nɔi mɛ̨nįɠaa nwun na. Nii ə kələn gbɔ gwəi gɔ́ mɛ̨nįɠaa ti hu,

² ə nu waa pow mɛ̨ihaaɓa ɲąąkpɔn da nwɔ hoogilɛhəɠənuą kəlee, ə bələ hon, yɛ li kɔ pɛ́lɛ́i Ɉuifəɠaa diɛ, ə kɛi kɛ ə daa kɛ a Grɛkəɠaa hee taa,

³ ə ɉɛli pɛ́lɛ laa too nįihɔnwɔ̨ mɛ̨nį hu, yɛ hali kɔ pɛ́lɛ takpɛliɠaa tɔɔ kɛ halipulunuą yei, ɛlɛɛ kwelan dɛitɛi yeemu yɛ ɉalaa kulɔ nwun nąmulaa lɔwɔ tɔɔ;

⁴ hvo kɛi giliŋahiɛ kpɔ tikpə Yálá hvaŋą kɛnɛ̨ pələ ɓa; gili tɔɔi kɛ a ɓowo pələ nwɔ kɔkulaa kpulu kɛnɛ̨i ɓa, nwɔ hoogilɛhəɠənuą wala-walaaɠaai diɛ da nwɔ hələ pow mɛ̨ihaaɓai ɓa.

⁵ Həlii ə mo Ɉude lɔi hu, ə pa kɔ́ taa ta hu diɛ kɛ mą Bɛtsurə, mąą kweaa Ɉerusalɛmə ɓa a kilə pow hveelɛ kɔw mɛ̨ihveelɛ, ə hee kpɔ ɉu kɛnɛ̨.

⁶ Bələi mɛ̨n Makabe da nwɔ nuą di mo la diɛ kɛ Lisiasə kaa kɔ́ pɛlɛ́i gɔ taaɠaa diɛ, di Nąmu mąąnɛ̨ɛ̨, da nuą kəlee, a ɲiŋɛ woo da wɔlɔ woo, diɛ kɛ ə malaka lɛlɛɛ ta tɔɔ yɛ Israɛlə ɓalo.

⁷ Makabe yaa kpįnį lee ə gɔ́ kɔ hɛnŋąą həɠə nu kəlee tɔwɔ, yɛ mɛlaa hvaŋą lɔ, diɛ di nwun nɔ di nwun na pili mɛ̨nį hu, di kaayɔwɔɠaa nwun mąą kɔnwɔ̨ mɛ̨nį ɓa. Yiliɠaa di wean a gee a di hvaŋą;

⁸ ya ɓə di kɛɛ ni Ɉerusalɛmə kwɛlɛ, di hoo gilɛhəɠəmun da kaa, həɠə kwəlɛɛ ə ɓo mą, di ɲɛ̨itɔwɔ, nwɔ kɔ́ kɔ hɛnŋąą ə ɓo a hɛni, di piliɛ ɲee mɛ̨i.

⁹ Di kəlee diɛ kea lúwɔ kɛ nu ɲɛ̨i mąąwɛli kaa Yálá ɓa, ə ɓo yɛ di hvaŋą ta a pɛlɛ mą, diɛ pɛli ɓɔi, və kɛli lɔ nuą hu, kɛlaa ə mą kɛ lɔwɔ huwɔ kpeɠiɛɠaa hu da taa mąąkpɛ hįį nwąną tɔɔ a kwɛli ɉu.

¹⁰ Di tɔɔ a di yɛli diɛ li gɔ́ ɓa, yələimun da ə ɓo di pɔ; hvo gaai Nąmu ə di ɲɛ̨i mąąwɛli kaa.

¹¹ Di wolo di yowoɠaa diɛ, yɛ yalaɠaa; nuąi kɛ di kɔwɔɲą, di nu waa pow gɔw tanɔ̨n baa. Ɉoomɛ̨inuą nu waa tɔnɔ̨ pulu nwun mɛ̨ida; di hee gbəliɠaa hu, di pu.

¹² Damąą di pu, kɛlaa kwɛli hɛn bɔɔ ə ɓo diɛ. Lisiasə yaa kpįnįlee ə pu a nwumɛ̨.

