Tɔɔɓɛlaa veelɛ 17 - Yálá laawoo hɛɓɛ (dc)

Ose Israɛlə tɔɔmun gbəli

¹ Ɉuda tɔɔmun Akazə nwɔ tɔɔlaa gwɛlan bow gɔw hveelɛ lɔwai ɓə, Ela lon Ose ə kɛ la a tɔɔmun Israɛlə lɔi hu Samari daai. Ə kwɛlan mɛ̨inąąn gɛ dɔɔlaa hu.

² Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, yili ɓə ə ɲee lɔ ɉu. Kɛlaa, hvo həli Israɛlə tɔɔɓɛlaa dɔlɔɔɠaa pɔ.

³ Asiri tɔɔmun Salmanasarə ə pa ə kɔ́ pɛlɛ mą. Ose ə lɛɛ ɲee mu, yɛ nįįhɔ̨nwɔ̨ kulɔ mą.

⁴ Kɛlaa, Asiri tɔɔmun aa kɛ gbaɠala kaa, yɛ Ose a nɔgilii kɛ mą. Mąąhɔlɔɓo, Ose ə nuą tɔɔ Eziptə tɔɔmun So pɔɔli, ɛlɛɛ, hvo kɛa kɛi nįįhɔ̨nwɔ̨ kulɔ Asiri tɔɔmun mą yɛ bələi a gɛ la a kwɛlan gəlee. Asiri tɔɔmun ə Ose hon, ə yɔwɔn doo gɔwɔ kwąną, ə doo gaho ŋą.

⁵ Asiri tɔɔmun ə lɔ Israɛlə lɔi hu nąą kəlee a kɔ́, ə pa, ə kɔ́ pɛlɛ Samari ɓa, ə mąą tinɛ̨n kwɛlan ɉaaɓa yee mu.

⁶ Ose nwɔ tɔɔlaa gwɛlan mɛ̨inąąn nɔwai, Asiri tɔɔmun ə Samari hon a kɔ́, ə Israɛlə nuą damąą həɠə, ə li a diɛ Asiri lɔi hu, ə di hee Hala da Habɔrə ya kwɛlɛ, yai kɛ a Gozan nwɔ ya lee kɛnɛ̨, ə daɠaa hee Medi taa kpɛa kpɛaa hu.

Israɛlə tɔɔlaa too mɛ̨nį nwun ga

⁷ Yili ə laa tii Israɛlə nuą diɛ, mąąhɔlɔɓo, di nɛ̨ŋɛ̨n ɉəɠə Yai-Laa di wɔ Yálái ɓa, yai di kulɔ Eziptə tɔɔmun ɲee mu luwɔlaa hu. Di kɛi kɛa kwɛli hvilɛn haliɠaa diɛ,

⁸ Nuąi di hvo kɛ Yai-Laa kɔ́lɔn, di hvilɛn gɛa di yíi pələ pulu, a nɔiɠaa ŋɛ̨i Yai-Laa ə ɉu nuą hu kala Israɛlə lonnii mąą mɛ̨nį ɓai. Yili ɓə Israɛlə tɔɔɓɛlaa di gɛ.

⁹ Mɛ̨nįi mąą hvo nɛ̨ɛ̨li kɛ Israɛlə lonnii di hvo gɛ a Yai-Laa di wɔ Yálái, ya ɓə yaamun di di yee lɔ ɉu diɛ gɛ a loo pɛlɛ. Diɛ hali kɔ́iɠaa pɛli daa kpɛa kpɛaa kəlee hu, daa mąąkpɛ pɛlɛ́ɠaa kəlee mu, da gɔ́ taaɠaa hu.

¹⁰ Diɛ hali kɔ́iɠaa tɔɔ, diɛ wuluɠaa tɔɔ, diɛ haláá kulɔ mą, ɲeeɠaa kəlee nwuɔ̨, da wuluɠaai nąą ŋąąnɛ̨ɛ̨ mą di mu.

¹¹ Ɉali kɔ́iɠaa kəlee ɓa, di kɛi lansan kələn naa, yɛ bələi nu huwuɠaai Yai-Laa ə di kpɛ di ɲɛ̨itɔwɔ di kɛi gɛ la. Di kɛi mɛ̨nį ɲɔ̨nŋaa kɛ a Yai-Laa nwąną lɔ pələ.

¹² Di kɛi kwɛli hvilɛn haliɠaa diɛ, yaan, Yai-Laa ə kɛ diɛ, 'ka hvo yili kɛ.

¹³ Ɛlɛɛ, Yai-Laa aa kɛ mo Israɛlə da Ɉuda diɛ gwəi mɛ̨nį hukulɔ nuą, da nwɔ kwɛlɛɛn gɛɛ kaa nuą laaləi, yɛ diɛ: «Ka ka pulu ka ka yee kulɔ ka wɔ túwɔ́ pələ ɲɔ̨nŋaa ɉu, ka hvilɛn nwɔ́ tiɓoɠaa da nwɔ́ tɔ́n nwooɠaa pulu, yɛ bələi ŋą́ mo la ka nąnni diɛ, gɛ́ gwə́i mɛ̨nį hukulɔ nuą tɛɛ, diɛ ɉukulɔ kaa.»

