2 Makabe 10 - Yálá laawoo hɛɓɛ (dc)

Ɉɛli pɛlɛ mąąhəɠə mɛ̨ni

¹ Nąmu ə tɔɔ Makabe da mɛlaa di pulu di gɛɛnąą mąąhəɠɛɛ da daa hon.

² Ɉaliɠaa kɔi ti nweąą di dɔɔ gwəli kɛnɛ̨ɛ̨ heąi, da ɉali kɔ pɛ́lɛɠaa, ə di pu.

³ Di ɉɛli pɛ́lɛ mąąhəɠə, di Yálá kɔi ta kpɛli tɔɔ; di nwɔ̨n gulɔ nwɔn gwɛni hu, di nwɔ̨n dɔɔ nwɔn ti ɓa, di pənə di halaa kulɔ; daa kɛ kpəla ɉalaa kulɔɔ ɓa aa kɛ a kwɛlan veelɛ; di lansan kələn, di labonŋąą tɔɔ, di nɛɠɛɠaa laa.

⁴ Di kpɛɛ a mɛ̨nįɠaa ti kɛɛ, di pɛ́lɛ́ nɔi ɓa, di Nąmu hvɛli, hvo kea mɔ̨nɔ̨ taalei ti ta laa diɛ; kɛlaa da nɛŋɛn ɉəɠəi, ə di hu tɔɔ a bɛliɛ ɉu, hvo di too mɛlɛ too lɔiɠaa da lɔi ɲɔ̨nwɔ̨ɔ̨ɠaa yee kɔn ma.

⁵ Voloi lɔ ti nweąą di ɉɛli pɛ́lɛ laa pu la, mąą hvoló lɔ ɓə pɛli a ɉɛli pɛlɛ́ mąą həɠə kuu, ya ɓaa Kislɛwə ɲąnįn ŋą hvoló pow hveelɛ gɔw lɔɔli yələ.

⁶ Di gələ hɛli pu hvoló mɛ̨ihaaɓa yee mu, a kwəinɛ̨ɛ̨ kɛnɛ̨ɛ̨, diɛ di kiliŋąhiɛ bələi wɔlɔ di kɛi gələ hɛli pu hvolóɠaa ti kɛ la, diɛ yíi yeeɠaa hu, kwɛni woloɠaa hu, yɛ lɔwɔ huwɔɠaa.

⁷ Yili ɓə gɛ, wulu-kpie mąą puɔɠaa, a wulu-powa, da wulu wonwoɠaa da gwalalaaɠaa di kɛ di yei, diɛ nwələɠaa too Yálá ɓa: ya ɓə ŋa hɛli pɛlɛ́ mąą həɠɛɛi goló kɛ yɛ naa kulɔ a nɛlɛɛ.

⁸ Di tɔn naa; a lɔi tɔn, nu kəlee ə ɲee lowa mą, a Ɉuifə lɔi kəlee nwɔ mɛ̨nį, diɛ kɛ kwɛlan dɛitɛi yeemu, da ɉɛli ti pu volóɠaa ti yee mu.

Antiokusə Eupatɔrə nwɔ tɔɔlaa kɔwɔ tɔɔi

⁹ Bələi Antiokusə, yai naa mɛ̨i heɛ a Epifanə, ə haa la, bələ ka ti, ku ɉukulɔ.

¹⁰ Yii kɛa gu kaa pai moi, ya ɓaa: Antiokusə Eupatɔrə, nu ɲɔ̨nwɔ̨ɔ̨ ti lon mąą mɛ̨nįɠaa; mɔ̨nɔ̨ɠaa kulɔ gɔɠaa hu, gu ɉəɠə a ɉu kpuaa, guɔ di hu kulɔ.

¹¹ Yii kɛa nɔi ə lɛɛ ɲei ti, ə Lisiasə laamun ta hee nɔi mɛ̨nįɠaa nwun na Siri kɛnɛ̨mun da Fenisi lɔi ɲąąwooɓomun gɛnɛ̨.

¹² Ptoleme yai naa mɛ̨i heɛi a Makrɔn nwɛ̨i, yai ti tɔɔ tɔwɔ yɛ Ɉuifəɠaa hon a tələnmolaa, mąąhɔlɔɓo daa kɛ di mɔ̨nɔ̨ɓo, ə tɔɔ a nwąnąi yɛ di ɲąąwooɓo a liilaa.

