Tɔɔɓɛlaa veelɛ 15 - Yálá laawoo hɛɓɛ (dc)Azariasə Ɉuda tɔɔmun 1 Israɛlə tɔɔmun Ɉeroboamə veelɛnąą nwɔ tɔɔlaa gwɛlan bow hveelɛ kɔ́w mɛ̨ihveelɛ lɔwai ɓə, Amasiasə lon Azariasə ə dɔɔlaa hɔlɔɓo la Ɉuda lɔi hu. 2 Gaa kwɛlan ə kɛ pow gɔw mɛ̨ida ɓɛlɔwai ə kɛ la a tɔɔmun, ə tɔɔlaa kɛ a kwɛlan bow lɔɔli kɔ́w hveelɛ Ɉerusalɛmə daai. Nee laa ɓa kɛ: Yekolyahu, yai həɠə Ɉerusalɛmə daai. 3 Azariasə ə hiɛ a ɉaŋąą Yai-Laa ɲɛ̨i ɓa, kpɔlɔɔ yɛ nąn Amasiasə. 4 Kɛlaa, ə mą kɛ tii, nuą di wɔ hali kɔ́iɠaa di hvo kpɛɛ nɔi; nɔi lonnii di kɛi lɔ haláá kulɔ gɛɛnąąɠaa tii, diɛ lansan kələn ɉaláá kulɔiɠaa tii ɓa. 5 Yai-Laa ə tɔɔmun gɛlɛ, hvólóɲɔ̨n ə yɛɛ la, ɲɔ̨n tii ə lɛɛ mą, ə lɛɛ la ɉu ɉaa yələ ə ɉəli la; ə kɛ pɛlɛ́ ta mu a dee, ɛlɛɛ, non Yotamə, yai kɛ dɔɔ pɛlɛ́ nwun na, ya ɓə kɛi nuą ɲąąwooɓo. 6 Azariasə kɛ mɛ̨nį gbəliɠaa, mɛ̨nįɠaa kpɔ ə gɛ, kɛlɛi gəlee pɛ̨ɛ̨ Ɉuda tɔɔɓɛlaa kɛ mɛ̨nį hɛɓɛ́ hu-ee? 7 Azariasə ə laa nąnni kwɛlɛ, di noo nąnni kámą hu Davidə taa. Non Yotamə ə hee dɔɔ kpəlin ɉu a nąn mąąhvalin. Zakari Israɛlə tɔɔmun 8 Ɉuda tɔɔmun Azariasə nwɔ tɔɔlaa gwɛlan bow haaɓa kɔ́w mɛ̨ihaaɓa lɔwai, Ɉeroboamə lon Zakari ə tɔɔlaa hɔlɔɓo Israɛlə lɔi hu Samari daai. Ə ɲąnin ɉaaɓa kɛ ɉu. 9 Ə túwɔ́ a ɲɔ̨nwɔ̨ɔ̨ Yai-Laa ɲɛ̨i ɓa, yɛ bələi galaɓɔlɔ ni di gɛ la. Nɛ̨ŋɛ̨n Nevatə lon Ɉeroboamə ə Israɛlə nuą yee lɔ ɉu, hvo həɠə bulu. 10 Yavɛsə lon Salumə ə lɔ Zakari kilii, ə ɓɔwa pu mą nuą ɲɛ̨i ɓa, ə baa ə hee ɉeei dɔɔlaa hu. 11 Zakari kɛ mɛ̨nį gbəliɠaa pɛ̨ɛ̨ Israɛlə tɔɔɓɛlaa kɛ mɛ̨nį hɛɓɛ́ hu. 12 Nwooi Yai-Laa ə mo Ɉehu ɓa, ya ka tii, yai ə kɛ mą: «Ə́ lonnii kaa pai lɛɛi heei Israɛlə tɔɔ kpəlin ɉu ə lɛɛ la ɉu ə həli la həɠə gee pɔ nąąn ma.» Salumə Israɛlə tɔɔmun 13 Yavɛsə lon Salumə ə dɔɔlaa həɠə Israɛlə lɔi hu, Ɉuda tɔɔmun Oziasə nwɔ tɔɔlaa gwɛlan bow haaɓa gɔw mɛ̨inąąn nɔwai. Ɲąnin dɔ̨nɔ̨ ɓə ə gɛ dɔɔlaa hu Samari. 