¹⁴ Kɛlaa, di hvo mɛ̨nįi tii mɛ̨n, di di kili walawala lɔ yɛ di nąnni, diɛi wɔlɔ lənə Yai-Laa di wɔ Yálái ɓa.

¹⁵ Yai-Laa nwɔ tíɓoɠaa, da mįnɛ̨i da di nąnni di ɉəɠə, di tɛɠɛɓo ɉu, diɛ kpɛli-kpɛli mɛ̨nį mąą gilɛ həɠə, diɛ ka kɛa, di hu aa kala. Nɔiɠaa kɛ di kwɛlɛ, di hvilɛn di túwɔ́ pələ pulu, ɛlɛɛ yaan, Yai-Laa ə mo diɛ, yɛ diɛ: 'Ka hvo túwɔ́ yɛ diɛ.

¹⁶ Di Yai-Laa di wɔ Yálái nwɔ tíɓoɠaa kəlee lɛɛ laa, di nįŋɛ̨ lon mąąnįnįn veelɛ pɛli, di wulu tɔɔ, diɛ haláá kulɔ mą. Diɛ kwɛli hvilɛn yələ kwəi hɛnŋąą kəlee diɛ, diɛ tí Baalə ɓa.

¹⁷ Di kɛi di lon ɉinąą da di lon nɛ̨ąą tɛɛ nwɔ̨n bɔ, diɛ tɔlikpɛ, diɛ nuą tɔɔ ɲąmuątaa, diɛ lɛa di yee too di kala mɛ̨nįɠaa hu, di túwɔ́ pələ ɲɔ̨n gulɔ a Yai-Laa nwąną lɔ pələ.

¹⁸ Yai-Laa ə níiholi Israɛlə pɔ kpɔ kɛnɛ̨, ə di pili kpɔ kwɛaa la, ə di həɠə ɲɛ̨i mu; Ɉuda huwu yaa tɔ̨nɔ̨ lɔ ɓə lɛɛ.

¹⁹ Ɉuda yaa kpɛli mąn, hvo kɛ Yai-Laa nwɔ Yálái nwɔ tíɓoɠaa kɛ li; diɛ kpɛli, bələi Israɛlə nuą di túwɔ́ la, di kɛ mɛ̨nįɠaa tii ɓə di hvilɛn bulu.

²⁰ Yili ɓə gɛ Yai-Laa yɛ Israɛlə huwu kəlee pili, ə di nwumɛ̨, ə di lɔ toomɛ̨i kɛ nuą yəi, ə naa kulɔ kɛa a di kpɛi ə mo ɲɛ̨i mu.

²¹ Ɓɛlɔwai Yai-Laa ə Israɛlə kulɔ la Davidə nwɔ pɛ́lɛ́i ɓa, nąąlɔwai ɓə di Nevatə lon Ɉeroboamə hee la a tɔɔmun. Ɉeroboamə ə Israɛlə nwun ɉu lan, yɛ mąąkwɛa Yai-Laa ɓa, ə ɲee lɔ nɛ̨ŋɛ̨n gɛnɛ̨ hu.

²² Nɛ̨ŋɛ̨nŋaa kpɔ Ɉeroboamə ə ɉəɠə, Israɛlə lonnii di hvilɛn gəlee pulu, di hvo dai lɔpee mąąlaa.

²³ Yili ɓə gɛ, Yai-Laa yɛ di kpɛ ɲɛ̨i mu, yɛ bələi ə bu la nwɔ tínuą kəlee la, diɛi kɛ a gwəi mɛ̨nį hukulɔ nuą, diɛ mo. Di Israɛlə kulɔ nwɔ lɔi hu, di li la kwɛaa la Asiri lɔi hu, gaa ni laa.

Samari nu huwu kpala tɔɔ pələ

²⁴ Asiri tɔɔmun ə nuą həɠə Babilonə, Kutə, Awa, Hamatə, ɛlɛɛ, Sefarwaimə, ə di hee Samari taaɠaa hu a Israɛlə lonnii mąąhvalin. Samari ə kɛ kɛa a di wɔ lɔi, di hee nąą taaɠaa hu.

²⁵ Ɓɛlɔwai di hee la a nįnɛ̨, gɛɛ nąą tii ɓa, di hvo kɛi ɲɔw Yai-Laa ɓa, Yai-Laa ə yalaɠaa tɛɛ, yiliɠaai diɛ di paa.

²⁶ Di mo Asiri tɔɔmun mą, diɛ mą: Nu huwuɠaa ə́ di kulɔ lɔiɠaa hu, yɛ́ di hee Samari taaɠaa hu, di hvo nąą nɔi nwɔ Yálá mąąwiɛ pələ kɔ́lɔn. Ɲálái tii aa yalaɠaa tí diɛ, ɛlɛɛ, yiliɠaa diɛ di paa. Mąąhɔlɔɓo, di hvo nɔi Yálá mąąwiɛ pələ kɔ́lɔn.