¹³ Yili mąą mɛ̨nį ɓə, tɔɔmun mɛlaa di ɉɔn doo la Eupatɔrə ɓa; diɛ kɛa kɛ mą, ɲaɓalɔmun ni a yələkəlee, mąąhɔlɔɓo Siprə lɔi ti Filometɔrə ə ɉee nwun na, ə nɛɛ laa, yɛ hvilɛn Antiokusə Epifanə pulu, tuwoi hvo mo a nwɔ kaalonnaa mąą hon bələ, ə gbɔwɔ paa a ɉali ɲɔ̨nwɔ̨ɔ̨ kpələi ə mo.

Gɔrgiasə da Idume kɔ-taa

¹⁴ Gɔrgiasə heei di mo nɔi nwun na, holahiɠaa di kɛ ɲei, ə di ya, ɛlɛɛ, yɛ kɔ pɛlɛ Ɉuifəɠaa diɛ a pələ huwu lɔpee ə kɛi gaa.

¹⁵ Nąąlɔwai lɔ nwɔ̨nɔ̨, Idume nuą di kɛ kɔ́-taaɠaa hu; daaɠaa tɔɔ pələ, di kɛi Ɉuifəɠaa hvaną, nuąi kɛ daa pu Ɉerusalɛmə ɓa diɛ di yee hee di mu, diɛ kɔ nįnɛ̨ muhəɠə pələ kwɛli.

¹⁶ Kɛlaa Makabe da nwɔ holahiɠaa di Yálá hvɛli di kəlee, diɛ kɛ mą ə tɔɔ di pulu, yili pulu di di muhəɠə diɛ li pɛlɛ́i Idume kɔ́-taaɠaa diɛ.

¹⁷ Di gɔ yili ɲą kpɔ a hu wala-walalaa, nuąi kɛ ɉii nwąną mɛ̨i, di hee yiliɠaa hu, di gɛɛnąą ti hon; yiiɠaa kɛi too di yee ɲą, di kɛi di paa; yiiɠai di di paa, da pɛli nu waa pow hveelɛ kulɔi.

¹⁸ Nu waa mɛ̨inaan di lɔ kɔ́-pɛ́lɛ hveelɛ mu, di hon naa walaa kpɔ a nelee, ɛlɛɛ hɛn lɔpee mąą kpaan gaa nu ɓa yɛ pɛli tɔɔi kɔ la, ə ɓo di yei,

¹⁹ Makabe ə Simɔn, Ɉosɛfə, da Zase di lɛɛ laa, di di mąątinɛ̨n, di hee, nuą di ɓo di yei a di kpulu kɛnɛ̨, yai ti ə li ɓɛi mąą kpaan ə kɛ laa nuą diɛ.

²⁰ Kɛlaa Simɔn nwɔ nuąi kɛi gɔ-pɛ́lɛɠaa mąąkpɛ, hɛn nwɛli ə gɛ, di daɠaa yá a wali; di wali waa pow mɛ̨ihveelɛ, ɛlɛɛ di nuąi ti lɛɛ laa di kulɔ.

²¹ Mɛ̨nį ti di gɛ, di ɉu kulɔ Makabe ɓa; ə gɔ nwun nąmįną ɲąąkpɔn, nuą ti di hɔn gɛ, yɛ diɛ daa di nąn nonnii lɔwɔtɔɔ wali ɓa, hvo gaai di di yee ɓo di yowoɠaa diɛ, yiliɠaai diɛ pənə diɛ pɛ́lɛ́ diɛ.

²² Di di paa yɛ ɲaɓalɔnuą; ə lɛɛ ə gɔ-pɛ́lɛ hveelɛi hon.

²³ Nwun na ə nɛ̨ɛ̨ gɔi ti hu, nuąi ə di paa gɔ-taa hveelɛi ti hu, da tɛɛ nu waa pow hveelɛ hu.

Gazara kɔ́

²⁴ Timote ti Ɉuifəɠaa daa kɛ kɔ kala mą tolo-tolo, ə nweąa hon a kɔkulaa di kpulu kɛnɛ̨, ə hooɠaa ɲąąkpɔn, a Asi hooɠaa, ə lɔ Ɉude lɔi hu, nɔi hon mɛ̨nį ɓa a kɔ́.

²⁵ Gɛɛ mąąlɛɠɛi diɛ, Ɉudasə da mɛlaa di kɛi Yálá mąąnɛ̨ɛ̨; pɔlɔ puɔ di nwuɔ̨, ɓii ə ɓo diɛ.