14 Gadi lon Menahɛmə ə həɠə Tirsa, ə pa ə ɓɔwa pu Yavɛsə lon Salumə ɓa Samari daai, ə baa, ə hee dɔɔlaa hu. 15 Salumə kɛ mɛ̨nį gbəliɠaa, nɔgilii ə gɛ, yili hvo mɔ̨ɔ̨ pɛ̨ɛ̨ li Israɛlə tɔɔɓɛlaa kɛ mɛ̨nį hɛɓɛ́ hu? 16 Nąąlɔwai ɓɛ Menahɛmə ə Tifsa kala, daa nuąi kpɔ kɛ laa, da ɲee mu lɔi kəlee, ə li kpɔ la Tirsa daai. Ə baa ɓoi tii kɛ, mąąhɔlɔɓo, di hvo daa gbonŋąą laa ɓo dɔwɔ; ə goonɛ̨ąɠaa kəlee kwəi ɓɛla. Menahɛmə Israɛlə tɔɔmun 17 Ɉuda tɔɔmun Azariasə nwɔ tɔɔlaa gwɛlan pow haaɓa gɔw mɛ̨inąąn nɔwai ɓə, Gadi lon Menahɛmə ə tɔɔlaa həɠə la Israɛlə lɔi hu Samari daai; ə kwɛlan bow kɛ dɔɔlaa hu. 18 Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ya ɓə ə ɲee lɔ ɉu yɛ gɛ nwɔ yɛnɛ̨ɛ̨ kəlee yee mu, nɛ̨ŋɛ̨n Nevatə lon Ɉeroboamə ə Israɛlə yee lɔ ɉu, hvo dɔ̨nɔ̨ kpɛli mąąlaa. 19 Asiri tɔɔmun Pulə ə pa ə pɛlɛ nɔi ɓa a kɔ́, kɛlaa, Menahɛmə ə wali kwələ kilə waa pow haaɓa tɛɛ Pulə pɔ, əgɛ, yili ə kpɔnmąą tɛɛ bɔ, dɔɔlaa ə lɛɛ ɲəi a nwalawalaa. 20 Menahɛmə ə nwalii tii hɔlɔɓo nįįhɔ̨nwɔ̨i ŋɛ̨i ə gulɔ Israɛlə nuą diɛ, ə da kulɔ nwali nąmįną yəi. Nu tɛitɛi ə kɛi wali kwələ pow lɔɔli kulɔ. Ə kɛi gulɔ yɛ dɛɛ Asiri tɔɔmun bɔ, əgɛ, yili ə bulu pənə hvo lɔ nɔi. 21 Menahɛmə kɛ mɛ̨nį gbəliɠaa, mɛ̨nįɠaa kpɔ ə gɛ, gəlee pɛ̨ɛ̨i Israɛlə tɔɔɓɛlaa kɛ mɛ̨nį hɛɓɛ́ hu. 22 Menahɛmə ə laa nąnni kwɛlɛ, non Pekahia ə hee a tɔɔmun a nąn mąąhvalin. Pekahia Israɛlə tɔɔmun 23 Ɉuda tɔɔmun Azariasə nwɔ tɔɔlaa gwɛlan bow lɔɔli lɔwai ɓə, Menahɛmə lon Pekahia ə kɛ la a tɔɔmun Israɛlə lɔi hu Samari daai. Ə kwɛlan veelɔ kɛ dɔɔlaa hu. 24 Pekahia ə túwɔ́ a ɲɔ̨nwɔ̨ɔ̨ Yai-Laa ɲɛ̨i ɓa, nɛ̨ŋɛ̨n Nevatə lon Ɉeroboamə ə Israɛlə yee lɔ ɉu, hvo dɔ̨nɔ̨ kpɛli mąąlaa. 