Ɉuifəɠaa di wɔ liilaa mɛ̨ni

¹³ Lisiasə hvo kɛ a nui hva giliŋąhiɛ; gɔi ŋɛ̨i kala mą, ə giliŋahiɛ ɉu; ə gbaɠala kaa yɛ kɛ nu ta yee hva pɛli tɛɛi Ɉuifəɠaa diɛ, hvo gaai Yálá hvaŋą kɛnɛ̨i tɔɔi di pulu,

¹⁴ ə nuą tɔɔ; yɛ Ɉuifəɠaa diɛ di di yee too geehu; mɛ̨nįi lɔpee da mo a ɉaŋanŋąą, a hvaa mą, ɛlɛɛ a mo tɔɔmun ma, da diɛni di nɛ̨ɛ̨.

¹⁵ Mɛ̨nįɠaai ti Lisiasə ə mo, Makabe ə giliŋahiɛ nɔi kəlee mąą mɛ̨nį hu, ə hvaa mą ɛlɛɛ mɛ̨nįɠaa kpɔ Makabe ə bɛ̨ɛ̨ Lisiasə ɓa, Ɉuifəɠaa mąą mɛ̨nį ɓa, tɔɔmun ə hvaa gəlee ɓa.

¹⁶ Ɉɛɓɛ́i Lisiasə ə bɛ̨ɛ̨ Ɉuifəɠaa diɛ ya ka: «Lisiasə ɓə ɉɛɓɛ́i ŋɛ̨i tɛɛi Ɉuifəɠaa kəlee diɛ, yɛ di tuwo ɓo.

¹⁷ Ɉaan da Absalɔn; ka wɔ kɛlaɠaai, di ka wɔ hɛɓɛ́i tɛɛ bɔ́, diɛ kɛ ŋą́ hvaa ɉu wooɠaa diɛ.

¹⁸ Mɛ̨nįɠaai kɛ mąą nɛ̨ɛ̨ ŋą́ tɔɔmun mąąnikɛ ɉu, ŋą́ mąąnikɛ di hu, ɛlɛɛ mɛ̨nįɠaa kɛ a ɲéé kɔn ma mɛ̨nį, ŋą́ hvaa yiliɠaa ɓa.

¹⁹ Ka kiliŋąhiɛ pələ a lɛɛ a nɛlɛɛ yɛ hvilɛn na nɔi ɓa, ɲąą gbɛlimąn gáá pai tɔɔi a nwą́ną́i gɛ́ ka mąą mɛ̨nį lɛlɛɛ ɲɛ̨i kulɔ tɔwɔ pələ.

²⁰ Mɛ̨nį pɛlɛ-pɛlɛɛɠaa di wɛi, ŋą́ gwéi mɛ̨nį hu kulɔ ka wɔ kɛlaɠaa diɛ da nwɔ́ nuąi diɛ, ka ka keeni kaa, kaa mąn ka diɛni.

²¹ Kɔlɔi pono ə́ kɛ ka yei! Gwɛlan nwun dɔnɔ̨ yee nąąn kɔw mɛ̨ihaaɓa, Dioskorə ɲąni voló pow hveelɛ gɔw nąąn ɲələ.»

²² Ɉɛɓɛ́i tɔɔmun ə dɛɛ, ɉu woo ka: «Tɔɔmun Antiokusə ɓə ɉɛɓɛ́i ŋɛ̨i tɛɛi gaayɔwɔ Lisiasə ɓa, yɛ duwoɓo.

²³ Gu ną́n ga, aa li gu nánni ɲamuaa pɔ; ɲąą gbįnįlee və́ bɔ ku wɔ lɔi hu nuą hvįįkpɛɛ mɛ̨nį hvo kɛ di wəli pulu, di yee yɛ pɛli kɛi lɔ di wɔ kolóɠaai ɓa;

²⁴ ŋąą bələ mɛ̨n, diɛ kɛ Ɉuifəɠaa di hvo Grɛkəɠaa yíi pələ pɔ, yai ną́n ə kɛ bɔi; Kɛlaa di wɔ lɔi hu yíi pələ ɓə di kaa bɔ; di kaa ɉu hvɛli, diɛ di di lɛɛ laa diɛ tuwó yɛ bələi nɔi tɔnŋąą da mo la;

²⁵ gáá bɔ, ə mąn kɛ nuą ti diɛ kpɛlimąn di kɛ liilaa hu; yili mąą mɛ̨nį ɓa, 'gɛ́, ɉɛli pɛ́lɛ ə pənə ə tɛɛ di pɔ, diɛ tuwó yɛ lɔi lonnii, a di nanni yíi pələ.