²⁶ Di pɛ́lɛ́ɛ́ kɛ nɔi ɓa, ɉaláá kulɔi kɔwɔ la, diɛ Yálá hvɛli diɛ kɛ, ə tɔɔ di pulu; ə kɛ a di yowoɠaa ɲowo, ɛlɛɛ nuąi tɔɔ di la, yɛ bələi bɛ̨ɛ̨ la hele-tete dɔn ɉɛɓɛ́ hu.

²⁷ Di kpɛɛ a vɛli ɓoɔ, di gɔ kɔ hɛnŋąą həɠə, di di mąą tɛ kpɔ a ɉu kweaa koloɓo daa ɓa; lɛɠɛi di mo di yowoɠaa diɛ, di kpəla di tɔɔ.

²⁸ Hvoló-liɛn ma, di gɔ yili ɲą pələ kəlee Ɉuifəɠaa kili ə pu ɉu diɛ gɔ a pɛli nɛ̨ɛ̨i diɛ, mąąhɔlɔɓo, ə kulɔ di hu walawala pələ hu, di kili tɔɔi kɛ Nąmu ɓa; yiiɠaai ti, di wɔ lííholi ɓə kɛi di tənəndɔɔ gɔ hu.

²⁹ Gɔ kpɔluɔ ti hu, Ɉuifəɠaa di yowoɠaa di nu lɔɔli kaa di lɛlɛɛ kpɔ, yələi pələ, di ɓo hooɠaa mɛ̨i, ɉooɠaa laa kwɛli ə ɓo a hɛni, di tɔɔ Ɉuifəɠaa ɲɛ̨i tɔwɔ.

³⁰ Di Makabe tɔɔ di lɔwai diɛ mąąkpɛ a di wɔ kwɛli hɛnŋąą, kwɛli hɛn da hvo pa nee túnwɔ̨n mą, kɛlaa di kɛi kpalaɠaa da yələ-gbanąą pili di yowoɠaa mɛ̨i, yiliɠaai di hu yɛ pu diɛ a gɛɛ-pono taaləi ti, di taɠa-taɠa pələ kəlee.

³¹ Nuąi kɛ di kɔwɔɲą, nu waa pow hveelɛ pulu nwun nɔɔli ɓə di di paa di hu; ɉoo mɛ̨i nuą, nu nwun mɛ̨ida.

³² Timote yaa kpɛliman ə pu ə li kɔ taa hon naa wala ta hu, diɛ kɛ mą Gazara, Kereasə ɓə kɛi nąą ɲąąwooɓo.

³³ Kɛlaa Makabe da mɛlaa di kɔ pɛ́lɛ́ daa ɓa hvoló nąąn yeemu, a liikpələ da kwəinɛ̨ɛ̨.

³⁴ Nuą kɛ daa kwəi pələ, di kili tɔɔ pələ daa ɓa, di kɛi lɔ lalan bili mɛ̨nį hu, diɛ woo ɲɔn ɉaa.

³⁵ Volo lɔɔlinan, yələ wala pinɛ̨ɛ̨, Makabe nwɔ holahiɠaa laŋąą pow hveelɛ di lííholi pələ nalan mɛ̨nį hu, di kpulun di tɛ ɉįį nwąną mɛ̨i, a lii kpələ kɛnɛ̨ da lííholi ɲɔ̨nwɔ̨ɔ̨ ta; nui lɔpee kɛi too di yei, di kɛi baa.

³⁶ Nu ta kpɛliɠaa di tɛ lɔ ti daa hu nuą pɔ, di daa mąąkpɛ pɛ́lɛɠaa kələn, di nwɔ̨nɠaa tɔɔ, di nalan bilinuą ti kələn a di hvulu. Nu tolo-toloɠaa di wɛi, di gbonŋa yali, ɉolahi kpulu gbəli ə lɔ, diɛ ɓə pili daai tolo-tolo.

³⁷ Di Timote nwun dee, aa kɛ noo yalowa hu; ə mą kɛ, nąn non Kereasə da Apolofanə.

³⁸ Gulalaa ti kɛi di mo, di kɛi lúwɔ too, diɛ Nąmu mąątɛnɛ̨, yai ti kɛi mɛ̨inɛ̨ɛ̨ kpɛa-kpɛa kɛ Israɛlə ɓa, yɛ kɔ nɛ̨ɛ̨ mą.