25 Nwɔ kɔ́ nwun nąmu Peka yai kɛ a Remaliahu lon, ə nɔgilii kɛ mą, ə ɓɔwa pu Pekahia ɓa, ə mą kɛ Argɔvə da Arie, di lɛɛ dɔɔ pɛlɛ́ ɲələi pələ Samari daai. Peka da Galaadə nuą ɓə li mɛ̨nįi tii kɛi. Peka ə Pekahia paa, ə hee dɔɔ kpəlin ɉu. 26 Pekahia kɛ mɛ̨nį gbəliɠaa, mɛ̨nįɠaa kpɔ ə gɛ, yili pɛ̨ɛ̨ Israɛlə tɔɔɓɛlaa di kɛ mɛ̨nį hɛɓɛ́ hu. Peka Israɛlə tɔɔmun 27 Ɉuda tɔɔmun Azariasə nwɔ tɔɔlaa gwɛlan bow lɔɔli gɔw hveelɛɛ lɔwai ɓə, Remaliahu lon Peka ə kɛ la a tɔɔmun Israɛlə lɔi hu Samari daai. Ə kwɛlan bow hveelɛ kɛ dɔɔlaa hu. 28 Ə túwɔ́ a ɲɔ̨nwɔ̨ɔ̨ Yai-Laa ɲɛ̨i ɓa; nɛ̨ŋɛ̨n Nevatə lon Ɉeroboamə ə Israɛlə yee lɔ ɉu, hvo həɠə bulu. 29 Israɛlə tɔɔmun Peka nwɔ lɔwai hu, Asiri tɔɔmun Tiglatə-Pilesɛrə ə pa Iyɔn, Avɛlə-Bɛtə-Maaka, Yanoa, Kɛdɛsə, Hasɔrə, Galaadə, Galile lɔi, da Nɛftali lɔi nąą kəlee, ə nuą hon ə li a diɛ Asiri. 30 Ela lon Ose ə nɔgilii kɛ Remaliahu lon Peka ɓa, ə baa, ə hee ɉeei dɔɔlaa hu. Oziasə lon Yotamə nwɔ tɔɔlaa gwɛlan bow hveelɛ lɔwai li kɛ. 31 Peka kɛ mɛ̨nį gbəliɠaa, mɛ̨nįɠaa kpɔ ə gɛ, yili hvo mɔ̨ɔ̨ pɛɛ li Israɛlə tɔɔɓɛlaa kɛ mɛ̨nį hɛɓɛ́ hu? Yotamə Ɉuda tɔɔmun 32 Remaliahu lon Peka, yai kɛ a Israɛlə tɔɔmun nwɔ tɔɔlaa gwɛlan veelɛ lɔwai ɓə, Ɉuda tɔɔmun Oziasə lon Yotamə ə tɔɔlaa hɔlɔɓo la. 33 Gaa kwɛlan ə kɛ pow hveelɛ kɔ́w lɔɔli, ɓɛlɔwai ə dɔɔlaa hɔlɔɓo la. Ə tɔɔlaa kɛ Ɉerusalɛmə daa a kwɛlan bow kɔ́w mɛ̨ida. Nee laa ɓa kɛ Yerusa, Sadɔkə lon. 34 Yotamə ə túwɔ́ a ɉaŋąą Yai-Laa ɲɛ̨i ɓa, kpɔlɔɔ yɛ nąn Oziasə. 35 Kɛlaa ə mą kɛ tii, ɉali kɔ́iɠaa di hvo kpɛɛ nɔi, nuą di kɛi lɔ li diɛ haláá kulɔ gɛɛnąąɠaa tii, diɛ lansan kələn nąą. Yotamə ɓə Yai-Laa nwɔ pɛlɛ́ ɲələi pələ kpon doo. 36 Yotamə kɛ mɛ̨nį gbəliɠaa, mɛ̨nįɠaa kpɔ ə gɛ, kɛlɛi gəlee pɛ̨ɛ̨i Ɉuda tɔɔɓɛlaa kɛ mɛ̨nį hɛɓɛ́ hu-ee? 37 Nąąlɔwai ɓə Yai-Laa ə gɔwɔ tɔɔ la yɛ, Aramə tɔɔmun Resin tɔɔ la a kɔ́ Remaliahu lon Peka ɓa Ɉuda lɔi hu. 38 Yotamə ə laa nąnni kwɛlɛ, di bowa loo nąnni kámą hu Davidə taa. Yotamə lon Akazə ə dɔɔlaa həɠə, ə hee a nąn mąąhvalin. |