²⁶ Nɛlɛɛ ɓaa kani ə́ nu tɔɔ di pɔ, gu gu yee hąŋąn di pɔ pələ, bələi gu mɛ̨nį ti hon na, di gbaɠala kaa, di gɛ a kili tɔɔ mąą, ɛlɛɛ di yee ə kɛ di kpɔ-kpɔɔ kólóɠaa ɓa, liilaa kpɔ-kpɔɔ hu.»

²⁷ Ɉɛɓɛ́i tɔɔmun ə dɛɛ Ɉuifə lɔi ɓa, ɉu woo ka: «Tɔɔmun Antiokusə ɓə ɉɛɓɛ́ ŋɛ̨i tɛɛi Ɉuifə kalanɉonŋaa diɛ, da Ɉuifəɠaa kəlee, yɛ di tuwoɓo.

²⁸ A kɛ ka kɔlɔi ponoi, ku liiɓa li; kuɔ kpįnįilee ku kɔlɔi ponoi.

²⁹ Menelasə ə mo kuɔ yɛ ka kaa bɔ ka pənə ka li ka pɔɔli, ka wɔ kólóɠaa ɓa.

³⁰ Nuąi kpɔ pai pənəi diɛ li di pɔɔli, Santikə ɲąnin nwɔ hvoló pow haaɓanąn hvo təɠaa kɛ həli, di laa na diɛ mɛ̨nį lɔpee ta hva kɛ di wəli pulu.

³¹ Ɉuifəɠaa da pɛli mą di di wɔ lɔi hu kɔnɔ̨nŋąą mįi, yɛ pələi di mąą tɔnŋąą kaa la, yɛ bələi di kɛi gɛ la a bɔlɔ-pɔlɔ; di hvo pai di ta lɔpee mɔ̨nɔ̨ɓoi a pələ huwu lɔpee, mąąhɔlɔɓo aa ɉɔn gɛ dɛɠi.

³² Ŋą́ą́ Menelasə tɔɔ nwɔ̨nɔ̨, yɛ pɛli ka lii laai

³³ Kɔlɔi pono ə́ kɛ ka yei! Gwɛlan nwun dɔ̨nɔ̨ yee nąąn gɔw mɛ̨ihaaɓa, Santikə nwɔ hvoló pow gɔw lɔɔlinąn.»

³⁴ Romə nuą diɛ kpɛlimąn di hɛɓɛ́ tɛɛ Ɉuifəɠaa diɛ; ɉu woo ka: «Kintusə Memiusə, Titusə Maniliusə, da Maniusə Sɛrziusə, Romə nuą di wɔ kɛlaɠaa ɓə ɉɛɓɛ́i ŋɛ̨i tɛɛi Ɉuifəɠaa diɛ, diɛ di tuoɓo.

³⁵ Mɛ̨nįɠaai ti tɔɔmun gaayɔwɔ Lisiasə ə hvaa mą, kaa pɛli gɛi, kuɔ kpɛlimąn kwaa hvaa mą.

³⁶ Mɛ̨nįɠaai ti ə gaa yɛ kɛ hvo kɛli a di hu lɛ tɔɔmun ma, ka di hu kpɛ, ka kɛhvi ka nu tɔɔ kuɔ, kuɔ pɛli di hu kulɔi tɔɔmun ma a pələ yii ɉu a nɛ̨ɛ̨ la kaa, hvo gaai ku kaa lii Antiɔsə.

³⁷ Ka kɛhvi kan, ka nu tɔɔ kuɔ, kuɔ pɛli ka kwəi mɛ̨nį kɔlɔnɉi.

³⁸ Kɔlɔi pono ə́ kɛ ka yei! Gwɛlan nwun dɔnɔ̨ yee nąąn kɔw mɛ̨ihaaɓa, Santikə nwɔ hvoló pow gɔw lɔɔli yələ.»