²⁷ Nąąlɔwai, Asiri tɔɔmun yɛ diɛ: Samari haláá laa həli nuą tii ka li a diɛ, ka dɔ̨nɔ̨ tɔɔ laa, ə ɉaláá kulɔ pələ lɛ diɛ.

²⁸ Ɉaláá laa həli nuą tii kulɔ Samari, diɛ li, dɔ̨nɔ̨ ə pənə ə pa, ə hee Betɛlə, yɛ Yai-Laa mąąwiɛ pələ lɛ nuą diɛ.

²⁹ Kɛlaa, ɉaláá kulɔiɠaa Samari nuą di bɛli, nu huwuɠaa ŋɛ̨i pa heei laa, nu kəlee ə nwɔ haliɠaa hee ɉaláá kulɔiɠaa tii ɓa. Bələ ɓə nu huwu tii kəlee di gɛ la daaɠaa di hee ɉu nąą kəlee.

³⁰ Babilonə nuą di Sukkotə-Benotə mąąnįnįn ɉəɠə, Kutə nuą di Nɛrgalə mąąnįnįn ɉəɠə. Hamatə nuą di Asima mąąnįnįn ɉəɠə,

³¹ Awi nuą di Nibazə mąąnįnįn ɉəɠə, da Tartakə; Sefarwaimə nuą di wɛi, di yee ə kɛ lɔ di lonnii kələn mɛ̨nį hu, diɛ Adramelɛkə da Anamelɛkə mąąwiɛ la, yiliɠaa ɓə kɛ a di wɔ haliɠaa.

³² Kɛlaa, di kɛi lɔ ɲɔw Yai-Laa ɓa yaa kpɛli. Di nuą həɠə di lɔwai a ɉaláá laa həli nuą di nwɔ haláá kulɔiɠaai ɓa, yiliɠaa diɛ ɉaláá laa həli a di laa ɉali kɔ́iɠaa ɓa.

³³ Di kɛi lɔ ɲɔw Yai-Laa ɓa, di yee ə ɓo nwɔ̨nɔ̨ di pɔ lɔi haliɠaa mąąwiɛ pələ ɓa, lɔ yɛ bələi nuąi di di kulɔ nɔi di yee ə kɛ la mą.

³⁴ Ə mą kɛ háákələi, bələ lɔ ɓə da kɛ túwɔ́i la, di hvo kɛi ɲɔw Yai-Laa ɓa. Di hvo nwɔ̨nɔ̨ hvilɛn díɓoɠaa da ɉaláá kulɔ pələɠaa pulu, ə mą kɛ, dɔ́n nwoo da mɛ̨nįɠaai Yai-Laa ə naa Ɉakɔbə lonnii nwuɔ̨, yaai ə Israɛlə laa hee Ɉakɔbə mą.

³⁵ Da Yai-Laa ni di ta nįnɛ̨ həɠə, Yai-Laa ə mo diɛ, yɛ diɛ: «Mąą hvo nɛ̨ɛ̨li ka hvo kwɛli hvilɛn haliɠaa diɛ, ka hvo di mąąwiɛ, ka hvo haláá kulɔ diɛ.

³⁶ Yai-Laa tii ka kulɔ Eziptə lɔi hu a nwɔ huwalawala yee kɔ̨nwɔ̨n, ya ɓə mąąnɛ̨ɛ̨ ka kwɛli hvilɛn mą, ka ɲɔw mą, ɛlɛɛ, ka haláá kulɔ mą.

³⁷ Díɓoɠaa, dɔ́n nwooɠaa, ɉaláá kulɔ pələ, da nɔi hon bələɠaai ə bɛ̨ɛ̨ a ka mąą mɛ̨nį, ka tɔɔ a ka nwąnąąi, ka di kɛ a yələ kəlee, 'ka hvo ɲɔw haliɠaa diɛ.

³⁸ Mįnɛ̨i ŋą́ naa gwa kaani gu lɔwai, ka hvo lɛ̨ą mą, ka hvo ɲɔw haliɠaa diɛ.

³⁹ Yai-Laa ka wɔ Yálái ɓə mąąnɛ̨ɛ̨ ka ɲɔw mą. Yaa tɔ̨nɔ̨ gbən mə a pɛli ka kulɔi ka ɲowoɠaa kəlee yəi.»

⁴⁰ Di hvo gɛ, di hvo di wəli tɔɔ Yai-Laa woo tii ɓa, yaamun, di yee ə kɛ lɔ di yíi pələ pɔlɔɠaa hu, diɛ gɛ.

⁴¹ Yɛ bələi ɉį́i takpɛliɠaa tii di kɛi Yai-Laa mąąwiɛ la, di yee ə ɓo di lɔ di yíi pələ pɔlɔ hu, diɛ di wɔ haliɠaai mąąwiɛ, bələ lɔ ɓə di lonnii di wɔ lonnii di kɛi túwɔ́ la háá ɓa háá.